3.5 Star (Good) · Drama · English · USA

166. THE BEGUILED (USA/DRAMA/2017)

🔼166) THE BEGUILED (2017)🔸A REVIEW 🔸

🔸Being Beguiled is like being captivated, charmed, delighted, enthralled, or entranced. When you’re Beguiled, you really like what you see”

🔼COUNTRY : USA
LANGUAGE : ENGLISH
GENRE : DRAMA
DIRECTION : SOFIA COPPOLA
IMDB RATING : 6.6 / 10
‎ROTTEN TOMATOES RATING : 78%

🔼 1864 ൽ അമേരിക്കൻ സിവിൽ വാർ കൊടുമ്പിരികൊണ്ടിരിക്കുന്ന കാലഘട്ടത്തിൽ വിർജീനിയയിൽ പെൺകുട്ടികൾക്ക് വേണ്ടി മാത്രമുള്ള ഒരു സ്കൂൾ നടത്തുകയാണ് മാർത്ത ഫാൺസ്വർത്ത്. യുദ്ധം രൂക്ഷമായതോടെ അധ്യാപികയായ എഡ്വിനയും അഞ്ച് വിദ്യാർത്ഥിനികളും ഒഴിച്ച് മറ്റുള്ളവരെല്ലാം സ്കൂൾ വിട്ട് പോയിരുന്നു. ഒരു ദിവസം അടുത്തുള്ള കാടിനുള്ളിൽ കാലിൽ മാരകമായി മുറിവേറ്റ നിലയിൽ കണ്ട ഒരു പട്ടാളക്കാരനെ ഒരു വിദ്യാർത്ഥിനി സ്കൂളിലേക്ക് കൊണ്ട് വരുന്നു. മാർത്ത അയാളുടെ മുറിവ് ഭേദമാകുന്നത് വരെ സ്കൂളിൽ താമസിക്കാൻ അനുവദിക്കുന്നു. എന്നാൽ ചെറുപ്പക്കാരനായ അയാളുടെ സാന്നിദ്ധ്യം കുട്ടികളിലും അധ്യാപികയിലും വരുത്തുന്ന മാറ്റങ്ങൾ മാർത്തയെ അസ്വസ്ഥയാക്കുന്നു.

🔼 A Painted Devil എന്ന പേരിലുള്ള നോവലിനെ ആധാരമാക്കി 1971 ൽ The Beguiled എന്ന പേരിൽ ക്ലിൻറ് ഈസ്റ്റ് വുഡിനെ നായകനാക്കി ഡോൺ സീഗൽ ഒരു ചിത്രം സംവിധാനം ചെയ്തിരുന്നു. അതിൽ ചെറിയ ചില മാറ്റങ്ങൾ വരുത്തിയാണ് സോഫിയ കൊപ്പോള പുതിയ ചിത്രം സംവിധാനം ചെയ്തിരിക്കുന്നത്. 2017 ലെ കാൻസ് ഫിലിം ഫെസ്റ്റിവലിൽ മികച്ച സംവിധാനത്തിനുള്ള പുരസ്കാരം ഈ ചിത്രത്തിലൂടെ സോഫിയ കൊപ്പോളക്ക് ലഭിച്ചിരുന്നു. സോഫിയ തന്നെ രചിച്ച ശക്തമായ തിരക്കഥയ്ക്കും സൂക്ഷ്മമായ സംവിധാനമികവിനും ഒപ്പം കോളിൻ ഫാരൽ, നിക്കോൾ കിഡ് മാൻ, ക്രിസ്റ്റൻ ഡൻസ്റ്റ് എന്നിവർ ഉൾപ്പെട്ട താരനിരയുടെ മികച്ച പെർഫോർമൻസും ചിത്രത്തെ മികവുറ്റതാക്കുന്നു. കഥാപാത്രങ്ങളുടെ പൂർവ്വ ചരിത്രമൊന്നും വിവരിക്കാതെ വർത്തമാനകാലം മാത്രം പ്രതിപാദിക്കുന്ന ചിത്രം പൂർണമായും ഒറ്റ ലൊക്കേഷനിൽ തന്നെയാണ് ചിത്രീകരിച്ചിരിക്കുന്നത്.

🔼RATING : 3.5/5 (GOOD)

🔼 For Getting The Movie Download Link Join AMAZING CINEMA Telegram Channel @
http://t.me/AmazingCinema

©PRADEEP V K

Advertisements
3.5 Star (Good) · Drama · English · USA

161. A GHOST STORY (USA/SUPERNATURAL DRAMA/2017)

🔹161) A GHOST STORY (2017)  🔹 A REVIEW 🔹

🔼 “When I was little and we used to move all the time, I wrote these notes, and I folded them up really small and I  hided them in different places so that if I ever wanted to go back, there would be a piece of me waiting.”

🔹COUNTRY : USA

     LANGUAGE : ENGLISH

     GENRE : SUPERNATURAL DRAMA

     DIRECTION : DAVID LOWERY

     ‎IMDB RATING : 7.2/10

     ‎ROTTEN TOMATOES RATING : 92%

🔹 OBSERVATIONS 🔹

🔼 മരണവും മരണാനന്തര ജീവിതവും എന്നും ലോകമെമ്പാടുമുള്ള സിനിമകൾക്ക് പ്രിയപ്പെട്ട വിഷയമാണ്. ആഗ്രഹങ്ങൾ പൂർത്തിയാക്കാതെ മരിച്ച മനുഷ്യരുടെ ആത്മാക്കൾ ഭൂമി വിട്ടു പോകാതെ തങ്ങളെ ദ്രോഹിച്ചവരോട് ക്രൂരമായി പ്രതികാരം ചെയ്യുന്ന നിരവധി കഥകൾ നാം സിനിമകളിൽ കണ്ടിട്ടുണ്ട്. എന്നാൽ അത്മാവ് എന്നൊന്നുണ്ടെങ്കിൽ അതിന്റെ ഉദ്ദേശ്യം ജീവിച്ചിരിക്കുന്നവരോട് പ്രതികാരം ചെയ്യുക എന്നതാണോ ? തന്റെ പ്രിയപ്പെട്ടയാളെ അപ്രതീക്ഷിതമായി പിരിയേണ്ടി വന്ന ഒരാളുടെ ആത്മാവ് ഭൂമിയിൽത്തന്നെ നിലനില്ക്കുന്നതിന് മറ്റെന്തെങ്കിലും കാരണം ഉണ്ടാവുമോ? തന്റെ ലക്ഷ്യ പൂർത്തീകരണത്തിന് വേണ്ടി , തന്റെ പ്രിയപ്പെട്ടവരെ വീണ്ടും കാണുന്നതിന് വേണ്ടി ഒരാത്മാവിന് ഏതറ്റം വരെ പോകാനാവും? അനശ്വരമായ അത്മാവിന് ഭാവി, ഭൂതം , വർത്തമാനം എന്നീ സമയബന്ധിതമായ കാലത്തിന്റെ ചാക്രികമായ സഞ്ചാരത്തിൽ നേർരേഖയിൽ മുന്നോട്ടും പിന്നോട്ടും സഞ്ചരിക്കാനാവുമോ? നാമോരോരുത്തരും ഭൂമി വിട്ടു പോകുമ്പോൾ നമ്മുടേതായ എന്ത് അടയാളങ്ങളാണ് ഇവിടെ അവശേഷിപ്പിക്കുന്നത്? എന്നും മനുഷ്യന് വ്യക്തമായ ഉത്തരം കിട്ടാത്ത ഇത്തരം നിരവധി ചോദ്യങ്ങളുമായാണ് David Lowery സംവിധാനം ചെയ്ത അമേരിക്കൻ ചിത്രം A Ghost Story എത്തുന്നത്. 

🔼 ആഗ്രഹിച്ചത് പോലെ വിജയിക്കാനാവാത്ത ഒരു സംഗീതജ്ഞനും അദ്ദേഹത്തിന്റെ ഭാര്യയും ഉൾനാട്ടിലെ ഒരു ഒറ്റപ്പെട്ട വീട്ടിൽ താമസിക്കുന്നു. എന്നാൽ ഒരപകടത്തിൽ ഭർത്താവ് മരണപ്പെടുന്നതോടെ ഭാര്യ ഏകാന്തതയുടെ പടുകുഴിയിലേക്ക് എടുത്തെറിയപ്പെടുന്നു. പക്ഷേ ഭർത്താവിന്റെ ആത്മാവ് മോർച്ചറിയിൽ നിന്നും ശരീരത്തെ പുതപ്പിച്ചിരുന്ന വെളുത്ത പുതപ്പോടെ ഉയർത്തെഴുനേറ്റ് തന്റെ വീട്ടിൽ എത്തുന്നു . കുറെ നാളുകൾക്ക് ശേഷം ഭാര്യ വീട് വിട്ട് താമസം മാറി പോകുന്നെങ്കിലും ആത്മാവ് അവിടം വിട്ട് പോകുന്നില്ല .താനും ഭാര്യയും തങ്ങളുടെ സന്തുഷ്ടമായ ജീവിതം ജീവിച്ച ആ വീടും സ്ഥലവും വിട്ടു പോകാതെ കഴിയുന്നതിന് അദൃശ്യനായ ആ ആത്മാവിന് ഒരു കാരണമുണ്ടായിരുന്നു. കാലത്തിന്റെ അനന്തമായ യാത്രയിൽ മുന്നോട്ടും പിന്നോട്ടും സഞ്ചരിച്ച് തേടുവാൻ മാത്രം വില പിടിച്ചതെന്തോ അവിടെയുണ്ടായിരുന്നു. എന്തായിരുന്നു അത്?

🔹FINAL WORD🔹

🔼വളരെ രസകരമായി സിംപിളായി കണ്ട് തീർക്കാവുന്ന ഒരു ചിത്രമല്ലിത് . പേര് സൂചിപ്പിക്കുന്നത് പോലെ ഇത് ഒരു ഹൊറർ ചിത്രം അല്ല .വളരെ കുറച്ച് കഥാപാത്രങ്ങളെ ചിത്രത്തിലുള്ളു .പ്രേക്ഷകനെ ഞെട്ടിക്കാനുള്ള ട്വിസ്റ്റോ ഡ്രാമയോ ഒന്നുമില്ല. മിനിട്ടുകൾ നീളുന്ന ഡയലോഗുകളില്ലാത്ത ദീർഘമായ ഷോട്ടുകൾ നിങ്ങളെ മുഷിപ്പിച്ചേക്കാം. കഥാപാത്രങ്ങളുടെ മാനസികാവസ്ഥയെ സൂചിപ്പിക്കാനായി ഒരു ബോക്സിന്റെ ആകൃതിയിലുള്ള Aspect Ratio (1.33:1) ആണ് ചിത്രത്തിന് ഉപയോഗിച്ചിരിക്കുന്നത്. Pete’s Dragon എന്ന ഡിസ്നി ചിത്രത്തിന്റെ സംവിധായകനായ David Lowery വളരെ പുതുമയാർന്ന ഒരു ചിത്രീകരണ ശൈലിയാണ് ഉപയോഗിച്ചിരിക്കുന്നത് . സംഭാഷണങ്ങളിലൂടെയല്ലാതെ സംഗീതത്തിലൂടെയും  സിനിമാറ്റോഗ്രഫിയിലൂടെയും ചിത്രം ആവശ്യപ്പെടുന്ന മൂഡ് പ്രേക്ഷകരിലേക്കെത്തിക്കാനാണ് അദ്ദേഹം ശ്രമിച്ചിരിക്കുന്നത്. എന്നാൽ അത് എല്ലാവർക്കും ഒരുപോലെ ആസ്വദിക്കാനാവില്ല എന്നത് ഒരു സത്യമാണ്. 

🔼കൂടുതൽ രംഗങ്ങളിലും വെള്ളത്തുണി പുതച്ച ഗോസ്റ്റ് ആയി എത്തുന്ന Casey Affleck ഉം ഭാര്യയുടെ വേഷത്തിലെത്തിയ Rooney Mara ഉം തങ്ങളുടെ കഥാപാത്രങ്ങൾ ഭംഗിയാക്കി. ഭർത്താവിന്റെ മരണ ശേഷം വീട്ടിലെത്തി വികാരങ്ങളെല്ലാം കടിച്ചമർത്തി ഭക്ഷണം കഴിക്കുന്ന ദൈർഘ്യമേറിയ ഒരു രംഗം Rooney Mara ഗംഭീരമാക്കി. ശ്രദ്ധയോടെ കണ്ടിരുന്നാൽ ക്യാമറയുടെ നിരവധി പുതുമയാർന്ന ഷോട്ടുകൾ നിങ്ങൾക്ക് കാണാം. വളരെ മിനിമൽ സെറ്റിംഗ്സിൽ കുറഞ്ഞ ബഡ്ജറ്റിൽ ചിത്രകരിച്ചിരിക്കുന്ന ഈ ചിത്രം സീരിയസ് ആയി സിനിമയെ സമീപിക്കുന്നവർക്ക് മാത്രമുള്ളതാണ്. സാവധാനം മുന്നോട്ട് നീങ്ങുന്ന ചിത്രങ്ങൾ ലാഗ് എന്ന് പറഞ്ഞ് കുറ്റപ്പെടുത്തുന്നവർ ഒരിക്കലും ഈ ചിത്രം കാണാനേ ശ്രമിക്കരുത്. ചിത്രം ആവശ്യപ്പെടുന്ന ക്ഷമയോടെ താല്പര്യത്തോടെ കണ്ടിരിക്കുന്നവർക്ക് അവസാനം  മനസ്സിൽ നിന്ന് പെട്ടെന്ന് മായാത്ത ഒരു ഫീൽ ലഭിക്കുമെന്ന് ഉറപ്പാണ്. അത് തന്നെയാണ് ആത്യന്തികമായി സിനിമയുടെ ഉദ്ദേശ്യവും.

🔹 Join AMAZING CINEMA Telegram Channel @

http://t.me/AmazingCinema

©PRADEEP V K 

3.5 Star (Good) · Drama · English · UK

159. LADY MACBETH (UK/DRAMA/2016)

🔹159) LADY MACBETH  (2016)  🔹A RECOMMENDATION🔹

🔹COUNTRY : UK

     LANGUAGE : ENGLISH

     GENRE : DRAMA

     DIRECTION : WILLIAM OLDROYD

     IMDB RATING : 7/10

🔹1865 ൽ Nikolai Leskov എഴുതിയ Lady Macbeth  of the Mtsensk District എന്ന നോവലാണ് ഈ ബ്രിട്ടീഷ് ചിത്രത്തിന് ആധാരം .ഇതേ നോവൽ തന്നെ 1962 ൽ Andrzej Wajda സംവിധാനം ചെയ്ത പോളിഷ് ചിത്രം Siberian Lady Macbeth നും വിഷയമായിട്ടുണ്ട്. പത്തൊമ്പതാം നൂറ്റാണ്ടിലെ ഇംഗ്ലണ്ടിൽ തന്റെ ഇരട്ടി പ്രായമുള്ള ഒരു ധനികനെ വിവാഹം കഴിച്ച് അയാളുടെ എസ്റ്റേറ്റിലെ ബംഗ്ലാവിൽ എത്തുന്ന കാതറീൻ എന്ന യുവതിയുടെ കഥയാണ് ഈ ചിത്രം പറയുന്നത്. തന്നോട് യാതൊരു സ്നേഹമോ താല്പര്യമോ കാണിക്കാത്ത കർക്കശക്കാരനായ ഭർത്താവിനോടും അദ്ദേഹത്തിന്റെ യാഥാസ്ഥിതിക മനോഭാവമുള്ള അച്ഛനോടും ഒത്തുള്ള ജീവിതത്തിൽ മനസ്സു മടുത്ത കാതറീൻ എസ്റ്റേറ്റിലെ ഒരു ജോലിക്കാരനുമായി അടുക്കുന്നു .ഷേക്സ്പിയറിന്റെ വിഖ്യാത നാടകത്തിലെ കഥാപാത്രത്തിന്റെ ജീവിതവുമായുള്ള കാതറീന്റെ സാമ്യം ചിത്രത്തിന്റെ പേരിൽ നിന്ന് തന്നെ വ്യക്തമാണല്ലോ.

🔹 വിക്ടോറിയൻ കാലഘട്ടത്തിലെ ജീവിതം പുനസൃഷ്ടിക്കുന്നതിൽ സംവിധായകൻ പൂർണമായി വിജയിച്ചു എന്ന് പറയാം .ഷേക്സ്പിയറിന്റെ ലേഡി മാക്ബത്തുമായി ഈ ചിത്രത്തിലെ കഥാപാത്രത്തിനുള്ള സാമ്യവും സാരമായ വ്യത്യാസവും പ്രകടമാക്കാൻ Alice Birch ന്റെ തിരക്കഥയ്ക്ക് കഴിഞ്ഞിട്ടുണ്ട് . തന്റെ ജയത്തിന് വേണ്ടി വൈകാരികത ഒട്ടുമില്ലാതെ ഏതറ്റം വരെയും പോകാൻ തയ്യാറായ കാതറീൻ എന്ന ശക്തമായ പ്രധാന കഥാപാത്രത്തെ അതീവ മികവോടെ Florence Pugh അവതരിപ്പിച്ചു . വിക്ടോറിയൻ കാലഘട്ടത്തിന്റെ കഥ പറയുന്ന ചിത്രങ്ങൾക്ക് പൊതുവായുണ്ടാവുന്ന ഫീൽ പകർന്ന് തരുന്നതോടൊപ്പം വിട്ടുവീഴ്ചയില്ലാത്ത മികച്ച കഥാപാത്രാവിഷ്കരണവും ഈ ചിത്രത്തിന്റെ പ്രത്യേകതയാണ്.

🔹 For Getting The Movie Download Link Join AMAZING CINEMA Telegram Channel @http://t.me/AmazingCinema

©PRADEEP V K

3.5 Star (Good) · Denmark · Drama · English · Musical

158. DANCER IN THE DARK (DENMARK/MUSICAL DRAMA/2000)

🔹158. DANCER IN THE DARK (2000)  🔹 A REVIEW 🔹

🔹”They say it’s the last song. But you see, it’s only the last song , if we let it be ”

🔹COUNTRY : DENMARK

     LANGUAGE : ENGLISH

     GENRE : MUSICAL DRAMA

     DIRECTION : LARS VON TRIER

     IMDB RATING : 8/10

🔹 BACKGROUND 🔹

▪ ലാർസ് വോൺ ട്രയറിന്റെ Golden Heart Trilogy യിലെ മൂന്നാമത്തെ ചിത്രമായ Dancer In The Dark ഹൃദയത്തിൽ സംഗീതം സൂക്ഷിക്കുന്ന , കാഴ്ചശക്തി നഷ്ടപ്പെട്ടുകൊണ്ടിരിക്കുന്ന സെൽമ എന്ന ചെക്കോസ്ലൊവാക്യൻ ഇമിഗ്രന്റിന്റെ വേദനയിൽ ചാലിച്ച കഥയാണ് പറയുന്നത്. ചെക്കോസ്ലൊവാക്യയിൽ നിന്ന് മകനോടൊപ്പം വാഷിംഗ്ടണിലേക്ക്  കുടിയേറിപ്പാർക്കുന്ന സെൽമ ആഗ്രഹിക്കുന്നത് ഒന്ന് മാത്രമാണ് . ക്രമാനുഗതമായി കാഴ്ചശക്തി നഷ്ടപ്പെടുന്ന തന്റെ അവസ്ഥ മകനും ഉണ്ടാകരുത് .ഓരോ ദിവസവും കുറഞ്ഞ് വരുന്ന കാഴ്ചശക്തിയെ അവഗണിച്ച് അപകടം നിറഞ്ഞ ഫാക്ടറി ജോലി ചെയ്യുന്നതും സ്വന്തം നാട്ടിൽ നിന്ന് അമേരിക്കയിലെത്തി ഒരു ഒഴിഞ്ഞ ട്രെയിലറിൽ ദാരിദ്രത്തിൽ ജീവിച്ച് പണം സ്വരുക്കൂട്ടി വയ്ക്കുന്നതുമെല്ലാം അതിന് വേണ്ടിയായിരുന്നു. വേദനയിൽ നീറി ജീവിക്കുമ്പോഴും ഉള്ളിൽ സംഗീതം സൂക്ഷിക്കുന്ന അവൾ ഫാക്ടറിയിലെ യന്ത്രങ്ങളുടെ ശബ്ദങ്ങളിലും യാത്രയ്ക്കിടയിലെ ട്രെയിനിന്റെ മുരൾച്ചയിലും എല്ലാം സംഗീതം കണ്ടെത്താൻ ശ്രമിച്ചു കൊണ്ടിരുന്നു . 

🔹 OBSERVATIONS 🔹

▪ സെൽമ എന്ന കേന്ദ്ര കഥാപാത്രമായി പ്രശസ്ത ഐസ്ലൻഡിയൻ സിംഗർ ആയ Bjork ആണ് അഭിനയിച്ചിരിക്കുന്നത്. കഷ്ടതകൾ നിറഞ്ഞ ജീവിതത്തെ പുഞ്ചിരിയോടെ നേരിടുന്ന, നഷ്ടപ്പെട്ടുകൊണ്ടിരിക്കുന്ന കാഴ്ചശക്തിയെ അവഗണിച്ച് അപകടം നിറഞ്ഞ ഫാക്ടറി ജോലി ചെയ്യുന്ന , സംഗീതത്തെ ഹൃദയത്തിൽ ആവാഹിച്ച സെൽമയെ അതിമനോഹരമായി Bjork അവതരിപ്പിച്ചു . ആ വർഷത്തെ കാൻ ഫിലിം ഫെസ്റ്റിവലിൽ മികച്ച നടിക്കുള്ള പുരസ്കാരം Bjork ന് ലഭിച്ചപ്പോൾ ചിത്രം പാം ഡി ഓർ പുരസ്കാരവും നേടി. ചിത്രത്തിലെ ഒരു ഗാനം ഓസ്കാർ നോമിനേഷനും നേടിയിരുന്നു. 

▪ സംഗീതം ഒരു പ്രധാന കഥാപാത്രമായി ചിത്രത്തിൽ അലിഞ്ഞു ചേർന്നിരിക്കുന്നു. ചിത്രത്തിലെ പ്രധാനപ്പെട്ട രംഗങ്ങളെല്ലാം ഗാനങ്ങളുടെ അകമ്പടിയോടെയാണ് ചിത്രീകരിച്ചിരിക്കുന്നത്. ചിത്രത്തിന്റെ സംഗീത വിഭാഗം Bjork തന്നെയാണ് കൈകാര്യം ചെയ്തിരിക്കുന്നത്. സ്പെഷൽ ഇഫക്ടുകൾ ഉപയോഗിക്കാതെ മിനിമൽ സെറ്റിംഗ്സിൽ കൂടുതലും ഹാൻഡ് ഹെൽഡ് ക്യാമറ ഉപയോഗിച്ചാണ് ഈ ചിത്രം ചിത്രികരിച്ചിരിക്കുന്നത് .അത് കൊണ്ട് തന്നെ ചിത്രത്തിന്റെ  തിരക്കഥാകൃത്ത് കൂടിയായ സംവിധായകന്റെ കയ്യൊപ്പ് ഓരോ രംഗത്തും പതിഞ്ഞിരിക്കുന്നു. 

🔹LAST WORD 🔹

▪ ലാർസ് വോൺ ട്രയറിന്റെ മറ്റ് ചിത്രങ്ങളെപ്പോലെ കണ്ട് കഴിഞ്ഞാൽ മനസ്സിൽ ഒരു വല്ലാത്ത ഭാരം സൃഷ്ടിക്കുന്ന ഒരു ചിത്രമാണിത് . ചിത്രത്തിന്റെ മിനിമൽ സെറ്റിംഗ്സും ഡിപ്രസ്സീവ് ആയ കഥാഗതിയും നിരൂപകരെ രണ്ട് തട്ടിലാക്കിയിരുന്നു .ചിലർ വാനോളം പുകഴ്ത്തിയപ്പോൾ മറ്റ് ചിലർ തീരെ നെഗറ്റീവ് ആയി റേറ്റിംഗ് നല്കി. പക്ഷേ എന്നും പ്രേക്ഷകരുടേയോ നിരൂപകരുടേയോ ഇഷ്ടം നോക്കാതെ തന്റേതായ ശൈലിയിൽ പരീക്ഷണ ചിത്രങ്ങളൊരുക്കുന്ന ലാർസ് വോൺ ട്രയറിന്റെ ചിത്രങ്ങളിൽ മുന്നിൽ നില്ക്കുന്ന ഒന്ന് തന്നെയാണ് Dancer In The Dark. 

🔹 For Getting The Movie Download Link Join AMAZING CINEMA Telegram Channel @http://t.me/AmazingCinema

©PRADEEP V K

3.5 Star (Good) · Drama · India · Tamil

153. TARAMANI (INDIA/DRAMA/2017)

🔹153. TARAMANI (2017)  🔽 A Review 🔽

🔹 “ഗ്രാൻഡ് മാ അമ്മയെ ഒരു ദിവസം Bitch എന്ന് വിളിച്ചതിന് ശേഷം അമ്മ ഗ്രാൻഡ് മായുടെ വീട്ടിൽ നിന്നും എന്നെയും കൊണ്ട് ഈ ഫ്ലാറ്റിൽ സ്ട്രയിൻജർ അങ്കിളിനോടൊപ്പം താമസമായി . എന്നാൽ ഇന്നലെ സ്ട്രയ്ൻജർ അങ്കിളും അമ്മയെ Bitch എന്ന് വിളിച്ചപ്പോൾ അമ്മ അങ്കിളിനെ അടിച്ച് പുറത്താക്കി . ഈ Bitch എന്ന് പറയുന്നത് അത്ര മോശം വാക്കാണോ?”

🔹COUNTRY : INDIA

     LANGUAGE : TAMIL

     GENRE : DRAMA

     DIRECTION : RAM

🔹SYNOPSIS 🔹

▪ സാധാരണ തമിഴ് ചിത്രങ്ങളുടെ ട്രാക്കിൽ നിന്ന് മാറി  വ്യത്യസ്തമായ, തനതായ ഒരു ആഖ്യാനശൈലിയോടെ ചിത്രങ്ങളൊരുക്കുന്ന സംവിധായകനാണ് റാം. അത് കൂടാതെ ആൻഡ്രിയ ജെറേമിയ കേന്ദ്രകഥാപാത്രത്തെ അവതരിപ്പിക്കുന്ന സ്ത്രീ കേന്ദ്രീകൃത ചിത്രമെന്ന നിലയിലും തരമണി പ്രതീക്ഷകൾ ഉയർത്തിയിരുന്നു. 

▪ ഒരു ഐ ടി കമ്പനിയിൽ ഉയർന്ന ശമ്പളത്തോടെ ജോലി നോക്കുന്ന ഭർത്താവില്ലാതെ മകനോടൊപ്പം ജീവിക്കുന്ന ദിയ എന്ന ഒരു ആംഗ്ലോ ഇന്ത്യൻ യുവതിയുടെ അതിജീവനത്തിന്റെ കഥയാണ് തരമണിയിലൂടെ റാം പറയുന്നത്. ഒറ്റയ്ക്ക് ജീവിക്കുന്ന ഒരു സുന്ദരിയായ യുവതി നമ്മുടെ സമൂഹത്തിൽ നിന്ന് നേരിടേണ്ടി വരുന്ന എല്ലാ വിധ തുറിച്ചു നോട്ടങ്ങളും കളിയാക്കലുകളും കുറ്റപ്പെടുത്തലുകളും നേരിടേണ്ടി വരുന്നെങ്കിലും അവയെയെല്ലാം സ്വന്തം മനോധൈര്യം കൊണ്ട് തട്ടിയെറിഞ്ഞ് തനിക്കിഷ്ടപ്പെട്ട രീതിയിൽ തനിക്ക് കംഫർട്ടബിൾ ആയ വസ്ത്രങ്ങൾ ധരിച്ച് ജീവിക്കുന്നവളാണ് ദിയ.ഒരു ദിവസം അവിചാരിതമായി  ഒരു മഴയത്ത് കണ്ട് മുട്ടുന്ന അപരിചിതനുമായി അടുക്കുന്നതോടെ അവളുടെ ജീവിതത്തിന് പുതിയൊരു ഭാവം കൈവരുന്നു. അവരുടെ ജീവിതത്തിലെ സുഖദു:ഖങ്ങൾ അനാവരണം ചെയ്യുന്നതോടൊപ്പം അതുമായി ബന്ധപ്പെട്ട വിവിധ സാമൂഹിക യാഥാർത്ഥ്യങ്ങളെക്കുറിച്ച് ചിത്രത്തിനിടയിലെ വോയിസ് ഓവറുകളിലൂടെ സംവിധായകൻ പ്രേക്ഷകനുമായി സംവദിക്കുകയും ചെയ്യുന്നു. 

🔹 REVIEW🔹

▪  തങ്ങളുടെ ചിത്രങ്ങളിലൂടെ പ്രേക്ഷകനുമായി നേരിട്ട് സംവദിക്കുന്ന രീതി പല വിദേശ ചിത്രങ്ങളിലും കണ്ടിട്ടുണ്ടെങ്കിലും നമ്മുടെ ചിത്രങ്ങളിൽ സാധാരണമല്ല. അതിന് ശ്രമിച്ചിട്ടുണ്ടെങ്കിൽ തന്നെ അതെല്ലാം അവസാനം വെറും സാരോപദേശങ്ങളായി മാറാറാണ് പതിവ് . എന്നാൽ തരമണിയിൽ ചിത്രത്തിന്റെ ഫ്ലോ ഒരു തരത്തിലും തടസ്സപ്പെടാതെ എന്നാൽ ചിത്രവുമായി നേരിട്ടോ അല്ലാതെയോ ബന്ധപ്പെടുത്താവുന്ന സാമൂഹിക വിഷയങ്ങൾ വളരെ രസകരമായി വോയിസ് ഓവറുകളിലൂടെ അവതരിപ്പിച്ചിരിക്കുന്നു. അവയിൽ ചിലത് നാം അംഗീകരിക്കുന്നവയും ചിലത് അംഗീകരിക്കാനാവാത്തവയും ആവാം. സംവിധായകൻ തന്നെ പറയുന്നത് പോലെ എല്ലാവരും ഫേസ് ബുക്കിൽ സ്റ്റാറ്റസ് ഇടുന്നു , അപ്പോൾ ഞാൻ എന്റെ സിനിമയ്ക്കിടക്ക് സ്റ്റാറ്റസ് ഇടുന്നു; അത്ര മാത്രം. 

▪ ദിയ എന്ന കേന്ദ്രകഥാപാത്രമായി ആൻഡ്രിയയുടെ മികച്ച പെർഫോർമൻസ് നിങ്ങൾക്ക് ചിത്രത്തിൽ കാണാം .അവർ ഇത് വരെ അഭിനയിച്ചതിൽ ഏറ്റവും മികച്ച കഥാപാത്രമാണ് ചിത്രത്തിലേത് എന്ന് നിസ്സംശയം പറയാം . പുതുമുഖം വസന്ത് രവിയും തന്റെ റോൾ ഭംഗിയാക്കി.ഗസ്റ്റ് റോളിൽ എത്തിയ അഞ്ജലിയും റയിൽവേ പോലീസിന്റെ വേഷം ചെയ്ത അഴഗം പെരുമാളും നന്നായിത്തന്നെ അവരവരുടെ റോളുകൾ അവതരിപ്പിച്ചു. സ്ത്രീ പുരുഷൻമാർ തമ്മിൽ വളരെ വയലന്റായി കലഹിക്കുന്ന രണ്ട് രംഗങ്ങൾ ചിത്രത്തിൽ അതീവ റിയലിസ്റ്റിക് ആയി അവതരിപ്പിച്ചിരിക്കുന്നു. സന്ദർഭത്തിന് യോജിച്ച ഗാനങ്ങളോടൊപ്പം ക്യാമറാ വർക്കും മികച്ച് നിന്നു. 

▪ നെഗറ്റീവ് ആയി തോന്നിയത് ചിത്രത്തിന്റെ ദൈർഘ്യവും വളരെ ലൗഡ്‌ ആയ ബിജിഎമ്മും ആണ്. പല രംഗങ്ങളിലും ബിജിഎം കാരണം ഡയലോഗുകൾ വ്യക്തമായില്ല .കുറച്ച് കൂടി ട്രിം ചെയ്ത് എഡിറ്റ് ചെയ്യാമായിരുന്നു എന്ന് തോന്നി. പ്രശസ്ത താരങ്ങളോ ഫാൻസോ ഒന്നും ഇല്ലാത്തത് കാരണം വിരലിലെണ്ണാവുന്നവരേ ചിത്രം കാണാൻ ഉണ്ടായിരുന്നുള്ളു. ടോറന്റ് റിലീസ് ആകുമ്പോൾ മികച്ച അഭിപ്രായം നേടുമെന്ന് ഉറപ്പാണ്. തട്ടുപൊളിപ്പൻ മസാല ചിത്രങ്ങൾ എല്ലാം പണം കൊടുത്ത് തിയേറ്ററിൽ പോയി കണ്ട് പ്രോത്സാഹിപ്പിക്കുകയും ഇതുപോലുള്ള വ്യത്യസ്തമായ പരീക്ഷണ ചിത്രങ്ങൾ ടോറൻറിൽ മാത്രം കാണുകയും ചെയ്യുന്നവർ ആണ് ഭൂരിപക്ഷം എന്നതിനാൽ അത്രയൊക്കെയേ പ്രതീക്ഷിക്കാനാവൂ.

▪ ഒരു സ്ത്രീ സെക്സി ആയി വസ്ത്രം ധരിച്ചാൽ, പുരുഷൻമാരോട് അടുത്തിടപഴകിയാൽ, ഒറ്റയ്ക്ക് ജീവിച്ചാൽ, രാത്രിയിൽ തനിയെ സഞ്ചരിച്ചാൽ ഒക്കെ അവരെ ദുഷിച്ച ദൃഷ്ടിയോടെ മാത്രം വീക്ഷിക്കുന്ന ഇന്നത്തെ സമൂഹത്തിന് നേരെ ചില അർത്ഥവത്തായ ചോദ്യങ്ങൾ സംവിധായകൻ ഉന്നയിക്കുന്നു. എത്രയൊക്കെ പുരോഗമനം പറഞ്ഞാലും  ഏത് പുരുഷനും അവസാനം സ്ത്രീ തന്റെ കാൽച്ചുവട്ടിൽ കിടക്കേണ്ടവളാണ് എന്ന ചിന്താഗതി തന്നെയാണ് വച്ച് പുലർത്തുന്നത് എന്നത് ചിത്രം ചൂണ്ടിക്കാട്ടുന്നു. നിരവധി അന്യ സ്ത്രീകളുമായി ബന്ധം പുലർത്തുന്ന ഭർത്താവ് സ്വന്തം ഭാര്യയ്ക്ക് മറ്റൊരാളുമായി ബന്ധമുണ്ടെന്ന് അറിയുമ്പോൾ പ്രതികരിക്കുന്നത് എങ്ങനെയെന്ന് നമുക്ക് കാണാം. ജീവിതം എന്നത് ഒരു നിമിഷം കൊണ്ട് അവസാനിക്കുന്നതല്ല .അപ്രതീക്ഷിതമായ വഴിത്തിരിവുകളിലൂടെ അത് നമ്മളെ കൊണ്ടെത്തിക്കുന്നത് എവിടെയാണെന്ന് ആർക്കും പ്രവചിക്കാനാവില്ല. ആ തിരിച്ചറിവ് ചിത്രത്തിലെ കഥാപാത്രങ്ങളെപ്പോലെ നാമേവർക്കും എന്നെങ്കിലും ഉണ്ടാകട്ടെ എന്നാശിക്കാം.

🔹RATING : 3.5/5 ( A Good , Daring And Thought Provoking Film )

©PRADEEP V K (AMAZING CINEMA)

4.5 Star (Brilliant) · Crime · Drama · Hindi · India

152. HAIDER (INDIA/CRIME DRAMA/2014)

🔹152. HAIDER (2014)  🔽 A Review 🔽

🔹”If I listen to my heart, it’s there.

      If I listen to my mind, though, it’s not.

      Should I take a life, or give mine,

      Should I remain, or should I not..”

🔹COUNTRY : INDIA

     LANGUAGE : HINDI

     GENRE : CRIME DRAMA

     DIRECTION : VISHAL BHARDWAJ

🔹SYNOPSIS 🔹

▪ ഇന്ത്യ ഇന്ന് സ്വതന്ത്ര്യം ലഭിച്ച് എഴുപത് വർഷങ്ങൾ പിന്നിടുകയാണ് .എന്നാൽ 1947 ൽ നമുക്കെല്ലാം ലഭിച്ച സ്വാതന്ത്ര്യം അല്ലെങ്കിൽ ഇന്ന് നാമെല്ലാം അനുഭവിക്കുന്ന സ്വാതന്ത്ര്യം അനുഭവിക്കാനുള്ള ഭാഗ്യം ലഭിക്കാത്ത നിരവധിയാളുകൾ ഇന്നും ഇന്ത്യയിൽ ജീവിക്കുന്നുണ്ട് എന്ന കാര്യം നാം ഓർക്കാറില്ല . അത്തരത്തിൽ ഒരു ഇന്ത്യൻ പൗരന് ഭരണഘടന അനുശാസിക്കുന്ന അടിസ്ഥാനപരമായ അവകാശം അതായത് ജീവിക്കാനുള്ള സ്വാതന്ത്ര്യം പോലും നിഷേധിക്കപ്പെട്ട ചിലരുടെ ചെറുത്തുനില്പിന്റെയും പ്രതികാരത്തിന്റെയും കഥ പറയുന്ന വിശാൽ ഭരദ്വാജ് സംവിധാനം ചെയ്ത HAIDER എന്ന ഹിന്ദി ചിത്രമാണ് ഈ സ്വാതന്ത്ര്യദിനത്തിൽ ഞാൻ നിങ്ങളുടെ മുമ്പിൽ അവതരിപ്പിക്കുന്നത്.  1990 കളിൽ ജമ്മു കാശ്മീരിൽ നിരവധി തീവ്രവാദി ഗ്രൂപ്പുകളുടെ നേതൃത്വത്തിൽ നടന്ന ഭീകരപ്രവർത്തനങ്ങളും അതിനെ എന്ത് വില കൊടുത്തും അമർച്ച ചെയ്യാനുള്ള ഇന്ത്യൻ പട്ടാളത്തിന്റെ ശ്രമങ്ങളും അതിന്റെ പരിണിത ഫലങ്ങളും ആണ് ഈ ചിത്രത്തിന്റെ കഥാ പശ്ചാത്തലം .ഷേക്സ്പിയർ നാടകമായ ഹാംലറ്റ് , ബഷാരത് പീർ എഴുതിയ കർഫ്യൂഡ് നൈറ്റ് എന്നിവ ആധാരമാക്കിയാണ് വിശാൽ ഭരദ്വാജും ബഷാരത് പീറും ചിത്രത്തിന്റെ തിരക്കഥ തയ്യാറാക്കിയിരിക്കുന്നത് .Maqbool, Omkara എന്നീ ചിത്രങ്ങൾക്ക് ശേഷം ഷേക്സ്പിയർ നാടകങ്ങളെ ആധാരമാക്കി വിശാൽ ഭരദ്വാജ് സംവിധാനം ചെയ്ത ചിത്രമാണിത്. 

▪ 1995 ൽ ശ്രീനഗറിൽ ഹിലാൽ മീർ എന്ന ഡോക്ടറെ ഒരു തീവ്രവാദി ഗ്രൂപ്പിലെ അംഗത്തിന് രഹസ്യമായി സ്വന്തം വീട്ടിൽ വച്ച് ഓപ്പറേഷൻ ചെയ്ത് കൊടുത്തു എന്ന കുറ്റത്തിന് ഇന്ത്യൻ പട്ടാളം പിടിച്ചു കൊണ്ടു പോകുകയും അദ്ദേഹത്തിന്റെ വീട് കത്തിച്ചു കളയുകയും ചെയ്യുന്നു. പട്ടാളത്തിന്റെ പിടിയിലായ അദ്ദേഹത്തെ അന്വേഷിച്ച് കണ്ട് പിടിക്കാൻ മകനായ ഹൈദർ നിരവധി ശ്രമങ്ങൾ നടത്തുന്നുവെങ്കിലും അദ്ദേഹം ജീവിച്ചിരിപ്പുണ്ടോ അതോ മരിച്ചുവോ എന്ന് പോലും കണ്ടെത്താനാവുന്നില്ല .അതിനിടയിൽ അമ്മയും അച്ഛന്റെ സഹോദരനും തമ്മിലുള്ള അടുപ്പവും കൂടി കാണുന്നതോടെ ഹൈദർ മാനസികമായി തളരുന്നു. തുടർന്ന് നടത്തിയ അന്വേഷണങ്ങളിൽ തീവ്രവാദി ബന്ധം ആരോപിച്ച് പട്ടാളം പിടികൂടി പിന്നീട് അപ്രത്യക്ഷരാകുന്ന നിരവധി സാധാരണ പൗരൻമാരിൽ ഒരാളാണ് തന്റെ അച്ഛനും എന്ന് ഹൈദർ മനസ്സിലാക്കുന്നു. തന്റെ കാമുകിയും ജേർണലിസ്റ്റുമായ ആർഷിയയുടെ സഹായത്തോടെ നടത്തിയ അന്വേഷണത്തിൽ  അച്ഛനെ പട്ടാളത്തിന് ഒറ്റിക്കൊടുത്തത് അദ്ദേഹത്തിന്റെ സഹോദരൻ തന്നെയായിരുന്നെന്നും അതിന് തന്റെ അമ്മയും കൂടി സഹായിച്ചിരുന്നുവെന്ന് മനസ്സിലാക്കുന്ന ഹൈദർ കടുത്ത മാനസിക സമ്മർദ്ദത്തിൽ അകപ്പെടുന്നു. തന്റെ അച്ഛനെ ചതിച്ചവരെ മുഴുവൻ നശിപ്പിച്ചാലേ തനിക്ക് സ്വസ്ഥത ലഭിക്കൂ എന്ന് ഹൈദർ വിശ്വസിക്കുന്നു. പ്രതികാരത്തിന്റെ തീച്ചൂളയിൽ സ്വയം വെന്തെരിയുമ്പോഴും അമ്മയോടുള്ള സ്നേഹത്തിന്റെ കനൽ അണയാതെ സൂക്ഷിക്കുന്ന ഹൈദറിന്റെ ആത്മ സംഘർഷങ്ങളുടെ കഥയാണ് ഈ ചിത്രം .

🔹 REVIEW🔹

▪  ഷേക്സ്പിയറിന്റെ ഹാംലറ്റും കാശ്മീർ പ്രശ്നങ്ങളും അതി വിദഗ്ദ്ധമായി ഇഴ ചേർത്ത് ചിത്രം സംവിധാനം ചെയ്യുന്നതിൽ വിശാൽ ഭരദ്വാജ് പൂർണമായും വിജയിച്ചിട്ടുണ്ട്. കെട്ടുറപ്പുള്ള തിരക്കഥയും ശക്തമായ സംഭാഷണങ്ങളും അഭിനേതാക്കളുടെ മികച്ച പെർഫോർമൻസും വിഷയത്തിന്റെ തീവ്രത പ്രേക്ഷകരിലേക്കെത്തിക്കുന്നതിൽ സഹായകരമായി. വിശാൽ ഭരദ്വാജ് തന്നെ ചിട്ടപ്പെടുത്തിയ മ്യൂസിക് സ്കോറും പങ്കജ് കുമാറിന്റെ ക്യാമറ വർക്കും ചിത്രത്തിന്റെ ടോണിന് ചേർന്ന് നിന്നു. സംഭാഷണത്തിനും മ്യൂസിക് ഡയറക്ഷനും അടക്കം അഞ്ച് നാഷണൽ അവാർഡുകൾ ചിത്രം കരസ്ഥമാക്കിയിരുന്നു. വിട്ടുവീഴ്ചകളില്ലാതെ കാലിക പ്രസക്തമായ ഒരു വിഷയം അതിന്റെ എല്ലാ തീവ്രതയോടും കൂടി അവതരിപ്പിച്ച വിശാൽ ഭരദ്വാജ് എന്ന സംവിധായകനിൽ നിന്ന് ഇനിയും ഏറെ സംഭാവനകൾ ഇന്ത്യൻ സിനിമാ ലോകത്തിന് ലഭിക്കും എന്ന് പ്രതീക്ഷിക്കുന്നു.

▪ ഹൈദർ എന്ന കേന്ദ്രകഥാപാത്രമായി ഷാഹിദ് കപൂർ അമ്പരപ്പിക്കുന്ന അഭിനയം കാഴ്ച വച്ചിരിക്കുന്നു. പ്രണയവും പ്രതികാരവും ദു:ഖവും ക്രോധവും സ്നേഹവും എല്ലാം ഒരേ സമയം അനുഭവിച്ച് മാനസികനില തന്നെ തകരാറിലാവുന്ന ഹാംലറ്റിന്റെ അവസ്ഥ പേറുന്ന ഹൈദർ എന്ന കഥാപാത്രം ഷാഹിദ് കപൂറിലെ നടനെ ഏറ്റവും നന്നായി  ഉപയോഗപ്പെടുത്തിയിട്ടുണ്ട്. ഹൈദറിന്റെ അമ്മയുടെ വേഷം അവതരിപ്പിച്ചിരിക്കുന്നത് ബോളിവുഡിലെ ഏറ്റവും മികച്ച നടിമാരിൽ ഒരാളായ തബു ആണ് . കുറ്റബോധവും മകനോടുള്ള സ്നേഹവും കൊണ്ട് വീർപ്പുമുട്ടുന്ന ആ കഥാപാത്രം ചിത്രം കഴിഞ്ഞാലും നിങ്ങളെ വിട്ടു പോകാതെ മനസ്സിൽ ഒരു വിങ്ങലായി അവശേഷിക്കും .ഹൈദറിന്റെ അമ്മാവന്റെ വേഷം ചെയ്ത കെ കെ മേനോനും പ്രണയിനിയുടെ വേഷത്തിലെത്തിയ ശ്രദ്ധ കപൂറും അതിഥി വേഷത്തിലെത്തിയ ഇർഫാൻ ഖാനും അടക്കം എല്ലാ നടീനടൻമാരും ഒന്നിനൊന്ന് മികച്ച് നിന്നു. സാധാരണ ബോളിവുഡ് ചിത്രങ്ങളിൽ കാണാറുള്ള സ്ഥിരം മസാലകൾ ഒന്നും ചേർക്കാതെ തന്നെ ഒരു നിമിഷം പോലും സ്ക്രീനിൽ നിന്ന് കണ്ണെടുക്കാൻ അനുവദിക്കാതെ പ്രേക്ഷകനെ പിടിച്ചിരുത്തുന്ന ചിത്രമാണിത്. ഓരോ ഭാരതീയനും നിർബന്ധമായും കണ്ടിരിക്കേണ്ട ഒരു ചിത്രം.

🔹SIGNIFICANCE🔹

▪ ജമ്മു കാശ്മീരിൽ തീവ്രവാദി ആക്രമണങ്ങളുടെ പേരിൽ സൈന്യം നടത്തിയിട്ടുള്ള മനുഷ്യാവകാശ ധ്വംസനങ്ങൾ നിരവധി എതിർപ്പുകൾക്ക് വഴിവച്ചിട്ടുള്ളതാണ്. സിനിമയിൽ ഒരു സ്ത്രീ  കഥാപാത്രം പറയുന്നത് തന്റെ ഭർത്താവ് മരിച്ചോ അതോ ജീവനോടെയുണ്ടോ എന്ന് പോലും അറിയാത്തതിനാൽ താൻ യുദ്ധ വിധവ (War Widow) അല്ല മറിച്ച് പകുതി യുദ്ധ വിധവ (Half War Widow) ആണെന്നാണ്. ചിത്രത്തിൽ ഹൈദർ പട്ടാള മേധാവിയോട് ആവശ്യപ്പെടുന്നതും തന്റെ അച്ഛൻ ജീവനോടെയുണ്ടോ അതോ ഇല്ലയോ  എന്നെങ്കിലും പറയുവാൻ മാത്രമാണ്. തീവ്രവാദ ഗ്രൂപ്പുകളിൽ നിന്നും ആർമിയിൽ നിന്നും പലപ്പോഴും കാശ്മീരിലെ സാധാരണ ജനങ്ങൾ ആ കാലഘട്ടങ്ങളിൽ അനുഭവിച്ചിട്ടുള്ളത്  ഒന്ന് തന്നെയാണ് എന്ന പലരും പറയാൻ മടിക്കുന്ന വസ്തുത ഹൃദയത്തിൽ തറയ്ക്കുന്ന രീതിയിൽ സംവിധായകൻ അവതരിപ്പിച്ചിരിക്കുന്നു. കയ്പ് നിറഞ്ഞ ചില സത്യങ്ങൾ പറയുമ്പോഴും അടുത്തിടെ ഉണ്ടായ കാശ്മീർ പ്രളയത്തിലും പ്രകൃതിക്ഷോഭങ്ങളിലും ജീവൻ പണയം വെച്ച് ദുരിതാശ്വാസ പ്രവർത്തനങ്ങൾ നടത്തിയ ഇന്ത്യൻ സൈന്യത്തിന്റെ സേവനങ്ങൾ എടുത്ത് പറയാനും സംവിധായകൻ മറക്കുന്നില്ല.

▪ കലാപകലുഷിതമായ കാശ്മീരിന്റെ സുരക്ഷയ്ക്ക് ഇന്ത്യൻ സൈന്യം ചെയ്തിട്ടുള്ള സേവനങ്ങൾ വിസ്മരിക്കാനാവില്ലെങ്കിലും വർഷങ്ങളായി മതത്തിന്റെ പേരിൽ സ്വന്തം നാട്ടിൽ തീവ്രവാദികളെന്ന് മുദ്ര കുത്തപ്പെട്ട് കൊടിയ പീഡനങ്ങൾ ഏറ്റുവാങ്ങേണ്ടി വന്ന ആയിരക്കണക്കിന് കാശ്മീർ നിവാസികളുടേയും ഭർത്താവും മക്കളും എവിടെയാണെന്ന് പോലും അറിയാതെ ജീവിക്കേണ്ടി വരുന്ന ഭാര്യമാരുടേയും അമ്മമാരുടേയും നിലവിളികൾ കാതുകളിൽ മുഴങ്ങിക്കൊണ്ടിരിക്കുന്നു. ഈ ചിത്രം ഒരിക്കലും ഇന്ത്യൻ ആർമിക്ക് എതിരല്ല . സ്നേഹനിധിയായ അച്ഛനെ നഷ്ടപ്പെട്ട ഒരു മകന്റെയും നനഞ്ഞിടം കുഴിക്കുന്ന സ്വാർത്ഥമതികളുടെ ചതിക്കുഴിയിൽ വീണ് എല്ലാം നഷ്ടപ്പെട്ട ഒരമ്മയുടേയും പ്രതികാരത്തിന്റെയും തിരിച്ചറിവിന്റെയും കഥ പറയുമ്പോൾ ചില പച്ചയായ യാഥാർത്ഥ്യങ്ങൾ തുറന്നു കാട്ടുന്നുവെന്ന് മാത്രം . രണ്ട് ആനകൾ തമ്മിൽ യുദ്ധം ചെയ്യുമ്പോൾ ചവിട്ടിമെതിക്കപ്പെടുന്നത് അവയുടെ കാലിനടിയിലെ പുല്ലുകൾ മാത്രമാണെന്ന യാഥാർത്ഥ്യം ദേശീയതാ വാദങ്ങൾക്കിടയിൽ നാം എന്നാണ് മനസ്സിലാക്കുക . മാസങ്ങൾക്ക് മുമ്പ് ജമ്മു കാശ്മീരിൽ ഇന്ത്യൻ ആർമി ജീപ്പിന് മുന്നിൽ യുവാവിനെ കെട്ടി വച്ച് ഗ്രാമങ്ങളിലൂടെ സഞ്ചരിച്ച സംഭവവും വേണമെന്നുള്ളവർക്ക് ഇതിനോട്  ചേർത്ത് വായിക്കാം. എന്തൊക്കെത്തന്നെയായാലും ഈ സ്വാതന്ത്ര്യദിനത്തിലും കാതുകളിൽ പ്രകമ്പനം കൊള്ളുന്ന ഭാരത് മാതാ കീ ജയ് വിളികൾക്കിടയിൽ പതിറ്റാണ്ടുകളായി തോക്കുകൾക്കും ബോംബുകൾക്കും ഇടയിൽപ്പെട്ട് ഉറ്റവരെ നഷ്ടപ്പെട്ട് ജീവിക്കുന്ന ചില മനുഷ്യാത്മാക്കളുടെ നിലവിളികൾ നമുക്ക് സൗകര്യപൂർവ്വം കേട്ടില്ലെന്ന് നടിക്കാം.

🔹RATING : 4.5/5 ( A BRILLIANT , BRAVE AND UNCOMPROMISING CINEMA WHICH SKILLFULLY BLENDS SHAKESPEAREAN TRAGEDY WITH KASHMIR CONFLICTS  )

©PRADEEP V K (AMAZING CINEMA)

4.0 Star (Very Good) · Drama · Hindi · India

150. MASAAN (INDIA/DRAMA/2015)

🔹150. MASAAN (2015)  🔽 A Review 🔽

🔹 MASAAN എന്ന ഹിന്ദി വാക്കിന് ശ്മശാനം എന്നാണ് അർത്ഥം. ജീവിതത്തിലുണ്ടാകുന്ന അപ്രതീക്ഷിത വേദനകളെയും ദുരന്തങ്ങളെയും തങ്ങളുടെ ഉള്ളിലെ ശ്മശാനത്തിൽ എരിച്ചു കളഞ്ഞ്  ജീവിതം മുന്നോട്ട് കൊണ്ട് പോകാൻ ശ്രമിക്കുന്ന നമ്മുടെ ചുറ്റും തന്നെയുള്ള ചില മനുഷ്യരുടെ കഥയാണ് ഈ ചിത്രം.

COUNTRY : INDIA

LANGUAGE : HINDI

GENRE : DRAMA

DIRECTION : NEERAJ GHAYWAN

🔹SYNOPSIS 🔹

▪️ വാരണാസിൽ  താമസിക്കുന്ന ദേവി എന്ന പെൺകുട്ടിയെ തന്റെ കാമുകനോടൊപ്പം ഒരു ഹോട്ടൽ മുറിയിൽ നിന്ന് അനാശാസ്യത്തിന് പൊലീസ് അറസ്റ്റ് ചെയ്യുന്നു. എന്നാൽ അപമാനം ഭയന്ന് കാമുകൻ ആത്മഹത്യ ചെയ്യുകയും കേസ് പുറത്താകാതിരിക്കാൻ പൊലീസ് ഇൻസ്പെക്ടർ മൂന്ന് ലക്ഷം രൂപ കൈക്കൂലി അവശ്യപ്പെടുകയും ചെയ്യുന്നതോടെ ദേവിയും ഗംഗാതീരത്ത്  മരണാനന്തര ചടങ്ങുകൾക്കുള്ള സാധനങ്ങൾ വില്ക്കുന്ന കട നടത്തുന്ന അവളുടെ അച്ഛനും നിസ്സഹായാവസ്ഥയിൽ എത്തുന്നു .വാരണാസിയിൽ തന്നെ പാരമ്പര്യമായി ശ്മശാനത്തിൽ മൃതദേഹങ്ങൾ ദഹിപ്പിക്കുന്ന ജോലി ചെയ്യുന്ന കുടുംബത്തിൽപ്പെട്ട ദീപക് ഉയർന്ന ജാതിയിലുള്ള ശാലുവുമായി പ്രണയത്തിലാകുന്നു . എന്നാൽ അപ്രതീക്ഷിതമായി സംഭവിച്ച ഒരു ദുരന്തം ദീപകിനെ മാനസികമായി തളർത്തുന്നു . തങ്ങളുടെ ജീവിതത്തിൽ സംഭവിച്ച അപ്രതീക്ഷിത ദുരന്തങ്ങൾ അവർ എങ്ങനെയാണ് നേരിടുന്നതെന്നാണ് ചിത്രത്തിന്റെ ഇതിവൃത്തം. 

🔹 REVIEW🔹

▪️  ഗാങ്ങ്സ് ഓഫ് വാസ്സിപ്പൂരിൽ അനുരാഗ് കാശ്യപിന്റെ സംവിധാന സഹായി ആയിരുന്ന  നീരജ് ഗെയവാന്റെ ആദ്യ സംവിധാന സംരംഭമാണ് MASAAN. യാതൊരു വിധ വിട്ടുവീഴ്ചകളുമില്ലാതെ കഥയോട് പൂർണമായും നീതി പുലർത്തി അദ്ദേഹം തന്റെ ആദ്യ ചിത്രം മനോഹരമാക്കി .ഗാന രചയിതാവായ വരുൺ ഗ്രോവറിന്റെ ശക്തമായ തിരക്കഥയും സംഭാഷണങ്ങളും ചിത്രത്തിന് കരുത്തായി .പ്രധാന കഥാപാത്രങ്ങളെ അവതരിപ്പിച്ച റിച്ച ഛദ്ദ , വിക്കി കൗശൽ , ശ്വേത ത്രിപാഠി എന്നിവർ കഥാപാത്രങ്ങളിലേക്ക് ഇറങ്ങിച്ചെന്ന് തന്മയത്വമാർന്ന പ്രകടനം കാഴ്ച വച്ചു. ദേവിയുടെ അച്ഛന്റെ വേഷം ചെയ്ത സഞ്ജയ് മിശ്രയുടെ പെർഫോർമൻസ് എടുത്ത് പറയേണ്ടതാണ് .

▪️ ബനാറസിൽ ഗംഗാ തീരത്ത് നടക്കുന്ന കഥയുടെ വൈകാരികത തുളുമ്പുന്ന മുഹൂർത്തങ്ങളിൽ മൂകസാക്ഷിയായ ഗംഗാനദി ഒരു പ്രധാന കഥാപാത്രമാകുന്നുണ്ട് .കത്തിയെരിയുന്ന ചിതകളും അതോടൊപ്പം കത്തിയെരിയുന്ന പ്രതീക്ഷകളും  അവിനാശ് അരുണിന്റെ ക്യാമറ മനോഹരമായി ഒപ്പിയെടുത്തിരിക്കുന്നു. ദേവി എന്ന കഥാപാത്രം ഇന്ത്യൻ സ്ത്രീകൾക്ക് ഒരു പാഠപുസ്തകമാണ് .അവൾ ജീവിതത്തിലെടുത്ത തീരുമാനങ്ങൾ ഓരോന്നും ആലോചിച്ചുറച്ചതായിരുന്നു.അത് കൊണ്ട് തന്നെ അപ്രതീക്ഷിതമായ തിരിച്ചടികൾ ശക്തമായി നേരിടാൻ അവൾക്ക് കഴിഞ്ഞു. ദേവി എല്ലാം സ്വന്തം കഴിവു കൊണ്ട് നേരിട്ടപ്പോൾ (അച്ഛന്റെ സഹായം മറക്കാനാവില്ലെങ്കിലും) ദീപക് തന്റെ ജീവിതത്തിലെ വേദനകൾ സുഹൃത്തുക്കളുടെ സഹായത്തോടെയാണ് നേരിട്ടത് .ഗംഗാ തീരത്ത് നെഞ്ച് പൊട്ടി നിലവിളിക്കുന്ന ദീപകിനെ സുഹൃത്തുക്കൾ സാന്ത്വനിപ്പിക്കുന്നത് മറക്കാനാവില്ല. 

▪️ പണമുണ്ടാക്കാൻ കിട്ടുന്ന ഒരവസരവും കൈവിടാത്ത മാനുഷികത ഒട്ടുമില്ലാത്ത പൊലീസുകാരൻ പലരേയും ഓർമിപ്പിക്കുന്നു. നിയമവും നീതിയും സ്വന്തം ഇഷ്ടത്തിന് വളച്ചൊടിക്കുന്ന ഇത്തരക്കാർ നമ്മുടെ ചുറ്റുപാടും ധാരാളം ഉണ്ടല്ലോ. പക്ഷേ ആരൊക്കെ എങ്ങനെയൊക്കെ ശ്രമിച്ചാലും പരാജയപ്പെടാൻ തയ്യാറല്ല എന്ന് സ്വയം തീരുമാനിക്കുന്നയാളെ നശിപ്പിക്കാനാവില്ല എന്ന ശക്തമായ സന്ദേശം നല്കുന്നിടത്താണ് ഈ ചിത്രത്തിന്റെ വിജയം . ആദ്യം പറഞ്ഞതു പോലെ മുന്നോട്ടുള്ള  ജീവിതത്തിന് വിലങ്ങുതടിയാവുന്ന ഓർമകളും വേദനകളും നമ്മുടെ ഉള്ളിലെ ശ്മശാനത്തിൽ എരിച്ചു കളഞ്ഞ് മുന്നേറുന്നവർക്ക് വേണ്ടിയാണ് ഈ ചിത്രം .പതിവ് ഹിന്ദി ചിത്രങ്ങളിൽ ഉണ്ടാകുന്ന മസാല രംഗങ്ങളൊന്നുമില്ലാത്ത MASAAN നിങ്ങൾക്ക് തികച്ചും വ്യത്യസ്തയായ ഒരു അനുഭവം സമ്മാനിക്കും.

🔹RATING : 4/5 ( VERY GOOD )

©PRADEEP V K (AMAZING CINEMA)