3.5 Star (Good) · Drama · Sweden · Swedish

191. THE SQUARE (SWEDEN/DRAMA/2017)

#Oscar2018MovieReviews
Post No. 4

🔰 സ്ത്രീകളും പുരുഷൻമാരും ഉൾപ്പെടെ നിരവധി വൈറ്റ് കോളർ വിഭാഗക്കാർ പങ്കെടുക്കുന്ന ഒരു ഡിന്നറിനിടയിൽ ഒരു പെർഫോർമൻസ് ആർട്ട് നടക്കുന്നു. ഒരു ആൾക്കുരങ്ങിന്റെ മാനറിസങ്ങളുമായെത്തുന്ന ഒരാളാണ് അന്നത്തെ പെർഫോർമർ. ആദ്യം കാണികൾ തമാശ രൂപത്തിൽ കാണുന്നെങ്കിലും അയാൾ ആൾക്കുരങ്ങിനെപ്പോലെ വയലന്റ് ആവുകയും കളിയാക്കുന്നവരെ ഉപദ്രവിക്കുകയും ചെയ്യാൻ തുടങ്ങിയതോടെ പലരും ഭയചകിതരാവുന്നു. മനുഷ്യന്റെ യാതൊരു വിധ ഭാവങ്ങളും ഒരിക്കൽ പോലും പ്രകടിപ്പിക്കാത്ത അയാൾ മനുഷ്യനാണോ അതോ ഇനി ആൾക്കുരങ്ങാണോ?

🔰ചിത്രം : ദി സ്ക്വയർ THE SQUARE (2017)
രാജ്യം : സ്വീഡൻ
‎ഓസ്കാർ 2018 നോമിനേഷൻ : മികച്ച വിദേശ ഭാഷാചിത്രം

🔰 സ്വീഡനിലെ പ്രശസ്തമായ ഒരു ആർട്ട് മ്യൂസിയം പുതിയ കാലഘട്ടത്തിനനുസൃതമായി മുഖം മിനുക്കാനുള്ള ശ്രമത്തിലാണ്. ക്യുറേറ്റർ ആയ ക്രിസ്റ്റ്യന്റെ നേതൃത്വത്തിൽ ദി സ്ക്വയർ എന്ന പേരിൽ ഒരു ആർട്ട് എക്സിബിഷൻ ആരംഭിക്കാനുള്ള ശ്രമത്തിലാണ് അവർ. മ്യൂസിയത്തിലേക്ക് ആൾക്കാരെ ആകർഷിക്കുന്നതിന് വേണ്ടി ഒരു പ്രമോഷൻ കമ്മിറ്റിയേയും ഏർപ്പാടാക്കുന്നു. എന്നാൽ പ്രമോഷൻ കമ്മിറ്റിക്കാർ ചെയ്ത ഒരബദ്ധം ക്രിസ്റ്റ്യനും മ്യൂസിയത്തിനുമെതിരെ ജനങ്ങളിൽ ഒരു വിഭാഗം തിരിയാൻ കാരണമാകുന്നു.

🔰 90 മത്തെ അക്കാദമി അവാർഡിൽ മികച്ച വിദേശഭാഷാ ചിത്രത്തിനുള്ള നോമിനേഷൻ നേടിയ ദി സ്ക്വയർ ഒരു ആക്ഷേപഹാസ്യ ചിത്രമാണ്. പ്രധാന കഥയുടെ പ്രയാണത്തിനിടയിൽ വരുന്ന പല സംഭവങ്ങളും ഇരുതലമൂർച്ചയുള്ളവയാണ്. നിരവധി ആർട്ടിസ്റ്റിക് സിംബൽസിലൂടെ മുന്നോട്ട് പോകുന്ന ചിത്രം പലപ്പോഴും ഒരു സ്വയം വിമർശനത്തിന് നമ്മെ പ്രേരിപ്പിക്കുന്നുണ്ട്. ഉദാഹരണത്തിന് തിരക്കുള്ള ഒരു പാതയിൽ പ്ലക്കാർഡുമായി നിൽക്കുന്ന ഒരു സാമൂഹ്യ പ്രവർത്തക എല്ലാവരോടും ചോദിക്കുന്നുണ്ട് ‘Do you want to save a life today? എന്ന്. എന്നാൽ ആ സ്ത്രീയോ അത് ശ്രദ്ധിക്കാതെ പോകുന്ന ആൾക്കാരോ തൊട്ടപ്പുറത്ത് ഒരു വൃദ്ധൻ അവശനായി കിടക്കുന്നത് ശ്രദ്ധിക്കുന്നതേ ഇല്ല!

🔰 ഒരു ആർട്ട് മ്യൂസിയത്തിന്റെ കഥയായതുകൊണ്ടാവാം പല കാര്യങ്ങളും ഇൻഡയറക്ടായാണ് ചിത്രത്തിൽ പറയുന്നത്. സാമാന്യയുക്തിയെ സംവിധായകൻ പലപ്പോഴും വെല്ലുവിളിക്കുന്നുമുണ്ട്. സംഭാഷണങ്ങളുടെ ആധിക്യവും രണ്ടര മണിക്കൂർ ദൈർഘ്യവും പ്രേക്ഷകർക്ക് മുഷിച്ചിലുണ്ടാക്കും. ചിത്രത്തിൽ ഏറ്റവും അദ്ഭുതപ്പെടുത്തിയ രംഗം ആദ്യം പറഞ്ഞ ഡിന്നറിനിടയിലെ ആർട് പെർഫോർമൻസാണ്. പ്ലാനറ്റ് ഓഫ് ദി ഏപ്സ്, കിംഗ് കോംഗ് എന്നിവയടക്കം നിരവധി ഹോളിവുഡ് ചിത്രങ്ങളിൽ ആൾക്കുരങ്ങുകളെ അവതരിപ്പിച്ച ടെറി നോട്ടറിയുടെ ഗംഭീര പെർഫോർമൻസ് ഡിന്നറിനെത്തിയവരെപ്പോലെ പ്രേക്ഷകരെയും ഞെട്ടിക്കുമെന്നുറപ്പാണ്.

🔸റേറ്റിംഗ് : 3.5/5

More Reviews @ http://www.amazingcinemareviews.wordpress.com

©️ PRADEEP V K

Advertisements