3.5 Star (Good) · English · Thriller · USA

172. DIG TWO GRAVES (USA/THRILLER/2014)

🔸172) DIG TWO GRAVES (2014)🔸 ഒരു അവലോകനം 🔸

🔸 ഹൃദയത്തിനുള്ളിൽ കത്തിപ്പടരുന്ന അഗ്നിയാണ് പ്രതികാരം. എന്നാൽ പ്രതികാരത്തിനു വേണ്ടി രണ്ടും കല്പിച്ച് യാത്ര തുടങ്ങുന്നതിന് മുമ്പ് ഒരു കാര്യം മറക്കരുത്. ശത്രുവിന് വേണ്ടി കുഴിക്കുന്ന കുഴിയോടൊപ്പം തനിക്ക് വേണ്ടിയും കൂടി മറ്റൊരു കുഴി കുഴിക്കാൻ!

🔸COUNTRY : USA
LANGUAGE : ENGLISH
GENRE : THRILLER
DIRECTION : HUNTER ADAMS
IMDB RATING : 5.7 / 10
‎ROTTEN TOMATOES RATING : 80%

🔸 1940 ലും 1970 ലും ആയി രണ്ട് വ്യത്യസ്ത കാലഘട്ടങ്ങൾ ഇഴ ചേർന്നാണ് ചിത്രത്തിന്റെ കഥ പുരോഗമിക്കുന്നത്. 1940 ൽ പൊലീസ് ഡെപ്യൂട്ടി ആയിരുന്ന വാട്ടർ ഹൗസും ഷെരീഫ് ആയിരുന്ന പ്രോക്ടറും രഹസ്യമായി ചെയ്യുന്ന ഒരു ക്രൈം അവരെ പീന്നീടുള്ള ജീവിതകാലം മുഴുവൻ വിടാതെ പിന്തുടരുന്നു. മുപ്പത് വർഷത്തിന് ശേഷം അപ്പോൾ ഷെരീഫ് ആയ വാട്ടർഹൗസിന്റെ കൊച്ചുമകൾ ജേക്കിന്റെ ജീവിതത്തിലേക്ക് നിരവധി നിഗൂഡതകൾ നിറഞ്ഞ ഒരു സംഘം ജിപ്സികൾ എത്തുന്നു .പ്രത്യക്ഷത്തിൽ ബന്ധമില്ലാത്തതെന്ന് തോന്നുന്ന ഇത്തരം നിരവധി സംഭവങ്ങൾ തമ്മിൽ ബന്ധിപ്പിക്കുന്ന ആ നിഗൂഢത എന്തായിരുന്നു?

🔸 കുറഞ്ഞ ചെലവിൽ ചിത്രീകരിച്ച ഒരു ഇൻഡിപെൻഡൻറ് ത്രില്ലർ ചിത്രമാണിത്. എന്നാൽ ഉയർന്ന ബഡ്ജറ്റിൽ വൻ സ്റ്റുഡിയോകളിൽ ചിത്രീകരിച്ച ചിത്രങ്ങളെ വെല്ലുന്ന രീതിയിലുള്ള സാങ്കേതിക മികവ് ചിത്രത്തിലുടനീളം കാണാം . Eric Maddison ന്റെ സിനിമാറ്റോഗ്രഫി അതി മനോഹരമായിരുന്നു. ക്വാറി രംഗങ്ങളും വെള്ളത്തിനടിയിലുള്ള രംഗങ്ങളും എടുത്ത് പറയേണ്ടതാണ്. അവസാന രംഗം വരെ രഹസ്യങ്ങളുടെ താക്കോൽ നഷ്ടമാകാതെ സൂക്ഷിക്കാൻ തിരക്കഥാകൃത്തും സംവിധായകനുമായ Hunter Adams ന് കഴിഞ്ഞിട്ടുണ്ട്. Ted Levine, Samantha Isler തുടങ്ങിയവരുടെ മികച്ച പെർഫോർമൻസും ചിത്രത്തിന് മുതൽക്കൂട്ടായി. യാഥാർത്ഥ്യവും ഫാന്റസ്സിയും ഇടകലർത്തി ഒരു ഡാർക്ക് മൂഡിൽ പോകുന്ന ചിത്രം അപ്രതീക്ഷിതമായ ക്ലൈമാക്സിൽ അവസാനിക്കുമ്പോൾ ഒരു മികച്ച ചിത്രം കണ്ട അനുഭവം പ്രേക്ഷകർക്ക് ലഭിക്കും.

🔸RATING : 3.5/5

🔸More Reviews @
http://www.amazingcinemareviews.wordpress.com

🔸Join AMAZING CINEMA Telegram Channel @
http://t.me/AmazingCinema

©PRADEEP V K

Advertisements
4.0 Star (Very Good) · English · Mystery · Thriller · USA

167. WIND RIVER (USA/MYSTERY THRILLER/2017)

🔸167) WIND RIVER (2017)🔸 ഒരു അവലോകനം 🔸

🔸 മഞ്ഞ് മൂടിയ ആ മലനിരകളിൽ വളർത്തുമൃഗങ്ങളെ കൊന്ന് തിന്നുന്ന അജ്ഞാത ജീവിയുടെ കാല്പാടുകൾ പിന്തുടർന്നെത്തിയ ഏജന്റ് കോറി ലാംബർട്ട് കണ്ടെത്തിയത് മഞ്ഞിൽ ഉറച്ച് കമിഴ്ന്ന് കിടക്കുന്ന നിലയിലുള്ള ഒരു പെൺകുട്ടിയുടെ മൃതദേഹമാണ്. അവളുടെ ശരീരത്തിലെ മുറിവുകളും കട്ട പിടിച്ച രക്തവും കണ്ട ലാംബർട്ട് വിദൂരമായ ഓർമ്മകളിൽ ഞെട്ടി വെറുങ്ങലിച്ച് നിന്നു. നോക്കെത്താ ദൂരത്തോളം പരന്ന് കിടക്കുന്ന മഞ്ഞ് പാളികൾക്കിടയിൽ മരണത്തിന്റെ വിളിയുമായി അജ്ഞാതനായ ഒരു കൊലയാളി ഒളിച്ചിരിക്കുന്നുണ്ടോ?

🔸COUNTRY : USA
LANGUAGE : ENGLISH
GENRE : MYSTERY THRILLER
DIRECTION : TAYLOR SHERIDAN
IMDB RATING : 7.9 / 10
‎ROTTEN TOMATOES RATING : 87%

🔹BACKGROUND 🔹

🔸 ജനവാസം വളരെ കുറഞ്ഞ നേറ്റീവ് അമേരിക്കൻസിന് വേണ്ടിയുള്ള വിൻഡ് റിവർ ഇൻഡ്യൻ റിസർവേഷനിലെ വൈൽഡ് ലൈഫ് സർവീസ് ഏജൻറായ കോറി ലാംബർട്ട് അപകടകാരികളായ മൃഗങ്ങളെ കൊല്ലുന്നതിൽ വിദഗ്ദനാണ്. ശൈത്യ കാലത്ത് മഞ്ഞ് മൂടിക്കിടക്കുന്ന മലനിരകൾ നിറഞ്ഞ ആ പ്രദേശത്തിന്റെ മുക്കും മൂലയും അയാൾക്ക് കാണാപാഠമായിരുന്നു .എങ്കിലും നതാലി ഹാൻസൺ എന്ന പതിനെട്ടുകാരിയുടെ മരണം അന്വേഷിക്കാനെത്തിയ FBl ഏജന്റ് ജെയ്ൻ ബാനറിനെ സഹായിക്കാൻ തയ്യാറാവുന്നതിന് അയാൾക്ക് മറ്റ് ചില കാരണങ്ങൾ കൂടി ഉണ്ടായിരുന്നു.

🔹ANALYSIS🔹

🔸 അമേരിക്കൻ റിസർവേഷനുകളിലെ കാണാതാവുന്ന പെൺകുട്ടികളുമായി ബന്ധപ്പെട്ട നിരവധി യഥാർത്ഥ സംഭവങ്ങളിൽ നിന്ന് പ്രചോദനം ഉൾക്കൊണ്ടാണ് Taylor Sheridan ഈ ചിത്രത്തിന്റെ തിരക്കഥയും സംവിധാനവും നിർവഹിച്ചിരിക്കുന്നത്.ശക്തമായ തിരക്കഥയും അർത്ഥപൂർണമായ സംഭാഷണങ്ങളും ചിത്രത്തിന് കരുത്തേകുന്നു. ഏജന്റ് കോറി ലാംബർട്ട് എന്ന കഥാപാത്രമായെത്തിയ ജെറമി റെന്നറും FBl ഏജൻറ് ജെയ്ൻ ബാനറായെത്തിയ എലിസബത്ത് ഓൾസണും അടക്കം ചെറിയ കഥാപാത്രങ്ങളായെത്തിയവർ പോലും മികച്ച പ്രകടനം തന്നെ കാഴ്ച വച്ചു. ജെറമി റെന്നറുടെ വളരെ നല്ല കഥാപാത്രങ്ങളിൽ ഒന്നാണ് ഈ ചിത്രത്തിലേത്. വളരെ കുറച്ച് സമയം മാത്രമേ സ്ക്രീനിൽ വരുന്നുള്ളു എങ്കിലും നതാലി ഹാൻസൺ എന്ന കഥാപാത്രം പ്രേക്ഷകരുടെ ഉള്ളിൽ ഒരു നോവായി അവശേഷിക്കും .

🔸ഓരോ നിമിഷവും പ്രേക്ഷകനെ ആകാംഷയുടെ മുൾമുനയിൽ നിർത്തിയാണ് ചിത്രം മുന്നോട്ട് പോകുന്നത്. മഞ്ഞ് നിറഞ്ഞ മലനിരകളുടെ മനോഹാരിതയും ഭീകരതയും ഒന്നുപോലെ ബെൻ റിച്ചാർഡ്സൺ തന്റെ ക്യാമറയിൽ ഒപ്പിയെടുത്തിട്ടുണ്ട്. ചിത്രം കണ്ടിരിക്കുമ്പോൾ അറിയാതെ ഒരു തണുപ്പ് നിങ്ങളുടെ ദേഹത്തും അരിച്ചിറങ്ങും. എല്ലാത്തിലും ഉപരിയായി പ്രേഷകനെ പൂർണമായും തൃപ്തിപ്പെടുത്തുന്ന ഒരു ക്ലൈമാക്സ് ആണ് ചിത്രത്തിന്. ഈ വർഷം പുറത്തിറങ്ങിയ അമേരിക്കൻ ചിത്രങ്ങളിൽ എല്ലാ തരത്തിലും തൃപ്തിപ്പെടുത്തിയ ചിത്രങ്ങളിൽ ഒന്നാണ് വിൻഡ് റിവർ . നതാലി ഹാൻസൺ കുറിച്ചിട്ട ആ വാക്കുകൾ അവസാനിക്കാത്ത ഒരു കവിത പോലെ ആ മലനിരകളിൽ മുഴങ്ങുന്നത് എനിക്ക് ഇപ്പോഴും കേൾക്കാം. നഗ്നപാദയായി മഞ്ഞ് പാളികൾക്ക് മുകളിലൂടെ മൈലുകളോളം ഓടിയ അവളുടെ അവസാന വാക്കുകളും ഇതായിരുന്നു.

🔹🔹🔹There’s a meadow in my perfect world, where wind dances the branches of a tree, casting leopard spots of light across the face of a pond, the tree stands tall and grand and alone, shading the world beneath it . It is here, in the cradle of all I hold dear , I guard every memory of you . And when I find myself frozen in the mud, real far from your loving eyes, I will return to this place, and find solace in the simple perfection of knowing you🔹🔹🔹

🔸RATING : 4/5 (VERY GOOD)

🔸 For Getting The Movie Download Link Join AMAZING CINEMA Telegram Channel @
http://t.me/AmazingCinema

©PRADEEP V K

3.5 Star (Good) · Anthology · India · Malayalam · Romance · Thriller

165. SOLO (INDIA/2017/ROMANTIC THRILLER)

🔹165) SOLO (2017) 🔹 A REVIEW 🔹

🔹 “ജലം , വായു , അഗ്നി , ഭൂമി , ആകാശം എന്നീ പഞ്ചഭൂതങ്ങളാലാണ് പ്രപഞ്ചത്തിലെ ഓരോ അണുവും രൂപപ്പെട്ടിരിക്കുന്നത് . അവയെ നിയന്ത്രിക്കുന്നതാവട്ടെ ത്രിമൂർത്തികളിൽ പ്രധാനിയും സംഹാരമൂർത്തിയുമായ ശിവനും” – As Per Ancient Mythology.

🔹COUNTRY : INDIA
LANGUAGE : MALAYALAM
GENRE : ROMANTIC THRILLER ANTHOLOGY
DIRECTION : BEJOY NAMBIYAR

🔹 OBSERVATIONS 🔹

▪️ പഞ്ചഭൂതങ്ങളിലെ ജലം , വായു , അഗ്നി , ഭൂമി എന്നിവയെ ആധാരമാക്കി ശിവന്റെ വ്യത്യസ്ത ഭാവങ്ങളിലുള്ള ശേഖർ , ത്രിലോക്, ശിവ , രുദ്ര എന്നിങ്ങനെ നാല് പേരുടെ കഥയാണ് സോളോ എന്ന ചിത്രത്തിലൂടെ ബിജോയ് നമ്പ്യാർ പറയുന്നത്. ശിവതാണ്ഡവത്തിന്റെ വ്യത്യസ്ത ഭാവങ്ങൾ ആണ് വേൾഡ് ഓഫ് ശേഖർ, വേൾഡ് ഓഫ് ത്രിലോക്, വേൾഡ് ഓഫ് ശിവ, വേൾഡ് ഓഫ് രുദ്ര എന്നീ നാല് എപ്പിസോഡുകളുടെ തീം ആയി സ്വീകരിച്ചിരിക്കുന്നത്. ബിജോയ് നമ്പ്യാരുടെ തന്നെ തിരക്കഥയിൽ മലയാളത്തിലും തമിഴിലും ചിത്രം റിലീസ് ചെയ്തിരുന്നു.

🔹 POSITIVE SIDES🔹

▪️ നാല് കഥകളിലും പ്രധാന കഥാപാത്രത്തെ അവതരിപ്പിച്ച ദുൽക്കർ സൽമാന്റെ അഭിനയ ജീവിതത്തിലെ മികച്ച ചില മുഹൂർത്തങ്ങൾ സോളോയിൽ കാണാൻ കഴിഞ്ഞു .മറ്റ് കഥാപാത്രങ്ങളെ അവതരിപ്പിച്ച മലയാളത്തിലും തമിഴിലും ഹിന്ദിയിലും ഉള്ള നടീനടൻമാർ എല്ലാവരും അവരവരുടെ വേഷങ്ങൾ ഭംഗിയാക്കിയിട്ടുണ്ട്. വ്യത്യസ്തമായ രീതിയിലുള്ള ഗാനങ്ങളും ഗാന ചിത്രീകരണവും അതി മനോഹരമായിരുന്നു. ഒരു റൊമാൻറിക് ഫാമിലി ഡ്രാമ വിഭാഗത്തിൽ പെടുത്താവുന്നതാണ് ആദ്യ എപ്പിസോഡായ വേൾഡ് ഓഫ് ശേഖർ.രണ്ടാമത്തെ എപ്പിസോഡായ വേൾഡ് ഓഫ് ത്രിലോക് ഒരു റൊമാൻറിക് റിവഞ്ച് ത്രില്ലറും മൂന്നാമത്തെ എപ്പിസോഡായ വേൾഡ് ഓഫ് ശിവ ഒരു ഡാർക്ക് ക്രൈം ത്രില്ലറും ആണ്. അവസാന എപ്പിസോഡായ വേൾഡ് ഓഫ് രുദ്രയെ ഒരു റൊമാൻറിക് ഫാമിലി ത്രില്ലറിൽ പെടുത്താം.

▪ ശിവൻ എന്ന മിത്തിക്കൽ കഥാപാത്രത്തെ ആഴത്തിൽ മനസ്സിലാക്കിയിട്ടുള്ളവർക്ക് ചിത്രത്തിന്റെ തീം വളരെ പെട്ടെന്ന് മനസ്സിലാക്കാനാവും . പ്രണയം , പ്രതികാരം , കാമം , ക്രോധം , ത്യാഗം തുടങ്ങിയ മനുഷ്യന്റെ എല്ലാ വികാരങ്ങളും ഒരാളിൽ സന്നിവേശിപ്പിച്ചതാണ് ശിവൻ എന്ന കഥാപാത്രം എന്ന് പറയാം. സ്ത്രീ എന്നത് ശിവന്റെ ശക്തിയും ദൗർബല്യവുമാണ് . കാമുകി , ഭാര്യ , മകൾ , അമ്മ ,സഹോദരി എന്നിങ്ങനെ വിവിധ ഭാവങ്ങളിലുള്ള സ്ത്രീയുടെ പുരുഷനിലുള്ള സ്വാധീനം ശിവന്റെ വിവിധ ഭാവങ്ങളിലൂടെ അവതരിപ്പിക്കാൻ സംവിധായകന് സാധിച്ചിട്ടുണ്ട്. ഓരോ എപ്പിസോഡിന്റെയും തുടക്കത്തിൽ കാണിക്കുന്ന ശിവതാണ്ഡവത്തിന്റെ കാരിക്കേച്ചറുകളും വിവരണവും ഹൃദ്യമായിരുന്നു. വേൾഡ് ഓഫ് ശിവയിലെ ദേവീ സ്തുതിയോട് ചേർന്നുള്ള ആക്ഷൻ രംഗങ്ങൾ വളരെ ആവേശഭരിതമായിരുന്നു.

🔹NEGATIVE SIDES🔹

▪️ ചിത്രത്തിലെ ഡയലോഗുകളിൽ ഒരു തരം അവ്യക്തതയും നാടകീയതയും കലർന്നിരുന്നു. വിക്കുള്ള കഥാപാത്രത്തിന്റെ കഥയും കൂടി ആയപ്പോൾ വേൾഡ് ഓഫ് ശേഖറിലെ ഡയലോഗുകൾ കൂടുതൽ പരിതാപകരമായി . അധോലോക മാഫിയയുടെ കഥ പറഞ്ഞ വേൾഡ് ഓഫ് ശിവയിലെ ദുൽക്കറിന്റെ സ്ഥായിയായ മുഖഭാവം കഥാപാത്രം ആവശ്യപ്പെടുന്നതാണെന്ന് കരുതാം. ആദ്യ ക്ലൈമാക്സിന്റെ പേരിൽ ഒരു പാട് നെഗറ്റീവ് കമൻറ്സ് ലഭിച്ച വേൾഡ് ഓഫ് രുദ്രയിലെ പ്രധാന പാളിച്ച വെട്ടിമാറ്റി അംഗഭംഗം വരുത്തിയ പുതിയ ക്ലൈമാക്സ് രംഗം തന്നെയായിരുന്നു എന്നത് വിരോധാഭാസമാവാം.

🔹FINAL WORDS🔹

▪ സിനിമ എന്നത് പൂർണമായും സംവിധായകന്റെ സൃഷ്ടിയാണ്. ആരോഗ്യമുള്ള കയ്യും കാലും മറ്റവയവങ്ങളും ഉണ്ടായാൽ മാത്രം പോര അവയെല്ലാം യഥാസ്ഥാനത്ത് വന്നാൽ മാത്രമേ ആരോഗ്യമുള്ള ഒരു കുഞ്ഞ് ജനിക്കൂ എന്നത് പോലെ മികച്ച അഭിനേതാക്കളും തിരക്കഥയും ഗാനങ്ങളും മറ്റ് സംവിധാനങ്ങളും ഉണ്ടാകുന്നതിലുപരി അവ കൃത്യമായ രീതിയാൽ കൃത്യമായ അളവിൽ സന്നിവേശിപ്പിച്ചാൽ മാത്രമേ മികച്ച ഒരു സിനിമ സൃഷ്ടിക്കപ്പെടൂ. ചില ചെറിയ പാളിച്ചകൾ മാറ്റി നിർത്തിയാൽ മലയാളത്തിലെ മികച്ച ചിത്രങ്ങളുടെ ഗണത്തിൽ പെടുത്താവുന്ന ഒരു ചിത്രം സംവിധാനം ചെയ്യാൻ ബിജോയ് നമ്പ്യാർക്ക് കഴിഞ്ഞു എന്ന് പറയാം .പുതുമ നിറഞ്ഞ വിഷയങ്ങൾ പുതുമ നിറഞ്ഞ രീതിയിൽ അവതരിപ്പിക്കുന്ന ചിത്രങ്ങളാണ് സാമ്പത്തിക വിജയം നേടുന്ന ചിത്രങ്ങളെക്കാളും ഏതൊരു സിനിമാ ഫീൽഡിന്റെയും വ്യാപ്തി നിശ്ചയിക്കുന്നത് എന്ന് അറിയാവുന്ന ഒരു സംവിധായകനെ നമുക്ക് ചിത്രത്തിലുടനീളം കാണാം .

▪ എന്നാൽ സ്വന്തം ഭാഷയിലെ പരീക്ഷണ ചിത്രങ്ങളെ അവജ്ഞയോടെ മാത്രം നോക്കിക്കാണുന്ന ഒരു സമൂഹത്തിലേക്കാണ് അദ്ദേഹം തന്റെ സ്വപ്ന ചിത്രവുമായെത്തിയത്. ഓരോ സിനിമയും അത് അർഹിക്കുന്ന സീരിയസ്നെസ്സോടെ വേണം സമീപിക്കേണ്ടത് എന്നറിയാത്ത ചിലർ നടത്തിയ പരാക്രമങ്ങളുടെ പേരിൽ മികച്ച ഒരു ക്ലൈമാക്സിനെ യാതൊരു സാമാന്യബോധവുമില്ലാതെ അണിയറക്കാർ വെട്ടിമുറിച്ച് നശിപ്പിച്ചു എന്നതാണ് ഏറ്റവും ഖേദകരം. പുതുമകളെ എന്നും അംഗീകരിക്കുന്ന തമിഴ് പ്രേക്ഷകർ ചിത്രത്തെ ഇതിലും നന്നായി സ്വീകരിക്കും എന്ന് വിശ്വസിക്കുന്നു. സ്വന്തം സൃഷ്ടിയെ ഇങ്ങനെ നശിപ്പിച്ചത് കാണുമ്പോഴുള്ള വേദനക്ക് ബിജോയ് നമ്പ്യാർ എന്ന സംവിധായകനോട് അതിന് കാരണക്കാരായ മലയാളി പ്രേക്ഷകരുടെ പേരിൽ മാപ്പ് ചോദിച്ചു കൊണ്ട് നിർത്തുന്നു.

🔹 Join AMAZING CINEMA Telegram Channel @
http://t.me/AmazingCinema

©PRADEEP V K

3.5 Star (Good) · English · Thriller · USA

164. THE INVITATION (USA/THRILLER/2015)

🔼164) THE INVITATION  (2015)  🔼A RECOMMENDATION🔼

🔼 “തന്റെ പ്രിയപ്പെട്ട ഒരാളിന്റെ ഒരിക്കലും നികത്താനാവാത്ത വേർപാട് സൃഷ്ടിച്ച അതി കഠിനമായ ദു:ഖവും കുറ്റബോധവും എങ്ങനെയാണ് മറികടക്കാനാവുക? എല്ലാം അംഗീകരിച്ച് ദു:ഖത്തെ ജീവിതത്തിന്റെ ഭാഗമാക്കി മുന്നോട്ട് പോകുന്നതാണോ അതോ ഒന്നും സംഭവിച്ചിട്ടില്ല എന്ന് വിശ്വസിച്ച് സന്തോഷം പ്രകടിപ്പിച്ച് ജീവിക്കുന്നതാണോ ഏതാണ് ശരി?”

🔼COUNTRY : USA

     LANGUAGE : ENGLISH

     GENRE : THRILLER

     DIRECTION : KARYN KUSAMA

     IMDB RATING : 6.7 / 10

     ‎ROTTEN TOMATOES RATING : 88%

🔼 തന്റെ മുൻ ഭാര്യയുടെയും ഭർത്താവിന്റെയും ക്ഷണം സ്വീകരിച്ച് താൻ മുൻപ് താമസിച്ചിരുന്ന വീട്ടിലേക്ക് സുഹൃത്തുക്കളുമൊത്തുള്ള  ഒരു പാർട്ടിയിൽ പങ്കെടുക്കാനായി Will ഉം ഗേൾഫ്രണ്ട് Kira യും എത്തുന്നു .ആ വീട് മുൻപ് ഒരപകടത്തിൽ കൊല്ലപ്പെട്ട മകന്റെ ഓർമ്മകൾ Will ൽ ഉണർത്തുന്നു. എന്നാൽ മുൻ ഭാര്യ Eden യാതൊരു ദു:ഖവും പ്രകടിപ്പിക്കാതെ സന്തുഷ്ടയായി കാണപ്പെടുന്നത് അയാളിൽ സംശയങ്ങൾ ഉണർത്തുന്നു. സുഹൃത്തുക്കൾക്കൊപ്പം അപരിചിതരായ രണ്ട് പേർ കൂടി എത്തുന്നതോടെ Will ന്റെ സംശയങ്ങൾ ഇരട്ടിയാവുന്നു. മറ്റുള്ള സുഹൃത്തുക്കൾ മദ്യത്തിലും സംഭാഷണങ്ങളിലും മുഴുകി ആസ്വദിക്കുമ്പോൾ ആ വീടും മകന്റെ ഓർമ്മകളും മുൻ ഭാര്യയുടേയും ഭർത്താവിന്റെയും സംശയാസ്പദമായ പെരുമാറ്റവും എന്തോ വലിയ അപകടം നടക്കാൻ പോകുന്നുവെന്ന തോന്നൽ അയാളിൽ ഇരട്ടിയാക്കുന്നു. രണ്ട് വർഷമായി ആരും കണ്ടിട്ടില്ലാത്ത Eden ഉം ഭർത്താവും പെട്ടെന്ന് ഒരു ദിവസം ആഡംബരം നിറഞ്ഞ ഇങ്ങനെ ഒരു പാർട്ടി നടത്തുന്നതിന് പിന്നിൽ എന്തെങ്കിലും ഗൂഢ ഉദ്ദേശ്യമുണ്ടോ?

🔼Girl Fight , AEon Flex, Jennifer’s Body എന്നീ ചിത്രങ്ങൾക്ക് ശേഷം Karyn Kusama സംവിധാനം ചെയ്യുന്ന ചിത്രമാണിത്. ആദ്യ ചിത്രം നിരൂപക പ്രശംസ നേടിയെങ്കിലും പിന്നീട് വന്ന ചിത്രങ്ങൾ ആ നിലവാരത്തിലേക്ക് എത്തിയിരുന്നില്ല. അതിൽ നിന്നെല്ലാം പാഠങ്ങൾ അവർ പൂർണമായും ഉൾക്കൊണ്ടുവെന്ന് The Invitation എന്ന ചിത്രം തെളിയിക്കുന്നു. ഹൊറർ എലമെന്റ്സ് കലർന്ന ആദ്യവസാനം എന്താണ് സംഭവിക്കാൻ പോകുന്നത് എന്ന ആകാംഷ കാണികളിൽ നിറച്ച് മുന്നോട്ട് പോകുന്ന ഒരു ത്രില്ലർ ചിത്രമാണിത് .ചിത്രത്തിലെ പ്രധാന കഥാപാത്രം അനുഭവിക്കുന്ന അതേ സംശയങ്ങളും ഭയവും പ്രേക്ഷകരിലും ഉണ്ടാക്കാൻ കഴിഞ്ഞതാണ് ഈ ചിത്രത്തിന്റെ വിജയം. ജീവിതത്തിലുണ്ടാകുന്ന ദുരന്തങ്ങളോടും നഷ്ടങ്ങളോടും ഓരോ മനുഷ്യരും വ്യത്യസ്തമായ രീതിയിൽ ആവും പ്രതികരിക്കുക . അവരുടെ അത്തരം അവസ്ഥകൾ തങ്ങളുടെ ആവശ്യങ്ങൾക്ക് വേണ്ടി മുതലെടുക്കുന്നവരും നമ്മുടെ സമൂഹത്തിൽ ധാരാളം. മനസ്സ് ഒന്നിടറിയാൽ കൈവിട്ട് പോകുന്ന അത്തരം സാഹചര്യങ്ങൾ ഭംഗിയായി ചിത്രത്തിൽ അവതരിപ്പിച്ചിട്ടുണ്ട് .പക്ഷേ സാവധാനം മുന്നേറുന്ന ചിത്രം ചിലരെയെങ്കിലും ബോറടിപ്പിച്ചേക്കാം. ക്ലൈമാക്സ് രംഗങ്ങൾ ക്ലീഷെ ആയെങ്കിലും തൃപ്തിപ്പെടുത്തുന്നതാണ്. 

🔼RATING : 3.5/5 (GOOD)

🔼 For Getting The Movie Download Link Join AMAZING CINEMA Telegram Channel @

http://t.me/AmazingCinema

©PRADEEP V K

4.0 Star (Very Good) · Crime · India · Tamil · Thriller

160. THUPPARIVALAN (INDIA/CRIME THRILLER/2017)

🔹160) THUPPARIVALAN (2017)  🔹 A REVIEW 🔹

🔹 “കൊല്ലപ്പെട്ടത് ഒരു പട്ടി ആണെങ്കിലും അപകടസ്ഥലത്ത് നിന്ന് ലഭിച്ച തെളിവുകൾ അവിടെ കൂടുതൽ വലിയ എന്തോ സംഭവങ്ങൾ നടന്നതായി ഒരു സംശയം ഉണ്ടാക്കുന്നു . ഞാനറിയാത്ത ലോകം അറിയാത്ത ആരോ ഇതിനെല്ലാം പിന്നിലുണ്ടെന്ന് ഉറപ്പാണ് ”

🔹COUNTRY : INDIA

     LANGUAGE : TAMIL

     GENRE : CRIME THRILLER

     DIRECTION : MYSSKIN

🔹 BACKGROUND 🔹

🔼 സർ ആർതർ കോനൻ ഡോയൽ സൃഷ്ടിച്ച   ഡിറ്റക്ടീവ് ഷെർലക്ക് ഹോംസ്  യാതൊരു മുഖവുരയും ആവശ്യമില്ലാത്ത കഥാപാത്രമാണ്. തന്റെ അസാമാന്യമായ ബുദ്ധികൂർമ്മതയാൽ നോവലിലൂടെയും സിനിമകളിലൂടെയും സീരീസുകളിലൂടെയും ലോകമെമ്പാടും ഉള്ള ആസ്വാദകരെ വിസ്മയിപ്പിച്ച ആ കഥാപാത്രത്തിന് സമാനമായി മറ്റൊരാളെ സങ്കല്പിക്കാൻ പോലുമാവില്ല . ഷെർലക് ഹോംസിന് സമാനമായി മറ്റൊരു കഥാപാത്രത്തെ സൃഷ്ടിക്കാനുള്ള ശ്രമങ്ങളൊന്നും പൂർണമായി വിജയിച്ചു എന്ന് പറയാനുമാവില്ല. ബംഗാളി സിനിമയിൽ ബോംകേഷ് ബക്ഷി ഉണ്ടെങ്കിലും സൗത്ത് ഇൻഡ്യൻ സിനിമയിൽ അത് പോലെ ഒരു കഥാപാത്രം ഉണ്ടോ എന്ന് സംശയമാണ്. എന്നാൽ കഴിഞ്ഞ ദിവസം തുപ്പരിവാലൻ എന്ന തമിഴ് ചിത്രം കണ്ടതിന് ശേഷം അതിനുള്ള ഉത്തരം എനിക്ക് കിട്ടി .നമുക്കും ഒരു ഷെർലക് ഹോംസിനെ ലഭിച്ചു കഴിഞ്ഞു .അദ്ദേഹത്തിന്റെ പേര് കനിയൻ പൂങ്കുന്ദ്രൻ എന്നാണ്. 

🔼തന്റെ സുഹൃത്തും സഹപ്രവർത്തകനുമായ മനോഹറിനോടൊപ്പം പ്രൈവറ്റ് ഡിറ്റക്ടീവ് ഏജൻസി നടത്തുന്ന കനിയൻ എന്ന തുപ്പരിവാലൻ(ഡിറ്റക്ടീവ്) തന്റെ കഴിവിനൊത്തുള്ള ഒരു കേസ് ലഭിക്കാത്തതിൽ ദു:ഖിതനാണ്. എന്നാൽ തന്റെ പട്ടിയെ കൊന്നത് ആരാണെന്ന് കണ്ട് പിടിക്കണമെന്ന ആവശ്യവുമായി ഒരു കൊച്ചു കുട്ടി അദ്ദേഹത്തെ സമീപിച്ചപ്പോൾ താൻ ഇതുവരെയും അന്വേഷിച്ചിട്ടുള്ളതിൽ ഏറ്റവും കോംപ്ലിക്കേറ്റഡ് ആയ  അപകടകരമായ കേസ് ആണ് തന്റെ മുന്നിൽ എത്തിയിരിക്കുന്നതെന്ന് കനിയൻ ഒരിക്കലും വിചാരിച്ചിരുന്നില്ല. 

🔹 OBSERVATIONS 🔹

🔼 തമിഴ് സിനിമയിൽ ഒരു നവതരംഗത്തിന് തുടക്കം കുറിച്ച സംവിധായകനാണ് മിഷ്കിൻ. 2006 ൽ ചിത്തിരം പേശുതടി എന്ന ചിത്രത്തിൽ തുടങ്ങി തന്റെ എട്ടാമത്തെ സംവിധാന സംരംഭമായ തുപ്പരിവാലനിൽ എത്തി നില്ക്കുമ്പോൾ ഇന്ത്യൻ സിനിമയിലെ ഏറ്റവും മികച്ച സംവിധായകരുടെ നിരയിലേക്ക് അദ്ദേഹം എത്തിയിരിക്കുന്നതായി ധൈര്യപൂർവ്വം പറയാം .

🔼തന്റെ അഭിനയ ജീവിതത്തിലെ ഏറ്റവും മികച്ച കഥാപാത്രമായ വളരെ വ്യത്യസ്തമായ സ്വഭാവ സവിശേഷതകൾക്ക് ഉടമയായ കനിയൻ പൂങ്കുന്ദ്രനെ  വിശാൽ മനോഹരമായി അവതരിപ്പിച്ചു . ചിത്രത്തിന്റെ നിർമ്മാതാവും വിശാൽ തന്നെയായിരുന്നത് വിട്ടുവീഴ്ചയില്ലാത്ത ചിത്രീകരണത്തിന് കൂടുതൽ സഹായകമായി. കനിയന്റെ സന്തത സഹചാരിയായ മനോഹറിനെ പ്രസന്ന ഗംഭീരമാക്കി . എങ്കിലും ഞെട്ടിച്ചു കളഞ്ഞത് ചിത്രത്തിലെ പ്രധാന വില്ലൻ കഥാപാത്രമായെത്തിയ വിനയ് ആണ് .ഇത് വരെ നിഷ്കളങ്ക വേഷങ്ങളിൽ കണ്ടിട്ടുള്ള വിനയ് അവതരിപ്പിച്ച ഡെവിൾ എന്ന കഥാപാത്രം തമിഴ് സിനിമയിൽ വന്നിട്ടുള്ളവയിൽ ഏറ്റവും  മികച്ച വില്ലൻ കഥാപാത്രങ്ങളിൽ ഒന്നാണെന്ന് നിസംശയം പറയാം .നായകന് ഒത്ത എതിരാളിയായ ആ വില്ലൻ കഥാപാത്രം പ്രേക്ഷകരെ ഞെട്ടിക്കുമെന്ന് ഉറപ്പാണ്. ഭാഗ്യരാജ്, ആൻഡ്രിയ ജറേമിയ തുടങ്ങിയവരുടേയും നെഗറ്റിവ് വേഷങ്ങൾ ചിത്രത്തിന്റെ മാറ്റ് കൂട്ടി. 

🔼കഥയുടെ ഒഴുക്കിനെ ബാധിക്കുന്ന പാട്ടുകളോ കോമഡിയോ ഒന്നും ചിത്രത്തിലില്ല .വളരെ മികച്ച പശ്ചാത്തല സംഗീതവും ചടുലമായ എഡിറ്റിംഗും പ്രേക്ഷകരെ പിടിച്ചിരുത്താൻ പര്യാപ്തമായിരുന്നു. ഒരു പാളിച്ചകളുമില്ലാത്ത മിസ്ക്കിന്റെ ശക്തമായ തിരക്കഥ തന്നെയാണ് ചിത്രത്തിന്റെ പ്രധാന ശക്തി.  ചിത്രത്തിന്റെ ആക്ഷൻ രംഗങ്ങൾ എല്ലാം കാണികളിൽ രോമാഞ്ചമുണ്ടാക്കുമെന്ന് ഉറപ്പാണ് . കല്ലുകടി ആയി തോന്നിയത്  അനു ഇമ്മാനുവൽ അവതരിപ്പിച്ച കഥാപാത്രത്തിന്റെ ചില രംഗങ്ങൾ മാത്രമാണ്. ചിത്രത്തിലെ പ്രധാനപ്പെട്ട ഒരു രംഗത്തിലെ വിശാലിന്റെ പെർഫോർമൻസ് കുറ്റപ്പെടുത്തുന്നവർ കനിയൻ എന്ന കഥാപാത്രത്തെ പൂർണമായും ഉൾക്കൊള്ളാത്തത് കൊണ്ടാണെന്നാണ് എനിക്ക് തോന്നുന്നത് .

🔹LAST WORD 🔹

🔼ഒരു മികച്ച ക്രൈം ത്രില്ലർ എങ്ങനെയാവണം എന്നതിന്റെ ഉദാഹരണമാണ് തുപ്പരിവാലൻ . ആദ്യന്തം ആകാംക്ഷാഭരിതമായ ചടുലമായ ഈ ചിത്രം ഈ വർഷം തിയേറ്ററിൽ കണ്ട ഏറ്റവും മികച്ച ചിത്രങ്ങളിൽ ഒന്നായിരുന്നു. അത് തിയേറ്ററിൽ നിന്നു തന്നെ ആസ്വദിക്കാൻ ശ്രമിക്കുക .ഇത് വരെ കണ്ടിട്ടില്ലാത്ത തരത്തിലുള്ള കൊലപാതക ദൃശ്യങ്ങൾ നിറഞ്ഞ ഈ ചിത്രം കണ്ട പ്രേക്ഷകന്റെ ഉള്ളിൽ അകാരണമായ ഒരു ഭയം ഉണ്ടായാൽ അദ്ഭുതപ്പെടാനില്ല . ചിലപ്പോൾ ഒരു പെൻസിൽ മുനയുടെ രൂപത്തിൽ മരണം ആൾക്കൂട്ടത്തിനിടയിൽ നിങ്ങളെ കാത്ത് നില്ക്കുന്നുണ്ടാവാം .

🔹 Join AMAZING CINEMA Telegram Channel @

http://t.me/AmazingCinema

©PRADEEP V K

3.0 Star (Above Average) · India · Malayalam · Thriller

155. ADAM JOAN (INDIA/THRILLER/2017)

🔹155. ADAM JOAN (2017)  🔹 A Review 

“അവളെ രക്ഷിക്കാൻ എന്നെക്കൊണ്ടാവും വിധം ഞാൻ ശ്രമിക്കും .എന്നിട്ടും അതിന് കഴിഞ്ഞില്ലെങ്കിൽ അവൾക്ക് ഒരു നിമിഷം മുൻപെങ്കിലും എന്റെ മരണം നടന്നു കഴിഞ്ഞു എന്ന് നിങ്ങൾക്ക് ഉറപ്പിക്കാം”

🔹COUNTRY : INDIA

     LANGUAGE : MALAYALAM

     GENRE : THRILLER

     DIRECTION : JINU V ABRAHAM

🔹 BACKGROUND 🔹

▪ഭൂരിഭാഗവും സ്കോട്ലൻഡിൽ ചിത്രീകരിച്ച ഡാർക്ക് ത്രില്ലർ ആയ ആദം ജൊവാൻ മലയാള സിനിമയിൽ അധികമാരും കൈ വയ്ക്കാത്ത ഒരു വിഷയമാണ് കൈകാര്യം ചെയ്യുന്നത്. പ്ലാൻറർ ആയ ആദം ജൊവാൻ പോത്തൻ ഒരു പ്രത്യേക സാഹചര്യത്തിൽ തന്റെ അമ്മയും അനുജനും കുടുംബവും താമസിക്കുന്ന സ്കോട്ലൻഡിലേക്ക് പോകേണ്ടി വരുന്നതും അവിടെ താനൊരിക്കലും വിചാരിക്കാത്ത അപ്രതീക്ഷിത സംഭവങ്ങളിൽ പെട്ടു പോകുന്നതുമാണ് ചിത്രത്തിന്റെ ഇതിവൃത്തം .ആദം ജൊവാൻ എന്ന കേന്ദ്രകഥാപാത്രമായെത്തിയ പൃഥിരാജിനോടൊപ്പം നരേൻ, ഭാവന , മിഷ്ടി ,രാഹുൽ മാധവ് തുടങ്ങിയവരും പ്രധാന വേഷങ്ങളിൽ എത്തിയിരിക്കുന്നു .

🔹 POSITIVE SIDES🔹

▪പുതുമയുള്ള വിഷയങ്ങൾ കൈകാര്യം ചെയ്യുന്ന ചിത്രങ്ങളിൽ മാത്രം അഭിനയിക്കാൻ ശ്രദ്ധിക്കുന്ന പൃഥ്വിരാജ് ഇത്തവണയും പതിവ് തെറ്റിച്ചില്ല. സാവധാനം വേഗം കൈവരിക്കുന്ന ചിത്രം മലയാള സിനിമയിൽ വ്യത്യസ്തമായ അനുഭവം നല്കും എന്നതിൽ തർക്കമില്ല. നായക കഥാപാത്രത്തിന്റെ ഡയലോഗുകൾ ചിത്രത്തിന്റെ സ്വഭാവം പ്രേക്ഷകരിലേക്കെത്തിക്കുവാൻ പ്രാപ്തമായിരുന്നു. സ്കോട്ലൻഡിലെ മനോഹരമായ ഭൂപ്രകൃതിയും ലൊക്കേഷനുകളും പകർത്തിയ ജിത്തു ദാമോദറിന്റെ ക്യാമറ വർക്ക് മികച്ച് നിന്നു . ത്രില്ലർ മൂഡ് നല്കുന്ന ദീപക് ദേവ് – ഗോപി സുന്ദർ ടീമിന്റെ സംഗീതം ചിത്രത്തിന്റെ ടോണിന് ചേർന്നതായിരുന്നു . അഭിനേതാക്കൾ തങ്ങളുടെ കഥാപാത്രങ്ങളോട് സാമാന്യം നീതി പുലർത്തി. 

🔹NEGATIVE SIDES🔹

▪ചിത്രത്തിന്റെ പ്രധാന പോരായ്മ ഒരു ത്രില്ലർ ചിത്രത്തിന് ചേരുന്ന തരത്തിലുള്ള പഴുതുകളില്ലാത്ത തിരക്കഥ ഒരുക്കുന്നതിൽ ജിനു എബ്രഹാം പരാജയപ്പെട്ടു എന്നതാണ്.  ചിത്രം കൈകാര്യം ചെയ്യുന്ന വിഷയത്തിൽ വ്യക്തമായ അവബോധം വിഷ്വൽസിലൂടെ കാണികളിൽ സൃഷ്ടിക്കുന്നതിന് പകരം ആഡംബര കാറുകളും ബൈക്കുകളും സ്കോട്ലൻഡിലെ വിജനമായ വീഥികളിലൂടെ രാത്രി ചീറിപ്പായുന്ന ദൃശ്യങ്ങൾ ചിത്രീകരിക്കാനായിരുന്നു സംവിധായകന് താല്പര്യം . നിരവധി ക്ലീഷേകൾ നിറഞ്ഞ ചിത്രത്തിന്റെ ക്ലൈമാക്സ് ആക്ഷൻ രംഗങ്ങൾ ചിത്രം കൈകാര്യം ചെയ്യുന്ന വിഷയത്തിന് ഒട്ടും യോജിച്ചതായില്ല .ഒന്നിനും കൊള്ളാത്ത സ്കോട്ലൻഡ് പോലീസും വിഡ്ഡികളായ വിദേശ വില്ലൻമാരും തിരക്കഥാ പാളിച്ചകളിൽ മുഴച്ചു നിന്നു .

🔹FINAL WORD🔹

▪പോരായ്മകൾ ഉണ്ടെങ്കിൽ തന്നെയും സാമാന്യം മികച്ച ഒരു സിനിമാനുഭവം പ്രദാനം ചെയ്യാൻ ആദം ജൊവാന് കഴിയുന്നുണ്ട്. മലയാള സിനിമയിൽ പൊതുവെ കാണാത്ത ലൊക്കേഷനുകളും ക്യാമറ വർക്കും ബിജിഎമ്മും തന്നെയാണ് പ്രധാന പോസിറ്റീവ്സ്. ഇത്തരം ഒരു വിഷയം തന്റെ ആദ്യ ചിത്രത്തിന്  തെരഞ്ഞെടുത്ത തിരക്കഥാകൃത്തും സംവിധായകനുമായ ജിനു എബ്രഹാം അഭിനന്ദനം അർഹിക്കുന്നു. സാധാരണ മലയാളി പ്രേക്ഷകർക്ക് പുതുമയാർന്ന അനുഭവം പ്രദാനം ചെയ്യുന്ന ആദം ജൊവാൻ നിങ്ങളെ നിരാശപ്പെടുത്തില്ല എന്ന് തീർച്ചയാണ്. ദയവായി ഈ ചിത്രം തിയേറ്ററിൽ തന്നെ പോയിക്കണ്ട് അഭിപ്രായങ്ങൾ രേഖപ്പെടുത്തുക.


🔹Join AMAZING CINEMA Telegram Channel @

http://t.me/AmazingCinema

©PRADEEP V K

4.0 Star (Very Good) · Crime · India · Tamil · Thriller

148. VIKRAM VEDHA (INDIA/CRIME THRILLER/2017)

🔹148. VIKRAM VEDHA (2017)  🔽 A Review 🔽

🔹 ഹിന്ദു പുരാണ കഥകളിലെ വളരെ പ്രശസ്തമായതാണ് വിക്രമാദിത്യ മഹാരാജാവിന്റെയും വേതാളത്തിന്റെയും കഥ. ശക്തിയും ബുദ്ധിയും ഒത്തിണങ്ങിയ വിക്രമാദിത്യനും തന്റെ കഥകളിലൂടെ വിക്രമാദിത്യനെ കുടുക്കാൻ ശ്രമിക്കുന്ന തന്ത്രശാലിയായ വേതാളവും ആധുനിക ലോകത്ത് ഏറ്റുമുട്ടിയാൽ എന്താവും സംഭവിക്കുക?

COUNTRY : INDIA

LANGUAGE : TAMIL

GENRE : CRIME THRILLER

DIRECTION : PUSHKAR – GAYATHRI

🔹SYNOPSIS 🔹

▪️  പുഷ്കർ – ഗായത്രി സംവിധായക ദമ്പതികളുടെ മൂന്നാമത്തെ ചിത്രമാണ് വിക്രം വേദ. 2010 ൽ വാ എന്ന ചിത്രത്തിന് ശേഷം 7 വർഷങ്ങൾക്ക് ശേഷമാണ് അവർ പുതിയ ചിത്രവുമായെത്തുന്നത്. ശരി – തെറ്റ് , ധർമ്മം – അധർമ്മം എന്നിവ തമ്മിലുള്ള അനാദിയായ പോരാട്ടത്തിന്റെ കഥ പറയുന്ന ഈ ചിത്രം ഒരു നീതിമാനായ പോലീസ് ഓഫീസറും ക്രൂരനായ ഗാങ്ങ്സ്റ്ററും തമ്മിലുള്ള ഏറ്റുമുട്ടലുകളുടെ ത്രസിപ്പിക്കുന്ന കഥയാണ് പറയുന്നത്.   വിക്രം പോലീസ് സേനയിലെ കഴിവുറ്റ ഒരു എൻകൗണ്ടർ സ്പെഷ്യലിസ്റ്റ് ആണ്. യാതൊരു ടെൻഷനുമില്ലാതെ കുറ്റവാളികളെ ഉന്മൂലനം ചെയ്യുന്ന വിക്രം ഗാങ്ങ്സ്റ്ററായ വേദയെ പിടികൂടാനുള്ള ദൗത്യം ഏറ്റെടുക്കുന്നു .വളരെ ബുദ്ധിശാലിയായ എന്തിനും മടിക്കാത്ത വേദയെ തന്റെ തോക്കിനു മുന്നിൽ കിട്ടിയെങ്കിലും വേദയുടെ വാക്കുകൾ വിക്രത്തിനെ താൻ അടിയുറച്ച് വിശ്വസിക്കുന്ന പലതിനെയും മറ്റൊരു ദൃഷ്ടിയോടെ കാണാൻ പ്രേരിപ്പിക്കുന്നു. 

🔹 PERFORMANCES & TECHNICAL SIDES🔹

▪️  വിക്രം എന്ന എൻകൗണ്ടർ സ്പെഷലിസ്റ്റ് ആയി മാധവനും വേദ എന്ന ഗാങ്ങ്സ്റ്ററായി വിജയ് സേതുപതിയും ഒന്നിനൊന്ന് മികച്ച പ്രകടനം കാഴ്ചവച്ചു. അവർ രണ്ട് പേരും ഒന്നിച്ച് വരുന്ന എല്ലാ രംഗങ്ങളും വളരെ എൻഗേജിംഗ് ആയിരുന്നു. വളരെ വ്യത്യസ്തമായ സ്വഭാവ സവിശേഷതകളുള്ള വേദ എന്ന ഗാങ്ങ്സ്റ്റർ കഥാപാത്രം വിജയ് സേതുപതിയുടെ അഭിനയ ജീവിതത്തിലെ തന്നെ ഒരു നാഴികക്കല്ലാണ്. ആക്ഷനും സെന്റിമെന്റ്സും കോമഡിയും എല്ലാം ഒരു പോലെ കൈകാര്യം ചെയ്യാൻ സമർത്ഥരായ മാധവനും വിജയ് സേതുപതിയും ചിത്രത്തെ വേറൊരു ലെവലിലെത്തിച്ചു എന്ന് പറയുന്നതാവും ശരി. സ്ത്രീ കഥാപാത്രങ്ങളെ അവതരിപ്പിച്ച ശ്രദ്ധ ശ്രീനാഥും വരലക്ഷ്മി ശരത് കുമാറും നായക വില്ലൻമാരുടെ നിഴലായി ഒതുങ്ങാത്ത മികച്ച കഥാപാത്രങ്ങളായെത്തി എന്നത് ശ്രദ്ദേയമാണ് .

▪️ ചിത്രത്തിന്റെ എടുത്തു പറയേണ്ട ഒരു കാര്യം സാം.സി.എസിന്റെ  ത്രില്ലിംഗ് ആയ ബാക്ക് ഗ്രൗണ്ട് മ്യൂസിക് ആണ്. ചിത്രത്തിന്റെ വിജയത്തിൽ ഒരു പ്രധാന പങ്ക് BGM ന് ഉണ്ടെന്ന് നിസ്സംശയം പറയാം .പി .എസ്. വിനോദിന്റെ ക്യാമറയും റിച്ചാർഡ് കെവിന്റെ എഡിറ്റിംഗും ചിത്രത്തെ മികവുറ്റ ഒരനുഭവമാക്കി മാറ്റി. സംവിധായകരായ പുഷ്കറും ഗായത്രിയും മണികണ്ഠനോടൊപ്പം ചേർന്നെഴുതിയ ശക്തമായ തിരക്കഥയുടെ ബലം ചിത്രത്തിന്റെ ഓരോ രംഗത്തും അനുഭവിച്ചറിയാം . മുൻ ചിത്രങ്ങളിൽ സംഭവിച്ച പിഴവുകൾ തിരുത്തി എല്ലാ തരത്തിലുള്ള പ്രേക്ഷകർക്കും ഒരുപോലെ ഇഷ്ടപ്പെടുന്ന തരത്തിൽ ഈ ചിത്രം അണിയിച്ചൊരുക്കിയ പുഷ്കർ- ഗായത്രി ദമ്പതിമാർക്ക് എല്ലാവിധ അനുമോദനങ്ങളും നേരുന്നു. 

🔹VERDICT 🔹

▪ കുട്ടിക്കാലം മുതൽ നാമെല്ലാവരും വായിച്ച് പരിചയിച്ച വിക്രമാദിത്യ വേതാള കഥയെ ഇന്നത്തെ കാലഘട്ടത്തിനനുസരിച്ച് മാറ്റി അതിലൂടെ വളരെ ത്രില്ലിംഗ് ആയ ഒരു ക്രൈം സ്റ്റോറി അവതരിപ്പിച്ചിരിക്കുന്ന വിക്രം വേദ വളരെ മികച്ച സിനിമാനുഭവമാണ് സമ്മാനിച്ചത്. അഭിനയ മികവും ശക്തമായ തിരക്കഥയും സംവിധാനവും ചടുലമായ BGM ഉം ഒത്തിണങ്ങിയ ഈ ചിത്രം ഒരു നിമിഷം പോലും തിയേറ്റർ സ്ക്രീനിൽ നിന്നും കണ്ണെടുക്കാതെയാണ് കണ്ട് തീർത്തത്. നന്മയും തിന്മയും തമ്മിലുള്ള പോരാട്ടത്തിന്റെ കഥയായി തുടങ്ങുന്ന ചിത്രം മുന്നോട്ട് പോകുമ്പോൾ ചിത്രത്തിലെ കഥാപാത്രങ്ങൾക്കൊപ്പം പ്രേക്ഷകനും ആരാണ് ശരി, ആരാണ് തെറ്റ് എന്ന പുരാതനമായ ചോദ്യത്തിനുള്ള ഉത്തരം തേടുകയാണ്. വളരെ ത്രില്ലിംഗ് ആയ തിയേറ്റർ അനുഭവം സമ്മാനിക്കുന്ന ഈ ചിത്രം നിങ്ങളെ ഒരിക്കലും നിരാശപ്പെടുത്തില്ല എന്ന് ഞാൻ ഉറപ്പ് തരുന്നു. 

🔹RATING : 4/5 ( VERY GOOD – A CLEVERLY CRAFTED INTENSE CRIME THRILLER )

©PRADEEP V K (AMAZING CINEMA)