3.5 Star (Good) · Drama · English · USA

206. BEASTS OF THE SOUTHERN WILD (USA/DRAMA/2012)

🔸”വെള്ളത്തിനപ്പുറം കാണുന്ന നഗരത്തിലെ ആൾക്കാരുടെ വിചാരം നമ്മുടെ ജീവിതം വളരെ കഷ്ടപ്പാട് നിറഞ്ഞതാണെന്നാണ്. പക്ഷേ അവർക്കറിയില്ലല്ലോ അവരെക്കാൾ ജീവിതം ആസ്വദിക്കുന്നത് നമ്മൾ ബാത്ത്ടബിൽ താമസിക്കുന്നവരാണെന്ന്. അവർക്ക് വർഷത്തിലൊരിക്കലേ ഉള്ളൂ അവധിയും ആഘോഷങ്ങളും. നമുക്ക് എന്നും അവധിയും ആഘോഷങ്ങളും തന്നെ. പക്ഷേ എല്ലാം ദൂരെ മഞ്ഞ് മലകൾക്കുള്ളിൽ ഉറങ്ങിക്കിടക്കുന്ന ഭീകരജീവികളായ ഔറോക്കുകൾ ഉണരുന്നത് വരെ മാത്രം. മഞ്ഞ് പാളികൾ തകർന്നാൽ അവ ഉണരും. ഉണർന്നാൽ നമ്മുടെ വീടുകളും ഈ ബാത്ത് ടബ് തന്നെയും അവ തകർത്ത് കളയും!”

🔸ചിത്രം : BEASTS OF THE SOUTHERN WILD (2012)
🔸 രാജ്യം : യുഎസ്എ

🔸 വെള്ളത്താൽ ചുറ്റപ്പെട്ട ദ്വീപ് പോലെ തോന്നുന്ന ആ പ്രദേശത്തിന് അവിടെ താമസിക്കുന്നവർ വിളിക്കുന്ന ഓമനപ്പേര് ബാത്ത് ടബ് എന്നാണ്. ബാത്ത് ടബിൽ ആണ് ആറ് വയസ്സുകാരിയായ ഹഷ് പപ്പിയും അച്ഛൻ വിങ്കും താമസിക്കുന്നത്. കനത്ത മഴയിലും കാറ്റിലും വീടും സ്ഥലവും വളർത്തു മൃഗങ്ങളും എല്ലാം നഷ്ടപ്പെട്ടിട്ടും വിങ്കും ഹഷ് പപ്പിയും കുറച്ച് സുഹൃത്തുക്കളും ബാത്ത് ടബിൽ തന്നെ ജീവിതം ജീവിച്ച് തീർക്കാൻ തീരുമാനിക്കുന്നു. അവരുടെ ജീവിതത്തിന്റെ ഓരോ ഉയർച്ചതാഴ്ചകളും ഹഷ് പപ്പിയുടെ വാക്കുകളിലൂടെ തന്നെ പ്രേക്ഷകർക്ക് മുന്നിൽ ഇതൾ വിരിയുന്നു.

🔸മികച്ച നടി, മികച്ച ചിത്രം എന്നിവ അടക്കം നാല് ഓസ്കാർ നോമിനേഷനുകൾ ലഭിച്ച ഈ ചിത്രം കാണുന്ന ആരുടെ മനസ്സിലും നിറഞ്ഞ് നില്ക്കുന്ന കഥാപാത്രമാണ് ഹഷ് പപ്പി എന്ന ആറ് വയസ്സുകാരി. മനോഹരമായ ആ കഥാപാത്രാവിഷ്കരണത്തിലൂടെ ക്യുവൻസാലെ വാലിസ് മികച്ച നടിക്കുള്ള ഓസ്കാർ നോമിനേഷൻ ലഭിച്ച ഏറ്റവും പ്രായം കുറഞ്ഞ നടിയെന്നുള്ള ബഹുമതിയും സ്വന്തമാക്കി. ഒരു കൊച്ച് കുട്ടിയുടെ മനസ്സിലൂടെ സഞ്ചരിക്കുന്ന ചിത്രത്തിൽ യാഥാർത്ഥ്യവും ഫാന്റസിയും തമ്മിൽ ഇഴചേർത്തിരിക്കുന്നത് കണ്ടറിയേണ്ടതാണ്. ഹഷ് പപ്പിയും വിങ്കും അവരുടെ സ്വന്തം ബാത്ത് ടബും മനസ്സ് നിറച്ച അനുഭവം നിങ്ങൾക്ക് സമ്മാനിക്കുമെന്നുറപ്പാണ്.

🔸റേറ്റിംഗ് : 3.5/5

🔸More Movie Reviews @ http://www.amazingcinemareviews.wordpress.com

©️ PRADEEP V K

Advertisements
3.5 Star (Good) · Drama · India · Malayalam · Period

205. KAMMARA SAMBHAVAM (INDIA/PERIOD DRAMA/2018)

🔸പാഠപുസ്തകങ്ങളിലൂടെ നാം മനസ്സിലാക്കിയിട്ടുള്ള ചരിത്രം യഥാർത്ഥത്തിൽ ആരാണ് എഴുതിയത്? ചരിത്രത്തിന്റെ ഭാഗമായതിനാൽ സത്യം എന്ന് നാം വിശ്വസിക്കുന്ന സംഭവങ്ങൾ യഥാർത്ഥത്തിൽ അങ്ങനെ തന്നെയായിരുന്നോ? മനസ്സിൽ വജ്രലിപികളാൽ കോറിയിടപ്പെട്ട വിഗ്രഹങ്ങൾ യഥാർത്ഥത്തിൽ അങ്ങനെയുള്ളവരായിരുന്നോ? ചരിത്രം നായകനായി വാഴ്ത്തിയവർ യഥാർത്ഥത്തിൽ വില്ലൻമാരും വില്ലൻമാരായി വാഴ്ത്തിയവർ യഥാർത്ഥത്തിൽ നായകൻമാരുമായിരുന്നോ? ഇത്തരം നിരവധി ചോദ്യങ്ങൾക്കുള്ള ഉത്തരം തേടാനാണ് കമ്മാരസംഭവം എന്ന മലയാള ചിത്രം ശ്രമിക്കുന്നത്.

🔸ചിത്രം : കമ്മാരസംഭവം (2018)
🔸 സംവിധാനം : രതീഷ് അമ്പാട്ട്

🔸 രണ്ടാം ലോക മഹായുദ്ധകാലത്ത് ഇന്ത്യയുടെ സ്വാതന്ത്ര്യത്തിന് വേണ്ടി സുഭാഷ് ചന്ദ്ര ബോസിന്റെ കീഴിൽ പ്രവർത്തിച്ചു എന്ന് ചരിത്രം രേഖപ്പെടുത്തിയ കമ്മാരൻ നമ്പ്യാരുടെ യഥാർത്ഥ ജീവിത കഥയാണ് ചിത്രത്തിന്റെ ആദ്യഭാഗം പറയുന്നത്.കമ്മാരന്റെ ജീവിതം രേഖപ്പെടുത്തിയ ഒരു ഇംഗ്ലീഷ് പുസ്തകത്തെ ആധാരമാക്കി നിർമ്മിച്ച സിനിമയാണ് ചിത്രത്തിന്റെ രണ്ടാം ഭാഗം. സിനിമയിലെ കമ്മാരൻ ധീരനും നന്മ നിറഞ്ഞവനും ദേശാഭിമാനിയുമൊക്കെ ആണെങ്കിലും അതൊന്നുമായിരുന്നില്ല യഥാർത്ഥ കമ്മാരൻ എന്ന് പ്രേക്ഷകരെ ആദ്യഭാഗം ബോധ്യപ്പെടുത്തുന്നുണ്ട്. വളരെ റിയലിസ്റ്റിക്കായ ആദ്യ ഭാഗത്തിന്റെ സ്പൂഫ് ആണ് അങ്ങേയറ്റം സിനിമാറ്റിക് ആയ രണ്ടാം ഭാഗം. അതു കൊണ്ട് തന്നെ ചിരിക്കാനുള്ള വക രണ്ടാം ഭാഗത്തിൽ അവശ്യത്തിനുണ്ട്.

🔸 ദിലീപ് എന്ന നടന്റെ ഏറ്റവും മികച്ച കഥാപാത്രമാണ് ആദ്യഭാഗത്തിലെ കമ്മാരൻ നമ്പ്യാർ. ഉള്ളിൽ ഒരു കടൽ നിറയെ പ്രതികാരവും ചിരിക്കുന്ന നിഷ്കളങ്കമായ മുഖവുമുള്ള കമ്മാരനായി അദ്ദേഹത്തിന്റെ പ്രകടനം ഗംഭീരമായി. ഗാന്ധിജിയും നെഹ്റുവും നേതാജിയും അടക്കം മൺമറഞ്ഞ നിരവധി നേതാക്കൾ കഥാപാത്രങ്ങളായി വരുന്ന രണ്ടാം ഭാഗം യാഥാർത്ഥ്യം മനസ്സിലാക്കിയ പ്രേക്ഷകന് ചിരിയായി മാറുന്നത് സ്വാഭാവികം മാത്രം. മുരളി ഗോപിയുടെ ശക്തമായ തിരക്കഥയാണ് ചിത്രത്തിന്റെ നെടും തൂണ് . എന്നാൽ അതേ സമയം അതേ തിരക്കഥ തന്നെയാണ് പ്രേക്ഷകനെ സിനിമയിൽ നിന്ന് കുറച്ചെങ്കിലും അകറ്റുന്നത് എന്നത് ഒരു വൈരുദ്ധ്യമാകാം. കെട്ടുപിണഞ്ഞ കഥയും കഥാപശ്ചാത്തലവും നിറഞ്ഞ ചിത്രം മൂന്ന് മണിക്കൂറിലധികം ദൈർഘ്യമുള്ളതായത് ഒരു പോരായ്മയായി. എഡിറ്റിംഗിൽ കുറച്ച് കൂടി ശ്രദ്ധിച്ചിരുന്നെങ്കിൽ കൂടുതൽ നന്നാക്കാമായിരുന്നു. ആദ്യഭാഗം ഏകദേശം പൂർണതയുള്ള ഒരു കഥയായതുകൊണ്ട് രണ്ടാം ഭാഗം കാണാൻ സ്വഭാവികമായും സാധാരണ പ്രേക്ഷകന് താല്പര്യം കുറഞ്ഞതും ക്ലൈമാക്സിലേക്കെത്തുമ്പോൾ എങ്ങനെയും തീർന്നാൽ മതിയെന്ന അവസ്ഥ അവരിൽ സൃഷ്ടിക്കുകയും ചെയ്തു.

🔸 എന്നാൽ എന്നിലെ പ്രേക്ഷകനെ സംബന്ധിച്ച് വളരെ മികച്ച ഒരനുഭവമായിരുന്നു കമ്മാരസംഭവം. ടെക്നിക്കലി വളരെ സൗണ്ട് ആയ ചിത്രത്തിലെ വിഎഫ് എക്സ് വർക്കുകൾ എല്ലാം മികച്ചതായി. ഗോപി സുന്ദറിന്റെ പശ്ചാത്തല സംഗീതവും സുനിലിന്റെ ക്യാമറയും നല്ല നിലവാരം പുലർത്തി. ആദ്യഭാഗമാണ് എനിക്കും കൂടുതൽ ഇഷ്ടമായത് എന്നതിൽ സംശയമില്ല. എങ്കിലും ചിത്രം പറയാനുദ്ദേശിക്കുന്ന വിഷയം പൂർണമാവാൻ രണ്ടാം ഭാഗം കൂടിയേ തീരൂ. പലപ്പോഴും ചരിത്രം യഥാർത്ഥത്തിൽ ഈ ചിത്രത്തിൽ കാണിക്കുന്നത് പോലെ ഒരു സ്പൂഫ് മാത്രമാണെന്ന വലിയ സത്യം പറഞ്ഞ് വയ്ക്കാൻ മുരളി ഗോപിക്ക് കഴിഞ്ഞിട്ടുണ്ട്. ഈ ചിത്രം നിങ്ങൾക്ക് ഇഷ്ടപ്പെടാം ഇഷ്ടപ്പെടാതിരിക്കാം .പക്ഷേ മലയാള സിനിമയിൽ കമ്മാരസംഭവം ഒരു സംഭവം തന്നെയാണെന്ന കാര്യത്തിൽ സംശയമില്ല.

🔸More Movie Reviews @ http://www.amazingcinemareviews.wordpress.com

©️ PRADEEP V K

3.0 Star (Above Average) · Canada · French · Horror · Zombie

204. THE RAVENOUS (CANADA/ZOMBIE HORROR/2017)

🔸ഹോളിവുഡിൽ സാധാരണമായ സോംബി ജനറിലുള്ള ചിത്രങ്ങൾ മറ്റ് ഭാഷകളിലും ഇപ്പോൾ സജീവമാണ്. എങ്കിലും പൊതുവെ എല്ലാ ചിത്രങ്ങളുടേയും കഥയും പശ്ചാത്തലവും ഏകദേശം ഒരു പോലെ തന്നെയാവും. ജനങ്ങൾ തിങ്ങിപ്പാർക്കുന്ന ഒരു പ്രദേശത്ത് പെട്ടെന്ന് ഒരു വൈറസ് പടർന്ന് പിടിച്ച് ജനങ്ങളെല്ലാം നരഭോജികളായ ഭീകര സത്വങ്ങളായി മാറുന്നതും അവരിൽ നിന്ന് രക്ഷപ്പെടാൻ ചിലർ നടത്തുന്ന ശ്രമങ്ങളും ആവും സാധാരണ സോംബി ചിത്രങ്ങളുടെ ഇതിവൃത്തം. അതിൽ നിന്നും കുറെ വ്യത്യസ്തമായി വൈകാരികമായി സോംബി ചിത്രങ്ങളെ സമീപിച്ച ട്രെയിൻ ടു ബുസാൻ, ഐ ആം എ ഹീറോ, മാഗി , വാം ബോഡീസ് തുടങ്ങിയ ചിത്രങ്ങൾ സോംബി ചിത്രങ്ങൾക്ക് പുതിയ മാനങ്ങൾ നല്കുകയും ചെയ്തു. അത്തരം സോംബി ചിത്രങ്ങളുടെ നിരയിലേക്ക് ഒരു കനേഡിയൻ ചിത്രം കൂടി എത്തുകയാണ്.

🔸ചിത്രം : THE RAVENOUS (2017)
🔸രാജ്യം : കാനഡ
🔸ഭാഷ : ഫ്രഞ്ച്
🔸ജനർ : സോംബി ഹൊറർ

🔸കാനഡയിലെ ക്യൂബകിലെ ഉൾനാടൻ ഗ്രാമങ്ങളിൽ പടർന്നു പിടിച്ച സോംബി വൈറസ് മൂലം ജനങ്ങളെല്ലാം സോംബികളായി മാറിക്കൊണ്ടിരിക്കുന്നു. അതിൽ നിന്നും രക്ഷപ്പെട്ട വിരലിലെണ്ണാവുന്ന കുറച്ച് പേർ സോംബികളിൽ നിന്ന് രക്ഷപെടാൻ വനത്തിനുള്ളിലൂടെ യാത്ര തിരിക്കുന്നു. തങ്ങളുടെ പ്രിയപ്പെട്ടവരെ ഈ രോഗബാധ മൂലം നഷ്ടപ്പെട്ടവരാണ് അവരെല്ലാവരും. കാടിനുള്ളിലേക്ക് ചേക്കേറിയ സോംബികൾ ഭക്ഷണം അന്വേഷിച്ച് തിരിച്ച് നാട്ടിലേക്ക് പ്രവേശിക്കുന്നതോടെ ബാക്കിയുള്ളവരുടെ ഒളിയിടങ്ങൾ ഓരോന്നായി നഷ്ടമാകുന്നു.

🔸ജീവനുവേണ്ടി ഓരോരുത്തരും നെട്ടോട്ടമോടുന്ന ആ അവസരത്തിൽ മനുഷ്യന്റെ സ്വാഭാവികമായ അതിജീവനത്വരയോടൊപ്പം സഹജീവികളോടുള്ള സഹാനുഭൂതിയും ത്യാഗവും എല്ലാം പരീക്ഷിക്കപ്പെടുന്നു. അഭിനേതാക്കളുടെ ഓരോരുത്തരുടേയും മികച്ച പെർഫോർമൻസും ചിത്രം മുഴുവൻ നിറഞ്ഞ് നില്ക്കുന്ന നിഗൂഡതയും പ്രേക്ഷകനെ പിടിച്ചിരുത്താൻ പര്യാപ്തമാണ്. കാടിനുള്ളിലെ ലൊക്കേഷനുകൾ പിരിമുറുക്കവും ഭയവും സൃഷ്ടിക്കുമെന്നുറപ്പാണ്. സോംബി ചിത്രങ്ങൾ ഇഷ്ടപ്പെടുന്നവർക്ക് ധൈര്യമായി കാണാവുന്ന ചിത്രമാണിത്.

🔸റേറ്റിംഗ് : 3/5

🔸More Movie Reviews @ http://www.amazingcinemareviews.wordpress.com

©️ PRADEEP V K

4.0 Star (Very Good) · Biography · English · USA

203. I, TONYA (USA/BIOGRAPHY/2017)

#Oscar2018MovieReviews
Post No. 15

🔸പ്രശസ്ത അമേരിക്കൻ ഫിഗർ സ്കേറ്റർ ആയിരുന്ന ടോണ്യ ഹാർഡിങ്ങിന്റെ ജീവിതം ആധാരമാക്കി ക്രേഗ് ഗില്ലെസ്പീ സംവിധാനം ചെയ്ത ഇംഗ്ലീഷ് ഭാഷാ ചിത്രമാണ് ഐ, ടോണ്യ. അലിസൺ ജാനി ഈ ചിത്രത്തിലെ അഭിനയത്തിന് മികച്ച സഹനടിക്കുള്ള 2018 ലെ ഓസ്കാർ സ്വന്തമാക്കി.മോക്ക്യുമെൻററി രീതിയോടൊപ്പം കഥാപാത്രങ്ങൾ പ്രേക്ഷകനോട് നേരിട്ട് സംവദിക്കുന്ന രീതിയും ചിത്രത്തിൽ വിദഗ്ദ്ധമായി ഉപയോഗിച്ചിരിക്കുന്നു.

🔸ചിത്രം : ഐ, ടോണ്യ I, TONYA (2017)
🔸രാജ്യം : യു എസ് എ
🔸ഓസ്കാർ അവാർഡുകൾ : മികച്ച സപ്പോർട്ടിംഗ് ആക്ട്രസ്സ്

🔸 മൂന്ന് വയസ്സ് പ്രായമുള്ളപ്പോൾ തന്നെ ഐസ് സ്കേറ്റിംഗ് അഭ്യസിച്ച് തുടങ്ങിയ ടോണ്യ തന്റെ ജീവിതം തന്നെ അതിന് വേണ്ടി ഉഴിഞ്ഞ് വച്ചു. കർക്കശ സ്വഭാവക്കാരിയായ അമ്മ മകളോട് യാതൊരു വിധ സ്നേഹ പരിളാളനകളും കാണിക്കാതെ കഠിന പരിശീലനത്തിന് അവളെ നിർബന്ധിതയാക്കി. സ്കേറ്റിംഗിന് വേണ്ടി മകളുടെ വിദ്യാഭ്യാസം പോലും ഒഴിവാക്കാൻ ആ അമ്മയ്ക്ക് രണ്ടാമതൊന്ന് ആലോചിക്കേണ്ടിയിരുന്നില്ല. സ്കേറ്റിംഗിൽ രണ്ട് ട്രിപ്പിൾ ആക്സൽ ജമ്പുകൾ ചെയ്ത ആദ്യ അമേരിക്കക്കാരിയെന്ന ബഹുമതി നേടിയെങ്കിലും ഒളിംബിക്സിൽ ആ വിജയം നിലനിർത്താൻ അവർക്കായില്ല. പിന്നീട് അവരുടെ പ്രധാന എതിരാളി ആയിരുന്ന നാൻസി കെരിഗലിനെ അപായപ്പെടുത്താൻ ശ്രമിച്ചു എന്ന ആരോപണം അവരുടെ സകേറ്റിംഗ് കരിയറിന് തന്നെ വെല്ലുവിളിയായി.

🔸ജീവിതത്തിൽ വിജയങ്ങളെക്കാളും കൂടുതൽ പരാജയങ്ങളും വിമർശനങ്ങളും ഏറ്റുവാങ്ങേണ്ടി വന്ന വ്യക്തിയാണ് ടോണ്യ ഹാർഡിങ്ങ്. അവർക്കെതിരെയുള്ള ആരോപണങ്ങളിൽ പലതിനും കഴമ്പുണ്ട് താനും. സിനിമയിൽ ഏവർക്കും അറിയാവുന്ന യഥാർത്ഥ സംഭവങ്ങളെ ഒരു മോക്കുമെന്ററി സ്റ്റൈലിൽ അവതരിപ്പിച്ചതോടൊപ്പം ടോണ്യയുടെ ഭാഗവും വ്യക്തമാക്കിയിട്ടുണ്ട്. അത് കൊണ്ട് തന്നെ യഥാർത്ഥ ടോണ്യ ഹാർഡിങ്ങ് ചിത്രത്തെക്കുറിച്ച് നല്ല അഭിപ്രായം തന്നെയാണ് പ്രകടിപ്പിച്ചത്. മാർഗട്ട് റോബി നായികാ വേഷത്തിൽ തകർത്തഭിനയിച്ച ഐ, ടോണ്യ എന്ന ചിത്രം കണ്ട് കഴിയുമ്പോൾ പ്രേക്ഷകന് ടോണ്യ ഹാർഡിങ്ങ് എന്ന വ്യക്തിയോട് സമ്മിശ്രമായ വികാരങ്ങളാവും ഉണ്ടാവുക.

🔸ടോണ്യയെ അവരുടെ എല്ലാ ഗുണദോഷങ്ങളും സഹിതം ചിത്രത്തിൽ കാണിക്കുന്ന സംവിധായകൻ അവരെ നന്മയുടെ അവതാരമാക്കാനോ യാഥാർത്ഥ്യങ്ങളെ മൂടിവയ്ക്കാനോ ഒരിടത്തും ശ്രമിച്ചിട്ടില്ല എന്നതാണ് ഏറ്റവും ശ്രദ്ദേയമായ കാര്യം. ബയോഗ്രാഫിക്കൽ ചിത്രങ്ങൾ ഒരുക്കുന്ന നമ്മുടെ നാട്ടിലെ സംവിധായകർ ഇത്തരം ചിത്രങ്ങൾ കണ്ട് പഠിക്കണം എന്നാണ് എന്റെ അഭിപ്രായം. ചിത്രത്തിലെ ഐസ് സ്കേറ്റിംഗ് രംഗങ്ങൾ യഥാർത്ഥ സ്കേറ്റിംഗ് താരങ്ങളുടെ സഹായത്തോടെ അതി ഗംഭീരമായാണ് ചിത്രീകരിച്ചിരിക്കുന്നത്. ഗ്ലാമർ വേഷങ്ങളിലൂടെ ശ്രദ്ദേയയായ മാർഗട്ട് റോബി ഈ ചിത്രത്തിലെ അഭിനയത്തിന് ഓസ്കാർ നോമിനേഷൻ നേടിയിരുന്നു. ടോണ്യയുടെ അമ്മയുടെ വേഷത്തിലെത്തി ഓസ്കാർ സ്വന്തമാക്കിയ അലിസൺ ജാനിയുടെ പ്രകടനം ഓസ്കാറിൽ എല്ലാവരും ഒരുപോലെ അംഗീകരിച്ച ചുരുക്കം അവാർഡുകളിൽ ഒന്നായിരുന്നു.

🔸റേറ്റിംഗ് : 4/5

©️ PRADEEP V K

Uncategorized

202. അപാരതയുടെ പൂമരം

#സിനിമVsസിനിമ
Post No.1

🔰അപാരതയുടെ പൂമരം🔰

🔸സിനിമ ഏറ്റവും ജനകീയമായ വിനോദോപാദി എന്ന നിലയിൽ മാത്രമല്ല പ്രേക്ഷകരുടെ മനസ്സിലേക്ക് പെട്ടെന്ന് ചിന്തകളുടെ കൂമ്പാരം നിറയ്ക്കാൻ കഴിവുള്ള മാധ്യമമെന്ന നിലയിലും പ്രസക്തമാണ്. നമുക്ക് നേരിട്ടറിയാത്ത എന്തിനെക്കുറിച്ചും ഒരു മുൻധാരണ സൃഷ്ടിക്കാൻ സിനിമയ്ക്ക് കഴിയും എന്നത് വാസ്തവമാണ്. അത്തരം മുൻധാരണകൾ ചിലപ്പോൾ ശരിയും മറ്റ് ചിലപ്പോൾ പൂർണമായും തെറ്റും ആകാം. അതിന് സിനിമയെ കുറ്റപ്പെടുത്താനുമാകില്ല. കാരണം സിനിമ സംവേദനം ചെയ്യുന്ന കാര്യങ്ങൾ യാഥാർത്ഥ്യമാകണമെന്ന് ഒരിക്കലും നിർബന്ധിക്കാനാകില്ല. യാഥാർത്ഥ്യവും ഫാന്റസിയും നോയറും എല്ലാമടങ്ങിയതാവും സിനിമ. നമ്മുടേതല്ലാത്ത മറ്റൊരു ലോകത്ത് നടക്കുന്നതോ നമുക്ക് ഒട്ടും പരിചിതമല്ലാത്ത മറ്റൊരു കാലഘട്ടത്തിൽ സംഭവിക്കുന്നതോ അല്ലെങ്കിൽ ലോകത്തിന്റെ മറ്റേതെങ്കിലും ഒരു സ്ഥലത്ത് നടക്കുന്നതോ ആയ ഒരു കഥ ചിത്രീകരിക്കുമ്പോൾ സംവിധായകന് തനിക്കിഷ്ടമുള്ള രീതിയിൽ സിനിമയെ മുന്നോട്ട് കൊണ്ട് പോകാനാവും. എന്നാൽ നമുക്ക് പരിചിതമായ ഒരു സ്ഥലവും പശ്ചാത്തലവും സിനിമയിൽ ചിത്രീകരിക്കുമ്പോൾ സംവിധായകൻ വളരെയധികം ജാഗ്രത്താവേണ്ടതുണ്ട് .
ഈ ഒരു പശ്ചാത്തലത്തിൽ അടുത്തിടെ മലയാളത്തിലിറങ്ങിയ രണ്ട് ക്യാമ്പസ് ചിത്രങ്ങൾ നമുക്ക് ഒന്ന് അവലോകനം ചെയ്യാം.

🔸ചിത്രം 1 : ഒരു മെക്സിക്കൻ അപാരത (2017)

🔸സമര ചരിത്രങ്ങൾ ധാരാളം പറയാനുള്ള എറണാകുളത്തെ പ്രശസ്തമായ ഒരു കോളേജിൽ നടക്കുന്ന രണ്ട് പാർട്ടിയിലെ വിദ്യാർത്ഥികൾ തമ്മിലുള്ള സംഘർഷങ്ങളും അവസാനം വർഷങ്ങളായി ഭൂരിപക്ഷമുള്ള പാർട്ടിയിൽ നിന്നും എതിർ പാർട്ടി ശക്തമായ പോരാട്ടത്തിലൂടെ അധികാരം പിടിച്ചെടുക്കുന്നതുമാണ് ചിത്രത്തിന്റെ പ്രതിപാദ്യ വിഷയം. ഇത്രയും പറഞ്ഞപ്പോൾ തന്നെ കോളേജിന്റെയും പാർട്ടികളുടേയും പേര് എല്ലാവരും മനസ്സിലാക്കുമെന്ന് ഉറപ്പാണ്. സിനിമയിൽ വന്നപ്പോൾ മഹാരാജാസ് കോളേജ്, മഹാരാജാ കോളേജായും എസ് എഫ് ഐ, എസ് എഫ് വൈ ആയും കെ എസ് യു, കെ എസ് ക്യു ആയും മാറി എന്നതാണ് ആകെ വ്യത്യാസം. ഏത് പാർട്ടി ആയാലും ഒരു കാര്യത്തിൽ മാത്രം സാമ്യമുണ്ട്. ഒരു വിദ്യാർത്ഥി പോലും അധ്യാപകർക്ക് എന്തെങ്കിലും വില കൊടുക്കുന്നത് കണ്ടതേയില്ല. ആരെ എന്ത് ചെയ്തിട്ടായാലും സ്വന്തം പാർട്ടി ഇലക്ഷനിൽ ജയിക്കണം എന്നത് മാത്രമാണ് എല്ലാവരുടേയും ചിന്ത. അവരുടെ മനസ്സ് പോലെ തന്നെ ചതിയും വഞ്ചനയും നിറഞ്ഞ കിടമത്സരങ്ങളിലൂടെയും ആരുടേയൊക്കെയോ വിജയപരാജയങ്ങളിലൂടെയും ചിത്രം അവസാനിക്കുന്നു.

🔸ചിത്രം 2 : പൂമരം (2018)

🔸പൂമരത്തിന്റെ കഥ നടക്കുന്നത് മഹാത്മാഗാന്ധി സർവകലാശാല യുവജനോത്സവ വേദികളിലാണ്. കൂടുതൽ പോയിൻറ് നേടുന്നതിന് വേണ്ടി മുൻ വർഷത്തെ ജേതാക്കളായ സെൻറ് തെരേസാസ് കോളേജും മഹാരാജാസ് കോളേജും തമ്മിലുള്ള കലാമത്സര പോരാട്ടങ്ങളാണ് ചിത്രത്തിന്റെ പ്രതിപാദ്യ വിഷയം. സാധാരണ ക്യാമ്പസുകളിൽ കാണുന്നത് പോലെ ജീവിതത്തെക്കുറിച്ച് വ്യക്തമായ ധാരണയുള്ളവരും അല്ലാത്തവരുമായ വിദ്യാർത്ഥി വിദ്യാർത്ഥിനികളെ നമുക്ക് ചിത്രത്തിൽ കാണാം. കലയെ സ്നേഹിക്കുന്നതോടൊപ്പം അധ്യാപകരെ ബഹുമാനിക്കാനും അവർക്കറിയാം. മനോഹരമായ ഒരു കവിത പോലെ ഹൃദയത്തെ തൊട്ടുരുമ്മി ഏവരുടേയും കണ്ണ് തുറപ്പിക്കുന്ന ഒരു ക്ലൈമാക്സിലൂടെയാണ് ചിത്രം അവസാനിക്കുന്നത്.

🔸അപാരതയോ പൂമരമോ?

🔸ഒരു മെക്സിക്കൻ അപാരതയും പൂമരവുമായി കഥയിലോ ട്രീറ്റ് മെൻറിലോ ടാർജറ്റഡ് ഓഡിയൻസിലോ യാതൊരു ബന്ധവുമില്ല. എന്റെ വ്യക്തിപരമായ അഭിപ്രായത്തിൽ ഒരു സിനിമയുടെ മൂല്യം ഞാനളക്കുന്നത് അത് കണ്ട് കഴിയുമ്പോൾ മനസ്സിന് ലഭിക്കുന്ന ഫീൽ കൊണ്ടാണ്. അത് ഓരോ ചിത്രങ്ങൾക്കും വ്യത്യസ്തമായിരിക്കും. ഒരു സിനിമയുടെ യഥാർത്ഥ വിജയം നിർണയിക്കപ്പെടുന്നത് സംവിധായകൻ ആ സിനിമ കൊണ്ട് ഉദ്ദേശിക്കുന്ന അതേ ഫീൽ ചിത്രം കണ്ട് കഴിയുന്ന പ്രേക്ഷകനും ലഭിക്കുമ്പോഴാണ്. പൂമരം എന്ന ചിത്രം യുവജനോത്സവങ്ങളിൽ പങ്കെടുത്തിട്ടുള്ളവരായാലും അല്ലെങ്കിലും ഏതൊരു വ്യക്തിയുടേയും കലാലയ സ്മരണകൾ ഉണർത്താൻ പോന്നതാണ്. അത് തന്നെയാണ് ചിത്രത്തിന്റെ വിജയവും. ചിത്രം കണ്ട് കഴിഞ്ഞപ്പോൾ മഹാരാജാസ് പോലുള്ളൊരു കോളേജിൽ പഠിക്കാൻ കഴിയാത്തതിന്റെ വ്യസനവുമായാണ് തിയേറ്റർ വിട്ടിറങ്ങിയത്. അതേ സമയം ഒരു മെക്സിക്കൻ അപാരത കണ്ട് കഴിഞ്ഞപ്പോൾ മഹാരാജ പോലൊരു കോളേജിൽ അബദ്ധത്തിൽ പോലും കയറിനിട വരരുതേ എന്ന പ്രാർത്ഥനയാണ് മനസ്സിലുണ്ടായത്.

🔸കലാലയം എന്നാൽ കലകളുടെ ആലയം എന്നാണ് വിവക്ഷിക്കുന്നത്. ഒരു ആർട്സ് കോളേജിനെ കലാലയം എന്ന് വിളിക്കുന്നത് ആ ഒരർത്ഥത്തിൽ കൂടിയാണെന്ന് ഒ മെ അ യുടെ സംവിധായകൻ മറന്ന് പോയി. ഒ മെ അ യിലും യുവജനോത്സവം ഉണ്ടെന്ന കാര്യം വിസ്മരിക്കുന്നില്ല. പക്ഷേ അത് രണ്ട് യൂണിയൻകാർക്ക് സ്വന്തം ശക്തി തെളിയിക്കാൻ വേണ്ടി മാത്രമുള്ള വെറും കെട്ടുകാഴ്ചകൾ മാത്രമായിരുന്നു. ഒ മെ അ യിൽ കണ്ടത് പോലെ നിലവാരമില്ലാതെ ഒരു കോളേജ് ചിത്രീകരണം മറ്റൊരു ചിത്രത്തിലും ഞാൻ കണ്ടിട്ടില്ല. ഒ മെ അ യെപ്പോലെ പൂമരം ചിലപ്പോൾ ശ്രദ്ധിക്കപ്പെട്ടില്ലായിരിക്കാം. പക്ഷേ മലയാളത്തിലെ ഏറ്റവും മികച്ച കലാലയ ചിത്രങ്ങളിൽ മുൻപന്തിയിൽ പൂമരം പൂത്തുലഞ്ഞ് നില്ക്കും എന്നുറപ്പാണ്.

©️ PRADEEP V K

Uncategorized

201. സാലോയും ധർമ്മപുരാണവും: ഒരു താരതമ്യ പഠനം

#CinemaVsLiterature
Post No. 1

🔸സാലോയും ധർമ്മപുരാണവും : ഒരു താരതമ്യ പഠനം🔸

🔰ഓരോ രാജ്യങ്ങൾക്കും അവർ ഒരിക്കലും ഓർക്കാനാഗ്രഹിക്കാത്ത ഇരുണ്ട ഭൂതകാലങ്ങളുണ്ട്. ജർമനിയിലെ നാസി ഭരണകാലമായാലും ഇന്ത്യയിലെ അടിയന്തരാവസ്ഥയായാലും ക്രൂരമായ മനുഷ്യാവകാശ ധ്വംസനങ്ങളാണ് അക്കാലത്ത് നടമാടിയത്. ആ കാലഘട്ടം പല ലോകരാജ്യങ്ങളിലെയും നിരവധി സിനിമകൾക്കും പുസ്തകങ്ങൾക്കും പ്രചോദനമായിട്ടുമുണ്ട്. അക്കൂട്ടത്തിൽ നിന്ന് പലതു കൊണ്ടും സാമ്യമുള്ള രണ്ട് പേരുകൾ ഞാനവതരിപ്പിക്കട്ടെ. ഒന്ന് 1975 ൽ റിലീസായ പിയർ പൗലോ പസ്സോളിനി സംവിധാനം ചെയ്ത ഇറ്റാലിയൻ ചിത്രം സാലോ ഓർ 120 ഡേയ്സ് ഓഫ് സോഡോം (SALO OR 120 DAYS OF SODOM ) യും മറ്റൊന്ന് അതേ കാലഘട്ടത്തിൽ തന്നെ എഴുതപ്പെട്ട ഒ.വി.വിജയൻ രചിച്ച മലയാളനോവൽ ധർമ്മപുരാണവുമാണ്.

🔰1943-45 കാലഘട്ടത്തിൽ ഇറ്റലിയിലെ ജർമൻ അധിനിവേശ കാലത്ത് ഫാസിസ്റ്റ് സ്റ്റേറ്റ് ആയിരുന്ന റിപ്പബ്ലിക് ഓഫ് സാലോയിൽ നാല് ഫാസിസ്റ്റുകൾ ചേർന്ന് പതിനെട്ട് ടീനേജേഴ്സിനെ പിടികൂടി ക്രൂരമായ ലൈംഗിക പീഡനങ്ങൾക്ക് വിധേയമാക്കുന്നതാണ് സാലോയുടെ ഇതിവൃത്തം. ദി 120 ഡേയ്സ് ഓഫ് സോഡോം എന്ന ഫ്രഞ്ച് നോവലിനെ ആധാരമാക്കിയ ഈ ചിത്രം നാല് ഭാഗങ്ങളായി വിഭജിച്ചിട്ടുണ്ട്. അങ്ങേയറ്റത്തെ സാഡിസവും ഫാസിസവും ടോർച്ചറും സെക്സും ക്രൂരമായ പീഡനങ്ങളും നിറഞ്ഞ ഈ ചിത്രം ഒറ്റയിരിപ്പിന് കണ്ട് തീർക്കാൻ ആരെകൊണ്ടും സാധിക്കില്ല എന്ന കാര്യം ഉറപ്പാണ്.

🔰1975 ൽ തന്നെ ഒ വി വിജയൻ ധർമ്മപുരാണം എഴുതിത്തീർത്തിരുന്നുവെങ്കിലും അടിയന്തരാവസ്ഥ പ്രഖ്യാപിക്കപ്പെട്ടത് മൂലം രണ്ട് വർഷത്തിന് ശേഷമാണ് മലയാളനാട് വാരികയിൽ പ്രസിദ്ധീകരണം ആരംഭിച്ചത്. അന്നേവരെ മലയാള നോവൽ സാഹിത്യം കണ്ടതിൽ നിന്നും വളരെയധികം വിഭിന്നമായിരുന്നു ധർമ്മപുരാണം. ഖസാക്കിന്റെ ഇതിഹാസത്തിന് ശേഷമിറങ്ങുന്ന ഒ വി വിജയന്റെ നോവൽ എന്ന നിലയിൽ ധർമ്മപുരാണം വായിക്കാൻ തുടങ്ങിയ വായനക്കാർ നോവലിലെ ആദ്യ വാചകം തന്നെ വായിച്ച് ഞെട്ടി . “ധർമപുരിയിലെ ശാന്തിഗ്രാമത്തിലെ പ്രജാപതിക്ക് തൂറാൻ മുട്ടി” ഇതായിരുന്നു ആ വാചകം. തുടർന്ന് വായിച്ചവർ തീട്ടം, ലിംഗം, യോനി, സംഭോഗം തുടങ്ങിയ വാക്കുകളുടെ അതിപ്രസരവും കേട്ടാലറയ്ക്കുന്ന മലം തീറ്റയുടെ കഥകളും വായിച്ച് അന്തിച്ചിരുന്നു.

🔰ധർമപുരി എന്ന രാജ്യത്തെ സ്വേച്ഛാപതിയായ പ്രജാപതി എന്ന വയസ്സന്റെ ക്രൂരമായ ലീലാവിലാസങ്ങളും അയാൾ കൊണ്ട് വന്ന അടിയന്തരാവസ്ഥ മൂലം ആ രാജ്യത്ത് നടമാടിയ ഭീകരമായ മനുഷ്യ പീഡനങ്ങളുടേയും വിവരണമാണ് പുസ്തകം പ്രമേയമാക്കിയിരിക്കുന്നത്. ധർമ്മപുരാണം എന്ന പേരിനെത്തന്നെ ക്രൂരമായ ഫലിതം എന്ന് വിളിക്കാം. പുരാണങ്ങളിലെ കഥാപാത്രങ്ങളുടെ പേരുകളാണ് നോവലിലെ മിക്ക കഥാപാത്രങ്ങൾക്കും നല്കിയിരിക്കുന്നത്. സിദ്ധാർത്ഥൻ, പരാശരൻ, ജരൽക്കാരു, ഹയവദനൻ, രുമണ്വാൻ എന്നിവ അവയിൽ ചിലത് മാത്രം. ധർമപുരിയിലെ ഭരണപക്ഷവും പ്രതിപക്ഷവും ഗവൺമെൻറും രാഷ്ട്രീയക്കാരും പട്ടാളവും ഉദ്യോഗസ്ഥരും മാധ്യമങ്ങളും എല്ലാം അഴിമതിയും സ്വജനപക്ഷപാതവും നടത്താൻ ഒറ്റക്കെട്ടാണ്. പ്രജാപതിയുടെ വിസർജ്യം പ്രസാദമായി കരുതി ഭക്ഷിക്കുന്നവരാണ് മേൽ പറഞ്ഞവരെല്ലാം. അയൽ രാജ്യങ്ങളായ താർത്താരി കുടിയരശും വെള്ള സംയുക്തനാടുകളും പ്രജാപതിയെ സഹായിക്കാനുണ്ട്. ജനങ്ങളുടെ കണ്ണിൽ പൊടിയിടാൻ പ്രതിസന്ധി(അടിയന്തരാവസ്ഥ) പ്രഖ്യാപിക്കപ്പെടുന്നതോടെ അരാജകത്വം കൊടികുത്തി വാഴുന്ന ധർമപുരിയിൽ രൂക്ഷമായ പട്ടിണിയോടൊപ്പം ശവരതിയും നരമാംസഭോജനവും അടക്കം കേട്ടാലറയ്ക്കുന്ന നിരവധി സംഭവങ്ങൾ അരങ്ങേറുന്നു. അതിനിടയിലേക്ക് നന്മയുടെ തിരിനാളവുമായി എത്തുന്ന സിദ്ധാർത്ഥൻ എന്ന പരദേശി രാജാവിന്റെ കണ്ണിലൂടെയാണ് നാം കാണുന്ന ധർമപുരി നോവലിസ്റ്റ് വരച്ചിടുന്നത്.

🔰സാലോ എന്ന സിനിമ കാണുന്നവർ ആദ്യം ചിന്തിച്ച് പോകുന്നത് ഇത്തരം ഒരു ചിത്രത്തിലൂടെ സംവിധായകൻ എന്താണ് പറയാനുദ്ദേശിക്കുന്നത് എന്നാണ്. അതേ ചോദ്യം തന്നെയാണ് ധർമപുരാണം വായിക്കുന്ന ഒരാളിനും ചോദിക്കാനുണ്ടാവുക. ഫാസിസത്തിന്റെയും സ്വേച്ഛാധിപത്യത്തിന്റെയും മറ്റൊരു വശം ക്രൂരമായ ലൈംഗികാതിക്രമങ്ങളായിരിക്കും എന്നത് വാസ്തവമാണ്. അത്തരത്തിൽ തങ്ങളുടെ ഭ്രാന്തമായ ലൈംഗിക ത്യഷ്ണകൾ പൂർത്തീകരിക്കാനും ഇരകളെ പീഡിപ്പിച്ച് ആനന്ദം കണ്ടെത്താനും ശ്രമിക്കുന്ന ഒരു കൂട്ടം ഫാസിസ്റ്റുകളുടെ കഥയാണ് സാലോയിൽ പറയുന്നത്. ഫാസിസത്തിനെതിരെ ഒരു കലാകാരന്റെ അതിതീവ്രമായ പ്രതികരണമായി ആ ചിത്രത്തെ കാണാം.

🔰മറുവശത്ത് ധർമപുരാണവും ഏതാണ്ട് അതേ ഉദ്ദേശ്യത്തോടെ തന്നെ എഴുതപ്പെട്ടതാണ്. ഹിറ്റ്ലറുടെ നാസി ഭരണവും ഇന്ത്യയിലെ അടിയന്തരാവസ്ഥയിലേക്ക് നയിച്ച അക്കാലത്തെ ഭരണസംവിധാനവും ഒരേ നാണയത്തിന്റെ വശങ്ങളാണെന്ന ഒ.വി. വിജയന്റെ തോന്നലുകളാവാം ഇത്തരം ഒരു പുസ്തകമെഴുതാൻ അദ്ദേഹത്തെ പ്രേരിപ്പിച്ചത്. എന്നാൽ പിന്നീട് ഇത്രയും കടുത്ത ഭാഷയിൽ എഴുതിപ്പോയതിൽ അദ്ദേഹം സ്വയം തിരുത്താൻ ശ്രമിച്ചതായും കാണാം. എന്തു തന്നെയായാലും ധർമപുരാണത്തിന് തുല്യം ധർമപുരാണം മാത്രമേയുള്ളൂ. വായനക്കാരിൽ ഇത്രയധികം വെറുപ്പും മാനസിക സമ്മർദ്ദവും സൃഷ്ടിക്കുമ്പോൾ തന്നെ അതിശക്തമായ കുറിക്ക് കൊള്ളുന്ന ഭാഷയിൽ വിമർശന ശരങ്ങൾ തൊടുത്ത് വിടാനും ധർമപുരാണത്തിന് കഴിഞ്ഞിട്ടുണ്ട്. എന്തായാലും സമൂഹത്തിൽ തങ്ങൾക്ക് ചുറ്റും അരങ്ങേറുന്ന മനുഷ്യാവകാശ ധ്വംസനങ്ങൾക്കെതിരെ തങ്ങളുടെ മാധ്യമത്തിലൂടെ അതേ നാണയത്തിൻ തന്നെയുള്ള ലോകത്തിന്റെ വ്യത്യസ്ത കോണുകളിലുള്ള രണ്ട് കലാകാരൻമാരുടെ പ്രതികരണങ്ങളായി സാലോ എന്ന സിനിമയേയും ധർമപുരാണം എന്ന നോവലിനെയും കാണാവുന്നതാണ്.

©️ PRADEEP V K

4.5 Star (Brilliant) · Adventure · Animation · English · Fantasy · USA

200. COCO (USA/ANIMATED FANTASY ADVENTURE/2017)

#Oscar2018MovieReviews
Post No. 14

🔰 “ഒരു വ്യക്തിയുടെ മരണം യഥാർത്ഥത്തിൽ എപ്പോഴാണ് സംഭവിക്കുന്നത്? ശരീരം നശിക്കുമ്പോൾ ആണോ? അല്ല… കാരണം ശരീരം നശിച്ചാലും ആ വ്യക്തിയെക്കുറിച്ചുള്ള ഓർമ്മകൾ അയാളുടെ പ്രിയപ്പെട്ടവരുടെ ഉള്ളിൽ ഉള്ളിടത്തോളം കാലം അയാൾ മറ്റുള്ളവരുടെ മനസ്സുകളിൽ ജീവിക്കുന്നു. എന്നാൽ പ്രിയപ്പെട്ടവരെല്ലാം അയാളെ മറന്നാലോ? അന്നാവും അയാളുടെ യഥാർത്ഥ മരണം സംഭവിക്കുന്നത്!”

🔰ചിത്രം : കോകോ COCO (2017)
രാജ്യം : യു എസ് എ
‎ഓസ്കാർ 2018 നോമിനേഷനുകൾ : മികച്ച അനിമേറ്റഡ് ഫീച്ചർ ചിത്രം, ഒറിജിനൽ സോങ്ങ്

🔰 തലമുറകൾക്ക് മുമ്പ് മെക്സിക്കോയിലെ ഒരു സംഗീതജ്ഞൻ തന്റെ സ്വപ്നങ്ങൾ യാഥാർത്ഥ്യമാക്കാൻ വേണ്ടി ഭാര്യയേയും മൂന്ന് വയസ്സുള്ള മകളെയും ഉപേക്ഷിച്ച് യാത്രയാവുന്നു. അതോടെ അയാളുടെ ഭാര്യ സംഗീതത്തെ വീടിന് പുറത്താക്കി ഷൂ ബിസിനസ് ആരംഭിക്കുന്നു. വളരെ പ്രശസ്തരായ ഷൂ മേക്കേഴ്സ് ആയ ആ ഫാമിലിയിലെ ഇപ്പോഴത്തെ സന്താനമാണ് പന്ത്രണ്ട്കാരനായ മിഖേൽ. എന്നാൽ ഷൂ നിർമ്മാണത്തേക്കാളുപരി ഒരു സംഗീതജ്ഞനാവണമെന്നായിരുന്നു മിഖേലിന്റെ ആഗ്രഹം. എന്നാൽ മരിച്ച് പോയവർ ജീവിച്ചിരിക്കുന്നവരെ കാണാനെത്തുമെന്ന് വിശ്വസിക്കുന്ന മരിച്ചവരുടെ ദിനത്തിൽ അബദ്ധത്തിൽ മിഖേൽ മരിച്ചവരുടെ ലോകത്തെത്തുന്നു. തന്റെ കുടുംബവുമായി ബന്ധപ്പെട്ട യഥാർത്ഥ രഹസ്യങ്ങൾ മനസ്സിലാക്കുന്ന മിഖേൽ തന്റെ സ്വപ്നമാണോ അതോ തന്റെ കുടുംബമാണോ വലുത് എന്ന ചിരപുരാതനമായ സ്വത്വ പ്രതിസന്ധിയിൽ അകപ്പെടുന്നു.

🔰 പിക്സർ അനിമേഷൻ സ്റ്റുഡിയോസും ഡിസ്നിയും ഒന്നിക്കുമ്പോഴൊക്കെ സംഭവിക്കുന്ന ചിത്രങ്ങളെല്ലാം ഒന്നിനൊന്ന് മികച്ചതാണ്. ടോയ് സ്റ്റോറി- 3 ,വാൾ-ഇ , അപ്, ഇൻസൈഡ് ഔട്ട് തുടങ്ങിയ ആ ലിസ്റ്റിലേക്ക് വന്ന പുതിയ അംഗമാണ് കോകോ. ഓസ്കാർ അവാർഡ് നേടിയ ടോയ്സ്റ്റോറി- 3 യുടെ സംവിധായകനായ ലീ അൺക്രിഷ് ആണ് കോകോ അണിയിച്ചൊരുക്കിയിരിക്കുന്നത്. അതി മനോഹരമായ അനിമേഷനും മനസ്സിനെ സ്പർശിക്കുന്ന കഥയും നല്ല ഗാനങ്ങളും ബിജിഎമ്മും എല്ലാം കൂടി പ്രേക്ഷകന് പൂർണ സംതൃപ്തി നല്കുന്ന ചിത്രമാണ് കോകോ. ഇത്തവണത്തെ മികച്ച അനിമേഷൻ ചിത്രത്തിനും മികച്ച ഒറിജിനൽ സോങ്ങിനുമുള്ള ഓസ്കാറിൽ ഏറ്റവും സാധ്യത കല്പിക്കുന്നതും ഈ ചിത്രത്തിനാണ്.
3D യിൽ തിയേറ്ററിൽ ഈ ചിത്രം കാണാൻ കഴിഞ്ഞവർ ഭാഗ്യവാൻമാർ എന്ന് മാത്രമേ പറയാനുള്ളു. ഗോൾഡൻ ഗ്ലോബ് അടക്കം നിരവധി അവാർഡുകൾ ഇതിനകം നേടിക്കഴിഞ്ഞ കോകോ ഒരിക്കലും നിങ്ങളെ നിരാശപ്പെടുത്തില്ല എന്ന് ഉറപ്പ് തരുന്നു.

🔸റേറ്റിംഗ് : 4.5/5

More Reviews @ http://www.amazingcinemareviews.wordpress.com

©️ PRADEEP V K