4.0 Star (Very Good) · Drama · Russia · Russian

190. LOVELESS (RUSSIA/DRAMA/2017)

#Oscar2018MovieReviews
Post No. 3

🔰 വ്യക്തി ബന്ധങ്ങളെയും കുടുംബാംഗങ്ങളേയും പരസ്പരം ബന്ധിപ്പിച്ച് നിർത്തുന്ന ഏറ്റവും പ്രധാനപ്പെട്ട ഘടകം ഏതാണ്? അത് സ്നേഹമല്ലാതെ മറ്റൊന്നുമല്ല. അച്ഛനമ്മമാർക്ക് മക്കളോടും തിരിച്ചുമുള്ള സ്നേഹം, ഭാര്യാഭർത്താക്കൻമാരും കാമുകീകാമുകൻമാരുമായുള്ള സ്നേഹം. എന്നാൽ സ്നേഹ ശൂന്യമായ അഡ്ജസ്റ്റ്മെന്റിന് വേണ്ടി മാത്രം നിലനില്ക്കുന്ന ഒരു കുടുംബത്തെക്കുറിച്ച് ആലോചിച്ച് നോക്കൂ.അത്തരമൊരു കുടുംബമാണ് 12 കാരനായ അലോഷ്യയുടേത്.

🔰ചിത്രം : ലൗ ലെസ്സ് (LOVELESS) (2017)
രാജ്യം : റഷ്യ
‎ഓസ്കാർ 2018 നോമിനേഷൻ : മികച്ച വിദേശ ഭാഷാചിത്രം

🔰അച്ഛനും അമ്മയ്ക്കും അലോഷ്യ ഒരു ബാധ്യതയാണ്. അവന്റെ അപ്രതീക്ഷിത ജനനം മൂലം ചെറുപ്പത്തിൽ വിവാഹിതയാകേണ്ടി വന്നതിന് അവന്റെ അമ്മ അവനയാണ് പഴിക്കുന്നത്. ഇന്ന് അച്ഛനും അമ്മയ്ക്കും വേറെ കമിതാക്കളുണ്ട്. എങ്ങനെയെങ്കിലും വിവാഹബന്ധം വേർപെടുത്തി പ്രണയിതാക്കളോടൊപ്പം പോകണമെന്നാണ് രണ്ട് പേരും ആഗ്രഹിക്കുന്നത്. എന്നാൽ അലോഷ്യയെ രണ്ട് പേർക്കും വേണ്ട. അച്ഛനമ്മമാർ തമ്മിൽ പൊരിഞ്ഞ വഴക്ക് നടന്ന ഒരു ദിവസത്തിന്റെ പിറ്റേന്ന് അവൻ അപ്രത്യക്ഷനാകുന്നു. എവിടെയാണ് അവൻ പോയത്? സ്വന്തം ഇഷ്ടപ്രകാരം പോയതാണോ അതോ ആരെങ്കിലും അവനെ തട്ടിക്കൊണ്ട് പോയതാണോ?

🔰 റഷ്യയിൽ മാത്രമല്ല നമ്മുടെ നാട്ടിലടക്കം സംഭവിച്ച് കൊണ്ടിരിക്കുന്ന ഒരു വിഷയത്തിന്റെ തീവ്രമായ ആവിഷ്കരണമാണ് ഈ ചിത്രം .ദമ്പതികൾ തമ്മിലുണ്ടാവുന്ന പ്രശ്നങ്ങളിൽ എന്നും വേദന അനുഭവിക്കുന്നത് കുട്ടികൾ തന്നെയാണ്. അച്ഛനുമമ്മയും തമ്മിൽ വഴക്കിടുമ്പോൾ ഭയന്ന് വിറച്ച് മുറിക്കകത്തിരുന്ന് പൊട്ടിക്കരയുന്ന കുഞ്ഞ് അലോഷ്യയുടെ കാഴ്ച നമ്മുടെ മനസ്സ് നൊമ്പരപ്പെടുത്തും. അതു പോലെ അലോഷ്യമാർ നമ്മിൽ പലരുടേയും വീടുകളിൽ ഉണ്ടെന്ന സത്യം കൂടി മനസ്സിലാക്കുമ്പോഴാണ് അതിന്റെ ഭീകരത വെളിപ്പെടുന്നത്.

🔰 ഒരു പാട് ചോദ്യങ്ങൾ അവശേഷിപ്പിച്ച് കൊണ്ടാണ് ചിത്രം അവസാനിക്കുന്നത്. അത് തന്നെയാണ് സംവിധായകൻ ഉദ്ദേശിക്കുന്നതും. വീടുകളിൽ നിന്നും സ്കൂളുകളിൽ നിന്നും കുട്ടികളെ കാണാതാവുമ്പോൾ പത്രങ്ങളിലും റോഡരുകിലെ പോസ്റ്റുകളിലും ‘കാണാതായി’ എന്ന തലക്കെട്ടോടെ പ്രത്യക്ഷപ്പെടുന്ന കുഞ്ഞ് മുഖങ്ങൾ തമ്മിൽ അദ്ഭുതം സൃഷ്ടിക്കാതാവുമ്പോൾ നാമും സ്നേഹ ശൂന്യമായ ഒരു സമൂഹത്തിന്റെ ഭാഗമായി മാറുകയാണെന്നോർക്കുക!

🔸റേറ്റിംഗ് : 4/5

©️ PRADEEP V K

Advertisements