3.0 Star (Above Average) · English · Slasher · UK

151. PREVENGE (UK/SLASHER COMEDY/2016)

🔹151. PREVENGE (2016)  🔽 A Review 🔽

🔹 ” ഈ ലിസ്റ്റിലുള്ളവരെല്ലാം മരിക്കേണ്ടവരാണ്. ഞാൻ അമ്മയുടെ ഗർഭപാത്രത്തിൽ നിന്ന് ഈ ലോകത്തേക്ക് വരുന്നതിന് മുമ്പ് തന്നെ അമ്മ അവരെയെല്ലാം വകവരുത്തിയേ തീരൂ ”

COUNTRY : UK

LANGUAGE : ENGLISH

GENRE : SLASHER COMEDY

DIRECTION : ALICE LOWE

🔹SYNOPSIS 🔹

▪  ഗർഭിണിയായ റൂത്ത് ഭർത്താവിന്റെ ആകസ്മികമായ മരണത്തിന് ശേഷം ഒറ്റയ്ക്ക് ജീവിക്കുകയാണ്. ഭർത്താവിന്റെ മരണവും ഗർഭകാലത്തെ ശാരീരിക മാനസിക ബുദ്ധിമുട്ടുകളും അനുഭവിക്കുന്നുണ്ടെങ്കിലും സാധാരണ ഗർഭിണികളിൽ നിന്നും റൂത്ത് തീർത്തും വ്യത്യസ്തയാണ്. കാരണം അവളുടെ വയറ്റിലുള്ള കുഞ്ഞ് അവളോട് വ്യക്തമായ ഭാഷയിൽ സംസാരിക്കുന്നത് അവൾക്ക്  കേൾക്കാം. പക്ഷേ അത് അവളോട് ആവശ്യപ്പെടുന്നത് താൻ പറയുന്നവരെ മുഴുവൻ കൊല്ലാനാണ് . സത്യമാണോ അതോ എല്ലാം തന്റെ തോന്നലാണോ എന്നറിയാതെ വിഷമിച്ച റൂത്തിനോട് അവളുടെ നഴ്സ് പറയുന്നത് ഗർഭകാലത്ത് ഒന്നും അമ്മയുടെ കൺട്രോളിൽ അല്ലെന്നും അമ്മ എന്ത് ചെയ്യണമെന്ന്  തീരുമാനിക്കുന്നത് വയറ്റിൽ വളരുന്ന കുഞ്ഞാണെന്നുമാണ് ( കുഞ്ഞ് അമ്മയോട് കൊലപാതകം ചെയ്യാനാണ് ആവശ്യപ്പെടുന്നതെന്ന് പാവം നഴ്സ് അറിഞ്ഞിരുന്നില്ല!). എന്തിന് വേണ്ടിയാണ് കുഞ്ഞ് അവരെയെല്ലാം കൊല്ലാൻ ആവശ്യപ്പെടുന്നത്? യഥാർത്ഥത്തിൽ അവളുടെ വയറ്റിൽ വളരുന്ന കുഞ്ഞ് ആരാണ് ? 

🔹 REVIEW🔹

▪ അസാധാരണമായ ഒരു പ്രമേയം കൊണ്ട് മാത്രമല്ല PREVENGE എന്ന ബ്രിട്ടീഷ് ചിത്രം വ്യത്യസ്തമാകുന്നത് . കാരണം ചിത്രത്തിന്റെ തിരക്കഥയും സംവിധാനവും കൂടാതെ പ്രധാന കഥാപാത്രമായ റൂത്തിനെയും അവതരിപ്പിച്ച ആലീസ് ലോവ് ചിത്രത്തിൽ അഭിനയിക്കുമ്പോൾ ഏഴ് മാസം ഗർഭിണിയായിരുന്നു എന്നതാണ്. നിരവധി വർഷങ്ങളായി സിനിമാരംഗത്ത് ഉണ്ടെങ്കിലും തന്റെ ആദ്യ സംവിധാന സംരംഭത്തിന് ഇത്തരം ഒരു കഥയും അവസരവും തെരഞ്ഞെടുത്ത ആലീസ് തീർച്ചയായും അഭിനന്ദനം അർഹിക്കുന്നു. പ്രേക്ഷകനെ സംശയത്തിന്റെ മുൾമുനയിൽ നിർത്തി കഥ മുന്നോട്ട് കൊണ്ട് പോകാൻ സംവിധായികക്ക് സാധിച്ചിട്ടുണ്ട്. എങ്കിലും കാര്യകാരണങ്ങൾ വിശദീകരിച്ച് ചിത്രം അവസാനിക്കുമ്പോൾ തുടക്കത്തിലുണ്ടായിരുന്ന പ്രതീക്ഷകൾക്കനുസരിച്ച് തൃപ്തിപ്പെടുത്താനായില്ല എന്ന് തോന്നി. 

▪ Rosemary’s Baby പോലുള്ള ചില ചിത്രങ്ങൾ ഒഴിച്ചു നിർത്തിയിൽ ഗർഭിണികളുടെ കഥ പറയുന്ന ഹൊറർ ചിത്രങ്ങൾ വളരെ വിരളമാണ് . Prevenge ഒരു ഹൊറർ ചിത്രം അല്ലെങ്കിലും കഥാപാത്രങ്ങളുടെ പ്രവൃത്തികളും ഡയലോഗുകളും പല രംഗങ്ങളിലും കാണികളിൽ ഭയം നിറക്കാൻ പോന്നതാണ്. ഡാർക്ക് കോമഡിയുടെ അകമ്പടിയോടെയാണ് വയലൻറായ പല രംഗങ്ങളും അവതരിപ്പിച്ചിരിക്കുന്നത്. ഗർഭിണിയായ ഒരു സ്ത്രീക്ക് ഇങ്ങനെയൊക്കെ ചെയ്യാൻ കഴിയുമോ എന്ന സംശയം പ്രേക്ഷകർക്ക് തോന്നുന്ന നിരവധി മുഹൂർത്തങ്ങൾ ചിത്രത്തിലുണ്ട്. അത് കൊണ്ട് തന്നെ ഗർഭിണികൾ ഈ ചിത്രം കാണാതിരിക്കുകയാവും ഉചിതം. മറ്റുള്ളവർക്ക് ഗർഭകാലവും പ്രതികാരവും ( PREGNANT + REVENGE ) വിഷയമാകുന്ന ഈ ചിത്രം കണ്ട് നോക്കാവുന്നതാണ്. 

🔹RATING : 3/5 ( ABOVE AVERAGE )

©PRADEEP V K (AMAZING CINEMA)

3.5 Star (Good) · Drama · English · USA

149. GIFTED (USA/DRAMA/2017)

🔹149. GIFTED (2017)  🔽 A Review 🔽

🔹 “മൂന്നും മൂന്നും കൂട്ടിയാൽ ആറാണെന്ന് ആർക്കാണറിയാത്തത്? ഇതെന്തൊരു സ്കൂളാണ്?”ഏഴ് വയസ്സുകാരിയായ മേരിയുടെ ഈ വാക്കുകൾ കേട്ട് ഒന്നാം ക്ലാസിൽ കണക്ക് പഠിപ്പിക്കാൻ വന്ന അദ്ധ്യാപിക ഞെട്ടി. മേരിയെ പരീക്ഷിക്കാനായി നിരവധി വലിയ സംഖ്യകൾ കൂട്ടാനും ഗുണിക്കാനും നല്കിയെങ്കിലും അവയുടെ ഉത്തരങ്ങൾ നിമിഷ നേരത്തിനുള്ളിൽ അവൾ പറഞ്ഞപ്പോൾ അവൾ അസാമാന്യ കഴിവുകളുള്ള കുട്ടിയാണെന്ന് ടീച്ചർ മനസ്സിലാക്കി .പക്ഷേ ആ ഏഴു വയസ്സുകാരിയുടെ യഥാർത്ഥ കഴിവുകൾ അതിനെല്ലാം അപ്പുറമാണെന്ന് മറ്റുള്ളവർ മനസ്സിലാക്കുവാൻ പിന്നെയും സമയമെടുത്തു.

COUNTRY : USA

LANGUAGE : ENGLISH

GENRE : DRAMA

DIRECTION : MARC WEBB

🔹SYNOPSIS 🔹

▪️  പ്രായത്തിൽ കവിഞ്ഞ പക്വതയുള്ള മേരി സ്കൂളിലെല്ലാവർക്കും അദ്ഭുതമായിരുന്നു. തന്റെ ക്ലാസിലെ കുട്ടുകാരനെ മറ്റൊരു മുതിർന്ന കുട്ടി കളിയാക്കിയപ്പോൾ ചോദിക്കാൻ അവൾ മാത്രമേ ഉണ്ടായിരുന്നുള്ളു. അവളുടെ ബുദ്ധിശക്തിയും മുതിർന്നവരോടുള്ള പെരുമാറ്റവും ദഹിക്കാത്ത ഹെഡ്മിസ്ട്രസ്സ് അവളുടെ ഗാർഡിയനെ സ്കൂളിൽ വരുത്തിയപ്പോഴാണ് ക്ലാസ് ടീച്ചർ അവളെക്കുറിച്ച് കൂടുതൽ അറിയുന്നത് . എല്ലാവരും അനുഗ്രഹീതയെന്ന് വിളിച്ച് അനുമോദിക്കുമ്പോഴും അവളുടെ കുഞ്ഞു മനസ്സിൽ സ്നേഹിക്കാനും സ്നേഹിക്കപ്പെടാനുമുള്ള ആഗ്രഹം മാത്രമാണുണ്ടായിരുന്നതെന്ന് അറിയാവുന്നത് അവളുടെ പ്രിയപ്പെട്ട അങ്കിൾ ഫ്രാങ്കിന് മാത്രമായിരുന്നു. അങ്കിൾ ഫ്രാങ്കും അടുത്ത വീട്ടിലെ ആന്റി റോബർട്ടയും ഒറ്റക്കണ്ണൻ പൂച്ച ഫ്രഡുമായിരുന്നു മേരിയുടെ അടുത്ത കൂട്ടുകാർ. എന്നാൽ അവളെ കാണാൻ മുത്തശ്ശിയായ എവലിൻ വർഷങ്ങൾക്ക് ശേഷം എത്തുന്നതോടെ മേരിയും ഫ്രാങ്കും അപ്രതീക്ഷിതമായ അനുഭവങ്ങളിലൂടെ കടന്നു പോകേണ്ടി വരുന്നു.

🔹VERDICT 🔹

▪ മേരി എന്ന അനുഗ്രഹീത കഴിവുകളുള്ള ഏഴ് വയസ്സുകാരിയായി മക്കെന്ന ഗ്രേസ് മനം കവർന്നു. അവളുടെ കുറുമ്പും കുസൃതിയും ഇണക്കവും പിണക്കവും ചിരിയും കരച്ചിലും എല്ലാം ചിത്രം കഴിഞ്ഞാലും നിങ്ങളുടെ മനസ്സിൽ നിന്ന് മായാതെ നില്ക്കും . മേരിയുടെ അങ്കിളായ ഫ്രാങ്ക് ആയി ക്യാപ്റ്റൻ അമേരിക്ക ഫെയിം ക്രിസ് ഇവാൻസ് നിറഞ്ഞ് നിന്നു . മേരിയും ഫ്രാങ്കും ചേർന്ന് വരുന്ന വൈകാരിക മുഹൂർത്തങ്ങളെല്ലാം മനസ്സിൽ സ്പർശിക്കുന്ന തരത്തിലായിരുന്നു. മറ്റ് കഥാപാത്രങ്ങളായ റേബർട്ട ആയി ഒക്റ്റേവിയ സ്പെൻസറും മുത്തശ്ശി എവലിൻ ആയി ലിൻഡ്സെ ഡങ്കനും മികച്ച പെർഫോർമൻസ് കാഴ്ച വച്ചു. മേരിയുമായി ഫ്രാങ്ക് ഹോസ്പിറ്റലിൽ ലേബർ റൂമിന് പുറത്തിരിക്കുന്ന  രംഗം എന്റെ പ്രിയപ്പെട്ട  സിനിമാ മുഹൂർത്തങ്ങളിൽ ഒന്നായി മനസ്സിലുണ്ട്.

▪ അമേസിങ്ങ് സ്പൈഡർമാൻ ചിത്രങ്ങൾക്ക് ശേഷം മാർക്ക് വെബ് ഈ ചിത്രത്തിലൂടെ സംവിധായകനായി തിരിച്ചെത്തിയപ്പോൾ ഹൃദയ സ്പർശിയായ ഒരു ഫാമിലി ഡ്രാമയാണ് നമുക്ക് ലഭിച്ചത്. ഗണിത ശാസ്ത്രത്തിൽ അനുഗ്രഹീത കഴിവുകളുള്ള പലരെക്കുറിച്ചും ചിത്രങ്ങൾ ഇറങ്ങിയിട്ടുണ്ടെങ്കിലും അവയിൽ നിന്നെല്ലാം വ്യത്യസ്തമായിരുന്നു GIFTED. പ്രെഡിക്റ്റബിൾ ആയ സ്റ്റോറി ലൈൻ ആണെങ്കിലും അഭിനേതാക്കളുടെ പെർഫോർമൻസും മനോഹരമായ സിനിമാറ്റോഗ്രഫിയും ചിത്രത്തെ മികച്ച ഒരനുഭവമാക്കി. കൂടുതൽ പഠിച്ച് അറിവ് നേടുക, കഴിവ് തെളിയിച്ച് പ്രശസ്തരാവുക എന്നതിൽ കവിഞ്ഞ ഊഷ്മളമായ  മനുഷ്യബന്ധങ്ങളിലൂടെ വളർന്ന് വലുതാവേണ്ടവരാണ് ഓരോ മനുഷ്യരും എന്ന് പറയാതെ പറയുന്ന ഈ ചിത്രം നിങ്ങൾക്കും തീർച്ചയായും ഇഷ്ടമാകും. മനസ്സ് നിറഞ്ഞ് ചിരിക്കാനും ഇടയ്ക്ക് ഒന്ന് കണ്ണ് നനയാനും ഓർത്ത് വയ്ക്കാൻ കുറച്ച് നല്ല മുഹൂർത്തങ്ങളുമായി ഒരു മനോഹര ചിത്രം . അതാണ് GIFTED.

🔹RATING : 3.5/5 ( A Beautiful And Heart Touching Family Drama )

©PRADEEP V K (AMAZING CINEMA)

4.0 Star (Very Good) · English · UK · War

147. DUNKIRK (UK/WAR/2017)

🔹147. DUNKIRK (2017)  🔽 A Review 🔽

🔹 രണ്ടാം ലോക മഹായുദ്ധത്തിനിടക്ക് ജർമൻ സൈന്യത്താൽ വലയം ചെയ്യപ്പെട്ട് ഫ്രാൻസിലെ ഡൺകിർക്ക് ബീച്ചിൽ അകപ്പെട്ടു പോയ നാല് ലക്ഷത്തോളം വരുന്ന ബ്രിട്ടൺ , ഫ്രാൻസ്, ബെൽജിയം  , കാനഡ എന്നീ രാജ്യങ്ങളുടെ സൈനികരെ അവിടെ നിന്നും രക്ഷിക്കുന്നതിനായി 1940 മെയ് 26 നും ജൂൺ 4 നും ഇടയിൽ നടത്തിയ രക്ഷാപ്രവർത്തനമാണ് Dunkirk Evacuation അഥവാ Operation Dynamo എന്നറിയപ്പെടുന്നത്. 

COUNTRY : UK | USA | FRANCE | NETHERLANDS

LANGUAGE : ENGLISH

GENRE : WAR

DIRECTION : CHRISTOPHER NOLAN

🔹SYNOPSIS 🔹

▪️ രണ്ടാം ലോക മഹായുദ്ധത്തെക്കുറിച്ച് പറയുമ്പോൾ ഡൺകിർക്ക് ഇവാക്കുവേഷനെക്കുറിച്ച് പറയാതിരിക്കാനാവില്ല .തങ്ങളുടെ സൈന്യത്തിന്റെ ഒരു പ്രധാന ഭാഗം തന്നെ 1940 മെയ് മാസത്തിൽ ഫ്രാൻസിലെ ഡൺകിർക്ക് ബീച്ചിൽ ജർമൻ സൈന്യത്തിന്റെ തോക്കിന് മുന്നിൽ പെട്ട് പോയപ്പോൾ ബ്രിട്ടീഷ് സാമ്രാജ്യം തന്നെ ഞെട്ടിവിറച്ചു. സാധാരണ സൈനികരും ഓഫീസർമാരും അടക്കം ഡൺകിർക്കിൽ പെട്ടു പോയ എല്ലാവരും ആഗ്രഹിച്ചത് ഒന്നു മാത്രമായിരുന്നു .സ്വന്തം നാട് എന്ന വിദൂര സ്വപ്നം. ഡൺകിർക്കിലെ കരയും കടലും ആകാശവും ഒരു പോലെ യുദ്ധമുഖരിതമായപ്പോൾ ഓരോ സൈനികന്റെയും ഉള്ളിൽ ഉണ്ടായത് യുദ്ധക്കൊതിയോ ശത്രുനാശമോ രാജ്യസ്നേഹമോ ഒന്നുമായിരുന്നില്ല .അത് എങ്ങനെയെങ്കിലും ജീവൻ നിലനിർത്തി അവിടെ നിന്ന് രക്ഷപ്പെടാനുള്ള ഏതൊരു ജീവിയുടേയും ഉള്ളിലുണ്ടാകുന്ന അതിജീവനത്വര മാത്രമായിരുന്നു. 

▪ കരയിലും കടലിലും ആകാശത്തും നടക്കുന്ന യുദ്ധവും അതിജീവനവും DUNKIRK ൽ ചിത്രീകരിച്ചിരിക്കുന്നത് The Mole (7 Days), The Sea (1 Day) , The Air (1 Hour) എന്നിങ്ങനെ മൂന്ന് ഇഴ ചേർന്ന് കിടക്കുന്ന വിഭാഗങ്ങളിലൂടെയാണ്. ജർമൻ സൈന്യത്തിന്റെ ആക്രമണത്തിൽ നിന്ന് രക്ഷപ്പെടാനുള്ള സൈനികരുടെ 7 ദിവസത്തെ ശ്രമങ്ങളും അവരെ രക്ഷിക്കാനായി ജീവൻ പണയം വെച്ച് DUNKIRK ൽ എത്തുന്ന ഒരു പ്രൈവറ്റ് ബോട്ടിന്റെ ഒരു ദിവസത്തെ യാത്രയും ജർമൻ യുദ്ധവിമാനങ്ങളെ നശിപ്പിക്കാനുള്ള മൂന്ന് ബ്രിട്ടീഷ് പൈലറ്റുമാരുടെ ഒരു മണിക്കൂറത്തെ ശ്രമങ്ങളും പരസ്പരം കൂട്ടിക്കലർത്തി ചിത്രത്തിൽ വിവരിക്കുന്നു.

🔹 PERFORMANCES & TECHNICAL SIDES🔹

▪️  ക്രിസ്റ്റഫർ നോളന്റെ പത്താമത്തെ ഫീച്ചർ ഫിലിമായ DUNKIRK ൽ അദ്ദേഹം താൻ ഇതുവരെ പരീക്ഷിക്കാത്ത യുദ്ധ വിഭാഗമാണ് തെരഞ്ഞെടുത്തിരിക്കുന്നത് .യുദ്ധ ചിത്രങ്ങൾക്ക് ഒരു പഞ്ഞവുമില്ലാത്ത ഹോളിവുഡിൽ ഇതുവരെ വന്നവയിൽ നിന്നും വ്യത്യസ്തമായി ഒരു ചിത്രം, അതും തന്റെ ശൈലിയിൽ നിന്നും പൂർണമായി വിട്ടുമാറാതെ ചിത്രീകരിക്കുക എന്നതായിരുന്നു അദ്ദേഹത്തിന്റെ മുന്നിലുണ്ടായിരുന്ന പ്രധാന വെല്ലുവിളി. അതിൽ അദ്ദേഹം പരിപൂർണമായി വിജയിച്ചിട്ടുമുണ്ട്. സാധാരണ യുദ്ധചിത്രങ്ങളിൽ ആക്രമണങ്ങളിൽ പരിക്കേല്‌ക്കുന്ന പട്ടാളക്കാരുടെ വേദനയും നിലവിളികളും രക്തവും ഫോക്കസ് ചെയ്ത് പ്രേക്ഷകരിൽ പിരിമുറുക്കം സൃഷ്ടിക്കാൻ ശ്രമിക്കുമ്പോൾ DUNKIRK ൽ ഒരു രംഗത്ത് പോലും അതൊന്നും കാണിക്കുന്നതേയില്ല. അത് പോലെ ഫ്ലാഷ് ബാക്കുകളോ അനുബന്ധകഥകളോ  ഇല്ലാത്ത ചിത്രത്തിലെ രംഗം പോലും യുദ്ധമുഖത്ത് നിന്നും മാറുന്നില്ല. സിനിമ കാണാനെത്തുന്ന പ്രേക്ഷകനിൽ ഒന്നേ മുക്കാൽ മണിക്കൂർ നേരം യഥാർത്ഥ യുദ്ധമുഖത്ത് പെട്ട് പോകുന്ന പ്രതീതി ഉളവാക്കാൻ ചിത്രത്തിനായി . 

▪️ DUNKIRK എന്ന ചിത്രത്തിന്റെ ആത്മാവ് എന്ന് പറയുന്നത് Hans Zimmer ഒരുക്കിയ പശ്ചാത്തല സംഗീതമാണ്. ഇത്രയും മികച്ച ഒരു BGM തിയേറ്ററിൽ ഇതുവരെ അനുഭവിച്ചിട്ടില്ല എന്ന് പറയാം . സാവധാനം തുടങ്ങി തീവ്രത കൂടി വരുന്ന BGM കഥാപാത്രങ്ങളുടെ അതേ ഭയവും ടെൻഷനും പ്രേക്ഷകരിലേക്കും എത്തിച്ചു. ഓരോ യുദ്ധവിമാനവും സ്വന്തം തലയ്ക്കു മുകളിലാണെന്ന് ഭയപ്പെട്ട് അറിയാതെ തലയുയർത്തി നോക്കിപ്പോകുന്ന , ഓരോ ബോംബും നമ്മുടെ തൊട്ടുമുമ്പിൽ പതിക്കുന്നെന്ന് കരുതി ഞെട്ടിത്തെറിക്കുന്ന അവസ്ഥ പ്രേക്ഷകരിൽ സൃഷ്ടിച്ച Hans Zimmer നെ എങ്ങനെ അഭിനന്ദിക്കണമെന്ന് അറിയില്ല. അത് പോലെ Hoyte Van Hoytema യുടെ ക്യാമറയുടെ മനോഹാരിത അവർണനീയമായിരുന്നു. കരയും കടലും ആകാശവും ഒരേ പോലെ ബൃഹത്തായ രീതിയിൽ  അദ്ദേഹം പകർത്തിയിട്ടുണ്ട്. യുദ്ധവിമാനം തകർന്ന് വീഴുമ്പോൾ പ്രേക്ഷകനും അതോടൊപ്പം വീഴുന്ന ഒരു പ്രതീതി ആയിരുന്നു. 

▪️ തന്റെ മുൻ ചിത്രങ്ങളിലെപ്പോലെ CGI കഴിവതും ഒഴിവാക്കി പ്രാക്ടിക്കൽ ഇഫക്ടുകളിലൂടെ ആണ് ചിത്രത്തിലെ വിഷ്വൽ ഇഫക്ട്സ് സംവിധായകൻ ചിത്രീകരിച്ചിരിക്കുന്നത്. യഥാർത്ഥ ഡൺകിർക്ക് ഇവാക്കുവേഷനിൽ ഉപയോഗിച്ച ബോട്ടുകളും ചിത്രത്തിന് വേണ്ടി ഉപയോഗിച്ചിരുന്നു. ടോം ഹാർഡി , കെന്നത്ത് ബ്രാണാ , സിലിയൻ മർഫി തുടങ്ങിയ പ്രശസ്തരും അത് പോലെ ഓഡിഷനിലൂടെ തെരഞ്ഞെടുത്ത പുതുമുഖങ്ങളും അടക്കം അഭിനയിച്ച എല്ലാവരും മികച്ച നിലവാരം പുലർത്തി. എല്ലാത്തിനും ഉപരിയായി തിരക്കഥാകൃത്തായും സംവിധായകനായും സഹനിർമ്മാതാവായും നിറഞ്ഞു നിന്ന ക്രിസ്റ്റഫർ നോളന്റെ ബ്രില്യൻസ് ചിത്രത്തിന്റെ ഓരോ രംഗത്തും നമുക്ക് കാണാം. 

🔹VERDICT 🔹

▪ DUNKIRK പൂർണമായും ഒരു യഥാർത്ഥ സംഭവത്തിന്റെ പുനരാവിഷ്കാരമാണ്. അതിൽ സസ്പെൻസോ ട്വിസ്‌റ്റോ അമാനുഷികതയോ ഡ്രാമയോ ഒന്നുമില്ല. പ്രേക്ഷകരെ പൂർണമായും സിനിമയിലേക്ക് ആവാഹിക്കുക എന്ന ഏറ്റവും ബുദ്ധിമുട്ടുള്ള കാര്യത്തിനാണ് സംവിധായകൻ പ്രാധാന്യം നല്കിയിരിക്കുന്നത് .അത് കൊണ്ട് തന്നെ ഏറ്റവും മികച്ച ദൃശ്യ ശ്രവ്യ സൗകര്യങ്ങളുള്ള തിയേറ്ററിൽ തന്നെ ഈ ചിത്രം കാണേണ്ടതാണ്. അല്ലാതെ ടോറൻറിൽ നിന്ന് ഡൗൺലോഡ് ചെയ്ത് കംപ്യൂട്ടറിലോ മൊബൈലിലോ കണ്ടാൽ ഈ ചിത്രത്തിന്റെ പത്ത് ശതമാനം പോലും നിങ്ങൾക്ക് ആസ്വദിക്കാനാവില്ല എന്നോർക്കുക. 

▪ DUNKIRK നോളന്റെ ഏറ്റവും മികച്ച ചിത്രമാണോ അല്ലെങ്കിൽ യുദ്ധ ചിത്രങ്ങളിൽ ഏറ്റവും മികച്ചതാണോ എന്നൊന്നും അന്വേഷിക്കുന്നതിൽ ഒരർത്ഥവുമില്ല. കാരണം ഇവിടെ ഓരോ പ്രേക്ഷകനും ഡൺകിർക്ക് ബീച്ചിൽ നാല് ലക്ഷത്തോളം വരുന്ന സൈനികരോടൊപ്പം ജീവൻ രക്ഷിക്കാനുള്ള ഓട്ടത്തിലാണ് .ചെവിയിൽ മുഴങ്ങുന്നത് യുദ്ധവിമാനങ്ങളുടെ കാതടിപ്പിക്കുന്ന പ്രകമ്പനങ്ങളും വെടിയൊച്ചകളും മാത്രം . കണ്ണിനു മുന്നിൽ അന്തമില്ലാതെ പരന്ന് കിടക്കുന്ന കടലും ആകാശവും മണലും മാത്രം .മനസ്സിനുള്ളിൽ ഒരേ ഒരു ചിന്ത മാത്രം. സ്വന്തം നാട് , സ്വന്തം വീട് ! ജീവൻ നഷ്ടപ്പെടുന്നതിന് മുമ്പ് എങ്ങിനെയും അവിടെത്തിയേ തീരൂ!  പ്രതീക്ഷ മാത്രമാണ്  നിങ്ങളുടെ ആയുധം , അതിജീവനം മാത്രമാണ് നിങ്ങളുടെ വിജയം! 

🔹RATING : 4/5 ( VERY GOOD – A UNIQUE CINEMATIC EXPERIENCE )

©PRADEEP V K (AMAZING CINEMA)

4.0 Star (Very Good) · English · Science Fiction · USA

146. WAR FOR THE PLANET OF THE APES (USA/SCIENCE FICTION/2017)

🔹146. WAR FOR THE PLANET OF THE APES 3D (2017)  🔽 A Review 🔽

🔹 2011 ൽ ആരംഭിച്ച പ്ലാനറ്റ് ഓഫ് ദി ഏപ്സ് റിബൂട്ട് സീരീസിലെ RISE OF THE PLANET OF THE APES (2011) , DAWN OF THE PLANET OF THE APES (2014) എന്നിവയ്ക്ക് ശേഷമുള്ള ചിത്രമാണ് WAR FOR THE PLANET OF THE APES.

COUNTRY : USA

LANGUAGE : ENGLISH

GENRE : SCIENCE FICTION

DIRECTION : MATT REEVES

🔹SYNOPSIS 🔹

▪️1968 മുതൽ 1973 വരെ ഇറങ്ങിയ അഞ്ച് ചിത്രങ്ങൾക്കും 2001 ൽ ഇറങ്ങിയ റീമേക്കിനും ശേഷമാണ് 2011ൽ പ്ലാനറ്റ് ഓഫ് ദി ഏപ്സ് റീബൂട്ട് സീരീസ് ആരംഭിക്കുന്നത് .ഒറിജിനൽ ചിത്രങ്ങളിൽ നിന്ന് വ്യത്യസ്തമായ സാഹചര്യത്തിൽ നടക്കുന്ന റിബൂട്ട് സീരീസ് നിരൂപകപ്രശംസയും പ്രേക്ഷകപ്രീതിയും ഒരു പോലെ നേടിയിരുന്നു . സിമിയൻ ഫ്ലൂ വൈറസ് പടർന്ന് പിടിച്ചതിന്റെ ഫലമായി ഭൂമിയിലെ ഭൂരിഭാഗം മനുഷ്യരും നശിച്ചപ്പോൾ കുരങ്ങൻമാർ മനുഷ്യരെപ്പോലെ ബുദ്ധിശക്തിയും സംസാരിക്കാനുള്ള കഴിവും നേടിയെടുക്കുന്നു. കുരങ്ങൻമാരുടെ നേതാവായ സീസർ തന്നെ ചതിച്ച കോബയെ വധിച്ചതിന് ശേഷം മനുഷ്യരുമായി യുദ്ധം കഴിവതും ഒഴിവാക്കി തന്റെ കുടുംബത്തോടൊപ്പം കഴിയാൻ ആഗ്രഹിക്കുന്നു .എന്നാൽ കുരങ്ങൻമാരെ പൂർണമായും നശിപ്പിക്കാൻ കച്ചകെട്ടിയിറങ്ങുന്ന ക്രൂരനായ കേണലിന്റെ നേതൃത്വത്തിലുള്ള ആൽഫ ഒമേഗ എന്ന ആർമി ഗ്രൂപ്പിന്റെ വരവ് സീസറിനെ മറ്റൊരു ജീവന്മരണ പോരാട്ടത്തിലേക്ക് വലിച്ചിഴയ്ക്കുന്നു. 

🔹VERDICT🔹

▪️ ആദ്യ രണ്ട് ചിത്രങ്ങളിൽ നിന്നും വ്യത്യസ്തമായി ആക്ഷൻ രംഗങ്ങൾ ആവശ്യത്തിന് മാത്രം ഉൾപ്പെടുത്തി ഇമോഷണൽ രംഗങ്ങൾക്കും ഡയലോഗുകൾക്കും പ്രാധാന്യം നല്കിയാണ് ഈ ചിത്രം ഒരുക്കിയിരിക്കുന്നത് .അത് കൊണ്ട് തന്നെ പ്രേക്ഷകരുടെ മനസ്സിൽ ചിരപ്രതിഷ്ഠ നേടാൻ ചിത്രത്തിലെ  കഥാപാത്രങ്ങൾക്ക് കഴിഞ്ഞിട്ടുണ്ട്. മോഷൻ ക്വാപ്ച്ചർ ടെക്നോളജിയും CGI യും സമന്വയിപ്പിച്ച് ഒരുക്കിയ ഏപ്സ് വളരെ മികച്ച അനുഭവമാണ് നല്കിയത്. Andy Serkis അവതരിപ്പിച്ച സീസർ ഇമോഷണൽ രംഗങ്ങളിലും ആക്ഷൻ രംഗങ്ങളിലും എല്ലാം വളരെ മികവ് പുലർത്തി. King Kong , Gollum (Lord of The Rings Series) തുടങ്ങിയ കഥാപാത്രങ്ങളെ അനശ്വരമാക്കിയ അദ്ദേഹത്തിന്റെ ഏറ്റവും മികച്ച കഥാപാത്രങ്ങളിൽ ഒന്നാണ് സീസർ .  

▪️മുൻ ചിത്രങ്ങളിൽ ഉണ്ടായിരുന്ന Karin Konoval അവതരിപ്പിച്ച മൗറിസ് എന്ന ഒറങ്ങ് ഉട്ടാൻ , Terry Notary അവതരിപ്പിച്ച റോക്കറ്റ് എന്നിവരോടൊപ്പം പുതിയതായെത്തിയ Steve Zahn അവതരിപ്പിച്ച ബാഡ് ഏപ്പ് വളരെ രസകരമായ കഥാപാത്രമായിരുന്നു. കേണലിന്റെ വേഷത്തിലെത്തിയ Woody Harrelson തന്റെ വേഷം പതിവുപോലെ ഗംഭീരമാക്കിയപ്പോൾ നോവ എന്ന മൂകയായ പെൺകുട്ടിയായി Amish Miller അപ്രതീക്ഷിത പെർഫോർമൻസ് കാഴ്ച വച്ചു. നോവയും ലൂക്കയുമായുള്ള വൈകാരിക മുഹൂർത്തങ്ങൾ ഹൃദയഭേദകമായിത്തന്നെ അവതരിപ്പിക്കപ്പെട്ടു. 

▪️ ചിത്രത്തിലെ ഓരോ രംഗത്തിലും ഒരു ക്ലാസ് ടച്ച് നല്കാൻ സംവിധായകൻ പ്രത്യേകം ശ്രദ്ധിച്ചിട്ടുണ്ട്. Michael Giacchino യുടെ ബാക്ക് ഗ്രൗണ്ട് മ്യൂസിക് അതീവ ഹൃദ്യമായിരുന്നു. പലപ്പോഴും പരിപൂർണ നിശബ്ദത നിറഞ്ഞ രംഗങ്ങൾ ഉണ്ടായിട്ടും ഒരു നിമിഷം പോലും ചിത്രം ബോറടിപ്പിച്ചില്ല. സിനിമാറ്റോഗ്രഫി, എഡിറ്റിംഗ്, വിഷ്വൽ ഇഫക്ട്സ് തുടങ്ങി ടെക്നിക്കൽ വിഭാഗങ്ങളിലെല്ലാം ചിത്രം അതീവ മികവ് പുലർത്തി. ആദ്യ ഭാഗങ്ങൾ കണ്ടിട്ടുള്ളവർക്ക് ചിത്രത്തിന്റെ ഇമോഷണൽ ഡെപ്ത്ത് പൂർണമായും ഉൾക്കൊള്ളാനാവും .ഒരു മൂവി ട്രിലജിക്ക് നല്കാവുന്ന മികച്ചൊരു പര്യവസാനം തന്നെയായിരുന്നു ഈ ചിത്രം. വെറും യുദ്ധവും ആക്ഷനും മാത്രം പ്രതീക്ഷിച്ച് പോകുന്നവരെ ഈ ചിത്രം ചിലപ്പോൾ നിരാശരാക്കിയേക്കാമെങ്കിലും സീസർ എന്ന കഥാപാത്രത്തെ മനസ്സിലാക്കുന്നവർക്ക് പൂർണ സംതൃപ്തി നല്കാൻ സാധിക്കുന്നിടത്താണ് War For The Planet Of The Apes ന്റെ വിജയം. 

🔹RATING : 4/5 ( VERY GOOD )

©PRADEEP V K (AMAZING CINEMA)

3.5 Star (Good) · Biography · Chile · Drama · English · France · USA

145. JACKIE (USA/BIOGRAPHICAL DRAMA/2016)

🔹145. JACKIE (2016)  🔽 A Review 🔽

🔹 അമേരിക്കൻ പ്രസിഡന്റായിരുന്ന ജോൺ എഫ്. കെന്നഡിയുടെ മരണവും തുടർസംഭവങ്ങളും അദ്ദേഹത്തിന്റെ ഭാര്യ ആയിരുന്ന ജാക്വിലിൻ കെന്നഡിയുടെ കണ്ണിലൂടെ നോക്കിക്കാണുകയാണ്  ഈ ചിത്രത്തിൽ!

COUNTRY : USA | CHILE | FRANCE

LANGUAGE : ENGLISH

GENRE : BIOGRAPHICAL DRAMA

DIRECTION : PABLO LARRAIN

🔹SYNOPSIS 🔹

▪️ അമേരിക്കൻ ചരിത്രത്തിൽ തന്നെ കറുത്ത നിഴലുകൾ വീഴ്ത്തിയ സംഭവമായിരുന്നു പ്രസിഡന്റ് ജോൺ എഫ്.കെന്നഡിയുടെ കൊലപാതകം .1963 നവംബർ 22 ന് ടെക്സാസിൽ കാറിൽ ജനങ്ങളെ അഭിസംബോധന ചെയ്യുന്നതിനിടയിൽ അദ്ദേഹം വെടിയേറ്റ് മരിക്കുകയായിരുന്നു. കാറിൽ അദ്ദേഹത്തോടൊപ്പം ഭാര്യയായ ജാക്വിലിനും ടെക്സാസ് ഗവർണറായ ജോൺ കോണലിയും ഭാര്യയും ഉണ്ടായിരുന്നു . അദ്ദേഹത്തെ  വെടിവച്ച് വീഴ്ത്തിയ മുൻ യു.എസ്.മറൈനായ ലീ ഹാർവി ഓസ്വാൾഡിനെ പോലീസ് അറസ്റ്റ് ചെയ്തെങ്കിലും വിചാരണ തുടങ്ങുന്നതിന് മുമ്പ് അയാളും ജാക്ക് റൂബി എന്ന ആളുടെ വെടിയേറ്റ് മരിച്ചു. അത് കൊണ്ട് തന്നെ കെന്നഡിയുടെ കൊലപാതകത്തിനുള്ള വ്യക്തമായ കാരണങ്ങൾ ഇന്നും ദുരൂഹമായി തുടരുകയാണ്.

▪️ ജാക്കി എന്ന വിളിപ്പേരിൽ അറിയപ്പെട്ടിരുന്ന ജാക്വിലിൻ കെന്നഡിയുടെ പ്രഥമ വനിത ആയുള്ള ചുരുങ്ങിയ കാലത്തെ ജീവിതത്തിന്റെ ഓർമകളും കെന്നഡിയുടെ മരണം അവരെ ഏതു രീതിയിൽ ബാധിച്ചു എന്നതിനെപ്പറ്റിയുമുള്ള  അന്വേഷണമാണ്  പാബ്ലോ ലാറയിൻ,  ജാക്കി എന്ന ചിത്രത്തിലൂടെ പറയുന്നത്. കെന്നഡിയുടെ മരണശേഷം ഒരു ജേർണലിസ്റ്റുമായി ജാക്കി നടത്തുന്ന സംഭാഷണങ്ങളിലൂടെ പുരോഗമിക്കുന്ന ചിത്രം ഫ്ലാഷ്ബാക്കുകളിലൂടെ  അവരുടെ ജീവിതം അനാവരണം ചെയ്യുന്നു. ജാക്വിലിൻ പ്രഥമ വനിത ആയതിന് ശേഷം വൈറ്റ് ഹൗസിൽ വരുത്തിയ മാറ്റങ്ങളും അപ്രതീക്ഷിതമായ  പടിയിറങ്ങലും  കുഞ്ഞുങ്ങളുമായുള്ള പിന്നീടുള്ള ജീവിതവും എല്ലാം ചിത്രത്തിന് വിഷയമാകുന്നു.

🔹VERDICT🔹

▪️ മറ്റൊരു പ്രഥമ വനിതയ്ക്കും ഉണ്ടായിട്ടില്ലാത്ത തരത്തിലുള്ള അനുഭവങ്ങളിലൂടെയാണ് ജാക്വിലിൻ കെന്നഡി കടന്നു പോയത് . അപകടത്തിന്  ശേഷം രക്തം പുരണ്ട വസ്ത്രങ്ങളുമായാണ്  അവർ അന്ന് വൈസ് പ്രസിഡൻറായിരുന്ന ലിൻഡൻ ബി. ജോൺസന്റെ പ്രസിഡൻറായുള്ള സത്യപ്രതിജ്ഞയിൽ  പങ്കെടുത്തത്. ജാക്വിലിൻ കെന്നഡിയുടെ വേഷം നതാലി പോർട്ട്മാൻ അതിഗംഭീരമായി അവതരിപ്പിച്ചു . രൂപത്തിലും വേഷത്തിലും സംഭാഷണത്തിലും എല്ലാം ജാക്വിലിൻ ആയി മാറിയ നതാലി പോർട്ട്മാന് ഈ ചിത്രത്തിലെ അഭിനയത്തിന് മികച്ച നടിക്കുള്ള ഓസ്കാർ നോമിനേഷനും ലഭിച്ചിരുന്നു. ജീവിച്ചിരുന്ന ഒരു പ്രശസ്ത വ്യക്തിയുടെ ജീവിതം പരാതികൾക്കിട നല്കാതെ മനോഹരമായി വെള്ളിത്തിരയിലെത്തിച്ച നതാലി തന്നെയാണ് ഈ ചിത്രത്തിന്റെ പ്രധാന പ്ലസ് പോയിന്റ്.

▪️ തന്റെ മുൻ ചിത്രമായ നെരൂദയിലൂടെ നിരൂപക പ്രശംസ നേടിയ പാബ്ലോ  ലാറയിൻ ഈ ചിത്രത്തിലും  തന്റെ കഴിവ് തെളിയിക്കുന്നുണ്ട്.  നെരൂദയിൽ സാങ്കല്പികതയും യാഥാർത്ഥ്യവും ഇടകലർത്തിയ ആഖ്യാനശൈലി  സ്വീകരിച്ച  അദ്ദേഹം ജാക്കിയിൽ കൂടുതൽ യാഥാർത്ഥ്യത്തോട്  ചേർന്ന്  നില്ക്കുന്നതായി  കാണാം. കെന്നഡിയുടെ മരണം ചിത്രത്തിൽ കാണിക്കുന്നുണ്ടെങ്കിലും അതിന്റെ കാരണങ്ങളോ മറ്റ് സംഭവ വികാസങ്ങളോ ചിത്രത്തിൽ വിഷയമാകുന്നില്ല. പല തലങ്ങളിലൂടെ കടന്ന് പോകുന്ന ജാക്വിലിൻ കെന്നഡിയുടെ വ്യക്തിത്വമാണ് ഈ ചിത്രത്തിന്റെ പ്രതിവാദ്യ വിഷയം . ചിത്രം പലപ്പോഴും ഒരു ഡോക്യുമെന്ററിയുടെ തലത്തിലേക്ക് പോകുന്നുണ്ടെങ്കിലും നതാലി പോർട്ട്മാന്റെ പെർഫോർമൻസ് പ്രേക്ഷകനെ പിടിച്ചിരുത്താൻ പര്യാപ്തമാണ് .

🔹RATING : 3.5/5 ( GOOD )

©PRADEEP V K (AMAZING CINEMA)

5.0 Star (Excellent) · Comedy · Drama · English · USA

141. ONE FLEW OVER THE CUCKOO’S NEST (USA/COMEDY DRAMA/1975)

🔹141. ONE FLEW OVER THE CUCKOO’S NEST (USA/English/1975/Comedy Drama/133 Min/Dir: Milos Forman/Stars: Jack Nicholson, Louise Fletcher, Will Sampson )

🔹 SYNOPSIS 🔹

 

▪ ലോക സിനിമയിലെ ഏറ്റവും മഹത്തായ ചിത്രങ്ങളുടെ നിരയിൽ പെടുത്താവുന്ന അഞ്ച് സുപ്രധാന ഓസ്കാർ അവാർഡുകൾ ( മികച്ച ചിത്രം ,സംവിധായകൻ, നടൻ, നടി, തിരക്കഥ ) നേടിയ One Flew Over The Cuckoo’s Nest അതേ പേരിൽ തന്നെയുള്ള Ken Kesey എഴുതിയ നോവലിന്റെ ചലച്ചിത്രാവിഷ്കാരമാണ് .1963 ൽ ഒറിഗോണിലെ ഒരു മനോരോഗാശുപത്രിയിലാണ് ചിത്രത്തിന്റെ കഥ നടക്കുന്നത് .തന്റേതായ മെത്തേഡുകളിലൂടെ രോഗികളെ താനുദ്ദേശിക്കുന്ന രീതിയിൽ കൺട്രോൾ ചെയ്യുന്ന റാച്ചഡ് എന്ന ഹെഡ് നഴ്സിനാണ് രോഗികളുടെ ചുമതല .പ്രത്യക്ഷത്തിൽ എല്ലാ സൗകര്യങ്ങളും രോഗികൾക്ക് നല്കുന്നു എന്ന് തോന്നിക്കുമെങ്കിലും റാച്ചഡ് അവരെ മനുഷ്യരായിപ്പോലും കാണുന്നില്ല എന്നതായിരുന്നു സത്യം .

▪ ആ ഹോസ്പിറ്റലിലേക്ക് ജോലിയൊന്നും ചെയ്യാതെ സുഖമായി കഴിയാനായി മനോരോഗം അഭിനയിച്ച് മക്മർഫി എന്ന പെറ്റി ക്രിമിനൽ കൂടി എത്തുന്നതോടെ കഥ മാറുന്നു . രോഗികളുടെ ചെറിയ ആവശ്യങ്ങൾ പോലും അംഗീകരിക്കാത്ത നഴ്സ് റാച്ചഡിന്റെ തീരുമാനങ്ങളെ മക്മർഫി വെല്ലുവിളിക്കുന്നു. പല തരത്തിലുള്ള മനോരോഗികൾക്കിടയിൽ ബധിരനും മൂകനുമായ എല്ലാവരും ചീഫ് എന്ന് വിളിക്കുന്ന ഒരാളുമായി മക്മർഫി ചങ്ങാത്തത്തിലാവുന്നു .റാച്ചഡിന്റെ കടുത്ത നിയന്ത്രണങ്ങൾ കാറ്റിൽ പറത്തി രോഗികളെ സ്വാതന്ത്ര്യത്തിന്റെ ലോകം കാട്ടിക്കൊടുക്കുവാൻ മക്മർഫി ശ്രമിക്കുന്നു .എന്നാൽ ആ ശ്രമങ്ങൾ അപ്രതീക്ഷിതമായ ചില സംഭവ വികാസങ്ങൾക്ക് വഴിവയ്ക്കുന്നു .

🔹BEHIND THE SCENES🔹

▪ ശക്തമായ തിരക്കഥയും മികവുറ്റ സംവിധാനവും സൂക്ഷ്മമായ അഭിനയവും അടക്കം എല്ലാ മേഖലകളിലും ഒരേ പോലെ മികച്ച ഒരു ചലച്ചിത്രമാണിത് .നിരൂപകർ എല്ലാം ഒരേ പോലെ വാഴ്ത്തിയ 4.4 മില്യൺ ഡോളർ നിർമ്മാണച്ചെലവുള്ള ഈ ചിത്രത്തിന്റെ ബോക്സ് ഓഫീസ് കളക്ഷൻ 109 മില്യൺ ഡോളറായിരുന്നു . മക്മർഫി എന്ന കഥാപാത്രത്തിലൂടെ ജാക്ക് നിക്കോൾസൺ എന്ന നടൻ ലോകോത്തര നടൻമാരുടെ പട്ടികയിലേക്കുയർന്നു .തമാശയും ദു:ഖവും ദേഷ്യവും നിസ്സഹായതയും എല്ലാം ഒരേ പോലെ പ്രതിഫലിപ്പിച്ച മക്മർഫി എന്ന കഥാപാത്രം പ്രേക്ഷകരുടെ മനസ്സിൽ എന്നും മായാതെ നില്ക്കും .കഥാപാത്രങ്ങളുമായി കൂടുതൽ അടുക്കാൻ അഭിനേതാക്കൾ ഷൂട്ടിങ്ങ് കഴിയുന്നത് വരെ ചിത്രീകരണം നടന്ന  ഒറിഗോൺ സ്റ്റേറ്റ് ഹോസ്പിറ്റലിലെ സൈക്ക്യാട്രിക് വാർഡിൽ തന്നെ താമസിച്ചിരുന്നു. ചിത്രീകരണം നടന്നത് യഥാർത്ഥ മെന്റൽ ഹോസ്പിറ്റലിൽ തന്നെ ആയിരുന്നതിനാൽ യഥാർത്ഥ രോഗികളും ഡോക്ടർമാരും പല രംഗങ്ങളിലും മിന്നിമറയുന്നുണ്ട് . 

▪ നഴ്സ് റാച്ചഡ് എന്ന നെഗറ്റീവ് കഥാപാത്രത്തെ അവതരിപ്പിച്ച ലൂയിസ് ഫ്ലെച്ചർ സമാനതകളില്ലാത്ത അഭിനയമാണ് കാഴ്ച വച്ചത്. ഒരു രംഗത്ത് പോലും സൗമ്യത കൈവിടാത്ത എപ്പോഴും പുഞ്ചിരിക്കുന്ന മുഖഭാവമുള്ള എന്നാൽ ഉള്ളിൽ ക്രൂരതയുടെ കടലിരമ്പുന്ന നഴ്സ് റാച്ചഡ് സത്യത്തിൽ ഒരല്ഭുതമാണ് .ലോക സിനിമയിലെ ഏറ്റവും മികച്ച വില്ലൻ കഥാപാത്രങ്ങളുടെ ലിസ്റ്റിൽ നഴ്സ് റാച്ചഡ് ഉണ്ടാകുന്നതിന്റെ കാരണം ചിത്രം കണ്ടാൽ നിങ്ങൾക്ക് മനസ്സിലാകും. മറ്റൊരു പ്രധാന കഥാപാത്രമായ  ചീഫ് എന്ന ആജാനബാഹുവിനെ  മനോഹരമായി അവതരിപ്പിച്ച വിൽ സാംസൺ പ്രേക്ഷകരെ ഞെട്ടിക്കുമെന്ന് തീർച്ചയാണ് . ചിത്രത്തിൽ അഭിനയിച്ച നടൻമാരിൽ പലരും ആദ്യമായി ക്യാമറയെ അഭിമുഖീകരിക്കുകയായിരുന്നു എന്നത് ശ്രദ്ദേയമാണ് .

▪ മോഹൻലാൽ പ്രധാന വേഷത്തിലെത്തിയ പ്രിയദർശൻ സംവിധാനം ചെയ്ത താളവട്ടം എന്ന മലയാള ചലച്ചിത്രം ഈ ചിത്രത്തിൽ നിന്നും പ്രചോദനം ഉൾക്കൊണ്ടതാണ് .രണ്ട് ചിത്രങ്ങളുമായുള്ള ഒരു താരതമ്യം ഇവിടെ ഉദ്ദേശിക്കുന്നില്ലെങ്കിലും രണ്ട് ചിത്രങ്ങളും കണ്ട് അത് സ്വയം മനസ്സിലാക്കാൻ ശ്രമിക്കുക.  മലയാളത്തിലെ മികച്ച ചിത്രങ്ങളിൽ ഒന്നാണ് താളവട്ടം എന്ന് അംഗീകരിക്കുന്നതിനൊപ്പം തന്നെ മറ്റൊന്ന് കൂടി പറയേണ്ടതുണ്ട്. One Flew Over The Cuckoo’s Nest എന്ന ചിത്രം ഏതൊരു താരതമ്യങ്ങൾക്കും മുകളിലാണ് .ഈ ചിത്രം നല്കുന്ന അനുഭവം വാക്കുകൾക്കതീതമാണ് .അത് സ്വയം അനുഭവിച്ച് തന്നെ മനസ്സിലാക്കുക.

🔹VERDICT :  EXCELLENT ( A Powerful And Touching Cinematic Masterpiece )

©PRADEEP V K (AMAZING CINEMA)

4.0 Star (Very Good) · English · Political · Thriller · UK

140. THE GHOST WRITER (UK/POLITICAL THRILLER/2010)

🔹140. THE GHOST WRITER (UK-France-Germany/English/2010/Political Thriller/128 Min/Dir: Roman Polanski/Stars: Evan McGregor, Pierce Brosnan, Olivia Williams )

🔹 SYNOPSIS 🔹

◾റോബർട്ട് ഹാരിസ് എഴുതിയ The Ghost എന്ന നോവലിനെ ആധാരമാക്കി റൊമാൻ പൊളാൻസ്കി 2010 ൽ സംവിധാനം ചെയ്ത പൊളിറ്റിക്കൽ ത്രില്ലർ ആണ് The Ghost Writer. UK യിലും അയർലൻഡിലും The Ghost എന്ന പേരിലാണ് ചിത്രം റിലീസ് ചെയ്തത്. മുൻ ബ്രിട്ടീഷ് പ്രധാനമന്ത്രിയായ ആദം ലാങ്ങിന്റെ ആത്മകഥ എഴുതി പൂർത്തിയാക്കുന്നതിന് വേണ്ടി ഒരു ബ്രിട്ടീഷ് കൂലി എഴുത്തുകാരനെ പബ്ലിഷിംഗ് കമ്പനി സമീപിക്കുന്നു .ആത്മകഥയുടെ പകുതിയോളം പൂർത്തിയാക്കിയ മുൻ കൂലി എഴുത്തുകാരൻ മൈക്ക് മക്കാറ ദുരൂഹ സാഹചര്യത്തിൽ കുറച്ച് നാൾ മുമ്പ് കൊല്ലപ്പെട്ടത് മനസ്സിലാക്കുന്ന അയാൾ പതിമനസ്സോടെ കമ്പനി വാഗ്ദാനം ചെയ്ത വൻ പ്രതിഫലം മോഹിച്ച് ആ ജോലി ഏറ്റെടുക്കുന്നു .

◾മസാച്ചുസെറ്റ്സിൽ അതീവ സുരക്ഷിത സ്ഥലത്ത് സ്ഥിതി ചെയ്യുന്ന ലാങ്ങിന്റെ ബംഗ്ലാവിൽ എത്തുന്ന എഴുത്തുകാരൻ ആ സ്ഥലത്തിനും ലാങ്ങിനും നിരവധി ദുരൂഹതകളുള്ളതായി മനസ്സിലാക്കുന്നു . ഇൻറർനാഷണൽ ക്രിമിനൽ കോർട്ടിന്റെ വിചാരണ നേരിടുന്ന ആദം ലാങ്ങിന്റെ നിരവധി രഹസ്യങ്ങൾ നിറഞ്ഞ ജീവിതവും മുൻ എഴുത്തുകാരന്റെ അപകട മരണവും എല്ലാം അയാളെ കൂടുതൽ സമ്മർദ്ദത്തിലാഴ്ത്തുന്നു .ആദം ലാങ്ങ് എന്ന അതിപ്രശസ്തനായ വ്യക്തിയുടെ പുറമെയുള്ള ചിരിക്കുന്ന മുഖത്തിന് പിന്നിൽ ഉറങ്ങിക്കിടക്കുന്ന രഹസ്യങ്ങൾ കണ്ടെത്താനുള്ള ആത്മകഥാകൃത്തിന്റെ ശ്രമങ്ങളാണ് ചിത്രം പറയുന്നത് .

🔹BEHIND THE SCENES🔹

◾മുൻ ബ്രിട്ടീഷ് പ്രധാനമന്ത്രി ടോണി ബ്ലെയറിന്റെ ജീവിതവുമായി പുസ്തകത്തിനും സിനിമയ്ക്കും നിരവധി സാദ്യശ്യങ്ങുണ്ട് .പ്രധാനമന്ത്രിയായിരുന്നപ്പോൾ ബ്രിട്ടന്റെ പൊതു താല്പര്യങ്ങൾക്ക് വിരുദ്ധമായി അദ്ദേഹം എടുത്ത പല തീരുമാനങ്ങളും പിന്നീട് ശക്തമായ വിമർശനങ്ങൾക്ക് കാരണമായിരുന്നു .അതെല്ലാം തന്റെ The Ghost എന്ന പുസ്തകത്തിന് പ്രചോദനമായതായി റോബർട്ട് ഹാരിസ് തന്നെ സമ്മതിച്ചിട്ടുണ്ട്. അദ്ദേഹവും സംവിധായകൻ റോമൻ പൊളാൻസ്കിയും ചേർന്നാണ് ചിത്രത്തിന്റെ തിരക്കഥ തയ്യാറാക്കിയിരിക്കുന്നത് . 

◾ആദം ലാങ്ങ് എന്ന മുൻ ബ്രിട്ടീഷ് പ്രധാനമന്ത്രിയായി പിയേഴ്സ് ബ്രോസ്നൻ ഗംഭീര പ്രകടനം കാഴ്ചവച്ചു .അധികാരം നഷ്ടപ്പെട്ടെങ്കിലും പെരുമാറ്റത്തിലും സംസാരത്തിലും ഗാംഭീര്യം നിലനിർത്തി ദുരൂഹതകൾ ഉള്ളിലൊളിപ്പിച്ച ആ കഥാപാത്രം മുൻ ജയിംസ് ബോണ്ട് താരത്തിന് ചേരുന്നത് തന്നെയായിരുന്നു .ഒരു രേഖയിലും പേര് വെളിപ്പെടുത്താത്ത എഴുത്തുകാരനെന്ന നിലയിലുള്ള ഒരു ക്രഡിറ്റും ലഭിക്കാത്ത ഗോസ്റ്റ് റൈറ്റർ ആയി ഇവാൻ മക്ഗ്രിഗർ മികച്ച പ്രകടനം കാഴ്ച വച്ചു .ശക്തമായ തിരക്കഥയും വിഖ്യാത സംവിധായകൻ റൊമാൻ പൊളാൻസ്കിയുടെ  സംവിധാനമികവും ഒരു പൊളിറ്റിക്കൽ ത്രില്ലറിന് വേണ്ട ആകാംഷയും ചടുലതയും ചിത്രത്തിന് സമ്മാനിക്കുന്നു .ചിത്രത്തിലെ ഏറ്റവും മികച്ച ഭാഗം ക്ലൈമാക്സ് തന്നയായിരുന്നു എന്ന് പറയാതെ വയ്യ .അന്താരാഷ്ട്ര തലത്തിൽ കോളിളക്കം സൃഷ്ടിച്ച യഥാർത്ഥ സംഭവ വികാസങ്ങൾ ആധാരമാക്കിയ ഈ ചിത്രം നിരവധി അവാർഡുകളും കരസ്ഥമാക്കിയിട്ടുണ്ട്.

🔹VERDICT :  VERY GOOD ( A Stylish Political Thriller With A Tight Screenplay )

©PRADEEP V K (AMAZING CINEMA)