3.5 Star (Good) · Drama · Italian · Italy

263. DOGMAN (ITALY/DRAMA/2018)

#IFFK2018REVIEWS

263. DOGMAN ( ITALY/ITALIAN/DRAMA/2018/DIR: MATTEO GARRONE )

▪️നായ്ക്കളെ ഒരു പാട് ഇഷ്ടപ്പെടുന്ന മാർസെലോ ഡോഗ് മാൻ എന്ന പേരിൽ ഒരു സ്ഥാപനം നടത്തുന്നുണ്ട്. പകൽ സമയം വീട്ടുകാർ ജോലിക്ക് പോകുമ്പോൾ അവരുടെ നായ്ക്കളെ സംരക്ഷിക്കുക, നായ്ക്കളുടെ രോമമൊക്കെ വെട്ടി വൃത്തിയാക്കി ഡോഗ് ഷോകളിൽ പങ്കെടുപ്പിക്കുക തുടങ്ങിയ കാര്യങ്ങളാണ് ഡോഗ് മാനിൽ ചെയ്യുന്നത്. എല്ലാവർക്കും പ്രിയപ്പെട്ടവനായ മർസെലോയ്ക്ക് ചെറിയ രീതിയിലുള്ള മയക്ക് മരുന്ന് വില്പനയുമുണ്ട്. എന്നാൽ ഗുണ്ടാപ്പണിയുമായി നടക്കുന്ന സിമോണുമായി മാർസെലോയ്ക്കുണ്ടായിരുന്ന സൗഹൃദം അയാളെ കൊണ്ടെത്തിക്കുന്നത് ഒരിക്കലും ഊരാൻ കഴിയാത്ത ഒരു കുടുക്കിലേക്കായിരിക്കുമെന്ന് അയാൾ ഒരിക്കലും വിചാരിച്ചിരുന്നില്ല.

▪️2018 ലെ കാൻ ഫിലിം ഫെസ്റ്റിവലിൽ മികച്ച നടനുള്ള പുരസ്കാരം ലഭിച്ചത് ഈ ചിത്രത്തിൽ മാർസെലോയെ അവതരിപ്പിച്ച മാർസെലോ ഫോണ്ടേക്കായിരുന്നു. അദ്ദേഹത്തിന്റെ പെർഫോർമൻസ് തന്നെയായിരുന്നു ഈ ചിത്രത്തിന്റെ പ്രധാന ഹൈലൈറ്റ്. സൗമ്യനായ നിഷ്ക്കളങ്കനായ വളർത്തുനായയെപ്പോലെ വിശ്വസ്തനായ വ്യക്തിയിൽ നിന്ന് ക്ലൈമാക്സിലെ വഴിത്തിരിവിലേക്കുള്ള കഥാപാത്രത്തിന്റെ യാത്ര വളരെ കൺവിൻസിങ്ങ് ആയി അദ്ദേഹം അവതരിപ്പിച്ചിട്ടുണ്ട്. ഒരു ഡ്രാമ മൂഡിൽ നിന്ന് ത്രില്ലർ സ്വഭാവത്തിലേക്ക് ചിത്രം വഴിമാറുന്ന രംഗങ്ങൾ കയ്യടി അർഹിക്കുന്നു. ചിത്രം കണ്ട് കഴിയുമ്പോൾ സമാനസ്വഭാവക്കാരായ വ്യത്യസ്ത സാഹചര്യങ്ങളിലുള്ള പല മലയാള സിനിമാ കഥാപാത്രങ്ങളെയും നമുക്ക് ഓർമ വരും. എന്നാൽ അവയിൽ നിന്നെല്ലാം വ്യത്യസ്തമായി അനാവശ്യ സെൻറിമെൻസുകളും മെലോഡ്രാമയും അമിതാഭിനയവുമെല്ലാം ഒഴിവാക്കിയ ഡോഗ് മാൻ മികച്ച അനുഭവം തന്നെയാണ് സമ്മാനിച്ചത്.

▪️RATING : 3.5/5 (GOOD)

കൂടുതൽ സിനിമാ റിവ്യൂകൾക്ക് ബ്ലോഗ് സന്ദർശിക്കുക
@ http://www.amazingcinemareviews.wordpress.com

ചിത്രം ടെലഗ്രാം ചാനലിൽ ലഭ്യമാണ്
@ https://t.me/AmazingCinema

©️ PRADEEP V K

Advertisements
3.5 Star (Good) · France · French · Horror · Musical

260. CLIMAX (FRANCE/MUSICAL HORROR/2018)

#IFFK2018REVIEWS

260. CLIMAX ( FRANCE/FRENCH/MUSICAL HORROR/2018/DIR: GASPER NOE )

▪️ഒരുൾപ്രദേശത്തെ ബാറിനുള്ളിൽ സ്ത്രീകളും പുരുഷൻമാരും അടങ്ങുന്ന ഒരു കൂട്ടം ഹിപ്പ് ഹോപ്പ് നർത്തകർ ഡാൻസ് പരിശീലനത്തിലാണ്. അങ്ങേയറ്റം ശാരീരികക്ഷമത ആവശ്യമുള്ള ആ നൃത്തത്തിന് എത്തുന്നവരുമായുള്ള ഒരഭിമുഖത്തിലൂടെയാണ് ചിത്രം തുടങ്ങുന്നത്. കഠിനമായ നൃത്ത പരിശീലനത്തിനിടയിൽ പല തരത്തിലുള്ള മദ്യവും ഭക്ഷണ പദാർത്ഥങ്ങളും വിതരണം ചെയ്യുന്നുമുണ്ട്. എന്നാൽ കുറച്ച് സമയം കഴിഞ്ഞതോടെ തങ്ങൾ കഴിച്ച മദ്യത്തിൽ ശക്തിയേറിയ മയക്ക്മരുന്ന് ആരോ കലർത്തിയതായി ചിലർ സംശയിക്കുന്നു. മയക്ക്മരുന്നിന്റെ ശക്തിയിൽ എല്ലാ നിയന്ത്രണങ്ങളും കൈവിട്ട് പോയ അവരുടെ ഭ്രാന്തമായ നൃത്തവും നിർത്താതെ മുഴങ്ങുന്ന സംഗീതവും എല്ലാ അതിരുകളും ലംഘിക്കുന്നു.

▪️A Crazy Film From A Crazy Director എന്ന് തന്നെ വിശേഷിപ്പിക്കാം ഗാസ്പർ നോയുടെ പുതിയ ചിത്രമായ ക്ലൈമാക്സിനെ. ഏതൊരു സംവിധായകനും തന്റെ ചിത്രം പ്രേക്ഷകർ സുഖമായി ആസ്വദിച്ച് കാണണം എന്നാവും ആഗ്രഹിക്കുക.എന്നാൽ തന്റെ ചിത്രം കണ്ട് പ്രേക്ഷകർ തല കറങ്ങി കിളി പോയി ഇറങ്ങിപ്പോകണമെന്ന് വിചാരിച്ച് ക്യാമറ കൊണ്ട് എന്തെല്ലാം കാട്ടാമോ അതെല്ലാം ചെയ്ത് പ്രേക്ഷകനെ അങ്ങേയറ്റം ബുദ്ധിമുട്ടിക്കുന്ന ഒരു സംവിധായകനാണ് ഗാസ്പർ നോ. അദ്ദേഹത്തിന്റെ ഇറിവേഴ്സിബിൾ എന്ന ചിത്രത്തിൽ ക്യാമറ എവിടെയൊക്കെയാണ് കയറിപ്പോകുന്നതെന്നോർത്ത് അന്തം വിട്ട് ഇരുന്ന് പോയിട്ടുണ്ട്. അത്രയ്ക്കൊന്നും വരില്ലെങ്കിലും പുതിയ ചിത്രമായ ക്ലൈമാക്സും മറ്റാരും കൈവയ്ക്കാൻ അധികം താല്പര്യം കാണിക്കാത്ത ഒരിടത്തേക്കാണ് നമ്മെ കൊണ്ട് പോകുന്നത്.

▪️തുടക്കത്തിലെ സംഗീതവും നൃത്തവും കണ്ടിരിക്കുന്ന പ്രേക്ഷകൻ ഒരു പരിധി കഴിയുന്നതോടെ ഇതൊന്ന് തീർന്നാൽ മതിയെന്ന് ചിന്തിച്ചാൽ അദ്ഭുതപ്പെടാനില്ല. സംവിധായകൻ ഉദ്ദേശിക്കുന്നതും അത് തന്നെയാണ്. ഒരു രംഗത്തിൽ നിന്ന് മറ്റൊരു രംഗത്തേക്ക് ഒഴുകിപ്പോകുന്ന ചിത്രത്തിൽ കട്ട് എവിടെയാണെന്ന് കണ്ടെത്താനാവില്ല. ഇറിവേഴ്സിബിളിന്റെ ക്യാമറമാനായിരുന്ന ബിനോയ്റ്റ് ഡെബി തന്നെയാണ് ഈ ചിത്രത്തിലും ക്യാമറ കൈകാര്യം ചെയ്തിരിക്കുന്നത്. സോഫിയ ബ്യൂട്ടെല്ല അടക്കം നടീനടൻമാർ ഏവരുടേയും പ്രകടനം കണ്ടാൽ ഇതഭിനയം തന്നെയാണോ എന്ന് പലപ്പോഴും സംശയിച്ച് പോകും. ഗാസ്പർ നോ എന്ന സംവിധായകന്റെ മുൻ ചിത്രങ്ങൾ കണ്ടിട്ടുള്ള അദ്ദേഹത്തിന്റെ ഭ്രാന്തമായ ചിന്തകളിലൂടെ സഞ്ചരിക്കാൻ താല്പര്യമുള്ളവർ മാത്രം ഈ ചിത്രം കാണുക. അല്ലാത്തവർക്ക് ഒരിക്കലും ഈ ചിത്രം ആസ്വദിക്കാനാവില്ല എന്ന കാര്യം ഓർമിപ്പിക്കുന്നു.

▪️RATING : 3.5/5 ( GOOD )

കൂടുതൽ സിനിമാ റിവ്യൂകൾക്ക് ബ്ലോഗ് സന്ദർശിക്കുക
@ http://www.amazingcinemareviews.wordpress.com

©️ PRADEEP V K

3.5 Star (Good) · Drama · Korean · South Korea

258. HUMAN, SPACE, TIME AND HUMAN (SOUTH KOREA/DRAMA/2018)

#IFFK2018REVIEWS

258. HUMAN, SPACE, TIME AND HUMAN ( SOUTH KOREA/KOREAN/ DRAMA/2018/DIR: KIM KI DUK )

▪️ഒരു യുദ്ധക്കപ്പലിൽ സമൂഹത്തിലെ പല തലങ്ങളിലുള്ള ആൾക്കാർ ഒന്നിച്ച് ഒരു ഉല്ലാസയാത്രയ്ക്ക് പുറപ്പെടുന്നു. അവരിൽ രാഷ്ട്രീയ നേതാക്കളും ഗാങ്ങ്സ്റ്റേഴ്സും വേശ്യകളും ഉദ്യോഗസ്ഥരും സാധാരണക്കാരും എല്ലാം ഉൾപ്പെടുന്നു. പരസ്പരമുള്ള വാക്കുതർക്കങ്ങളും മദ്യപാനവും സെക്സും ഒക്കെയായി കഴിഞ്ഞു പോയ ആദ്യ ദിനം കഴിഞ്ഞ് പിറ്റേന്ന് നേരം പുലർന്നത് ഒരു അത്ഭുതത്തിലേക്കാണ്. അവർ സഞ്ചരിച്ചിരുന്ന കപ്പൽ കടലിൽ നിന്നും ഉയർന്ന് മേഘങ്ങൾക്കിടയിൽ ഉറച്ച് നില്ക്കുന്നു!

▪️തന്റെ മുൻ ചിത്രങ്ങളിലെപ്പോലെ ശക്തമായ ദൃശ്യഭാഷയോടൊപ്പം കടുത്ത വയലൻസും ചിത്രത്തിൽ കിം കി ഡുക്ക് ഫലപ്രദമായി ഉപയോഗിച്ചിട്ടുണ്ട്. മനുഷ്യന്റെ ശരിതെറ്റുകളും നന്മതിന്മകളും മനുഷ്യത്വവും എല്ലാം ഏത് അറ്റം വരെ പോകുമെന്നും എത്ര നന്മ നിറഞ്ഞ മനുഷ്യനും സ്വാർത്ഥതയിലേക്ക് കൂപ്പ് കുത്തുന്ന നിമിഷമേതെന്നും സംവിധായകൻ നമുക്ക് കാട്ടിത്തരുന്നു. പുറമെയുള്ള കാഴ്ചയിൽ നിന്ന് വിഭിന്നമായ അന്തർത്ഥങ്ങളുള്ള ചിത്രമാണിത്. അങ്ങനെ ചിന്തിച്ചാൽ ശൂന്യതയിൽ നില്ക്കുന്ന കപ്പലും അതിനുള്ളിലെ വ്യത്യസ്ത തലങ്ങളിലുള്ള മനുഷ്യരും എല്ലാമറിയുന്ന വൃദ്ധനും പെൺകുട്ടിയും ചെറുപ്പക്കാരനും എല്ലാം മറ്റൊരു തലത്തിലേക്ക് മാറുന്നത് കാണാം. സമാനമായ രീതിയിലുള്ള ഡാരൻ അർണോേഫ്സ്കി ചിത്രം മദർ ഈ അവസരത്തിൽ ഓർമയിൽ വരുന്നുണ്ട്.

▪️പേര് പോലെ ഒരു ലൂപ്പ് ആയി തുടരുന്ന സംഭവങ്ങൾ നിറഞ്ഞതാണ് ഈ ചിത്രം. സ്പ്രിങ്ങ്, സമ്മർ, ഫാൾ, വിന്റർ ആൻഡ് സ്‌പ്രിങ്ങ് എന്ന ചിത്രത്തിലൂടെ മനുഷ്യ ജീവിതത്തിന്റെ വിവിധ കാലങ്ങൾ വരച്ച് കാട്ടിയ കിം ഈ ചിത്രത്തിലൂടെ പ്രകൃതിയുടെ ആത്യന്തികമായ വളർച്ചയും തളർച്ചയും പ്രേക്ഷകന് മുന്നിൽ എത്തിക്കുന്നു. തന്നെ വിശ്വസിക്കുന്ന പ്രേക്ഷകനെ കിം കി ഡുക്ക് എന്ന സംവിധായകൻ ഒരിക്കലും നിരാശപ്പെടുത്തില്ല എന്ന് ഈ ചിത്രം വീണ്ടും തെളിയിക്കുന്നുണ്ട്. കിമ്മിന്റ ചിത്രങ്ങൾ കണ്ട് പരിചയമില്ലാത്തവർക്ക് ഞെട്ടലുണ്ടാക്കുന്നതും ഓക്കാനം വരുത്തുന്നതുമായ നിരവധി രംഗങ്ങൾ ചിത്രത്തിലുണ്ട്. അത് കൊണ്ട് എല്ലാത്തരം പ്രേക്ഷകർക്കും യോജിച്ചതല്ല ഈ ചിത്രം എന്ന കാര്യം ഓർമപ്പെടുത്തുന്നു.

▪️RATING : 3.5/5 ( GOOD )

കൂടുതൽ സിനിമാ റിവ്യൂകൾക്ക് ബ്ലോഗ് സന്ദർശിക്കുക
@ http://www.amazingcinemareviews.wordpress.com

©️ PRADEEP V K

3.5 Star (Good) · Adventure · Denmark · Drama · English

254. VALHALLA RISING (DENMARK/ ADVENTURE DRAMA/2009)

254. VALHALLA RISING ( DENMARK / ADVENTURE DRAMA / 2009 / NICOLAS WINDING REFN )

ചിത്രത്തിന്റെ പേരിനെക്കുറിച്ച് ഒരു ചെറിയ വിശദീകരണം പറയാം. നോർഡിക് വിശ്വാസമനുസരിച്ച് ദൈവങ്ങളുടെ രാജാവായ ഓഡിന്റെ വാസസ്ഥലമാണ് വാൽഹല്ല. അതിശക്തരായ പോരാളികൾ മരണശേഷം വാൽഹല്ലയിൽ എത്തുകയും ഓഡിന്റെ സൈന്യത്തിൽ അംഗങ്ങളാകുകയും ചെയ്യുമത്രേ. നന്മയും തിന്മയും തമ്മിലുള്ള അന്ത്യ പോരാട്ടത്തിൽ അവർ ഓഡിനോടൊപ്പം ചേർന്ന് നന്മയുടെ പക്ഷത്തുള്ള പോരാളികൾ ആവുമെന്നാണ് വിശ്വാസം.

ആയിരത്തോളം വർഷങ്ങൾക്ക് മുമ്പ് പാഗനുകളും ക്രിസ്ത്യൻസും തമ്മിൽ പോരാട്ടങ്ങൾ നടക്കുന്ന കാലത്ത് നടക്കുന്ന ഈ ചിത്രം ആറ് ഭാഗങ്ങളായി തിരിച്ചിരിക്കുന്നു. ഒറ്റക്കണ്ണനായ ഒൺ ഐ എന്ന് വിളിക്കുന്ന മൂകനായ ഒരു പോരാളിയിലൂടെയാണ് ചിത്രത്തിന്റെ കഥ വികസിക്കുന്നത്. പാഗനുകളുടെ തടവിൽ നിന്ന് രക്ഷപെട്ട് ദൈവത്തിന്റെ പോരാളികളെന്ന് സ്വയം വിശേഷിപ്പിക്കുന്ന ക്രിസ്ത്യൻ സംഘത്തോടൊപ്പം ഹോളി ലാൻഡ് കണ്ടെത്താനായി ഒൺ ഐ നടത്തുന്ന രക്തരൂക്ഷിതമായ യാത്രയാണ് ചിത്രത്തിൽ പറയുന്നത്. സംഭാഷണങ്ങൾ വളരെ കുറച്ച് മാത്രമുള്ള ഈ ചിത്രം വളരെ സാവധാനം നീങ്ങുന്ന രംഗങ്ങൾ നിറഞ്ഞതായതിനാൽ ചിത്രം കണ്ട് തീർക്കാൻ നല്ല ക്ഷമ അവശ്യമാണെന്ന് ഓർമിപ്പിക്കട്ടെ.

നിക്കോളാസ് വൈൻഡിംഗ് റെഫിന്റെ സിനിമകളുടെ സവിശേഷതയായ കടുംനിറങ്ങളുടെ ഉപയോഗവും കടുത്ത വയലൻസും ഈ ചിത്രത്തിലും കാണാം. സംഭാഷണങ്ങൾ വളരെ കുറവായതിനാൽ കഥാപാത്രങ്ങളുടെ പല പ്രവൃത്തികളുടേയും കാരണങ്ങൾ വ്യക്തമാകാൻ ബുദ്ധിമുട്ടാണ്. പാഗൻ മിത്തോളജിയും നോർഡിക് സംസ്കാരവും ആദ്യകാല ക്രിസ്ത്യൻ അധിനിവേശങ്ങളെയും കുറിച്ചുള്ള സാമാന്യ അറിവ് ചിത്രം കുറെയൊക്കെ മനസ്സിലാക്കാൻ സഹായിക്കും.

മാഡ്സ് മിക്കൽസെൻ ഒൺ ഐ എന്ന കഥാപാത്രത്തെ നന്നായി അവതരിപ്പിച്ചിട്ടുണ്ട്. ഗംഭീരമായ സിനിമാറ്റോഗ്രഫിയും പശ്ചാത്തല സംഗീതവും ചിത്രത്തെ പ്രത്യേക അനുഭവമാക്കുന്നുണ്ട്. എല്ലാത്തിലുമുപരിയായി ഇതൊരു നിക്കോളാസ് വൈൻഡിംഗ് റെഫിൻ ചാത്രമാണ് എന്നത് തന്നെയാണ് ഏറ്റവും വലിയ സവിശേഷത. പൂർണമായും വിശദീകരിക്കാനാവാത്ത ഇമേജുകളും വിഷനുകളും കളർ ടോണുകളും നിറഞ്ഞ ഒരു റെഫിൻ സിനിമാനുഭവം ആഗ്രഹിക്കുന്നവർ മാത്രം ഈ ചിത്രം കാണാൻ ശ്രമിക്കുക.

RATING : 3.5/5

കൂടുതൽ സിനിമാ റിവ്യൂകൾക്ക് ബ്ലോഗ് സന്ദർശിക്കുക
@ http://www.amazingcinemareviews.wordpress.com

ചിത്രം ടെലഗ്രാം ചാനലിൽ ലഭ്യമാണ്
@ https://t.me/AmazingCinema

©️ PRADEEP V K

3.5 Star (Good) · Horror

252. MAY THE DEVIL TAKE YOU (INDONESIA/HORROR/2018)

252. MAY THE DEVIL TAKE YOU (SEBELUM IBLIS MENJEMPUT) ( INDONESIA/ HORROR / 2018 )

•ഡോക്ടർ ഫോസ്റ്റസ് എന്ന ക്രിസ്റ്റഫർ മാർലോവിന്റെ പ്രശസ്തമായ നാടകത്തിൽ ഒരു രംഗമുണ്ട്. ലൗകിക സുഖങ്ങൾക്ക് വേണ്ടി ഡോക്ടർ ഫോസ്റ്റസ് തന്റെ ആത്മാവിനെ മെഫിസ്റ്റോഫിലിസ് എന്ന ദൂതനിലൂടെ ഡെവിളിന് അടിയറവ് വയ്ക്കുന്ന രംഗം. അതിലൂടെ എല്ലാ സുഖവും സമ്പത്തും ലഭിക്കുന്ന ഫോസ്റ്റസ് തന്റെ അത്മാവ് തേടി ഡെവിൾ എത്തുന്ന സമയം ആകുന്നതോടെ അനുഭവിക്കുന്ന ഭയവും വേദനയുമാണ് നാടകത്തിന്റെ പ്രധാന പ്രമേയം.

•സമാനമായ ഒരു കഥയാണ് മെ ദി ഡെവിൾ ടേക്ക് യു എന്ന ഇന്തോനേഷ്യൻ ഹൊറർ ചിത്രവും പറയുന്നത്. സാമ്പത്തികമായി തകർന്ന ഒരു ബിസിനസ്കാരൻ ഒരു ദുർമന്ത്രവാദിനിയിലൂടെ ഡെവിളുമായി കരാറിലേർപ്പെടുന്നു. എന്നാൽ പണവും പ്രശസ്തിയും ആവോളം ലഭിക്കുന്ന അയാൾ താനുണ്ടാക്കിയ കരാർ വിസ്മരിക്കുന്നതോടെ സംഭവിക്കുന്നത് അയാൾ ഒരിക്കലും പ്രതീക്ഷിക്കാത്ത ഭീകര സംഭവങ്ങളാണ്. അയാളിലൂടെ ശക്തിയാർജിച്ച അതീന്ദ്രിയ ശക്തിയുടെ ഉറവിടം കണ്ടു പിടിക്കാൻ മകളായ ആൽഫി ഇറങ്ങിത്തിരിക്കുമ്പോൾ ഞെട്ടിപ്പിക്കുന്ന നിരവധി ദൃശ്യങ്ങൾക്കാണ് പ്രേക്ഷകർ സാക്ഷിയാവുന്നത്.

•സ്ഥിരമായി ഹൊറർ ചിത്രങ്ങൾ കാണുന്ന വ്യക്തിയെന്ന നിലയിൽ എനിക്ക് മികച്ച അനുഭവം പ്രദാനം ചെയ്ത ചുരുക്കം ഹൊറർ ചിത്രങ്ങളിൽ ഒന്നാണിത്. ഏകദേശം പൂർണമായും ഒരു വീടിനുള്ളിൽ ചിത്രീകരിച്ചിരിക്കുന്ന ചിത്രം ഈവിൾ ഡെഡ് ചിത്രങ്ങളെ ഓർമ്മിപ്പിച്ചു. കിടിലൻ ഹൊറർ രംഗങ്ങളോടൊപ്പം അഭിനേതാക്കളുടെ നല്ല പെർഫോർമൻസുകളും കൂടി ചേർന്ന ഈ ഇന്തോനേഷ്യൻ ചിത്രം ഹൊറർ ചിത്ര പ്രേമികൾക്ക് തീർച്ചയായും ഇഷ്ടപ്പെടും.

RATING : 3.5/5

ചിത്രം ടെലഗ്രാം ചാനലിൽ ലഭ്യമാണ്
@ https://t.me/AmazingCinema

©️ PRADEEP V K

3.5 Star (Good) · Psychological · Spain · Spanish · Thriller

251. THE INVISIBLE GUARDIAN (SPAIN/PSYCHOLOGICAL THRILLER/2017)

251. THE INVISIBLE GUARDIAN ( SPAIN / PSYCHOLOGICAL THRILLER / 2017 )

✓പ്രകൃതിമനോഹരമായ ആ കാടിനുള്ളിലെ നദിക്കരയിൽ അവർ കണ്ടത് ഞെട്ടിപ്പിക്കുന്ന ഒരു ദൃശ്യമായിരുന്നു. കൗമാരക്കാരിയായ ഒരു പെൺകുട്ടി പൂർണ നഗ്നയായി മരിച്ച് കിടക്കുന്നു. മുഖത്തെ മേയ്ക്കപ്പ് എല്ലാം മായ്ച്ച് കളഞ്ഞ് മുടി നന്നായി കോതിയൊതുക്കിയ അവളുടെ കൈകൾ ഒരു പുരാതനമായ ചിത്രത്തിലെപ്പോലെ തോന്നിച്ചു.

✓കേസന്വേഷിക്കാനായി നിയോഗിക്കപ്പെട്ട അമേയ സലാസാർ എന്ന പോലീസ് ഉദ്യോഗസ്ഥ കുറച്ച് നാൾ മുമ്പ് നടന്ന മറ്റൊരു പെൺകുട്ടിയുടെ മരണം സമാനമായ രീതിയിലായിരുന്നു എന്ന കാര്യം ശ്രദ്ധിക്കുന്നതോടെ മരണങ്ങൾക്ക് പിന്നിൽ ഒരു സീരിയൽ കില്ലർ ആകാമെന്ന നിഗമനത്തിലെത്തുന്നു. എന്നാൽ ജനങ്ങളും മീഡിയയും ഈ കൊലപാതകങ്ങൾക്ക് പിന്നിൽ പലരും കണ്ടിട്ടുണ്ട് എന്നവകാശപ്പെടുന്ന കാടിന്റെ രക്ഷകനായി വിശ്വസിക്കപ്പെടുന്ന ബസാജ്വാൻ എന്ന നിഗൂഢശക്തി ആണെന്ന് വിശ്വസിക്കുന്നു. യാഥാർത്ഥ്യവും വിശ്വാസവും ഇടകലർന്ന ആ പ്രദേശത്ത് കാടിന്റെ വന്യതയിൽ ഒളിച്ചിരിക്കുന്ന കൊലപാതകി യഥാർത്ഥത്തിൽ ആരായിരിക്കും?

✓ഒരു മിസ്റ്ററി ചിത്രത്തിന്റെ മികവിന് പിന്നിൽ കഥ നടക്കുന്ന സ്ഥലത്തിന് വളരെയധികം പ്രാധാന്യമുണ്ട്. ഇവിടെ വളരെ നിഗൂഢമായ കഥയ്ക്ക് ചേർന്ന വിധത്തിലുള്ള ലൊക്കേഷനുകളും ചിത്രീകരണവും ആണ് ഈ ചിത്രത്തിന്റെ ഏറ്റവും വലിയ പ്രത്യേകത. സ്ക്രീനിൽ നിന്ന് കണ്ണെടുക്കാൻ തോന്നാത്ത തരത്തിലുള്ള മനോഹാരിത ഓരോ ഫ്രെയിമിലും കാണാം. പൊലീസ് അന്വേഷണവും ഫാന്റസിയും ഭംഗിയായി ഇടകലർത്തിയിരിക്കുന്നു. എന്നാൽ പ്രധാന കഥയ്ക്കുള്ളിൽ വരുന്ന ഫാന്റസി എലമെന്റ് കഥയുടെ റിയാലിറ്റി നഷ്ടപ്പെടുത്തുന്നുണ്ട് എന്നത് ഒരു ന്യൂനതയാണ്.

✓എല്ലാ നടീനടൻമാരും മികച്ച പെർഫോർമൻസ് കാഴ്ച വച്ചിരിക്കുന്ന ചിത്രത്തിന്റെ മൂഡ് നിലനിർത്താൻ ലൊക്കേഷനുകളും സിനിമാറ്റോഗ്രഫിയും വഹിച്ച പങ്ക് ചെറുതല്ല. എന്നാൽ ക്രിട്ടിക്സ് ചിത്രത്തെ വല്ലാതെ കയ്യൊഴിഞ്ഞുകളഞ്ഞു എന്നത് നിരാശാജനകമാണ്. എന്നെ സംബന്ധിച്ച് ചിത്രം വളരെ നല്ല ഒരനുഭവമാണ് പ്രദാനം ചെയ്തത്. ആദ്യവസാനം ഒരു നിമിഷം പോലും സ്ക്രീനിൽ നിന്ന് കണ്ണെടുക്കാതെ ആകാംഷയോടെയാണ് ചിത്രം കണ്ട് തീർത്തത്. നല്ലൊരു സൈക്കോളജിക്കൽ ത്രില്ലർ ചിത്രം ആസ്വദിക്കാനാഗ്രഹിക്കുന്നവരെ ഒരിക്കലും ഈ ചിത്രം നിരാശപ്പെടുത്തില്ല എന്ന് ഉറപ്പ്.

RATING : 3.5/5

ചിത്രം ടെലഗ്രാം ചാനലിൽ ലഭ്യമാണ്
@ t.me/AmazingCinema

©️ PRADEEP V K

3.5 Star (Good) · Crime · Drama · Japan · Japanese

250. THE CRIMES THAT BIND (JAPAN/CRIME DRAMA/2018)

🔸ഒരു ഫ്ലാറ്റിനുള്ളിൽ നിന്ന് ഒരു സ്ത്രീയുടെ കഴുത്ത് ഞെരിച്ച് കൊല്ലപ്പെട്ട നിലയിലുള്ള അഴുകിയ മൃതദേഹം കണ്ടെടുക്കുന്നു. ആദ്യ അന്വേഷണത്തിൽ ആ ഫ്ലാറ്റിന്റെ ഉടമയും ഏതാനും നാളുകളായി അപ്രത്യക്ഷനായിരിക്കുന്നതായി പോലീസ് മനസ്സിലാക്കുന്നു. അതിനിടയിൽ കേസന്വേഷണത്തിൽ പുതിയതായെത്തിയ ഇൻസ്പെക്ടർ കാഗാ കാണാതായ വ്യക്തിയുടെ ഫ്ലാറ്റിൽ ഉണ്ടായിരുന്ന ഒരു വസ്തു 16 വർഷം മുമ്പ് മരിച്ചു പോയ തന്റെ അമ്മയുമായി ബന്ധപ്പെട്ടതാണെന്ന് സംശയിക്കുന്നു. നിരവധി വർഷങ്ങളുടെ ഇടവേളകളിൽ നടന്ന സംഭവങ്ങൾ തമ്മിലുള്ള ലിങ്ക് കണ്ടെത്താനാവാതെ കുറ്റാന്വേഷകർ കുഴങ്ങുമ്പോൾ രഹസ്യങ്ങളുടെ താക്കോൽ ആരുടെ മനസ്സിന്റെ അഗാധതകളിലാവാം കുരുങ്ങിക്കിടക്കുന്നത്?

🔸THE CRIMES THAT BIND ( JAPAN / CRIME DRAMA / 2018 )

🔸ജാപ്പനീസ് കൊറിയൻ സിനിമകളിലെ ക്രൈം ഡ്രാമകൾക്ക് ഒരു പ്രത്യേക ശൈലി ഉണ്ട്. അതിക്രൂരരായ ക്രിമിനലുകളും നിസ്സഹായരായ ഇരകളും ഒന്നും ചെയ്യാനാവാത്ത പൊലീസും എല്ലാം അതിന് ഉദാഹരണമാണ്. അതിൽ നിന്ന് കുറച്ച് മാറി ഇവിടെ കേസന്വേഷണം അന്വേഷണോദ്യോഗസ്ഥന്റെ വ്യക്തിപരമായ ജീവിതത്തിലേക്ക് കടന്ന് ചെല്ലുമ്പോൾ നിരവധി മികച്ച വൈകാരിക മുഹൂർത്തങ്ങളും ചിത്രത്തിൽ കാണാം. ചിത്രത്തെ ഒരു ഇമോഷണൽ ക്രൈം ഡ്രാമ വിഭാഗത്തിൽ പെടുത്താം. വളരെ മികച്ച രീതിയിൽ തുടങ്ങുന്ന ചിത്രത്തിൽ ഡയലോഗുകളുടെ അതിപ്രസരം കുറച്ച് ബുദ്ധിമുട്ട് സൃഷ്ടിക്കുന്നുണ്ടെങ്കിലും തൃപ്തികരമായ ക്ലൈമാക്സ് തന്നെയായിരുന്നു. നിരവധി കഥാപാത്രങ്ങളും സബ് പ്ലോട്ടുകളും നിറഞ്ഞ ഈ ചിത്രം ശ്രദ്ധയോടെയുള്ള കാഴ്ച ആവശ്യപ്പെടുന്നുണ്ട്. ഇതേ പേരിൽ തന്നെയുള്ള ജാപ്പനീസ് നോവലിനെ ആധാരമാക്കിയുള്ള ഈ ചിത്രം അഭിനേതാക്കളുടെ മികച്ച പെർഫോർമൻസ് കൊണ്ടും ശ്രദ്ദേയമാണ്. ഏഷ്യൻ ക്രൈം ഡ്രാമ ചിത്രങ്ങൾ ഇഷ്ടപ്പെടുന്നവർക്ക് കണ്ട് നോക്കാവുന്നതാണ്.

🔸RATING : 3.5/5

🔸Movie Review Post No.250
@ http://www.amazingcinemareviews.wordpress.com
🔸ചിത്രം ടെലഗ്രാം ചാനലിൽ ലഭ്യമാണ്
@ https://t.me/AmazingCinema

©️ PRADEEP V K