3.5 Star (Good) · Psychological · Spain · Spanish · Thriller

251. THE INVISIBLE GUARDIAN (SPAIN/PSYCHOLOGICAL THRILLER/2017)

251. THE INVISIBLE GUARDIAN ( SPAIN / PSYCHOLOGICAL THRILLER / 2017 )

✓പ്രകൃതിമനോഹരമായ ആ കാടിനുള്ളിലെ നദിക്കരയിൽ അവർ കണ്ടത് ഞെട്ടിപ്പിക്കുന്ന ഒരു ദൃശ്യമായിരുന്നു. കൗമാരക്കാരിയായ ഒരു പെൺകുട്ടി പൂർണ നഗ്നയായി മരിച്ച് കിടക്കുന്നു. മുഖത്തെ മേയ്ക്കപ്പ് എല്ലാം മായ്ച്ച് കളഞ്ഞ് മുടി നന്നായി കോതിയൊതുക്കിയ അവളുടെ കൈകൾ ഒരു പുരാതനമായ ചിത്രത്തിലെപ്പോലെ തോന്നിച്ചു.

✓കേസന്വേഷിക്കാനായി നിയോഗിക്കപ്പെട്ട അമേയ സലാസാർ എന്ന പോലീസ് ഉദ്യോഗസ്ഥ കുറച്ച് നാൾ മുമ്പ് നടന്ന മറ്റൊരു പെൺകുട്ടിയുടെ മരണം സമാനമായ രീതിയിലായിരുന്നു എന്ന കാര്യം ശ്രദ്ധിക്കുന്നതോടെ മരണങ്ങൾക്ക് പിന്നിൽ ഒരു സീരിയൽ കില്ലർ ആകാമെന്ന നിഗമനത്തിലെത്തുന്നു. എന്നാൽ ജനങ്ങളും മീഡിയയും ഈ കൊലപാതകങ്ങൾക്ക് പിന്നിൽ പലരും കണ്ടിട്ടുണ്ട് എന്നവകാശപ്പെടുന്ന കാടിന്റെ രക്ഷകനായി വിശ്വസിക്കപ്പെടുന്ന ബസാജ്വാൻ എന്ന നിഗൂഢശക്തി ആണെന്ന് വിശ്വസിക്കുന്നു. യാഥാർത്ഥ്യവും വിശ്വാസവും ഇടകലർന്ന ആ പ്രദേശത്ത് കാടിന്റെ വന്യതയിൽ ഒളിച്ചിരിക്കുന്ന കൊലപാതകി യഥാർത്ഥത്തിൽ ആരായിരിക്കും?

✓ഒരു മിസ്റ്ററി ചിത്രത്തിന്റെ മികവിന് പിന്നിൽ കഥ നടക്കുന്ന സ്ഥലത്തിന് വളരെയധികം പ്രാധാന്യമുണ്ട്. ഇവിടെ വളരെ നിഗൂഢമായ കഥയ്ക്ക് ചേർന്ന വിധത്തിലുള്ള ലൊക്കേഷനുകളും ചിത്രീകരണവും ആണ് ഈ ചിത്രത്തിന്റെ ഏറ്റവും വലിയ പ്രത്യേകത. സ്ക്രീനിൽ നിന്ന് കണ്ണെടുക്കാൻ തോന്നാത്ത തരത്തിലുള്ള മനോഹാരിത ഓരോ ഫ്രെയിമിലും കാണാം. പൊലീസ് അന്വേഷണവും ഫാന്റസിയും ഭംഗിയായി ഇടകലർത്തിയിരിക്കുന്നു. എന്നാൽ പ്രധാന കഥയ്ക്കുള്ളിൽ വരുന്ന ഫാന്റസി എലമെന്റ് കഥയുടെ റിയാലിറ്റി നഷ്ടപ്പെടുത്തുന്നുണ്ട് എന്നത് ഒരു ന്യൂനതയാണ്.

✓എല്ലാ നടീനടൻമാരും മികച്ച പെർഫോർമൻസ് കാഴ്ച വച്ചിരിക്കുന്ന ചിത്രത്തിന്റെ മൂഡ് നിലനിർത്താൻ ലൊക്കേഷനുകളും സിനിമാറ്റോഗ്രഫിയും വഹിച്ച പങ്ക് ചെറുതല്ല. എന്നാൽ ക്രിട്ടിക്സ് ചിത്രത്തെ വല്ലാതെ കയ്യൊഴിഞ്ഞുകളഞ്ഞു എന്നത് നിരാശാജനകമാണ്. എന്നെ സംബന്ധിച്ച് ചിത്രം വളരെ നല്ല ഒരനുഭവമാണ് പ്രദാനം ചെയ്തത്. ആദ്യവസാനം ഒരു നിമിഷം പോലും സ്ക്രീനിൽ നിന്ന് കണ്ണെടുക്കാതെ ആകാംഷയോടെയാണ് ചിത്രം കണ്ട് തീർത്തത്. നല്ലൊരു സൈക്കോളജിക്കൽ ത്രില്ലർ ചിത്രം ആസ്വദിക്കാനാഗ്രഹിക്കുന്നവരെ ഒരിക്കലും ഈ ചിത്രം നിരാശപ്പെടുത്തില്ല എന്ന് ഉറപ്പ്.

RATING : 3.5/5

ചിത്രം ടെലഗ്രാം ചാനലിൽ ലഭ്യമാണ്
@ t.me/AmazingCinema

©️ PRADEEP V K

Advertisements
3.5 Star (Good) · Crime · Drama · Japan · Japanese

250. THE CRIMES THAT BIND (JAPAN/CRIME DRAMA/2018)

🔸ഒരു ഫ്ലാറ്റിനുള്ളിൽ നിന്ന് ഒരു സ്ത്രീയുടെ കഴുത്ത് ഞെരിച്ച് കൊല്ലപ്പെട്ട നിലയിലുള്ള അഴുകിയ മൃതദേഹം കണ്ടെടുക്കുന്നു. ആദ്യ അന്വേഷണത്തിൽ ആ ഫ്ലാറ്റിന്റെ ഉടമയും ഏതാനും നാളുകളായി അപ്രത്യക്ഷനായിരിക്കുന്നതായി പോലീസ് മനസ്സിലാക്കുന്നു. അതിനിടയിൽ കേസന്വേഷണത്തിൽ പുതിയതായെത്തിയ ഇൻസ്പെക്ടർ കാഗാ കാണാതായ വ്യക്തിയുടെ ഫ്ലാറ്റിൽ ഉണ്ടായിരുന്ന ഒരു വസ്തു 16 വർഷം മുമ്പ് മരിച്ചു പോയ തന്റെ അമ്മയുമായി ബന്ധപ്പെട്ടതാണെന്ന് സംശയിക്കുന്നു. നിരവധി വർഷങ്ങളുടെ ഇടവേളകളിൽ നടന്ന സംഭവങ്ങൾ തമ്മിലുള്ള ലിങ്ക് കണ്ടെത്താനാവാതെ കുറ്റാന്വേഷകർ കുഴങ്ങുമ്പോൾ രഹസ്യങ്ങളുടെ താക്കോൽ ആരുടെ മനസ്സിന്റെ അഗാധതകളിലാവാം കുരുങ്ങിക്കിടക്കുന്നത്?

🔸THE CRIMES THAT BIND ( JAPAN / CRIME DRAMA / 2018 )

🔸ജാപ്പനീസ് കൊറിയൻ സിനിമകളിലെ ക്രൈം ഡ്രാമകൾക്ക് ഒരു പ്രത്യേക ശൈലി ഉണ്ട്. അതിക്രൂരരായ ക്രിമിനലുകളും നിസ്സഹായരായ ഇരകളും ഒന്നും ചെയ്യാനാവാത്ത പൊലീസും എല്ലാം അതിന് ഉദാഹരണമാണ്. അതിൽ നിന്ന് കുറച്ച് മാറി ഇവിടെ കേസന്വേഷണം അന്വേഷണോദ്യോഗസ്ഥന്റെ വ്യക്തിപരമായ ജീവിതത്തിലേക്ക് കടന്ന് ചെല്ലുമ്പോൾ നിരവധി മികച്ച വൈകാരിക മുഹൂർത്തങ്ങളും ചിത്രത്തിൽ കാണാം. ചിത്രത്തെ ഒരു ഇമോഷണൽ ക്രൈം ഡ്രാമ വിഭാഗത്തിൽ പെടുത്താം. വളരെ മികച്ച രീതിയിൽ തുടങ്ങുന്ന ചിത്രത്തിൽ ഡയലോഗുകളുടെ അതിപ്രസരം കുറച്ച് ബുദ്ധിമുട്ട് സൃഷ്ടിക്കുന്നുണ്ടെങ്കിലും തൃപ്തികരമായ ക്ലൈമാക്സ് തന്നെയായിരുന്നു. നിരവധി കഥാപാത്രങ്ങളും സബ് പ്ലോട്ടുകളും നിറഞ്ഞ ഈ ചിത്രം ശ്രദ്ധയോടെയുള്ള കാഴ്ച ആവശ്യപ്പെടുന്നുണ്ട്. ഇതേ പേരിൽ തന്നെയുള്ള ജാപ്പനീസ് നോവലിനെ ആധാരമാക്കിയുള്ള ഈ ചിത്രം അഭിനേതാക്കളുടെ മികച്ച പെർഫോർമൻസ് കൊണ്ടും ശ്രദ്ദേയമാണ്. ഏഷ്യൻ ക്രൈം ഡ്രാമ ചിത്രങ്ങൾ ഇഷ്ടപ്പെടുന്നവർക്ക് കണ്ട് നോക്കാവുന്നതാണ്.

🔸RATING : 3.5/5

🔸Movie Review Post No.250
@ http://www.amazingcinemareviews.wordpress.com
🔸ചിത്രം ടെലഗ്രാം ചാനലിൽ ലഭ്യമാണ്
@ https://t.me/AmazingCinema

©️ PRADEEP V K

3.0 Star (Above Average) · English · Thriller · USA

249. HOLD THE DARK (USA/THRILLER/2018)

🔺 “അവിടെ മനുഷ്യർ കൊല്ലപ്പെടുന്നത് ആദ്യമായല്ല. ആ കുന്നിൻ പ്രദേശം മുഴുവൻ മനുഷ്യശരീരാവശിഷ്ടങ്ങൾ കൊണ്ട് നിറഞ്ഞിരിക്കുകയാണ്!”

🔸MOVIE : HOLD THE DARK (2018)
🔸COUNTRY : USA (ENGLISH)
🔸GENRE : THRILLER
🔸DIRECTION : JEREMY SAULNIER
🔸STARRING : JEFFREY WRIGHT, ALEXANDER SKARSGARD

🔻 അലാസ്കയിലെ മഞ്ഞ് മൂടിയ ആ താഴ്‌വരയിലേക്ക് ചെന്നായ വേട്ടക്കാരനായ റസ്സൽ കോർ എത്തിയത് മെഡോറയുടെ അഭ്യർത്ഥന മാനിച്ചാണ്. മറ്റ് നിരവധി കുട്ടികളെപ്പോലെ തന്റെ മകൻ ബെയ്ലിയും ചെന്നായ്ക്കളുടെ പിടിയലകപ്പെട്ടതോടെ കോറിന്റെ സഹായം തേടുകയല്ലാതെ മെഡോറക്ക് മറ്റ് വഴികളൊന്നുമില്ലായിരുന്നു. എന്നാൽ ആ ഗ്രാമത്തിലെത്തിയ കോർ താൻ ഒട്ടും പ്രതീക്ഷിക്കാത്ത സംഭവങ്ങൾക്കാണ് സാക്ഷിയാകുന്നത്. ഇറാഖിലെ യുദ്ധമുഖത്ത് നിന്നും മെഡോറയുടെ ഭർത്താവായ വെർണൻ സ്ലോൺ കൂടി എത്തുന്നതോടെ ഉത്തരമില്ലാത്ത ചോദ്യങ്ങളുടെ പട്ടിക വലുതാകുന്നു.

🔺 മികച്ച പ്രേക്ഷകാഭിപ്രായം നേടിയ ബ്ലൂ റൂയിൻ, ഗ്രീൻ റൂം എന്നീ ത്രില്ലർ ചിത്രങ്ങൾക്ക് ശേഷം ജെറമി സോൾനിയറുടെ പുതിയ സംവിധാന സംരംഭമാണ് ഹോൾഡ് ദി ഡാർക്ക്. മുൻ ചിത്രങ്ങളിൽ നിന്ന് വിഭിന്നമായ രീതിയിൽ പെട്ടെന്നൊന്നും പിടി തരാത്ത ആഖ്യാനശൈലിയാണ് ഈ ചിത്രത്തിന് സോൾനിയർ സ്വീകരിച്ചിരിക്കുന്നത്. വെസ്റ്റ് വേൾഡ് സീരീസിലൂടെ പ്രശസ്തനായ ജെഫ്രി റൈറ്റ് മുഖ്യവേഷത്തിലെത്തുന്ന ചിത്രത്തിന്റെ വിതരണാവകാശം നെറ്റ്ഫ്ലിക്സിനായിരുന്നു. വളരെ നിഗൂഢത നിറഞ്ഞ സ്വഭാവ സവിശേഷതകളുള്ള വെർണൻ സ്ലോൺ എന്ന കഥാപാത്രമായെത്തിയ അലക്സാണ്ടർ സ്കാർസ്ഗാർഡിന്റെ പ്രകടനം എടുത്ത് പറയേണ്ടതാണ്.

🔻സ്പൂൺ ഫീഡിംഗ് ആഗ്രഹിക്കുന്ന പ്രേക്ഷകർക്കുള്ളതല്ല ഈ ചിത്രം. പല ചോദ്യങ്ങൾക്കും ഉത്തരം പറയാതെയാണ് ചിത്രം അവസാനിക്കുന്നത്. അവ പൂരിപ്പിക്കേണ്ട ഉത്തരവാദിത്തം സംവിധായകൻ പ്രേക്ഷകർക്ക് വിട്ട് തരുന്നു. സോൾനിയർ ചിത്രങ്ങളുടെ മുഖമുദ്രയായ കടുത്ത വയലൻസ് ഈ ചിത്രത്തിലുമുണ്ട്. എന്നാൽ ഒന്നിനുമുളള ഉത്തരങ്ങളോ അവയുടെ ക്ലുവോ ഒരിടത്തും നല്കാൻ സംവിധായകൻ ശ്രമിക്കാതിരുന്നത് ഒരല്പം നിരാശ പ്രേക്ഷകന് ഉണ്ടാക്കുമെന്ന് ഉറപ്പാണ്. എന്നാൽ ഇരുട്ട് നിറഞ്ഞ മനസ്സുകളിലെ ചില നിഗൂഢതകൾ അവ ആഗ്രഹിക്കുന്ന കാലത്തോളം അങ്ങനെ തന്നെ തുടരുമെന്ന സത്യവും നമുക്ക് മറക്കാതിരിക്കാം.

🔺RATING : 3/5

Movie Review Post No.249
@ http://www.amazingcinemareviews.wordpress.com
ചിത്രം ടെലഗ്രാം ചാനലിൽ ലഭ്യമാണ്
@ t.me/AmazingCinema

©️ PRADEEP V K

4.0 Star (Very Good) · English · Thriller · UK

248. STRAW DOGS (UK/THRILLER/1971)

🔺 “മറ്റുള്ളവരുടെ സ്വകാര്യ ജീവിതത്തിലേക്ക് ഒളിഞ്ഞ് നോക്കാൻ ചിലർക്ക് പ്രത്യേക താല്പര്യമാണ്. പ്രത്യേകിച്ചും അവർ ചെറുപ്പക്കാരായ ഒരു സ്ത്രീയും പുരുഷനും ആവുമ്പോൾ. അതിര് വിടുന്ന അവരുടെ പ്രവൃത്തികൾ ഏറ്റവും സൗമ്യനായ മനുഷ്യനെപ്പോലും ചിലപ്പോൾ വേട്ടനായ ആക്കിയെന്നിരിക്കും!”

🔸MOVIE : STRAW DOGS (1971)
🔸COUNTRY : UK/USA (ENGLISH)
🔸GENRE : THRILLER
🔸DIRECTION : SAM PECKINPAH
🔸STARRING : DUSTIN HOFFMAN, SUSAN GEORGE

🔻 മാത്തമാറ്റിഷ്യനായ ഡേവിഡും ഭാര്യ ആമിയും അമേരിക്കയിൽ നിന്ന് ആ ഗ്രാമത്തിലേക്ക് താമസം മാറി വന്നത് ഡേവിഡിന്റെ റിസർച്ച് പൂർത്തിയാക്കാനും സ്വസ്ഥമായ ഒരു കുടുംബ ജീവിതം കൊതിച്ചുമാണ് .എന്നാൽ ആമിയുടെ ജന്മസ്ഥലമായ അവിടെയുള്ളവർ അവരെ മറ്റൊരു കണ്ണിലൂടെയാണ് നോക്കിക്കണ്ടത്. പ്രത്യേകിച്ചും ആമിയുടെ മുൻ കാമുകനായ ചാർളിയും അയാളുടെ സുഹൃത്തുക്കളും. സ്വതവേ ഉൾവലിഞ്ഞ പ്രകൃതക്കാരനായ ഡേവിഡും വളരെ സോഷ്യലായ ആമിയും തമ്മിലുള്ള സ്വഭാവവ്യത്യാസങ്ങളും അതോടൊപ്പം അവരുടെ സ്വകാര്യ ജീവിതത്തിലേക്കുള്ള ചാർളിയുടേയും സുഹൃത്തുക്കളുടേയും കടന്ന് കയറ്റവും തീർത്തും അപകടകരമായ അവസ്ഥയിലേക്ക് അവരെ കൊണ്ടെത്തിക്കുന്നു.

🔺1971 ൽ റിലീസായ ഈ ചിത്രം അതിലെ കോൺട്രവേഴ്സ്യൽ ആയ രംഗങ്ങൾ കൊണ്ട് ശ്രദ്ദേയമായിരുന്നു. 2011 ൽ ഇതേ പേരിൽ തന്നെ ചിത്രം റിമേക്ക് ചെയ്തിരുന്നുവെങ്കിലും ഒറിജിനലിന്റെ മികവിനെ വെല്ലാൻ ആ ചിത്രത്തിനായില്ല. 2018ൽ റിലീസായ വരത്തൻ എന്ന മലയാള ചിത്രവും ഈ ചിത്രത്തിന്റെ അൺഒഫിഷ്യൽ അഡാപ്റ്റേഷൻ ആണ്. ഡസ്റ്റിൻ ഹോഫ്മാന്റെ കരിയറിലെ ഏറ്റവും മികച്ച വേഷങ്ങളിലൊന്നാണ് ഈ ചിത്രത്തിലെ ഡേവിഡ് എന്ന കഥാപാത്രം. സാവധാനം നീങ്ങുന്ന ആദ്യ പകുതിക്ക് ശേഷമുള്ള വളരെ വയലന്റ് ആയ ക്ലൈമാക്സ് ചിത്രത്തിന്റെ സ്വഭാവം തന്നെ മാറ്റുന്നുണ്ട്. റിലീസ് ആയി 47 വർഷങ്ങൾക്ക് ശേഷവും ചിത്രം നല്കുന്ന ഫ്രഷ്നെസ്സ് എടുത്ത് പറയേണ്ടതാണ്. ചിത്രം കൈകാര്യം ചെയ്യുന്ന വിഷയത്തിന്റെ സാമൂഹിക പ്രസക്തിയും അത് അവതരിപ്പിച്ചിരിക്കുന്ന രീതിയും എല്ലാം ചിത്രത്തിന് ഒരു കൾട്ട് ക്ലാസിക് പദവി നേടിക്കൊടുത്തിട്ടുണ്ട്. സിനിമാ പ്രേമികൾ തീർച്ചയായും കണ്ടിരിക്കേണ്ട ചിത്രങ്ങളിൽ ഈ ചിത്രത്തിനും മുൻപന്തിയിൽ തന്നെ സ്ഥാനമുണ്ടാവും.

🔺RATING : 3.75/5

Movie Review Post No.248
@ http://www.amazingcinemareviews.wordpress.com
ചിത്രം ടെലഗ്രാം ചാനലിൽ ലഭ്യമാണ്
@ t.me/AmazingCinema

©️ PRADEEP V K

3.0 Star (Above Average) · Crime · Denmark · Drama · English

247. ONLY GOD FORGIVES (DENMARK/CRIME/2013)

🔺 എന്നും വ്യത്യസ്തമായ തന്റേത് മാത്രമായ ശൈലിയിൽ ചിത്രങ്ങളെടുക്കുന്ന സംവിധായകരിൽ ഒരാളാണ് നിക്കോളാസ് വൈൻഡിംഗ് റെഫിൻ. അദ്ദേഹത്തിന്റെ സംവിധാന ശൈലി തന്നെയാണ് റയാൻ ഗോസ്ലിംഗ് മുഖ്യവേഷത്തിലെത്തിയ ഒൺലി ഗോഡ് ഫർഗിവ്സ് എന്ന ആർട്ടിസ്റ്റിക് ക്രൈം ഡ്രാമ ചിത്രത്തെയും വ്യത്യസ്തമാക്കുന്നത്.

🔸MOVIE : ONLY GOD FORGIVES (2013)
🔸COUNTRY : DENMARK/FRANCE (ENGLISH)
🔸GENRE : CRIME DRAMA
🔸DIRECTION : NICOLAS WINDING REFN

🔻 അമേരിക്കക്കാരായ ജൂലിയനും സഹോദരൻ ബില്ലിയും തായ്ലൻഡിൽ ഒരു ബോക്സിംഗ് ക്ലബ് നടത്തുകയാണ്. എന്നാൽ ക്ലബിന് മറവിൽ നടക്കുന്നത് മയക്ക് മരുന്ന് കച്ചവടമാണ് എന്നത് പരസ്യമായ രഹസ്യമാണ്. ഒരു ദിവസം ഒരു തായ്ലൻഡ്കാരൻ ബില്ലിയെ ക്രൂരമായി കൊലപ്പെടുത്തുന്നതോടെ ജൂലിയൻ പ്രതികാരത്തിനായി ഇറങ്ങുന്നു. എന്നാൽ ലഫ്റ്റനന്റ് ചാങ്ങ് എന്ന സൗമ്യനും ക്രൂരനുമായ പൊലിസ് ഓഫീസറുടെ രംഗപ്രവേശം കാര്യങ്ങൾ കൂടുതൽ വഷളാക്കുന്നു.

🔺വളരെ ഇൻറ്റൻസ് ആയ ലൈറ്റിംഗ് നിറഞ്ഞ ഈ ചിത്രം സാധാരണ ക്രൈം ചിത്രങ്ങൾ പ്രതീക്ഷിക്കുന്നവരെ ഒരിക്കലും തൃപ്തിപ്പെടുത്തില്ല. മിതഭാഷിയായ പറഞ്ഞതിലും കൂടുതൽ പറയാതെ വയ്ക്കുന്ന ജൂലിയനെ റയാൻ ഗോസ്ലിങ്ങ് മനോഹരമാക്കിയപ്പോൾ ഞെട്ടിച്ചത് വിതായ പാൻസ്ട്രിങ്ങ്ഗ്രാം അവതരിപ്പിച്ച ചാങ്ങ് എന്ന കഥാപാത്രമാണ്. ഒരു ബാറിൽ വച്ച് ഒരു ഗ്യാങ്ങ്സ്റ്ററിനെ പീഡനത്തിന് വിധേയനാക്കുന്ന രംഗം ചിത്രത്തിലെ ഏറ്റവും വയലന്റ് ആയ രംഗങ്ങളിൽ ഒന്നാണ്. എന്നാൽ നിക്കോളാസും ഗോസ്ലിങ്ങും ഇതിന് മുമ്പ് ഒന്നിച്ച ഡ്രൈവ് എന്ന ചിത്രം പോലെ ഒന്ന് പ്രതീക്ഷിക്കുന്നവരെ ചിത്രം നിരാശപ്പെടുത്തും. പുതുമകൾ പ്രതീക്ഷിക്കുന്നവർ മാത്രം കാണാൻ ശ്രമിക്കേണ്ട ചിത്രം.

🔺RATING : 3/5

Movie Review Post No.247
@ http://www.amazingcinemareviews.wordpress.com
ചിത്രം ടെലഗ്രാം ചാനലിൽ ലഭ്യമാണ്@ t.me/AmazingCinema

©️ PRADEEP V K

3.0 Star (Above Average) · English · Horror · USA

246. THE EVIL WITHIN (USA/HORROR/2017)

🔺 സിനിമാ രംഗത്ത് വലിയ ഗോഡ്ഫാദേഴ്സ് ഒന്നുമില്ലാത്ത ഒരാൾ 2002 ൽ തന്റെ ആദ്യ സിനിമ സ്വന്തം തിരക്കഥയിൽ സ്വന്തം പണം മുടക്കി ചിത്രീകരണം ആരംഭിക്കുന്നു. പ്രധാന ഷൂട്ടിങ്ങ് ലൊക്കേഷൻ സ്വന്തം ബംഗ്ലാവ് തന്നെ. സിനിമയുടെ പൂർണതയ്ക്ക് വേണ്ടി സ്വയം ഡെവലപ്പ് ചെയ്ത സ്പെഷ്യൽ ഇഫക്ടുകളും അനിമട്രോണിക്സും ഉപയോഗിക്കുന്നു. സാമ്പത്തിക ബുദ്ധിമുട്ടുകൾ മൂലം ചിത്രീകരണം വർഷങ്ങൾ നീണ്ട് നിന്നു. അവസാനം സിനിമയുടെ പോസ്റ്റ് പ്രൊഡക്ഷൻ വർക്കുകൾ കഴിയുന്നതിന് മുമ്പ് 2015ൽ അദ്ദേഹം മരണപ്പെടുന്നു. അവസാനം ചിത്രീകരണം തുടങ്ങി പതിനഞ്ച് വർഷത്തിന് ശേഷം 2017ൽ ചിത്രം റിലീസ് ചെയ്യുന്നു. The Stotyteller എന്ന പേരിൽ 2002 ൽ ചിത്രീകരണം തുടങ്ങി 2017ൽ റിലീസായ The Evil Within ആയിരുന്നു ആ ചിത്രം.

🔸MOVIE : THE EVIL WITHIN (2017)
🔸COUNTRY : USA (ENGLISH)
🔸GENRE : HORROR
🔸DIRECTION : ANDREW GETTY

🔻 സ്പെഷ്യൽ കെയർ ആവശ്യമുള്ള ഡെന്നീസിനെ കുട്ടിക്കാലം മുതൽ ഭീകര സ്വപ്നങ്ങൾ വേട്ടയാടിയിരുന്നു. താൻ ജീവിക്കുന്നത് റിയാലിറ്റിയിലാണോ അതോ സ്വപ്നത്തിലാണോ എന്ന് പോലും മനസ്സിലാക്കാൻ ഡെന്നീസിന് കഴിയുന്നില്ല. എന്നാൽ ഇന്ന് ഡെന്നീസിനെ വേട്ടയാടുന്നത് കണ്ണാടികൾക്കുള്ളിൽ ഒളിച്ചിരിക്കുന്ന കഡാവർ എന്ന ഭീകരരൂപിയായ ഡെമൺ ആണ്. ഡെന്നീസിന്റെ ഇഷ്ടത്തിന് വിപരീതമായി സഹോദരൻ അവന്റെ ബെഡ് റൂമിൽ വലിയൊരു കണ്ണാടി കൂടി സ്ഥാപിക്കുന്നതോടെ കഡാവർ ഡെന്നീസിന് മേൽ കൂടുതൽ പിടിമുറുക്കുന്നു.

🔺 ഒരു പാട് ഭയപ്പെടുത്തുന്ന തരത്തിലുള്ള ഒരു ഹൊറർ ചിത്രം അല്ലിത്. എന്നാൽ സമാനമായ മറ്റ് ചിത്രങ്ങളിൽ നിന്നും വ്യത്യസ്തമായ ട്രീറ്റ്മെന്റാണ് ചിത്രത്തിൽ സംവിധായകൻ ഉപയോഗിച്ചിരിക്കുന്നത്. ഡെന്നീസ് എന്ന കഥാപാത്രമാണ് ചിത്രത്തിന്റെ ആത്മാവ്. ആ കഥാപാത്രം ഫ്രെഡറിക് കോഹ്ളർ ഭംഗിയായി അവതരിപ്പിച്ചിട്ടുണ്ട്. സാമ്പത്തികമായ കുറവുകൾ ചിത്രത്തിൽ പലയിടത്തും പ്രകടമാണ്. ചിത്രത്തിന്റെ അവസാന ഭാഗത്തെ ഇഫക്ടുകൾ പലതും സംവിധായകൻ സ്വയം നിർമ്മിച്ച മോഡലുകൾ ഉപയോഗിച്ച് ചിത്രീകരിച്ചതാണ്. വളരെ അണ്ടർറേറ്റഡ് ആയ ചിത്രമാണ് ദി ഈവിൽ വിത്തിൻ. പേരും പ്രശസ്തിയുമുള്ള നിർമ്മാണ കമ്പനികളുടെ പിൻബലം ഉണ്ടായിരുന്നെങ്കിൽ ഏറെ ശ്രദ്ദിക്കപ്പെടേണ്ടിയിരുന്ന ചിത്രമാണിത്. വ്യത്യസ്തകൾ തേടുന്നവർക്ക് പരീക്ഷിക്കാവുന്ന മറ്റൊരു ചിത്രം.

🔺RATING : 3/5

Movie Review Post No.246
@ http://www.amazingcinemareviews.wordpress.com
ചിത്രം ടെലഗ്രാം ചാനലിൽ ലഭ്യമാണ്
@ t.me/AmazingCinema

©️ PRADEEP V K

3.0 Star (Above Average) · Canada · Drama · English · Science Fiction

245. BEYOND THE BLACK RAINBOW (CANADA/SCIENCE FICTION DRAMA/2010)

🔺”മനുഷ്യന്റെ ഉപബോധമനസ്സിനെ ശാസ്ത്ര പരീക്ഷണങ്ങളിലൂടെ ഉണർത്തുന്നതിലൂടെ അവനിൽ നിഗൂഢമായിരിക്കുന്ന അതീന്ദ്രിയമായ കഴിവുകൾ പുറത്ത് വരുത്താനാവുമോ?”

🔸MOVIE : BEYOND THE BLACK RAINBOW (2010)
🔸COUNTRY : CANADA
🔸GENRE : SCIENCE FICTION DRAMA
🔸DIRECTION : PANOS COSMATOS

🔻 സയൻസും സ്പിരിച്വാലിറ്റിയും സമന്വയിപ്പിച്ച് മനുഷ്യന് ആത്യന്തികമായ സന്തോഷവും സമാധാനവും പ്രദാനം ചെയ്യുമെന്ന് അവകാശപ്പെടുന്ന സ്ഥാപനമാണ് അർബോറിയ ഇൻസ്റ്റിറ്റ്യൂട്ട്. 1983ൽ അവിടത്തെ ഡോക്ടറായ ഡോ. നൈൽ സൈക്കിക് കഴിവുകൾ ഉള്ള എലെന എന്ന പെൺകുട്ടിയെ തടവിൽ പാർപ്പിച്ച് കഠിനമായ പരീക്ഷണ നിരീക്ഷണങ്ങൾക്ക് വിധേയയാക്കുന്നു. ശക്തമായ സെക്യൂരിറ്റി ഉള്ള ആ രഹസ്യ തടവറയിൽ എലെനയെ പാർപ്പിച്ചിരിക്കുന്നത് എന്തിനായിരിക്കും?

🔺 പൂർണമായും ഒരു പരീക്ഷണ ചിത്രം എന്ന് പറയാവുന്ന ചിത്രമാണ് ബിയോൺഡ് ദി ബ്ലാക്ക് റെയിൻബോ. 2018ൽ റിലീസായ മാൻഡി എന്ന ചിത്രത്തിന്റെ സംവിധായകനായ പാനോസ് കോസ്മറ്റോസിന്റെ ആദ്യ ചിത്രമാണിത്. മുമ്പ് കണ്ട് പരിചയിച്ചിട്ടില്ലാത്ത തരം വിഷ്വൽ സ്റ്റൈലാണ് ചിത്രത്തിന്. സംഭാഷണങ്ങൾ വളരെ കുറവാണ്. കടുത്ത ചുവപ്പുനിറത്തിലെ ലൈറ്റിങ്ങും അബ്സ്ട്രാക്റ്റ് ആർട്ട് വർക്കുകളും 1983 ലെ കാലഘട്ടവും ചെവിയിൽ ഇരച്ച് കയറുന്ന പശ്ചാത്തല സംഗീതവും അടക്കം മാൻഡി എന്ന ചിത്രത്തിൽ ഉപയോഗിച്ചിരിക്കുന്ന പലതും ഈ ചിത്രത്തിലും കാണാം. രണ്ട് ചിത്രങ്ങളിലെയും കഥ നടക്കുന്നത് ഒരു പാനോസ് കോസ്മറ്റോസ് യൂണിവേഴ്സിൽ ആണെന്ന് കരുതാം.

🔻ഡോ. നൈലിന്റെ ചെറുപ്പകാലം വിവരിക്കുന്ന 1960 കൾ കാണിക്കുന്നത് ഹൈ കോൺട്രാസ്റ്റ് ബ്ലാക്ക് ആൻഡ് വൈറ്റിൽ ആണ്. ഗാസ്പർ നോ ചിത്രങ്ങളിലും സ്റ്റാൻലി കുബ്രിക് ചിത്രങ്ങളിലും കണ്ടിട്ടുള്ള ദ്യശ്യങ്ങളുടെ ചില സാമ്യതകൾ പലയിടത്തും കാണാൻ കഴിയും. അങ്ങനെ വിവരിക്കാനാവാത്ത നിരവധി പരീക്ഷണങ്ങളും പ്രത്യേകതകളും നിറഞ്ഞതാണ് ഈ ചിത്രം. അതു കൊണ്ട് തന്നെ സാധാരണ പ്രേക്ഷകന് ഒരു തരത്തിലും റിലേറ്റ് ചെയ്യാനാവാത്ത ചിത്രമാണിത്. ഒരു സാധാരണ സയൻസ് ഫിക്ഷനോ ത്രില്ലറോ ഡ്രാമയോ അല്ല ഈ ചിത്രം. വ്യത്യസ്തമായ ചിത്രങ്ങളും അവയിൽ പുതുമ നിറഞ്ഞ പരീക്ഷണങ്ങളും കാണാനാഗ്രഹിക്കുന്നവർ മാത്രം കാണേണ്ട ചിത്രമാണിത് എന്നോർക്കുക.

🔺RATING : 3/5 ( A Highly Experimental Film – Not For Everyone )

Movie Review Post No.245
@ http://www.amazingcinemareviews.wordpress.com
ചിത്രം ടെലഗ്രാം ചാനലിൽ ലഭ്യമാണ്
@ t.me/AmazingCinema

©️ PRADEEP V K