4.0 Star (Very Good) · Crime · India · Tamil

180. THEERAN ADHIGARAM ONDRU (INDIA/CRIME THRILLER/2017)

⏺️ ബ്രിട്ടീഷ് ഭരണകാലത്തിന് മുമ്പ് മൃഗങ്ങളെ വേട്ടയാടി ജീവിച്ചിരുന്ന ബാവരിയ ഗോത്രവർഗക്കാർ വർഷങ്ങൾക്കിപ്പുറം കാടും മൃഗങ്ങളും കുറഞ്ഞപ്പോളും വേട്ടയാടൽ എന്ന തങ്ങളുടെ കുലത്തൊഴിൽ മറന്നില്ല. മൃഗങ്ങൾക്ക് പകരം ഇന്ന് അവർ വേട്ടയാടുന്നത് മനുഷ്യരെ ആണെന്ന് മാത്രം!

🔸180) THEERAN ADHIGARAM ONDRU (2017)🔸 Tamil | Crime Thriller🔸

⏺️ സിനിമ തുടങ്ങുമ്പോൾ സീറ്റിൽ ചാരിക്കിടക്കുന്ന നിങ്ങൾ ഒരു ഘട്ടത്തിൽ താൻ പോലുമറിയാതെ സീറ്റിന്റെ അറ്റത്തേക്ക് നീങ്ങിവരുന്ന അനുഭവം നിങ്ങൾക്കുണ്ടായിട്ടുണ്ടോ? സ്ക്രീനിൽ വില്ലൻമാരുടെ ഓരോ അടിയും സ്വന്തം തലയ്ക്കാണ് കൊള്ളുന്നതെന്ന് തോന്നിയിട്ടുണ്ടോ? ഹൊറർ അല്ലാത്ത ഒരു സിനിമ കണ്ടിരുക്കുമ്പോൾ അകാരണമായ ഒരു ഭയം നിങ്ങളുടെ ഉള്ളിൽ നാമ്പിട്ടിട്ടുണ്ടോ? ഇല്ലെങ്കിൽ തീരൻ അധികാരം ഒണ്‌ഡ്ര് എന്ന തമിഴ് സിനിമ കാണുക. ഈ അനുഭവങ്ങളെല്ലാം നിങ്ങൾക്കുണ്ടാകും.

⏺️ വർഷങ്ങൾക്ക് മുമ്പ് തമിഴ്നാട്ടിനെ പിടിച്ചുലച്ച ഹൈവേ കേന്ദ്രീകരിച്ച് നടന്ന നിരവധി അതിക്രൂരമായ കൊലപാതകങ്ങൾക്ക് കാരണക്കാരായവരെ പിടികൂടാൻ പോലീസ് നടത്തിയ സാഹസികമായ കേസന്വേഷണമാണ് ഈ ചിത്രത്തിന് പ്രചോദനമായത്. ഒരു സാധാരണ പോലീസ് സ്റ്റോറി പ്രതീക്ഷിച്ച് തിയേറ്ററിൽ എത്തുന്നവരെ അക്ഷരാർത്ഥത്തിൽ ഈ ചിത്രം ഞെട്ടിക്കും.തുടക്കത്തിലുള്ള കുറച്ച് റൊമാൻസ് കുടുംബ രംഗങ്ങൾ കഴിഞ്ഞാൽ ശ്വാസം വിടാൻ പോലും അനുവദിക്കാതെ പ്രേക്ഷകരെ പിടിച്ചിരുത്തുന്ന ഗംഭീര ത്രില്ലർ ആണ് ഈ ചിത്രം.

⏺️ ആദ്യ ചിത്രങ്ങളിൽ മികച്ച വേഷങ്ങളിൽ വന്ന് കഴിവ് തെളിയിച്ച് പിന്നീട് തെറ്റായ സെലക്ഷനുകളിലൂടെ അടുത്ത കാലത്ത് അത്ര ശ്രദ്ധിക്കപ്പെടാതായ കാർത്തിയുടെ തകർപ്പൻ തിരിച്ചുവരവാണ് ഈ ചിത്രം. ആക്ഷൻ രംഗങ്ങളിലും വൈകാരിക മുഹൂർത്തങ്ങളിലും കാർത്തി മികച്ച രീതിയിൽ പെർഫോം ചെയ്തു. ഓമ ബാവരിയ എന്ന ജീവിച്ചിരുന്ന കഥാപാത്രമായി അഭിമന്യു സിംഗ് ഞെട്ടിച്ചു കളഞ്ഞു. ക്രൂരത മാത്രം കൈമുതലാക്കിയ മനുഷ്യത്വം എന്തെന്നറിയാത്ത ആ കഥാപാത്രം ഇതിലും നന്നായി അവതരിപ്പിക്കാൻ മറ്റാർക്കും കഴിയില്ല എന്നുറപ്പിച്ച് പറയാം.

⏺️ഓപ്പറേഷൻ ബാവരിയ എന്ന പേരിൽ അറിയപ്പെടുന്ന തമിഴ്നാട് പോലീസിന് രാജ്യത്താകമാനം പ്രശസ്തി നേടിക്കൊടുത്ത പോലീസ് ഓപ്പറേഷനെ അതിന്റെ തീവ്രത ഒട്ടും നഷ്ടപ്പെടുത്താതെ യഥാർത്ഥ സംഭവങ്ങളിൽ വെള്ളം ചേർക്കാതെ അഭ്രപാളികളിലെത്തിച്ച H.വിനോത് എന്ന സംവിധായകന്റെ കഴിവിനെ എത്ര പുകഴ്ത്തിയാലും മതിയാവില്ല. എല്ലാത്തരം പ്രേക്ഷകരെയും ആകർഷിക്കാനായി കുറച്ച് ലൗ സ്റ്റോറിയും ഗാനങ്ങളും ഉൾപ്പെടുത്തിയിട്ടുണ്ടെങ്കിലും കഥയുടെ തീവ്രത അതേപടിയിൽ അദ്ദേഹം അവതരിപ്പിച്ചു. ആദ്യ പകുതിക്ക് മുമ്പുള്ള ആക്ഷൻ രംഗങ്ങൾ ശ്വാസമടക്കിപ്പിടിച്ചാണ് കണ്ടിരുന്നത്. ഒരു ക്രിമിനലിനെ പിടികൂടാനായി ബസിന് മുകളിലുള്ള ആക്ഷൻ രംഗങ്ങളൊക്കെ പ്രേക്ഷകന്റെ ഹൃദയമിടിപ്പ് കൂട്ടാൻ പര്യാപ്തമാണ്. ഒരു മികച്ച ക്രൈം ആക്ഷൻ ത്രില്ലർ കാണണമെന്നുണ്ടെങ്കിൽ മറ്റൊന്നും ആലോചിക്കാതെ തീരൻ അധികാരം ഒണ്ഡ്ര് കാണാൻ ടിക്കറ്റെടുക്കാം.

🔸RATING : 3.75/5 ( AN EDGE OF THE SEAT CRIME THRILLER. DON’T MISS IT )

©PRADEEP V K

Advertisements
3.5 Star (Good) · Horror · India · Tamil

176. AVAL (INDIA/HORROR/2017)

🔸176) AVAL (2017)🔸 A REVIEW🔸

🔼The Goal Of All Life Is Death
– Sigmund Freud

🔸COUNTRY : INDIA
LANGUAGE : TAMIL
GENRE : HORROR
DIRECTION : MILIND RAU
‎STARRING : SIDDHARTH, ANDREA
‎JEREMIAH, ANISHA VICTOR
‎THEATRE : ARIESPLEX AUDI 6,
‎TRIVANDRUM

🔼SYNOPSIS🔽

🔸 ഇന്ത്യൻ സിനിമയിൽ മികച്ച ഹൊറർ ചിത്രങ്ങൾ ഇറങ്ങുന്നത് തമിഴിലാണ് എന്നത് വളരെ സത്യമാണ്. മായ, ഡെമൺടേ കോളനി , പിസ്സ, പിസാച് എന്നീ ചിത്രങ്ങൾ എല്ലാം ക്വാളിറ്റിയിൽ ഫോറിൻ ഹൊറർ മൂവീസിനോട് കിടപിടിക്കുന്നവയാണ്. മികച്ച ഹൊറർ ചിത്രങ്ങൾ പൊതുവേ കുറയാനുള്ള പ്രധാന കാരണം ഇന്നത്തെ പ്രേക്ഷകനെ ഭയപ്പെടുത്തുക എന്നത് വളരെ ബുദ്ധിമുട്ടുള്ള കാര്യമാണ് എന്നത് തന്നെയാണ്. അത് കൊണ്ട് തന്നെ മിലിൻഡ് റാവുവും സിദ്ധാർത്ഥും ചേർന്ന് പുതിയ ഒരു ഹൊറർ ചിത്രം പ്ലാൻ ചെയ്യുന്നു എന്നറിഞ്ഞപ്പോൾ മുതൽ പ്രതീക്ഷകൾ ഉണ്ടായിരുന്നു. തമിഴ് ,തെലുങ്ക്, ഹിന്ദി ഭാഷകളിൽ ഒരേ സമയം ചിത്രീകരിച്ച ചിത്രത്തിന്റെ തിരക്കഥ സംവിധായകനും സിദ്ധാർത്ഥും ചേർന്നാണ് എഴുതിയത് .സിദ്ധാർത്ഥ് ചിത്രത്തിന്റെ സഹനിർമ്മാതാവും കൂടി ആയിരുന്നു.

🔸 ഹിമാലയൻ മലനിരകൾക്ക് അടുത്തുള്ള ഒരു വീട്ടിൽ താമസിക്കുന്ന കൃഷ് എന്ന ന്യൂറോ സർജനും ഭാര്യ ലക്ഷ്മിയും തങ്ങളുടെ അടുത്ത വീട്ടിൽ പുതിയതായി താമസത്തിനെത്തുന്ന കുടുംബവുമായി വളരെ പെട്ടെന്ന് സൗഹൃദത്തിലാവുന്നു. അടുത്ത വീട്ടിലെ പെൺകുട്ടിയായ ജെന്നി കൃഷിനോട് തുടക്കത്തിലേ ഒരു പ്രത്യേക അടുപ്പം കാണിക്കുന്നത് ലക്ഷ്മിയുടെ ശ്രദ്ധയിൽ പെടുന്നു. എന്നാൽ പുറമേ സുന്ദരമായ തങ്ങളുടെ അയർക്കാരുടെ വീടിനും അവിടത്തെ താമസക്കാർക്കും ഭീഷണിയായി അമാനുഷികമായ ചില സംഭവങ്ങൾ അവിടെ അരങ്ങേറുമ്പോൾ അതിനുള്ള കാരണങ്ങൾ കണ്ടെത്താൻ ഒരു ഡോക്ടർ എന്ന നിലയിലുള്ള തന്റെ അറിവുകൾ കൃഷിന് മതിയാകാതെ വരുന്നു.

🔼POSITIVES & NEGATIVES🔽

🔸ടൈറ്റിൽ കാർഡിൽ THANKS TO THE DEVIL എന്ന് എഴുതിക്കാണിച്ചത് കണ്ടപ്പോൾത്തന്നെ സംവിധായകന്റെ സൃഷ്ടിയിൽ പ്രതീക്ഷ വർദ്ധിച്ചിരുന്നു. ഒരു ഹൊറർ ചിത്രം കാണാൻ പോകുന്ന പ്രേക്ഷകൻ ആഗ്രഹിക്കുന്നത് പോലെ വളരെ മികച്ച ഹൊറർ രംഗങ്ങൾ ചിത്രത്തിലുണ്ട്. അതിൽ ഏറ്റവും മികച്ചത് ഇൻറർവെലിന് തൊട്ടുമുമ്പുള്ള എക്സോർസിസം രംഗമാണ്. സിനിമകളിൽ കണ്ടിട്ടുള്ളവയിൽ വച്ച് വളരെ മികച്ച എക്സോർസിസം രംഗങ്ങളിൽ ഒന്നായിരുന്നു അത്. ആ രംഗത്തിന്റെ ചിത്രീകരണത്തിൽ പുതുമുഖം അനീഷാ വിക്ടറും സംവിധായകനും തീർച്ചയായും അഭിനന്ദനം അർഹിക്കുന്നു. സിദ്ധാർത്ഥും ആൻഡ്രിയയും തങ്ങളുടെ കഥാപാത്രങ്ങൾ നല്ല വെടിപ്പായി ചെയ്തു എന്ന് പറയാം. ധാരാളം ജമ്പ് സ്കെയർ രംഗങ്ങൾ ചിത്രത്തിലുണ്ട്. നല്ലൊരു തിയേറ്ററിൽ കണ്ടാൽ ഉറപ്പായും നിങ്ങൾ ഞെട്ടിയിരിക്കും. ഇന്ത്യൻ സിനിമയിലെ മികച്ച ഹൊറർ ചിത്രങ്ങളുടെ പട്ടികയിൽ തീർച്ചയായും ഈ ചിത്രവും ഉണ്ടാകും.

🔸നെഗറ്റീവ് സൈഡ് എന്ന് പറയുന്നത് ഹൊറർ ചിത്രങ്ങളിലെ സ്ഥിരം ക്ലിഷേ കഥാഗതി ആണ് ചിത്രത്തിനെന്നതാണ്. പ്രേത സാന്നിധ്യം തോന്നിപ്പിക്കുന്നതിന് വേണ്ടി കാണിക്കുന്ന രംഗങ്ങൾ പലതും നമുക്ക് പരിചിതമാണ്. ഇൻറർവെലിന് ശേഷം രഹസ്യങ്ങളുടെ പൂട്ട് തുറക്കുമ്പോൾ പല തവണ കണ്ട് മറന്ന പാതയിലൂടെയാണ് സഞ്ചരിക്കുന്നതെന്ന് പ്രേക്ഷകന് തോന്നാം. എങ്കിലും ഹൊറർ രംഗങ്ങളിലെ സമ്പന്നത കൊണ്ടും ക്ലൈമാക്സ് ട്വിസ്റ്റ് കൊണ്ടും കൂടുതലൊന്നും ചിന്തിക്കാൻ ഇടകൊടുക്കാതെ പ്രേക്ഷകനെ ആദ്യവസാനം പിടിച്ചിരുത്താൻ സംവിധായകന് കഴിഞ്ഞു. ഗാനങ്ങളും BGM ഉം ചിത്രത്തിന്റെ മൊത്തം മൂഡിന് ചേർന്ന് നിന്നു. CGI രംഗങ്ങൾ എല്ലാം മികവ് പുലർത്തി. നല്ല ശബ്ദ ദ്യശ്യ സംവിധാനങ്ങളുള്ള തിയേറ്ററിൽ നിലവാരമുള്ള പ്രേക്ഷകരോടൊപ്പം മാത്രം ആസ്വദിക്കേണ്ട ചിത്രമാണിത് എന്നത് പ്രത്യേകം ഓർമ്മിപ്പിക്കുന്നു.

🔸RATING : 3.5/5 (GOOD)

🔸More Reviews @
http://www.amazingcinemareviews.wordpress.com

🔸Join AMAZING CINEMA Telegram Channel @
http://t.me/AmazingCinema

©PRADEEP V K

4.0 Star (Very Good) · Crime · India · Tamil · Thriller

160. THUPPARIVALAN (INDIA/CRIME THRILLER/2017)

🔹160) THUPPARIVALAN (2017)  🔹 A REVIEW 🔹

🔹 “കൊല്ലപ്പെട്ടത് ഒരു പട്ടി ആണെങ്കിലും അപകടസ്ഥലത്ത് നിന്ന് ലഭിച്ച തെളിവുകൾ അവിടെ കൂടുതൽ വലിയ എന്തോ സംഭവങ്ങൾ നടന്നതായി ഒരു സംശയം ഉണ്ടാക്കുന്നു . ഞാനറിയാത്ത ലോകം അറിയാത്ത ആരോ ഇതിനെല്ലാം പിന്നിലുണ്ടെന്ന് ഉറപ്പാണ് ”

🔹COUNTRY : INDIA

     LANGUAGE : TAMIL

     GENRE : CRIME THRILLER

     DIRECTION : MYSSKIN

🔹 BACKGROUND 🔹

🔼 സർ ആർതർ കോനൻ ഡോയൽ സൃഷ്ടിച്ച   ഡിറ്റക്ടീവ് ഷെർലക്ക് ഹോംസ്  യാതൊരു മുഖവുരയും ആവശ്യമില്ലാത്ത കഥാപാത്രമാണ്. തന്റെ അസാമാന്യമായ ബുദ്ധികൂർമ്മതയാൽ നോവലിലൂടെയും സിനിമകളിലൂടെയും സീരീസുകളിലൂടെയും ലോകമെമ്പാടും ഉള്ള ആസ്വാദകരെ വിസ്മയിപ്പിച്ച ആ കഥാപാത്രത്തിന് സമാനമായി മറ്റൊരാളെ സങ്കല്പിക്കാൻ പോലുമാവില്ല . ഷെർലക് ഹോംസിന് സമാനമായി മറ്റൊരു കഥാപാത്രത്തെ സൃഷ്ടിക്കാനുള്ള ശ്രമങ്ങളൊന്നും പൂർണമായി വിജയിച്ചു എന്ന് പറയാനുമാവില്ല. ബംഗാളി സിനിമയിൽ ബോംകേഷ് ബക്ഷി ഉണ്ടെങ്കിലും സൗത്ത് ഇൻഡ്യൻ സിനിമയിൽ അത് പോലെ ഒരു കഥാപാത്രം ഉണ്ടോ എന്ന് സംശയമാണ്. എന്നാൽ കഴിഞ്ഞ ദിവസം തുപ്പരിവാലൻ എന്ന തമിഴ് ചിത്രം കണ്ടതിന് ശേഷം അതിനുള്ള ഉത്തരം എനിക്ക് കിട്ടി .നമുക്കും ഒരു ഷെർലക് ഹോംസിനെ ലഭിച്ചു കഴിഞ്ഞു .അദ്ദേഹത്തിന്റെ പേര് കനിയൻ പൂങ്കുന്ദ്രൻ എന്നാണ്. 

🔼തന്റെ സുഹൃത്തും സഹപ്രവർത്തകനുമായ മനോഹറിനോടൊപ്പം പ്രൈവറ്റ് ഡിറ്റക്ടീവ് ഏജൻസി നടത്തുന്ന കനിയൻ എന്ന തുപ്പരിവാലൻ(ഡിറ്റക്ടീവ്) തന്റെ കഴിവിനൊത്തുള്ള ഒരു കേസ് ലഭിക്കാത്തതിൽ ദു:ഖിതനാണ്. എന്നാൽ തന്റെ പട്ടിയെ കൊന്നത് ആരാണെന്ന് കണ്ട് പിടിക്കണമെന്ന ആവശ്യവുമായി ഒരു കൊച്ചു കുട്ടി അദ്ദേഹത്തെ സമീപിച്ചപ്പോൾ താൻ ഇതുവരെയും അന്വേഷിച്ചിട്ടുള്ളതിൽ ഏറ്റവും കോംപ്ലിക്കേറ്റഡ് ആയ  അപകടകരമായ കേസ് ആണ് തന്റെ മുന്നിൽ എത്തിയിരിക്കുന്നതെന്ന് കനിയൻ ഒരിക്കലും വിചാരിച്ചിരുന്നില്ല. 

🔹 OBSERVATIONS 🔹

🔼 തമിഴ് സിനിമയിൽ ഒരു നവതരംഗത്തിന് തുടക്കം കുറിച്ച സംവിധായകനാണ് മിഷ്കിൻ. 2006 ൽ ചിത്തിരം പേശുതടി എന്ന ചിത്രത്തിൽ തുടങ്ങി തന്റെ എട്ടാമത്തെ സംവിധാന സംരംഭമായ തുപ്പരിവാലനിൽ എത്തി നില്ക്കുമ്പോൾ ഇന്ത്യൻ സിനിമയിലെ ഏറ്റവും മികച്ച സംവിധായകരുടെ നിരയിലേക്ക് അദ്ദേഹം എത്തിയിരിക്കുന്നതായി ധൈര്യപൂർവ്വം പറയാം .

🔼തന്റെ അഭിനയ ജീവിതത്തിലെ ഏറ്റവും മികച്ച കഥാപാത്രമായ വളരെ വ്യത്യസ്തമായ സ്വഭാവ സവിശേഷതകൾക്ക് ഉടമയായ കനിയൻ പൂങ്കുന്ദ്രനെ  വിശാൽ മനോഹരമായി അവതരിപ്പിച്ചു . ചിത്രത്തിന്റെ നിർമ്മാതാവും വിശാൽ തന്നെയായിരുന്നത് വിട്ടുവീഴ്ചയില്ലാത്ത ചിത്രീകരണത്തിന് കൂടുതൽ സഹായകമായി. കനിയന്റെ സന്തത സഹചാരിയായ മനോഹറിനെ പ്രസന്ന ഗംഭീരമാക്കി . എങ്കിലും ഞെട്ടിച്ചു കളഞ്ഞത് ചിത്രത്തിലെ പ്രധാന വില്ലൻ കഥാപാത്രമായെത്തിയ വിനയ് ആണ് .ഇത് വരെ നിഷ്കളങ്ക വേഷങ്ങളിൽ കണ്ടിട്ടുള്ള വിനയ് അവതരിപ്പിച്ച ഡെവിൾ എന്ന കഥാപാത്രം തമിഴ് സിനിമയിൽ വന്നിട്ടുള്ളവയിൽ ഏറ്റവും  മികച്ച വില്ലൻ കഥാപാത്രങ്ങളിൽ ഒന്നാണെന്ന് നിസംശയം പറയാം .നായകന് ഒത്ത എതിരാളിയായ ആ വില്ലൻ കഥാപാത്രം പ്രേക്ഷകരെ ഞെട്ടിക്കുമെന്ന് ഉറപ്പാണ്. ഭാഗ്യരാജ്, ആൻഡ്രിയ ജറേമിയ തുടങ്ങിയവരുടേയും നെഗറ്റിവ് വേഷങ്ങൾ ചിത്രത്തിന്റെ മാറ്റ് കൂട്ടി. 

🔼കഥയുടെ ഒഴുക്കിനെ ബാധിക്കുന്ന പാട്ടുകളോ കോമഡിയോ ഒന്നും ചിത്രത്തിലില്ല .വളരെ മികച്ച പശ്ചാത്തല സംഗീതവും ചടുലമായ എഡിറ്റിംഗും പ്രേക്ഷകരെ പിടിച്ചിരുത്താൻ പര്യാപ്തമായിരുന്നു. ഒരു പാളിച്ചകളുമില്ലാത്ത മിസ്ക്കിന്റെ ശക്തമായ തിരക്കഥ തന്നെയാണ് ചിത്രത്തിന്റെ പ്രധാന ശക്തി.  ചിത്രത്തിന്റെ ആക്ഷൻ രംഗങ്ങൾ എല്ലാം കാണികളിൽ രോമാഞ്ചമുണ്ടാക്കുമെന്ന് ഉറപ്പാണ് . കല്ലുകടി ആയി തോന്നിയത്  അനു ഇമ്മാനുവൽ അവതരിപ്പിച്ച കഥാപാത്രത്തിന്റെ ചില രംഗങ്ങൾ മാത്രമാണ്. ചിത്രത്തിലെ പ്രധാനപ്പെട്ട ഒരു രംഗത്തിലെ വിശാലിന്റെ പെർഫോർമൻസ് കുറ്റപ്പെടുത്തുന്നവർ കനിയൻ എന്ന കഥാപാത്രത്തെ പൂർണമായും ഉൾക്കൊള്ളാത്തത് കൊണ്ടാണെന്നാണ് എനിക്ക് തോന്നുന്നത് .

🔹LAST WORD 🔹

🔼ഒരു മികച്ച ക്രൈം ത്രില്ലർ എങ്ങനെയാവണം എന്നതിന്റെ ഉദാഹരണമാണ് തുപ്പരിവാലൻ . ആദ്യന്തം ആകാംക്ഷാഭരിതമായ ചടുലമായ ഈ ചിത്രം ഈ വർഷം തിയേറ്ററിൽ കണ്ട ഏറ്റവും മികച്ച ചിത്രങ്ങളിൽ ഒന്നായിരുന്നു. അത് തിയേറ്ററിൽ നിന്നു തന്നെ ആസ്വദിക്കാൻ ശ്രമിക്കുക .ഇത് വരെ കണ്ടിട്ടില്ലാത്ത തരത്തിലുള്ള കൊലപാതക ദൃശ്യങ്ങൾ നിറഞ്ഞ ഈ ചിത്രം കണ്ട പ്രേക്ഷകന്റെ ഉള്ളിൽ അകാരണമായ ഒരു ഭയം ഉണ്ടായാൽ അദ്ഭുതപ്പെടാനില്ല . ചിലപ്പോൾ ഒരു പെൻസിൽ മുനയുടെ രൂപത്തിൽ മരണം ആൾക്കൂട്ടത്തിനിടയിൽ നിങ്ങളെ കാത്ത് നില്ക്കുന്നുണ്ടാവാം .

🔹 Join AMAZING CINEMA Telegram Channel @

http://t.me/AmazingCinema

©PRADEEP V K

3.5 Star (Good) · Drama · India · Tamil

153. TARAMANI (INDIA/DRAMA/2017)

🔹153. TARAMANI (2017)  🔽 A Review 🔽

🔹 “ഗ്രാൻഡ് മാ അമ്മയെ ഒരു ദിവസം Bitch എന്ന് വിളിച്ചതിന് ശേഷം അമ്മ ഗ്രാൻഡ് മായുടെ വീട്ടിൽ നിന്നും എന്നെയും കൊണ്ട് ഈ ഫ്ലാറ്റിൽ സ്ട്രയിൻജർ അങ്കിളിനോടൊപ്പം താമസമായി . എന്നാൽ ഇന്നലെ സ്ട്രയ്ൻജർ അങ്കിളും അമ്മയെ Bitch എന്ന് വിളിച്ചപ്പോൾ അമ്മ അങ്കിളിനെ അടിച്ച് പുറത്താക്കി . ഈ Bitch എന്ന് പറയുന്നത് അത്ര മോശം വാക്കാണോ?”

🔹COUNTRY : INDIA

     LANGUAGE : TAMIL

     GENRE : DRAMA

     DIRECTION : RAM

🔹SYNOPSIS 🔹

▪ സാധാരണ തമിഴ് ചിത്രങ്ങളുടെ ട്രാക്കിൽ നിന്ന് മാറി  വ്യത്യസ്തമായ, തനതായ ഒരു ആഖ്യാനശൈലിയോടെ ചിത്രങ്ങളൊരുക്കുന്ന സംവിധായകനാണ് റാം. അത് കൂടാതെ ആൻഡ്രിയ ജെറേമിയ കേന്ദ്രകഥാപാത്രത്തെ അവതരിപ്പിക്കുന്ന സ്ത്രീ കേന്ദ്രീകൃത ചിത്രമെന്ന നിലയിലും തരമണി പ്രതീക്ഷകൾ ഉയർത്തിയിരുന്നു. 

▪ ഒരു ഐ ടി കമ്പനിയിൽ ഉയർന്ന ശമ്പളത്തോടെ ജോലി നോക്കുന്ന ഭർത്താവില്ലാതെ മകനോടൊപ്പം ജീവിക്കുന്ന ദിയ എന്ന ഒരു ആംഗ്ലോ ഇന്ത്യൻ യുവതിയുടെ അതിജീവനത്തിന്റെ കഥയാണ് തരമണിയിലൂടെ റാം പറയുന്നത്. ഒറ്റയ്ക്ക് ജീവിക്കുന്ന ഒരു സുന്ദരിയായ യുവതി നമ്മുടെ സമൂഹത്തിൽ നിന്ന് നേരിടേണ്ടി വരുന്ന എല്ലാ വിധ തുറിച്ചു നോട്ടങ്ങളും കളിയാക്കലുകളും കുറ്റപ്പെടുത്തലുകളും നേരിടേണ്ടി വരുന്നെങ്കിലും അവയെയെല്ലാം സ്വന്തം മനോധൈര്യം കൊണ്ട് തട്ടിയെറിഞ്ഞ് തനിക്കിഷ്ടപ്പെട്ട രീതിയിൽ തനിക്ക് കംഫർട്ടബിൾ ആയ വസ്ത്രങ്ങൾ ധരിച്ച് ജീവിക്കുന്നവളാണ് ദിയ.ഒരു ദിവസം അവിചാരിതമായി  ഒരു മഴയത്ത് കണ്ട് മുട്ടുന്ന അപരിചിതനുമായി അടുക്കുന്നതോടെ അവളുടെ ജീവിതത്തിന് പുതിയൊരു ഭാവം കൈവരുന്നു. അവരുടെ ജീവിതത്തിലെ സുഖദു:ഖങ്ങൾ അനാവരണം ചെയ്യുന്നതോടൊപ്പം അതുമായി ബന്ധപ്പെട്ട വിവിധ സാമൂഹിക യാഥാർത്ഥ്യങ്ങളെക്കുറിച്ച് ചിത്രത്തിനിടയിലെ വോയിസ് ഓവറുകളിലൂടെ സംവിധായകൻ പ്രേക്ഷകനുമായി സംവദിക്കുകയും ചെയ്യുന്നു. 

🔹 REVIEW🔹

▪  തങ്ങളുടെ ചിത്രങ്ങളിലൂടെ പ്രേക്ഷകനുമായി നേരിട്ട് സംവദിക്കുന്ന രീതി പല വിദേശ ചിത്രങ്ങളിലും കണ്ടിട്ടുണ്ടെങ്കിലും നമ്മുടെ ചിത്രങ്ങളിൽ സാധാരണമല്ല. അതിന് ശ്രമിച്ചിട്ടുണ്ടെങ്കിൽ തന്നെ അതെല്ലാം അവസാനം വെറും സാരോപദേശങ്ങളായി മാറാറാണ് പതിവ് . എന്നാൽ തരമണിയിൽ ചിത്രത്തിന്റെ ഫ്ലോ ഒരു തരത്തിലും തടസ്സപ്പെടാതെ എന്നാൽ ചിത്രവുമായി നേരിട്ടോ അല്ലാതെയോ ബന്ധപ്പെടുത്താവുന്ന സാമൂഹിക വിഷയങ്ങൾ വളരെ രസകരമായി വോയിസ് ഓവറുകളിലൂടെ അവതരിപ്പിച്ചിരിക്കുന്നു. അവയിൽ ചിലത് നാം അംഗീകരിക്കുന്നവയും ചിലത് അംഗീകരിക്കാനാവാത്തവയും ആവാം. സംവിധായകൻ തന്നെ പറയുന്നത് പോലെ എല്ലാവരും ഫേസ് ബുക്കിൽ സ്റ്റാറ്റസ് ഇടുന്നു , അപ്പോൾ ഞാൻ എന്റെ സിനിമയ്ക്കിടക്ക് സ്റ്റാറ്റസ് ഇടുന്നു; അത്ര മാത്രം. 

▪ ദിയ എന്ന കേന്ദ്രകഥാപാത്രമായി ആൻഡ്രിയയുടെ മികച്ച പെർഫോർമൻസ് നിങ്ങൾക്ക് ചിത്രത്തിൽ കാണാം .അവർ ഇത് വരെ അഭിനയിച്ചതിൽ ഏറ്റവും മികച്ച കഥാപാത്രമാണ് ചിത്രത്തിലേത് എന്ന് നിസ്സംശയം പറയാം . പുതുമുഖം വസന്ത് രവിയും തന്റെ റോൾ ഭംഗിയാക്കി.ഗസ്റ്റ് റോളിൽ എത്തിയ അഞ്ജലിയും റയിൽവേ പോലീസിന്റെ വേഷം ചെയ്ത അഴഗം പെരുമാളും നന്നായിത്തന്നെ അവരവരുടെ റോളുകൾ അവതരിപ്പിച്ചു. സ്ത്രീ പുരുഷൻമാർ തമ്മിൽ വളരെ വയലന്റായി കലഹിക്കുന്ന രണ്ട് രംഗങ്ങൾ ചിത്രത്തിൽ അതീവ റിയലിസ്റ്റിക് ആയി അവതരിപ്പിച്ചിരിക്കുന്നു. സന്ദർഭത്തിന് യോജിച്ച ഗാനങ്ങളോടൊപ്പം ക്യാമറാ വർക്കും മികച്ച് നിന്നു. 

▪ നെഗറ്റീവ് ആയി തോന്നിയത് ചിത്രത്തിന്റെ ദൈർഘ്യവും വളരെ ലൗഡ്‌ ആയ ബിജിഎമ്മും ആണ്. പല രംഗങ്ങളിലും ബിജിഎം കാരണം ഡയലോഗുകൾ വ്യക്തമായില്ല .കുറച്ച് കൂടി ട്രിം ചെയ്ത് എഡിറ്റ് ചെയ്യാമായിരുന്നു എന്ന് തോന്നി. പ്രശസ്ത താരങ്ങളോ ഫാൻസോ ഒന്നും ഇല്ലാത്തത് കാരണം വിരലിലെണ്ണാവുന്നവരേ ചിത്രം കാണാൻ ഉണ്ടായിരുന്നുള്ളു. ടോറന്റ് റിലീസ് ആകുമ്പോൾ മികച്ച അഭിപ്രായം നേടുമെന്ന് ഉറപ്പാണ്. തട്ടുപൊളിപ്പൻ മസാല ചിത്രങ്ങൾ എല്ലാം പണം കൊടുത്ത് തിയേറ്ററിൽ പോയി കണ്ട് പ്രോത്സാഹിപ്പിക്കുകയും ഇതുപോലുള്ള വ്യത്യസ്തമായ പരീക്ഷണ ചിത്രങ്ങൾ ടോറൻറിൽ മാത്രം കാണുകയും ചെയ്യുന്നവർ ആണ് ഭൂരിപക്ഷം എന്നതിനാൽ അത്രയൊക്കെയേ പ്രതീക്ഷിക്കാനാവൂ.

▪ ഒരു സ്ത്രീ സെക്സി ആയി വസ്ത്രം ധരിച്ചാൽ, പുരുഷൻമാരോട് അടുത്തിടപഴകിയാൽ, ഒറ്റയ്ക്ക് ജീവിച്ചാൽ, രാത്രിയിൽ തനിയെ സഞ്ചരിച്ചാൽ ഒക്കെ അവരെ ദുഷിച്ച ദൃഷ്ടിയോടെ മാത്രം വീക്ഷിക്കുന്ന ഇന്നത്തെ സമൂഹത്തിന് നേരെ ചില അർത്ഥവത്തായ ചോദ്യങ്ങൾ സംവിധായകൻ ഉന്നയിക്കുന്നു. എത്രയൊക്കെ പുരോഗമനം പറഞ്ഞാലും  ഏത് പുരുഷനും അവസാനം സ്ത്രീ തന്റെ കാൽച്ചുവട്ടിൽ കിടക്കേണ്ടവളാണ് എന്ന ചിന്താഗതി തന്നെയാണ് വച്ച് പുലർത്തുന്നത് എന്നത് ചിത്രം ചൂണ്ടിക്കാട്ടുന്നു. നിരവധി അന്യ സ്ത്രീകളുമായി ബന്ധം പുലർത്തുന്ന ഭർത്താവ് സ്വന്തം ഭാര്യയ്ക്ക് മറ്റൊരാളുമായി ബന്ധമുണ്ടെന്ന് അറിയുമ്പോൾ പ്രതികരിക്കുന്നത് എങ്ങനെയെന്ന് നമുക്ക് കാണാം. ജീവിതം എന്നത് ഒരു നിമിഷം കൊണ്ട് അവസാനിക്കുന്നതല്ല .അപ്രതീക്ഷിതമായ വഴിത്തിരിവുകളിലൂടെ അത് നമ്മളെ കൊണ്ടെത്തിക്കുന്നത് എവിടെയാണെന്ന് ആർക്കും പ്രവചിക്കാനാവില്ല. ആ തിരിച്ചറിവ് ചിത്രത്തിലെ കഥാപാത്രങ്ങളെപ്പോലെ നാമേവർക്കും എന്നെങ്കിലും ഉണ്ടാകട്ടെ എന്നാശിക്കാം.

🔹RATING : 3.5/5 ( A Good , Daring And Thought Provoking Film )

©PRADEEP V K (AMAZING CINEMA)

4.0 Star (Very Good) · Crime · India · Tamil · Thriller

148. VIKRAM VEDHA (INDIA/CRIME THRILLER/2017)

🔹148. VIKRAM VEDHA (2017)  🔽 A Review 🔽

🔹 ഹിന്ദു പുരാണ കഥകളിലെ വളരെ പ്രശസ്തമായതാണ് വിക്രമാദിത്യ മഹാരാജാവിന്റെയും വേതാളത്തിന്റെയും കഥ. ശക്തിയും ബുദ്ധിയും ഒത്തിണങ്ങിയ വിക്രമാദിത്യനും തന്റെ കഥകളിലൂടെ വിക്രമാദിത്യനെ കുടുക്കാൻ ശ്രമിക്കുന്ന തന്ത്രശാലിയായ വേതാളവും ആധുനിക ലോകത്ത് ഏറ്റുമുട്ടിയാൽ എന്താവും സംഭവിക്കുക?

COUNTRY : INDIA

LANGUAGE : TAMIL

GENRE : CRIME THRILLER

DIRECTION : PUSHKAR – GAYATHRI

🔹SYNOPSIS 🔹

▪️  പുഷ്കർ – ഗായത്രി സംവിധായക ദമ്പതികളുടെ മൂന്നാമത്തെ ചിത്രമാണ് വിക്രം വേദ. 2010 ൽ വാ എന്ന ചിത്രത്തിന് ശേഷം 7 വർഷങ്ങൾക്ക് ശേഷമാണ് അവർ പുതിയ ചിത്രവുമായെത്തുന്നത്. ശരി – തെറ്റ് , ധർമ്മം – അധർമ്മം എന്നിവ തമ്മിലുള്ള അനാദിയായ പോരാട്ടത്തിന്റെ കഥ പറയുന്ന ഈ ചിത്രം ഒരു നീതിമാനായ പോലീസ് ഓഫീസറും ക്രൂരനായ ഗാങ്ങ്സ്റ്ററും തമ്മിലുള്ള ഏറ്റുമുട്ടലുകളുടെ ത്രസിപ്പിക്കുന്ന കഥയാണ് പറയുന്നത്.   വിക്രം പോലീസ് സേനയിലെ കഴിവുറ്റ ഒരു എൻകൗണ്ടർ സ്പെഷ്യലിസ്റ്റ് ആണ്. യാതൊരു ടെൻഷനുമില്ലാതെ കുറ്റവാളികളെ ഉന്മൂലനം ചെയ്യുന്ന വിക്രം ഗാങ്ങ്സ്റ്ററായ വേദയെ പിടികൂടാനുള്ള ദൗത്യം ഏറ്റെടുക്കുന്നു .വളരെ ബുദ്ധിശാലിയായ എന്തിനും മടിക്കാത്ത വേദയെ തന്റെ തോക്കിനു മുന്നിൽ കിട്ടിയെങ്കിലും വേദയുടെ വാക്കുകൾ വിക്രത്തിനെ താൻ അടിയുറച്ച് വിശ്വസിക്കുന്ന പലതിനെയും മറ്റൊരു ദൃഷ്ടിയോടെ കാണാൻ പ്രേരിപ്പിക്കുന്നു. 

🔹 PERFORMANCES & TECHNICAL SIDES🔹

▪️  വിക്രം എന്ന എൻകൗണ്ടർ സ്പെഷലിസ്റ്റ് ആയി മാധവനും വേദ എന്ന ഗാങ്ങ്സ്റ്ററായി വിജയ് സേതുപതിയും ഒന്നിനൊന്ന് മികച്ച പ്രകടനം കാഴ്ചവച്ചു. അവർ രണ്ട് പേരും ഒന്നിച്ച് വരുന്ന എല്ലാ രംഗങ്ങളും വളരെ എൻഗേജിംഗ് ആയിരുന്നു. വളരെ വ്യത്യസ്തമായ സ്വഭാവ സവിശേഷതകളുള്ള വേദ എന്ന ഗാങ്ങ്സ്റ്റർ കഥാപാത്രം വിജയ് സേതുപതിയുടെ അഭിനയ ജീവിതത്തിലെ തന്നെ ഒരു നാഴികക്കല്ലാണ്. ആക്ഷനും സെന്റിമെന്റ്സും കോമഡിയും എല്ലാം ഒരു പോലെ കൈകാര്യം ചെയ്യാൻ സമർത്ഥരായ മാധവനും വിജയ് സേതുപതിയും ചിത്രത്തെ വേറൊരു ലെവലിലെത്തിച്ചു എന്ന് പറയുന്നതാവും ശരി. സ്ത്രീ കഥാപാത്രങ്ങളെ അവതരിപ്പിച്ച ശ്രദ്ധ ശ്രീനാഥും വരലക്ഷ്മി ശരത് കുമാറും നായക വില്ലൻമാരുടെ നിഴലായി ഒതുങ്ങാത്ത മികച്ച കഥാപാത്രങ്ങളായെത്തി എന്നത് ശ്രദ്ദേയമാണ് .

▪️ ചിത്രത്തിന്റെ എടുത്തു പറയേണ്ട ഒരു കാര്യം സാം.സി.എസിന്റെ  ത്രില്ലിംഗ് ആയ ബാക്ക് ഗ്രൗണ്ട് മ്യൂസിക് ആണ്. ചിത്രത്തിന്റെ വിജയത്തിൽ ഒരു പ്രധാന പങ്ക് BGM ന് ഉണ്ടെന്ന് നിസ്സംശയം പറയാം .പി .എസ്. വിനോദിന്റെ ക്യാമറയും റിച്ചാർഡ് കെവിന്റെ എഡിറ്റിംഗും ചിത്രത്തെ മികവുറ്റ ഒരനുഭവമാക്കി മാറ്റി. സംവിധായകരായ പുഷ്കറും ഗായത്രിയും മണികണ്ഠനോടൊപ്പം ചേർന്നെഴുതിയ ശക്തമായ തിരക്കഥയുടെ ബലം ചിത്രത്തിന്റെ ഓരോ രംഗത്തും അനുഭവിച്ചറിയാം . മുൻ ചിത്രങ്ങളിൽ സംഭവിച്ച പിഴവുകൾ തിരുത്തി എല്ലാ തരത്തിലുള്ള പ്രേക്ഷകർക്കും ഒരുപോലെ ഇഷ്ടപ്പെടുന്ന തരത്തിൽ ഈ ചിത്രം അണിയിച്ചൊരുക്കിയ പുഷ്കർ- ഗായത്രി ദമ്പതിമാർക്ക് എല്ലാവിധ അനുമോദനങ്ങളും നേരുന്നു. 

🔹VERDICT 🔹

▪ കുട്ടിക്കാലം മുതൽ നാമെല്ലാവരും വായിച്ച് പരിചയിച്ച വിക്രമാദിത്യ വേതാള കഥയെ ഇന്നത്തെ കാലഘട്ടത്തിനനുസരിച്ച് മാറ്റി അതിലൂടെ വളരെ ത്രില്ലിംഗ് ആയ ഒരു ക്രൈം സ്റ്റോറി അവതരിപ്പിച്ചിരിക്കുന്ന വിക്രം വേദ വളരെ മികച്ച സിനിമാനുഭവമാണ് സമ്മാനിച്ചത്. അഭിനയ മികവും ശക്തമായ തിരക്കഥയും സംവിധാനവും ചടുലമായ BGM ഉം ഒത്തിണങ്ങിയ ഈ ചിത്രം ഒരു നിമിഷം പോലും തിയേറ്റർ സ്ക്രീനിൽ നിന്നും കണ്ണെടുക്കാതെയാണ് കണ്ട് തീർത്തത്. നന്മയും തിന്മയും തമ്മിലുള്ള പോരാട്ടത്തിന്റെ കഥയായി തുടങ്ങുന്ന ചിത്രം മുന്നോട്ട് പോകുമ്പോൾ ചിത്രത്തിലെ കഥാപാത്രങ്ങൾക്കൊപ്പം പ്രേക്ഷകനും ആരാണ് ശരി, ആരാണ് തെറ്റ് എന്ന പുരാതനമായ ചോദ്യത്തിനുള്ള ഉത്തരം തേടുകയാണ്. വളരെ ത്രില്ലിംഗ് ആയ തിയേറ്റർ അനുഭവം സമ്മാനിക്കുന്ന ഈ ചിത്രം നിങ്ങളെ ഒരിക്കലും നിരാശപ്പെടുത്തില്ല എന്ന് ഞാൻ ഉറപ്പ് തരുന്നു. 

🔹RATING : 4/5 ( VERY GOOD – A CLEVERLY CRAFTED INTENSE CRIME THRILLER )

©PRADEEP V K (AMAZING CINEMA)

4.5 Star (Brilliant) · Crime · India · Tamil

131. AARANYA KAANDAM (INDIA/CRIME/2011)

131. Aaranya Kaandam (INDIA/TAMIL/2011/ Neo Noir Gangster Film/123 Min/Dir: Thiagarajan Kumararaja /Stars: Jackie Shroff, Sampath Raj, Ravi Krishna, Yasmin Ponnappa , Guru Somasundaram)
🔹 SYNOPSIS 🔹
 ▪ പരീക്ഷണ ചിത്രങ്ങൾ ധാരാളം ഇറങ്ങുന്ന തമിഴ് സിനിമാ ലോകത്തിന് ലോക സിനിമാ ഭൂപടത്തിൽ സ്ഥാനം നേടിക്കൊടുക്കാൻ എന്തുകൊണ്ടും പര്യാപ്തമായ ചിത്രമാണ് ആരണ്യകാണ്ഡം. ക്വൻറിൻ തരാൻറിനോ , പാർക്ക് ചാൻ വൂക്ക് തുടങ്ങിയ സംവിധായകർ അവരുടെ ചിത്രങ്ങളിൽ പിന്തുടരുന്ന നിയോ നോയർ ശൈലിയിലുള്ള ആദ്യ തമിഴ് ചിത്രമാണിത് .തമിഴ് സിനിമയിലെന്നല്ല ഇന്ത്യൻ ചിത്രങ്ങളിൽ തന്നെ വളരെ അപൂർവ്വമായ ശൈലിയിലുള്ള ഈ ചിത്രം ത്യാഗരാജൻ കുമാരരാജയുടെ  ആദ്യ സംവിധാന സംരംഭമാണ് . 
▪സിങ്കപ്പെരുമാൾ എന്ന ക്രൂരനായ ഗാങ്ങ്സ്റ്റർ, അയാളുടെ വലംകൈ ആയ പശുപതി , അയാൾ തട്ടിക്കൊണ്ടുവന്ന സുബ്ബു എന്ന യുവതി , ജോലിക്കാരനായ സപ്പെ , എതിർ പക്ഷക്കാരനായ ഗാങ്ങ്സ്റ്റർ ഗജേന്ദ്രൻ , കോഴിപ്പോരുകാരനായ കലയ,  അയാളുടെ മകൻ എന്നിവരുടെ ജീവിതത്തിൽ ഒരു ദിവസം നടക്കുന്ന സംഭവങ്ങളുടെ രക്തരൂക്ഷിതമായ ആവിഷ്കാരമാണ് ഈ ചിത്രം .ഒരു മയക്ക് മരുന്ന് കച്ചവടത്തിനിടയിൽ നടക്കുന്ന ചതിയും വഞ്ചനയും പ്രതികാരവും രക്തച്ചൊരിച്ചിലും റിയലിസ്റ്റിക്ക് ആയി അവതരിപ്പിച്ചിരിക്കുന്ന ഈ ചിത്രം സെൻസർ ബോർഡിന്റെ ശക്തമായ എതിർപ്പിന് ശേഷമാണ് നിരവധി കട്ടുകൾക്കും ബീപ്പ് ഡയലോഗുകൾക്കും ശേഷം റിലീസ് ചെയ്യാൻ കഴിഞ്ഞത് .ചിത്രം കണ്ട് കഴിഞ്ഞപ്പോൾ രക്തം കാണുന്ന സ്ഥലങ്ങളിൽ വെള്ളയടിപ്പിച്ചും ഡയലോഗുകൾക്കിടയിൽ ബീപ്പ് കേൾപ്പിച്ചും ചിത്രത്തിന്റെ പൂർണമായ ആസ്വാദനം തടസ്സപ്പെടുത്തിയ സെൻസർ ബോർഡിനോട് തോന്നിയത് പുച്ഛം മാത്രം .അമേരിക്കൻ ഫിലിം റേറ്റിംഗ് പോലെ താല്പര്യമുള്ള സംവിധായകർക്ക്  സെൻസർ ചെയ്യാതെ അൺറേറ്റഡ് ആയി ചിത്രങ്ങൾ റിലീസ് ചെയ്യാനുള്ള സ്വാതന്ത്ര്യം ഇവിടെയും നല്കേണ്ട കാലം അതിക്രമിച്ചിരിക്കുന്നു .
▪ഒരു പരിപൂർണ ഗാങ്ങ്സ്റ്റർ ചിത്രം എന്ന് ആരണ്യകാണ്ഡത്തെ വിശേഷിപ്പിക്കാം .ജാക്കി ഷറോഫ്, സമ്പത്ത് , രവി കൃഷ്ണ , ഗുരു സോമസുന്ദരം എന്നിവർ അടക്കം അഭിനയിച്ച എല്ലാ നടീനടൻമാരും അത് എത്ര ചെറിയ വേഷമായാലും മികച്ചതാക്കി .കലയ എന്ന കഥാപാത്രത്തെ അവതരിപ്പിച്ച ഗുരു സോമസുന്ദരവും അയാളുടെ മകനായ ചെറിയ കുട്ടിയെ അവതരിപ്പിച്ച മാസ്റ്റർ വസന്തും അതിഗംഭീര പ്രകടനമാണ് കാഴ്ച വച്ചത് .സ്ത്രീ കഥാപാത്രങ്ങൾ വളരെ കുറവായ ചിത്രത്തിൽ സുബ്ബു എന്ന കഥാപാത്രത്തെ അവതരിപ്പിച്ച പുതുമുഖം യാസ്മിൻ പൊന്നപ്പ അപ്രതീക്ഷിതമായ പ്രകടനത്തിലൂടെ ഞെട്ടിച്ചു .
▪പ്രവീൺ കെ എൽ , എൻ ബി ശ്രീകാന്ത് എന്നിവർക്ക് മികച്ച എഡിറ്റിംഗിനുള്ള ദേശീയ പുരസ്കാരം ഈ ചിത്രത്തിലൂടെ ലഭിച്ചു . ഒരു അനാവശ്യ ഷോട്ട് പോലുമില്ലാത്ത ഈ ചിത്രത്തിൽ എഡിറ്റിംഗിന്റെ മാസ്മരികത അനുഭവിച്ചറിയാം . ചിത്രത്തിന് നിയോ നോയർ ഇഫക്ട് നല്കാൻ പി എസ് വിനോദിന്റെ ഛായാഗ്രഹണവും യുവൻ ശങ്കർ രാജയുടെ ബാക്ക് ഗ്രൗണ്ട്  മ്യൂസിക്കും വഹിച്ച പങ്ക് ചെറുതല്ല .ശക്തമായ കുറിക്ക് കൊള്ളുന്ന ഡയലോഗുകൾ നിറഞ്ഞ ചിത്രത്തിന്റെ തിരക്കഥയും സംഭാഷണവും സംവിധായകൻ തന്നെയാണ് നിർവഹിച്ചത് .തന്റെ മനസ്സിലുള്ള സിനിമയുടെ പൂർണതയുടെ കാര്യത്തിൽ ഒരു വിട്ടുവീഴ്ചക്കും തയ്യാറാവാത്ത സംവിധായകൻ ത്യാഗരാജൻ കുമാരരാജയെ എത്ര അഭിനന്ദിച്ചാലും മതിയാവില്ല . ആദ്യ ചിത്രം ഇറങ്ങി ആറ് വർഷങ്ങൾ പിന്നിട്ടിട്ടും അദ്ദേഹത്തിന്റെ പുതിയ ചിത്രം ഇതുവരെയും വന്നിട്ടില്ല എന്നതും ശ്രദ്ദേയമാണ് .ചിത്രങ്ങളുടെ എണ്ണത്തിലല്ല പുതുമയിലും ആവിഷ്കാര സ്വാതന്ത്ര്യത്തിലുമാണ് പ്രാധാന്യമെന്ന് വിശ്വസിക്കുന്ന അദ്ദേഹത്തെപ്പോലുള്ള സംവിധായകൻ ഇന്ത്യൻ സിനിമയുടെ തന്നെ യശസ്സുയർത്തട്ടെ .

VERDICT :  BRILLIANT ( Strikingly Raw And Realistic Gangster Saga Which Excels In Both Technical And Acting Departments – A New Dawn To Tamil Cinema )

©PRADEEP V K (AMAZING CINEMA)

1.5 Star (Poor) · Horror · India · Tamil

117. DORA (INDIA/HORROR/2017)

117. DORA ( INDIA/TAMIL/2017/Horror Thriller/137 Min/Dir:Doss Ramasamy /Stars: Nayanthara, Thambi Ramaiah, Harish Uthaman )
🔹SYNOPSIS🔹 
▪ 2015 ൽ റിലീസ് ചെയ്ത മായ എന്ന ഹൊറർ ചിത്രം തമിഴ് സിനിമാ ചരിത്രത്തിലും നയൻതാര എന്ന നടിയുടെ കരിയറിലും ഒരു നാഴികക്കല്ലായിരുന്നു .ആദ്യവസാനം പ്രേക്ഷകനെ ഭയത്തിന്റെ മുൾമുനയിൽ നിർത്തിയ ഇന്ത്യൻ സിനിമയിൽ തന്നെ അപൂർവ്വമായ നിയോ നോയർ ഹൊറർ ത്രില്ലർ വിഭാഗത്തിൽപ്പെടുത്താവുന്ന ഒരു ചിത്രമായിരുന്നു മായ . സ്ത്രീകഥാപാത്രം പ്രധാന വേഷത്തിലെത്തി വൻ വിജയം നേടിയ ആ ചിത്രത്തിന് ശേഷം നയൻതാര അഭിനയിക്കുന്ന ഹൊറർ ചിത്രം എന്ന ലേബലിൽ വൻ പ്രതീക്ഷ ഉണ്ടായിരുന്ന ചിത്രമാണ് ഡോറ. എന്നാൽ നിലവാരമില്ലാത്ത പരസ്യവാചകങ്ങൾ നിറഞ്ഞ പോസ്റ്ററുകളും ട്രെയിലറും എല്ലാം ആ പ്രതീക്ഷ നശിപ്പിച്ചിരുന്നു. എങ്കിലും നേരത്തേ കാണണം എന്ന് കരുതിയിരുന്നതിനാലും ഹൊറർ ചിത്രങ്ങൾ തിയേറ്ററിൽ കാണാനുള്ള താല്പര്യം മൂലവും ഈ ചിത്രം തിയേറ്ററിൽ തന്നെ കാണുവാൻ തീരുമാനിച്ചു .
▪ പവലക്കൊടി ( നയൻതാര) യും അച്ഛൻ വൈരക്കണ്ണും ( തമ്പി രാമയ്യ) കാർ ടാക്സി സ്ഥാപനം  തുടങ്ങാൻ വേണ്ടി ഒരു പഴയ Austin Cambridge കാർ വാങ്ങുന്നു .അതേ സമയം നഗരത്തിലെ ഒരു ഫ്ലാറ്റിൽ ഒരു സ്ത്രീ കൊല്ലപ്പെടുകയും കേസ് ഏറ്റെടുത്ത പോലീസ് ഓഫീസർ ഹരീഷ് ( ഹരീഷ് ഉത്തമൻ) മൂന്ന് അന്യ സംസ്ഥാന തൊഴിലാളികളാണ് അതിന് പിന്നിലുള്ളതെന്ന് സംശയിക്കുകയും ചെയ്യുന്നു . ചില അതീന്ദ്രിയ സംഭവങ്ങൾക്ക് ശേഷം കാറിൽ പ്രതികാരദാഹിയായ ഒരാത്മാവ് കുടിയിരിക്കുന്നതായി മനസ്സിലാക്കുന്ന പവലക്കൊടി അത് ആരാണെന്നും അതിന് താനുമായുള്ള ബന്ധം എന്താണെന്നും  കണ്ടെത്താനായി ശ്രമം ആരംഭിക്കുന്നു.

 

▪ ഹൊറർ ചിത്രം എന്ന ലേബലിൽ ഇറങ്ങിയെങ്കിലും പേരിന് പോലും ഒരു ഹൊറർ രംഗം ഇല്ലാത്ത ചിത്രം .കെട്ടുറപ്പില്ലാത്ത തിരക്കഥയും ബോറൻ സംഭാഷണങ്ങളും അനാവശ്യമായ കോമഡി രംഗങ്ങളും മോശം സംവിധാനവും നിറഞ്ഞ ചിത്രത്തിൽ നന്നായി തോന്നിയ ഒരേ ഒരു കാര്യം നയൻതാര മാത്രമാണ് .സൗന്ദര്യത്തിലും അഭിനയത്തിലും വേഷവിധാനത്തിലും എല്ലാം മികച്ചു നിന്ന അവർ തന്റെ വേഷം ആവുംവിധം ഭംഗിയാക്കിയിട്ടുണ്ട് .തമ്പി രാമയ്യ അങ്ങേയറ്റം വെറുപ്പിച്ചപ്പോൾ ഹരീഷ് ഉത്തമന് ഒന്നും ചെയ്യാനും ഇല്ലായിരുന്നു . ഒരു ഫാന്റസി റിവൻജ് ത്രില്ലർ എന്ന രീതിയിൽ കണ്ടാലും ചിത്രം വേണ്ട നിലവാരത്തിലേക്കുയർന്നില്ല. അത്തരം ഒരു ചിത്രത്തിന് വേണ്ട മികച്ച വിഷ്വൽ ഇഫക്സോ കഥയോ ഒന്നും ചിത്രത്തിനില്ല. കാറിൽ കുടികൊള്ളുന്ന ആത്മാവ് Tarzan The Wonder Car എന്ന ബോളിവുഡ് ചിത്രത്തിൽ മുമ്പ് പരീക്ഷിച്ച് പരാജയപ്പെട്ടതാണ് . മായ എന്ന ഹിറ്റ് ചിത്രത്തിന്റെയും നയൻതാര എന്ന നടിയുടേയും പേര് മാത്രം ഉപയോഗിച്ച് വിജയം നേടാമെന്ന് വ്യാമോഹിച്ച് നിർമ്മിച്ച ഡോറ പരിപൂർണ നിരാശയാണ് സമ്മാനിച്ചത് .
🔹RATING : 1.5/5 ( Poor – Watch At Your Own Risk )
©PRADEEP V K