4.5 Star (Brilliant) · Crime · Drama · Hindi · India

152. HAIDER (INDIA/CRIME DRAMA/2014)

🔹152. HAIDER (2014)  🔽 A Review 🔽

🔹”If I listen to my heart, it’s there.

      If I listen to my mind, though, it’s not.

      Should I take a life, or give mine,

      Should I remain, or should I not..”

🔹COUNTRY : INDIA

     LANGUAGE : HINDI

     GENRE : CRIME DRAMA

     DIRECTION : VISHAL BHARDWAJ

🔹SYNOPSIS 🔹

▪ ഇന്ത്യ ഇന്ന് സ്വതന്ത്ര്യം ലഭിച്ച് എഴുപത് വർഷങ്ങൾ പിന്നിടുകയാണ് .എന്നാൽ 1947 ൽ നമുക്കെല്ലാം ലഭിച്ച സ്വാതന്ത്ര്യം അല്ലെങ്കിൽ ഇന്ന് നാമെല്ലാം അനുഭവിക്കുന്ന സ്വാതന്ത്ര്യം അനുഭവിക്കാനുള്ള ഭാഗ്യം ലഭിക്കാത്ത നിരവധിയാളുകൾ ഇന്നും ഇന്ത്യയിൽ ജീവിക്കുന്നുണ്ട് എന്ന കാര്യം നാം ഓർക്കാറില്ല . അത്തരത്തിൽ ഒരു ഇന്ത്യൻ പൗരന് ഭരണഘടന അനുശാസിക്കുന്ന അടിസ്ഥാനപരമായ അവകാശം അതായത് ജീവിക്കാനുള്ള സ്വാതന്ത്ര്യം പോലും നിഷേധിക്കപ്പെട്ട ചിലരുടെ ചെറുത്തുനില്പിന്റെയും പ്രതികാരത്തിന്റെയും കഥ പറയുന്ന വിശാൽ ഭരദ്വാജ് സംവിധാനം ചെയ്ത HAIDER എന്ന ഹിന്ദി ചിത്രമാണ് ഈ സ്വാതന്ത്ര്യദിനത്തിൽ ഞാൻ നിങ്ങളുടെ മുമ്പിൽ അവതരിപ്പിക്കുന്നത്.  1990 കളിൽ ജമ്മു കാശ്മീരിൽ നിരവധി തീവ്രവാദി ഗ്രൂപ്പുകളുടെ നേതൃത്വത്തിൽ നടന്ന ഭീകരപ്രവർത്തനങ്ങളും അതിനെ എന്ത് വില കൊടുത്തും അമർച്ച ചെയ്യാനുള്ള ഇന്ത്യൻ പട്ടാളത്തിന്റെ ശ്രമങ്ങളും അതിന്റെ പരിണിത ഫലങ്ങളും ആണ് ഈ ചിത്രത്തിന്റെ കഥാ പശ്ചാത്തലം .ഷേക്സ്പിയർ നാടകമായ ഹാംലറ്റ് , ബഷാരത് പീർ എഴുതിയ കർഫ്യൂഡ് നൈറ്റ് എന്നിവ ആധാരമാക്കിയാണ് വിശാൽ ഭരദ്വാജും ബഷാരത് പീറും ചിത്രത്തിന്റെ തിരക്കഥ തയ്യാറാക്കിയിരിക്കുന്നത് .Maqbool, Omkara എന്നീ ചിത്രങ്ങൾക്ക് ശേഷം ഷേക്സ്പിയർ നാടകങ്ങളെ ആധാരമാക്കി വിശാൽ ഭരദ്വാജ് സംവിധാനം ചെയ്ത ചിത്രമാണിത്. 

▪ 1995 ൽ ശ്രീനഗറിൽ ഹിലാൽ മീർ എന്ന ഡോക്ടറെ ഒരു തീവ്രവാദി ഗ്രൂപ്പിലെ അംഗത്തിന് രഹസ്യമായി സ്വന്തം വീട്ടിൽ വച്ച് ഓപ്പറേഷൻ ചെയ്ത് കൊടുത്തു എന്ന കുറ്റത്തിന് ഇന്ത്യൻ പട്ടാളം പിടിച്ചു കൊണ്ടു പോകുകയും അദ്ദേഹത്തിന്റെ വീട് കത്തിച്ചു കളയുകയും ചെയ്യുന്നു. പട്ടാളത്തിന്റെ പിടിയിലായ അദ്ദേഹത്തെ അന്വേഷിച്ച് കണ്ട് പിടിക്കാൻ മകനായ ഹൈദർ നിരവധി ശ്രമങ്ങൾ നടത്തുന്നുവെങ്കിലും അദ്ദേഹം ജീവിച്ചിരിപ്പുണ്ടോ അതോ മരിച്ചുവോ എന്ന് പോലും കണ്ടെത്താനാവുന്നില്ല .അതിനിടയിൽ അമ്മയും അച്ഛന്റെ സഹോദരനും തമ്മിലുള്ള അടുപ്പവും കൂടി കാണുന്നതോടെ ഹൈദർ മാനസികമായി തളരുന്നു. തുടർന്ന് നടത്തിയ അന്വേഷണങ്ങളിൽ തീവ്രവാദി ബന്ധം ആരോപിച്ച് പട്ടാളം പിടികൂടി പിന്നീട് അപ്രത്യക്ഷരാകുന്ന നിരവധി സാധാരണ പൗരൻമാരിൽ ഒരാളാണ് തന്റെ അച്ഛനും എന്ന് ഹൈദർ മനസ്സിലാക്കുന്നു. തന്റെ കാമുകിയും ജേർണലിസ്റ്റുമായ ആർഷിയയുടെ സഹായത്തോടെ നടത്തിയ അന്വേഷണത്തിൽ  അച്ഛനെ പട്ടാളത്തിന് ഒറ്റിക്കൊടുത്തത് അദ്ദേഹത്തിന്റെ സഹോദരൻ തന്നെയായിരുന്നെന്നും അതിന് തന്റെ അമ്മയും കൂടി സഹായിച്ചിരുന്നുവെന്ന് മനസ്സിലാക്കുന്ന ഹൈദർ കടുത്ത മാനസിക സമ്മർദ്ദത്തിൽ അകപ്പെടുന്നു. തന്റെ അച്ഛനെ ചതിച്ചവരെ മുഴുവൻ നശിപ്പിച്ചാലേ തനിക്ക് സ്വസ്ഥത ലഭിക്കൂ എന്ന് ഹൈദർ വിശ്വസിക്കുന്നു. പ്രതികാരത്തിന്റെ തീച്ചൂളയിൽ സ്വയം വെന്തെരിയുമ്പോഴും അമ്മയോടുള്ള സ്നേഹത്തിന്റെ കനൽ അണയാതെ സൂക്ഷിക്കുന്ന ഹൈദറിന്റെ ആത്മ സംഘർഷങ്ങളുടെ കഥയാണ് ഈ ചിത്രം .

🔹 REVIEW🔹

▪  ഷേക്സ്പിയറിന്റെ ഹാംലറ്റും കാശ്മീർ പ്രശ്നങ്ങളും അതി വിദഗ്ദ്ധമായി ഇഴ ചേർത്ത് ചിത്രം സംവിധാനം ചെയ്യുന്നതിൽ വിശാൽ ഭരദ്വാജ് പൂർണമായും വിജയിച്ചിട്ടുണ്ട്. കെട്ടുറപ്പുള്ള തിരക്കഥയും ശക്തമായ സംഭാഷണങ്ങളും അഭിനേതാക്കളുടെ മികച്ച പെർഫോർമൻസും വിഷയത്തിന്റെ തീവ്രത പ്രേക്ഷകരിലേക്കെത്തിക്കുന്നതിൽ സഹായകരമായി. വിശാൽ ഭരദ്വാജ് തന്നെ ചിട്ടപ്പെടുത്തിയ മ്യൂസിക് സ്കോറും പങ്കജ് കുമാറിന്റെ ക്യാമറ വർക്കും ചിത്രത്തിന്റെ ടോണിന് ചേർന്ന് നിന്നു. സംഭാഷണത്തിനും മ്യൂസിക് ഡയറക്ഷനും അടക്കം അഞ്ച് നാഷണൽ അവാർഡുകൾ ചിത്രം കരസ്ഥമാക്കിയിരുന്നു. വിട്ടുവീഴ്ചകളില്ലാതെ കാലിക പ്രസക്തമായ ഒരു വിഷയം അതിന്റെ എല്ലാ തീവ്രതയോടും കൂടി അവതരിപ്പിച്ച വിശാൽ ഭരദ്വാജ് എന്ന സംവിധായകനിൽ നിന്ന് ഇനിയും ഏറെ സംഭാവനകൾ ഇന്ത്യൻ സിനിമാ ലോകത്തിന് ലഭിക്കും എന്ന് പ്രതീക്ഷിക്കുന്നു.

▪ ഹൈദർ എന്ന കേന്ദ്രകഥാപാത്രമായി ഷാഹിദ് കപൂർ അമ്പരപ്പിക്കുന്ന അഭിനയം കാഴ്ച വച്ചിരിക്കുന്നു. പ്രണയവും പ്രതികാരവും ദു:ഖവും ക്രോധവും സ്നേഹവും എല്ലാം ഒരേ സമയം അനുഭവിച്ച് മാനസികനില തന്നെ തകരാറിലാവുന്ന ഹാംലറ്റിന്റെ അവസ്ഥ പേറുന്ന ഹൈദർ എന്ന കഥാപാത്രം ഷാഹിദ് കപൂറിലെ നടനെ ഏറ്റവും നന്നായി  ഉപയോഗപ്പെടുത്തിയിട്ടുണ്ട്. ഹൈദറിന്റെ അമ്മയുടെ വേഷം അവതരിപ്പിച്ചിരിക്കുന്നത് ബോളിവുഡിലെ ഏറ്റവും മികച്ച നടിമാരിൽ ഒരാളായ തബു ആണ് . കുറ്റബോധവും മകനോടുള്ള സ്നേഹവും കൊണ്ട് വീർപ്പുമുട്ടുന്ന ആ കഥാപാത്രം ചിത്രം കഴിഞ്ഞാലും നിങ്ങളെ വിട്ടു പോകാതെ മനസ്സിൽ ഒരു വിങ്ങലായി അവശേഷിക്കും .ഹൈദറിന്റെ അമ്മാവന്റെ വേഷം ചെയ്ത കെ കെ മേനോനും പ്രണയിനിയുടെ വേഷത്തിലെത്തിയ ശ്രദ്ധ കപൂറും അതിഥി വേഷത്തിലെത്തിയ ഇർഫാൻ ഖാനും അടക്കം എല്ലാ നടീനടൻമാരും ഒന്നിനൊന്ന് മികച്ച് നിന്നു. സാധാരണ ബോളിവുഡ് ചിത്രങ്ങളിൽ കാണാറുള്ള സ്ഥിരം മസാലകൾ ഒന്നും ചേർക്കാതെ തന്നെ ഒരു നിമിഷം പോലും സ്ക്രീനിൽ നിന്ന് കണ്ണെടുക്കാൻ അനുവദിക്കാതെ പ്രേക്ഷകനെ പിടിച്ചിരുത്തുന്ന ചിത്രമാണിത്. ഓരോ ഭാരതീയനും നിർബന്ധമായും കണ്ടിരിക്കേണ്ട ഒരു ചിത്രം.

🔹SIGNIFICANCE🔹

▪ ജമ്മു കാശ്മീരിൽ തീവ്രവാദി ആക്രമണങ്ങളുടെ പേരിൽ സൈന്യം നടത്തിയിട്ടുള്ള മനുഷ്യാവകാശ ധ്വംസനങ്ങൾ നിരവധി എതിർപ്പുകൾക്ക് വഴിവച്ചിട്ടുള്ളതാണ്. സിനിമയിൽ ഒരു സ്ത്രീ  കഥാപാത്രം പറയുന്നത് തന്റെ ഭർത്താവ് മരിച്ചോ അതോ ജീവനോടെയുണ്ടോ എന്ന് പോലും അറിയാത്തതിനാൽ താൻ യുദ്ധ വിധവ (War Widow) അല്ല മറിച്ച് പകുതി യുദ്ധ വിധവ (Half War Widow) ആണെന്നാണ്. ചിത്രത്തിൽ ഹൈദർ പട്ടാള മേധാവിയോട് ആവശ്യപ്പെടുന്നതും തന്റെ അച്ഛൻ ജീവനോടെയുണ്ടോ അതോ ഇല്ലയോ  എന്നെങ്കിലും പറയുവാൻ മാത്രമാണ്. തീവ്രവാദ ഗ്രൂപ്പുകളിൽ നിന്നും ആർമിയിൽ നിന്നും പലപ്പോഴും കാശ്മീരിലെ സാധാരണ ജനങ്ങൾ ആ കാലഘട്ടങ്ങളിൽ അനുഭവിച്ചിട്ടുള്ളത്  ഒന്ന് തന്നെയാണ് എന്ന പലരും പറയാൻ മടിക്കുന്ന വസ്തുത ഹൃദയത്തിൽ തറയ്ക്കുന്ന രീതിയിൽ സംവിധായകൻ അവതരിപ്പിച്ചിരിക്കുന്നു. കയ്പ് നിറഞ്ഞ ചില സത്യങ്ങൾ പറയുമ്പോഴും അടുത്തിടെ ഉണ്ടായ കാശ്മീർ പ്രളയത്തിലും പ്രകൃതിക്ഷോഭങ്ങളിലും ജീവൻ പണയം വെച്ച് ദുരിതാശ്വാസ പ്രവർത്തനങ്ങൾ നടത്തിയ ഇന്ത്യൻ സൈന്യത്തിന്റെ സേവനങ്ങൾ എടുത്ത് പറയാനും സംവിധായകൻ മറക്കുന്നില്ല.

▪ കലാപകലുഷിതമായ കാശ്മീരിന്റെ സുരക്ഷയ്ക്ക് ഇന്ത്യൻ സൈന്യം ചെയ്തിട്ടുള്ള സേവനങ്ങൾ വിസ്മരിക്കാനാവില്ലെങ്കിലും വർഷങ്ങളായി മതത്തിന്റെ പേരിൽ സ്വന്തം നാട്ടിൽ തീവ്രവാദികളെന്ന് മുദ്ര കുത്തപ്പെട്ട് കൊടിയ പീഡനങ്ങൾ ഏറ്റുവാങ്ങേണ്ടി വന്ന ആയിരക്കണക്കിന് കാശ്മീർ നിവാസികളുടേയും ഭർത്താവും മക്കളും എവിടെയാണെന്ന് പോലും അറിയാതെ ജീവിക്കേണ്ടി വരുന്ന ഭാര്യമാരുടേയും അമ്മമാരുടേയും നിലവിളികൾ കാതുകളിൽ മുഴങ്ങിക്കൊണ്ടിരിക്കുന്നു. ഈ ചിത്രം ഒരിക്കലും ഇന്ത്യൻ ആർമിക്ക് എതിരല്ല . സ്നേഹനിധിയായ അച്ഛനെ നഷ്ടപ്പെട്ട ഒരു മകന്റെയും നനഞ്ഞിടം കുഴിക്കുന്ന സ്വാർത്ഥമതികളുടെ ചതിക്കുഴിയിൽ വീണ് എല്ലാം നഷ്ടപ്പെട്ട ഒരമ്മയുടേയും പ്രതികാരത്തിന്റെയും തിരിച്ചറിവിന്റെയും കഥ പറയുമ്പോൾ ചില പച്ചയായ യാഥാർത്ഥ്യങ്ങൾ തുറന്നു കാട്ടുന്നുവെന്ന് മാത്രം . രണ്ട് ആനകൾ തമ്മിൽ യുദ്ധം ചെയ്യുമ്പോൾ ചവിട്ടിമെതിക്കപ്പെടുന്നത് അവയുടെ കാലിനടിയിലെ പുല്ലുകൾ മാത്രമാണെന്ന യാഥാർത്ഥ്യം ദേശീയതാ വാദങ്ങൾക്കിടയിൽ നാം എന്നാണ് മനസ്സിലാക്കുക . മാസങ്ങൾക്ക് മുമ്പ് ജമ്മു കാശ്മീരിൽ ഇന്ത്യൻ ആർമി ജീപ്പിന് മുന്നിൽ യുവാവിനെ കെട്ടി വച്ച് ഗ്രാമങ്ങളിലൂടെ സഞ്ചരിച്ച സംഭവവും വേണമെന്നുള്ളവർക്ക് ഇതിനോട്  ചേർത്ത് വായിക്കാം. എന്തൊക്കെത്തന്നെയായാലും ഈ സ്വാതന്ത്ര്യദിനത്തിലും കാതുകളിൽ പ്രകമ്പനം കൊള്ളുന്ന ഭാരത് മാതാ കീ ജയ് വിളികൾക്കിടയിൽ പതിറ്റാണ്ടുകളായി തോക്കുകൾക്കും ബോംബുകൾക്കും ഇടയിൽപ്പെട്ട് ഉറ്റവരെ നഷ്ടപ്പെട്ട് ജീവിക്കുന്ന ചില മനുഷ്യാത്മാക്കളുടെ നിലവിളികൾ നമുക്ക് സൗകര്യപൂർവ്വം കേട്ടില്ലെന്ന് നടിക്കാം.

🔹RATING : 4.5/5 ( A BRILLIANT , BRAVE AND UNCOMPROMISING CINEMA WHICH SKILLFULLY BLENDS SHAKESPEAREAN TRAGEDY WITH KASHMIR CONFLICTS  )

©PRADEEP V K (AMAZING CINEMA)

4.5 Star (Brilliant) · Crime · India · Tamil

131. AARANYA KAANDAM (INDIA/CRIME/2011)

131. Aaranya Kaandam (INDIA/TAMIL/2011/ Neo Noir Gangster Film/123 Min/Dir: Thiagarajan Kumararaja /Stars: Jackie Shroff, Sampath Raj, Ravi Krishna, Yasmin Ponnappa , Guru Somasundaram)
🔹 SYNOPSIS 🔹
 ▪ പരീക്ഷണ ചിത്രങ്ങൾ ധാരാളം ഇറങ്ങുന്ന തമിഴ് സിനിമാ ലോകത്തിന് ലോക സിനിമാ ഭൂപടത്തിൽ സ്ഥാനം നേടിക്കൊടുക്കാൻ എന്തുകൊണ്ടും പര്യാപ്തമായ ചിത്രമാണ് ആരണ്യകാണ്ഡം. ക്വൻറിൻ തരാൻറിനോ , പാർക്ക് ചാൻ വൂക്ക് തുടങ്ങിയ സംവിധായകർ അവരുടെ ചിത്രങ്ങളിൽ പിന്തുടരുന്ന നിയോ നോയർ ശൈലിയിലുള്ള ആദ്യ തമിഴ് ചിത്രമാണിത് .തമിഴ് സിനിമയിലെന്നല്ല ഇന്ത്യൻ ചിത്രങ്ങളിൽ തന്നെ വളരെ അപൂർവ്വമായ ശൈലിയിലുള്ള ഈ ചിത്രം ത്യാഗരാജൻ കുമാരരാജയുടെ  ആദ്യ സംവിധാന സംരംഭമാണ് . 
▪സിങ്കപ്പെരുമാൾ എന്ന ക്രൂരനായ ഗാങ്ങ്സ്റ്റർ, അയാളുടെ വലംകൈ ആയ പശുപതി , അയാൾ തട്ടിക്കൊണ്ടുവന്ന സുബ്ബു എന്ന യുവതി , ജോലിക്കാരനായ സപ്പെ , എതിർ പക്ഷക്കാരനായ ഗാങ്ങ്സ്റ്റർ ഗജേന്ദ്രൻ , കോഴിപ്പോരുകാരനായ കലയ,  അയാളുടെ മകൻ എന്നിവരുടെ ജീവിതത്തിൽ ഒരു ദിവസം നടക്കുന്ന സംഭവങ്ങളുടെ രക്തരൂക്ഷിതമായ ആവിഷ്കാരമാണ് ഈ ചിത്രം .ഒരു മയക്ക് മരുന്ന് കച്ചവടത്തിനിടയിൽ നടക്കുന്ന ചതിയും വഞ്ചനയും പ്രതികാരവും രക്തച്ചൊരിച്ചിലും റിയലിസ്റ്റിക്ക് ആയി അവതരിപ്പിച്ചിരിക്കുന്ന ഈ ചിത്രം സെൻസർ ബോർഡിന്റെ ശക്തമായ എതിർപ്പിന് ശേഷമാണ് നിരവധി കട്ടുകൾക്കും ബീപ്പ് ഡയലോഗുകൾക്കും ശേഷം റിലീസ് ചെയ്യാൻ കഴിഞ്ഞത് .ചിത്രം കണ്ട് കഴിഞ്ഞപ്പോൾ രക്തം കാണുന്ന സ്ഥലങ്ങളിൽ വെള്ളയടിപ്പിച്ചും ഡയലോഗുകൾക്കിടയിൽ ബീപ്പ് കേൾപ്പിച്ചും ചിത്രത്തിന്റെ പൂർണമായ ആസ്വാദനം തടസ്സപ്പെടുത്തിയ സെൻസർ ബോർഡിനോട് തോന്നിയത് പുച്ഛം മാത്രം .അമേരിക്കൻ ഫിലിം റേറ്റിംഗ് പോലെ താല്പര്യമുള്ള സംവിധായകർക്ക്  സെൻസർ ചെയ്യാതെ അൺറേറ്റഡ് ആയി ചിത്രങ്ങൾ റിലീസ് ചെയ്യാനുള്ള സ്വാതന്ത്ര്യം ഇവിടെയും നല്കേണ്ട കാലം അതിക്രമിച്ചിരിക്കുന്നു .
▪ഒരു പരിപൂർണ ഗാങ്ങ്സ്റ്റർ ചിത്രം എന്ന് ആരണ്യകാണ്ഡത്തെ വിശേഷിപ്പിക്കാം .ജാക്കി ഷറോഫ്, സമ്പത്ത് , രവി കൃഷ്ണ , ഗുരു സോമസുന്ദരം എന്നിവർ അടക്കം അഭിനയിച്ച എല്ലാ നടീനടൻമാരും അത് എത്ര ചെറിയ വേഷമായാലും മികച്ചതാക്കി .കലയ എന്ന കഥാപാത്രത്തെ അവതരിപ്പിച്ച ഗുരു സോമസുന്ദരവും അയാളുടെ മകനായ ചെറിയ കുട്ടിയെ അവതരിപ്പിച്ച മാസ്റ്റർ വസന്തും അതിഗംഭീര പ്രകടനമാണ് കാഴ്ച വച്ചത് .സ്ത്രീ കഥാപാത്രങ്ങൾ വളരെ കുറവായ ചിത്രത്തിൽ സുബ്ബു എന്ന കഥാപാത്രത്തെ അവതരിപ്പിച്ച പുതുമുഖം യാസ്മിൻ പൊന്നപ്പ അപ്രതീക്ഷിതമായ പ്രകടനത്തിലൂടെ ഞെട്ടിച്ചു .
▪പ്രവീൺ കെ എൽ , എൻ ബി ശ്രീകാന്ത് എന്നിവർക്ക് മികച്ച എഡിറ്റിംഗിനുള്ള ദേശീയ പുരസ്കാരം ഈ ചിത്രത്തിലൂടെ ലഭിച്ചു . ഒരു അനാവശ്യ ഷോട്ട് പോലുമില്ലാത്ത ഈ ചിത്രത്തിൽ എഡിറ്റിംഗിന്റെ മാസ്മരികത അനുഭവിച്ചറിയാം . ചിത്രത്തിന് നിയോ നോയർ ഇഫക്ട് നല്കാൻ പി എസ് വിനോദിന്റെ ഛായാഗ്രഹണവും യുവൻ ശങ്കർ രാജയുടെ ബാക്ക് ഗ്രൗണ്ട്  മ്യൂസിക്കും വഹിച്ച പങ്ക് ചെറുതല്ല .ശക്തമായ കുറിക്ക് കൊള്ളുന്ന ഡയലോഗുകൾ നിറഞ്ഞ ചിത്രത്തിന്റെ തിരക്കഥയും സംഭാഷണവും സംവിധായകൻ തന്നെയാണ് നിർവഹിച്ചത് .തന്റെ മനസ്സിലുള്ള സിനിമയുടെ പൂർണതയുടെ കാര്യത്തിൽ ഒരു വിട്ടുവീഴ്ചക്കും തയ്യാറാവാത്ത സംവിധായകൻ ത്യാഗരാജൻ കുമാരരാജയെ എത്ര അഭിനന്ദിച്ചാലും മതിയാവില്ല . ആദ്യ ചിത്രം ഇറങ്ങി ആറ് വർഷങ്ങൾ പിന്നിട്ടിട്ടും അദ്ദേഹത്തിന്റെ പുതിയ ചിത്രം ഇതുവരെയും വന്നിട്ടില്ല എന്നതും ശ്രദ്ദേയമാണ് .ചിത്രങ്ങളുടെ എണ്ണത്തിലല്ല പുതുമയിലും ആവിഷ്കാര സ്വാതന്ത്ര്യത്തിലുമാണ് പ്രാധാന്യമെന്ന് വിശ്വസിക്കുന്ന അദ്ദേഹത്തെപ്പോലുള്ള സംവിധായകൻ ഇന്ത്യൻ സിനിമയുടെ തന്നെ യശസ്സുയർത്തട്ടെ .

VERDICT :  BRILLIANT ( Strikingly Raw And Realistic Gangster Saga Which Excels In Both Technical And Acting Departments – A New Dawn To Tamil Cinema )

©PRADEEP V K (AMAZING CINEMA)

4.5 Star (Brilliant) · English · USA · War

109. BEASTS OF NO NATION (USA/WAR/2015)

🔹AMAZING CINEMA # 109

🔹BEASTS OF NO NATION (USA/English/2015/War Drama/Dir: Cary Joji Fukunaga/Starring: Abraham Attah, Idris Elba)

🔹യുദ്ധം… ലോകജനതയെ ഏറ്റവും ഭയപ്പെടുത്തുന്ന വാക്ക്… അത് രാജ്യങ്ങൾ തമ്മിലായാലും ഒരേ രാജ്യത്തിലെ പല വിഭാഗങ്ങൾ തമ്മിലായാലും മനുഷ്യന്റെ ഏറ്റവും വലിയ ശത്രു. ഒരു ആഫ്രിക്കൻ രാജ്യത്തിലെ സിവിൽ വാർ ഒരു കുട്ടിയുടെ ജീവിതത്തെ എങ്ങനെ മാറ്റിമറിക്കുന്നു എന്നതിന്റെ ഏറ്റവും ഭീതിദമായ , റിയലിസ്റ്റിക് ആയ ആവിഷ്കാരമാണ് Beasts of No Nation എന്ന ചിത്രം.

🔹 SYNOPSIS  🔹

▪അദ്ധ്യാപകനും ആക്ടിവിസ്റ്റുമായ അച്ഛൻ, കുടുംബിനിയായ അമ്മ , ശരീര സൗന്ദര്യത്തിൽ മാത്രം ശ്രദ്ധിച്ച് ജീവിക്കുന്ന ജ്യേഷ്ഠ സഹോദരൻ , രണ്ട് കുഞ്ഞ് സഹോദരങ്ങൾ , പിന്നെ കൂടെ കളിക്കാനും അല്ലറ ചില്ലറ കള്ളത്തരങ്ങൾ കാണിക്കാനും അടുത്ത കൂട്ടുകാർ .ഇവയെല്ലാമായിരുന്നു അഗു ( Abraham Attah ) വിന്റെ  ലോകം .രാജ്യത്ത് യുദ്ധം നടക്കുന്നുണ്ടെങ്കിലും അവരുടെ പ്രദേശം Buffer Zone ആയി പ്രഖ്യാപിക്കപ്പെട്ടതിനാൽ സമാധാനം നിറഞ്ഞ അവിടേക്ക് ചുറ്റുപാടു നിന്നും നിരവധി അഭയാർത്ഥികൾ  എത്തിക്കൊണ്ടിരുന്നു . എന്നാൽ പെട്ടെന്നായിരുന്നു ഒരു ദിവസം എല്ലാം മാറിമറിഞ്ഞത് .റിബലുകളുടെ ആക്രമണത്തിൽ ഗവൺമെന്റ് സംവിധാനം പാടെ തകരുകയും പട്ടാളവും റിബൽ ഗ്രൂപ്പുകളും തമ്മിൽ ശക്തമായ യുദ്ധം ആരംഭിക്കുകയും ചെയ്യുന്നു . ആ യുദ്ധത്തിൽ പ്രിയപ്പെട്ടതെല്ലാം കൺമുന്നിൽ  നഷ്ടപ്പെട്ട അഗു ജീവൻ രക്ഷിക്കാനുള്ള ഓട്ടത്തിന്റെ അവസാനം ചെന്നെത്തുന്നത് NDF എന്ന ഗറില്ലാ പോരാളികളുടെ ഗ്രൂപ്പിലാണ് .

▪ദയയേതുമില്ലാത്ത ക്രൂരനായ കമാൻഡൻറ് ( Idris Elba ) അതികഠിനമായ ട്രെയിനിംഗിന് ശേഷം അഗുവിനെ NDF ഗ്രൂപ്പ് മെമ്പർ ആയി സ്വീകരിക്കുന്നു . അന്ന് മുതൽ കയ്യിൽ തോക്കും കഠാരയുമേന്തിയ , ഒരു മനുഷ്യനെ കൈ വിറക്കാതെ വെട്ടിക്കൊല്ലാൻ പോലും കഴിവുള്ള ഒരു NDF Child Soldier ആയി അഗു മാറുകയാണ് .അഗുവിനെപ്പോലെ നേരത്തെ ഗ്രൂപ്പിൽ അംഗമായ Strika യോടൊപ്പം അവനും നിരവധി മനസ്സാക്ഷിയെ മരവിപ്പിക്കുന്ന മനുഷ്യക്കുരുതികൾ നടത്തുന്നു. ഒരിക്കലും തിരിച്ചുവരാനാവാത്ത ,മനുഷ്യൻ മനുഷ്യനെ കൊല്ലുന്ന ക്രൂരതയുടെ ലോകത്തിലേക്ക് എടുത്തെറിയപ്പെടുന്ന അഗുവിനെപ്പോലുള്ള നിരവധി കുട്ടിപ്പട്ടാളക്കാരുടെ  രക്തപങ്കിലമായ ജീവിതത്തിന്റെ നേർക്കാഴ്ചയാണീ ചിത്രം .

🔹 ASSESSMENT 🔹

▪എത്ര മനക്കരുത്തുള്ളയാളും അറിയാതെ സ്ക്രീനിൽ നിന്നും തല ചെരിച്ചു പോകുന്ന രംഗങ്ങൾ നിറഞ്ഞ ചിത്രമാണിത് .യുദ്ധത്തിന്റെ എല്ലാ വിധ തീവ്രതയും ഒട്ടും ചോർന്നു പോകാതെ ഒരു തരത്തിലുള്ള വിട്ടുവീഴ്ചയുമില്ലാതെയാണ് സംവിധായകൻ Cary Joji Fukunaga ഇതിൽ ചിത്രീകരിച്ചിരിക്കുന്നത് . Uzodinma Iweala എഴുതിയ Beasts of No Nation എന്ന 2005 ലെ നോവലിനെ ആധാരമാക്കിയ ഈ ചിത്രത്തിന്റെ സംവിധാനത്തോടൊപ്പം തിരക്കഥയും ക്യാമറയും കൈകാര്യം ചെയതിരിക്കുന്നത് Fukunaga തന്നെയാണ് . അദ്ദേഹവും Idris Elba യും ചിത്രത്തിന്റെ നിർമ്മാണത്തിലും പങ്കാളികളായിരുന്നു . Netflix വഴിയായിരുന്നു ചിത്രം റിലീസ് ചെയ്തത് .

▪പല രംഗങ്ങളും എങ്ങനെ ചിത്രീകരിച്ചു എന്ന് നമ്മളെ വിസ്മയിപ്പിക്കുന്ന രീതിയിലുള്ള ചിത്രീകരണമാണ് ചിത്രത്തിന് . അണിയറ പ്രവർത്തകരും നടീനടൻമാരും എത്രമാത്രം കഷ്ടപ്പെട്ടിട്ടാണ് ചിത്രം ഒരുക്കിയിരിക്കുന്നതെന്ന് ഓരോ ഷോട്ടും വ്യക്തമാക്കുന്നു . അഗുവിനെ അവതരിപ്പിച്ച Abraham Attah എന്ന പതിനാല്കാരന്റെ പ്രകടനം നിങ്ങളെ അദ്ഭുതപ്പെടുത്തുമെന്ന് തീർച്ചയാണ് .തന്റെ ആദ്യ ചിത്രത്തിലൂടെ ലോകസിനിമയിൽ തന്റെ സ്ഥാനം ഉറപ്പിക്കാൻ അദ്ദേഹത്തിന് കഴിഞ്ഞിട്ടുണ്ട് .വൈകാരിക മുഹൂർത്തങ്ങളിലും യുദ്ധരംഗങ്ങളിലും Abraham Attah യുടെ പെർഫോർമൻസ് അഗു എന്ന കഥാപാത്രത്തെ പ്രേക്ഷകന്റെ ഉള്ളിൽ ഒരിക്കലും മായാത്ത രീതിയിൽ പ്രതിഷ്ഠിക്കും എന്നുറപ്പാണ് . നിഷ്ഠൂരനായ, തന്റെ ജയത്തിന് വേണ്ടി എന്തിനും മടിക്കാത്ത NDF കമാണ്ടൻറ് ആയി Idris Elba തന്റെ കരിയറിലെ ഏറ്റവും മികച്ച പ്രകടനമാണ് കാഴ്ച വച്ചിരിക്കുന്നത് . വളരെ കുറച്ച് സ്ത്രീ കഥാപാത്രങ്ങൾ മാത്രമുള്ള ചിത്രത്തിലെ എല്ലാ അഭിനേതാക്കളും ഒരിക്കലും മറക്കാനാവാത്ത നിമിഷങ്ങൾ ആണ് പ്രേക്ഷകന് നല്കുന്നത്.

▪ആവശ്യത്തിനും അനാവശ്യത്തിനും യുദ്ധത്തിനായി മുറവിളി കൂട്ടുന്ന നമ്മുടെ നാട്ടിലെ ചിലർ ഈ ചിത്രം നിർബന്ധമായും കണ്ടിരിക്കേണ്ടതാണ് . യുദ്ധത്തിൽ എല്ലാം നഷ്ടപ്പെടുന്നവന്റെ വേദന ലോകത്തെല്ലാ മനുഷ്യർക്കും ഒരുപോലെ ആണെന്ന് ഈ ചിത്രം നമ്മെ വീണ്ടും ഓർമ്മപ്പെടുത്തുന്നു .അഗുവിനെപ്പോലെ ആയിരക്കണക്കിന് കുട്ടിപ്പട്ടാളക്കാർ ലോകത്താകമാനമുള്ള പല തരം യുദ്ധങ്ങളിൽ ഇപ്പോഴും പങ്കാളികളാണെന്നുള്ള യാഥാർത്ഥ്യം നമ്മുടെ ഉള്ളിൽ ഒരു ഞെട്ടൽ സമ്മാനിക്കുകയാണ് . യുണൈറ്റഡ് നേഷൻസിന്റെ ശ്രമഫലമായി അവരിൽ പലരേയും രക്ഷപെടുത്താൻ സാധിച്ചിട്ടുണ്ടെങ്കിലും ഭൂതകാലത്തിന്റെ അതിക്രൂരമായ ഓർമകളുടെ വേട്ടയാടലിൽ ജീവിക്കുന്ന അവരുടെ വികാരരഹിതമായ കണ്ണുകൾ യുദ്ധവെറിയൻമാരുടെ നേർക്കുള്ള ചോദ്യചിഹ്നമായി അവശേഷിക്കുന്നു .

🔹Rating : 4.5/5 ( An Uncompromising and Brutal Tale Of War )

©PRADEEP V K

4.5 Star (Brilliant) · Animation · Belgium · Fantasy · France · Japan · No Dialogues

103. THE RED TURTLE (FRANCE/ANIMATION/2016)

🔹AMAZING CINEMA # 103
🔹MOVIE TITLE :THE RED TURTLE (2016)
🔹YEAR : 2016
🔹 COUNTRY : France / Belgium / Japan
🔹 LANGUAGE : No Dialogues
🔹GENRE : Animated Fantasy Film
🔹 RUNNING TIME : 80 Min
🔹DIRECTOR : Michael Dudok De Wit

🔹 SYNOPSIS 🔹

▪ 89th അക്കാദമി അവാർഡിലെ മികച്ച അനിമേറ്റഡ് ഫീച്ചർ ഫിലിമിനുള്ള നോമിനേഷൻ ലഭിച്ച ചിത്രങ്ങളിൽ ഒന്നാണ് THE RED TURTLE . സാധാരണ അനിമേഷൻ ചിത്രങ്ങൾ എന്നാൽ സംസാരിക്കുന്ന പക്ഷികളും മൃഗങ്ങളും നിറഞ്ഞ നന്മയും തിന്മയും തമ്മിലുള്ള ഏറ്റുമുട്ടലിന്റെ കഥ പറയുന്ന ഒരു പാട് തമാശകൾ നിറഞ്ഞ കളർഫുൾ ആയ ചിത്രങ്ങളാണ് നമ്മുടെ മനസ്സിലേക്കെത്തുക .എന്നാൽ അതൊന്നുമല്ല ഈ ചിത്രം .ഒന്നാമതായി ഈ അനിമേറ്റഡ് ചിത്രത്തിൽ ഡയലോഗുകളേ ഇല്ല . മനുഷ്യരും മ്യഗങ്ങളും ഉണ്ടെങ്കിലും നിറങ്ങൾ വാരി വിതറിയ ഒരു കളർഫുൾ ചിത്രമല്ലിത് . പകരം തുടങ്ങിയിടത്ത് തന്നെ അവസാനിക്കുകയും അവസാനിക്കുന്നിടത്തു നിന്ന് തുടങ്ങുകയും ചെയ്യുന്ന ജീവിതത്തിന്റെ വ്യത്യസ്തമായതും അതേ സമയം അവിശ്വസനീയമായതുമായ കാഴ്ചകളാണ് ഈ ചിത്രം കാണിച്ചു തരുന്നത് .

▪  കടൽക്ഷോഭത്തിൽപ്പെട്ട് തകർന്ന ഒരു കപ്പലിൽ നിന്ന് ഒരാൾ മാത്രം രക്ഷപെടുകയും അയാൾ എങ്ങിനേയോ മനുഷ്യവാസമില്ലാത്ത ഒരു ദ്വീപിൽ എത്തിപ്പെടുകയും ചെയ്യുന്നു .മുളങ്കാടുകൾ നിറഞ്ഞ ദ്വീപിൽ ഉള്ള ചില ഫലവൃക്ഷങ്ങൾ കഴിച്ചും ഒരു ചെറിയ പൊയ്കയിലെ വെള്ളം കുടിച്ചും അയാൾ വിശപ്പകറ്റുന്നു .കടൽത്തീരത്തെ മണലിൽ കഴിയുന്ന ഞണ്ടുകളും കടലാമകളും ഒരു നീർനായയും ആകാശത്ത് പറക്കുന്ന കടൽ പക്ഷികളും മാത്രമാണ് അവിടെയുള്ള മറ്റ് ജീവികൾ .വിരസമായ ദിവസങ്ങൾക്ക് ശേഷം അവിടെ നിന്ന് രക്ഷപെടാൻ അയാൾ മുളകളും വള്ളികളും കൊണ്ട് ഒരു ചങ്ങാടം ഉണ്ടാക്കുന്നു .എന്നാൽ ചങ്ങാടത്തിൽ കയറി കുറച്ചു ദൂരം യാത്ര കഴിയുമ്പോഴേക്കും ഏതോ ഒരു വലിയ ജീവിയുടെ ആക്രമണത്താൽ ചങ്ങാടം തകരുന്നു .വീണ്ടും അയാൾ ചങ്ങാടം ഉണ്ടാക്കുന്നെങ്കിലും പിന്നെയും അത് തന്നെ ആവർത്തിക്കുന്നു .

▪ മൂന്നാം തവണയും ചങ്ങാടം നിർമ്മിക്കുന്ന അയാൾ തന്റെ ചങ്ങാടം തകർത്ത് തന്നെ അവിടെ നിന്നും രക്ഷപെടാൻ അനുവദിക്കാത്ത ജീവിയെ ആദ്യമായി കാണുന്നു .അത് അസാമാന്യ വലിപ്പമുള്ള ചുവന്ന നിറത്തിലുള്ള ഒരു ആമയായിരുന്നു . എന്താണ് ആ ആമയ്ക്ക് പിന്നിലുള്ള രഹസ്യമെന്നും എന്തിനാണ് അത് ചങ്ങാടം തകർത്തതെന്നും ഉള്ള സംശയത്തോടെ അതിനെ സമീപിക്കുന്ന അയാളോടൊപ്പം  പ്രേക്ഷകനും പ്രവചനാതീതമായ ജീവിതത്തിന്റെ വിവിധ തലങ്ങളിലൂടെ കടന്നു പോകുന്നു.

▪ അനിമേഷൻ ചിത്രങ്ങൾക്കിടയിൽ തരംഗം സൃഷ്ടിച്ച Spirited Away അടക്കമുള്ള നിരവധി ചിത്രങ്ങൾ സൃഷ്ടിച്ച പ്രശസ്ത ജാപ്പനീസ് സ്റ്റുഡിയോ ആയ Studio Ghibli യുമായി ചേർന്നാണ് ഈ ചിത്രം നിർമ്മിച്ചിരിക്കുന്നത് . അതിൽ നിന്ന് തുടങ്ങുന്ന പുതുമ ചിത്രത്തിന്റെ ഓരോ രംഗത്തും കാണാം . ഓസ്കാർ നോമിനേഷൻ ലഭിച്ച മറ്റ് ചിത്രങ്ങളിൽ നിന്നും എന്ത് കൊണ്ടും വ്യത്യസ്തമായ ഒരു അനുഭവമായിരുന്നു The Red Turtle. തന്റെ ആദ്യ ഫീച്ചർ ഫിലിമിന് ഇങ്ങനെ ഒരു ചിത്രം തിരഞ്ഞെടുത്ത Michael Dudok De Wit എന്ത് കൊണ്ടും അഭിനന്ദനം അർഹിക്കുന്നു.

🔹റേറ്റിംഗ് : 4.5/5 ( Brilliant )

▪*A Beautifully Crafted Animation Film which recounts the various milestones in the life of a Human Being in a way which is rather unconventional for an animation film – Never Miss It*

🔹പിൻകുറിപ്പ് : അനിമേഷൻ ചിത്രങ്ങൾ പ്രശസ്തമാകുന്നത് അതിൽ ശബ്ദം കൊടുത്തിരിക്കുന്ന അഭിനേതാക്കൾ വഴിയും കൂടിയാണ് .എന്നാൽ പ്രേക്ഷകന്റെ മനസ്സിൽ അനന്തമായ വിചാരധാര സൃഷ്ടിക്കാൻ സംഭാഷണത്തിന്റെ ആവശ്യമേയില്ലെന്ന് ഈ ചിത്രം തെളിയിക്കുകയാണ് .ചിരിച്ച് ആഹ്ലാദിക്കാൻ വേണ്ടി മാത്രം അനിമേഷൻ ചിത്രങ്ങൾ കാണുന്നവർ ഈ ചിത്രം കാണാൻ ശ്രമിക്കാതിരിക്കുന്നതാണ് നല്ലത് എന്ന് ഓർക്കുക .

©PRADEEP V K

4.5 Star (Brilliant) · English · UK · War

95. FULL METAL JACKET (UK/WAR/1987)

🔹AMAZING CINEMA # 95
🔹MOVIE TITLE : FULL METAL JACKET (1987)
🔹COUNTRY : UK/USA
🔹LANGUAGE: ENGLISH
🔹GENRE: WAR FILM
🔹RUNNING TIME : 116 Min
🔹DIRECTOR : STANLEY KUBRICK
🔹ACTORS : MATTHEW MODINE , VINCENT D’ONOFRIO

🔹SYNOPSIS 🔹

▪ഗുസ്താവ് ഗാസ്ഫോഡിന്റെ 1979 ലെ The Short Timers എന്ന നോവലിനെ ആധാരമാക്കി  വിയറ്റ്നാം യുദ്ധ പശ്ചാത്തലത്തിൽ സ്റ്റാൻലി കുബ്രിക്ക് സംവിധാനം ചെയ്ത ചിത്രമാണ് Full Metal Jacket. വിയറ്റ്നാം യുദ്ധത്തിൽ അമേരിക്കൻ പട്ടാളക്കാർ ഉപയോഗിച്ച ഫുൾ മെറ്റൽ ജാക്കറ്റ് ബുള്ളറ്റുകളിൽ നിന്നാണ് ചിത്രത്തിന് ആ പേര് ലഭിച്ചത് .ഒരു സംഘം യു.എസ് മറൈൻ കോർപ്സ് പട്ടാളക്കാരുടെ ട്രെയിനിംഗ് കാലഘട്ടത്തിൽ തുടങ്ങി അവരുടെ വിയറ്റ്നാം യുദ്ധാനുഭവങ്ങൾ വിവരിക്കുന്ന ചലച്ചിത്രമാണിത് .

▪1967ൽ ഒരു സംഘം യു എസ് മറൈൻ പട്ടാളക്കാർ സൗത്ത് കരോളിനയിലെ ട്രെയിനിംഗ് സെന്ററിൽ എത്തുന്നു . കർക്കശക്കാരനും ക്രൂരനുമായ ഡ്രിൽ ഇൻസ്ട്രക്ടർ ഹാർട്ട്മാന്റെ കീഴിലായിരുന്നു പരിശീലനം .യഥാർത്ഥ പേരിന് പകരം ഓരോരുത്തരുടേയും സ്വഭാവത്തിനനുസരിച്ച് ജോക്കർ , കൗബോയ് , പൈൽ എന്ന് തുടങ്ങിയ പേരുകൾ നല്കിയ ഹാർട്ട്മാന്റെ അതികഠിനമായ ട്രെയിനിംഗ് ഏവർക്കും സഹിക്കാവുന്നതിലുമപ്പുറമായിരുന്നു .ചെറിയ പിഴവിനു പോലും അതിക്രൂരമായ ശിക്ഷാ നടപടികൾ നടത്തിയ ഹാർട്ട്മാന്റെ ട്രെയിനിംഗ് സ്വതവേ വണ്ണം കൂടിയ മടിയനായ പൈൽ എന്ന് വിളിക്കുന്ന ലിയനാർഡ് ലോറൻസിന് താങ്ങാനാവുന്നില്ല . എന്നാൽ പൈലിനെ തന്റെ വരുതിക്ക് കൊണ്ട് വരാൻ ഹാർട്ട്മാൻ അയാളെ മാനസികമായും ശാരീരികമായും  അങ്ങേയറ്റത്തെ പീഡനങ്ങൾക്ക് വിധേയനാക്കുന്നു .

▪ട്രെയിനിംഗിന് ശേഷം 1968 ൽ വാർ കറസ്പോണ്ടൻറ് ആകുന്ന ജോക്കർ , സൗത്ത് വിയറ്റ്നാമിൽ യുദ്ധം റിപ്പോർട്ട് ചെയ്യാനായി നിയോഗിക്കപ്പെടുന്നു .അവിടെ കൗ ബോയ് ഉൾപ്പെടുന്ന മറൈൻസിനെ അപ്രതീക്ഷിതമായി വിയറ്റ് കോംഗ് പോരാളികൾ ആക്രമിക്കുന്നു .ചുറ്റുപാടും കെട്ടിടങ്ങളാൽ വലയം ചെയ്യപ്പെട്ട പ്രദേശത്ത് പെട്ടു പോകുന്ന അവർ എവിടെ നിന്നാണ് വെടിയുണ്ടകൾ വരുന്നതെന്ന് അറിയാൻ കഴിയാതെ പ്രതിരോധിക്കാനാവാതെ ജീവന്മരണ പോരാട്ടത്തിലേർപ്പെടുന്നു .

🔹VERDICT 🔹

▪മറൈൻ ട്രെയിനിംഗും യുദ്ധവും നിരവധി ചിത്രങ്ങളിൽ കണ്ടിട്ടുണ്ടെങ്കിലും ഏറ്റവും ഭീകരമായി തോന്നിയത് ഈ ചിത്രം കണ്ടപ്പോഴാണ് .വിയറ്റ്നാം യുദ്ധത്തിനിടയിൽ യഥാർത്ഥ ഡ്രിൽ ഇൻസ്ട്രക്ടർ ആയി സേവനം അനുഷ്ഠിച്ചിട്ടുള്ള Lee Ermy ആണ് ഹാർട്ട്മാൻ എന്ന കർക്കശക്കാരനായ ഡ്രിൽ ഇൻസ്ട്രക്ടറുടെ വേഷം ചെയ്തത് .ആ വേഷം അതിൽ കൂടുതൽ ഭംഗിയാക്കാൻ മറ്റാർക്കും കഴിയില്ല. അതുപോലെ ചുണ്ടിൽ നിന്നും വിഡ്ഢിച്ചിരി മായാത്ത പൈൽ എന്ന മറൈനിന്റെ വേഷം ചെയ്ത Vincent D’onofrio യെ ഒരിക്കലും മറക്കാനാവില്ല .അദ്ദേഹം ഈ കഥാപാത്രത്തിന് വേണ്ടി 32 Kg ശരീരഭാരം കൂട്ടിയിരുന്നു .

▪സംവിധാനം ചെയ്ത എല്ലാ ചിത്രങ്ങളും ഒന്നിനൊന്ന് വ്യത്യസ്തവും മികച്ചതുമാക്കിയ സ്റ്റാൻലി കുബ്രിക്ക് എന്ന പ്രതിഭാശാലിയുടെ സംവിധാനമികവ് ഓരോ രംഗത്തും വ്യക്തമാകുന്നുണ്ട് .മറ്റ് യുദ്ധ ചിത്രങ്ങൾ ഏതെങ്കിലും ഒരു വശം ചേർന്നു നിന്ന് കഥ പറയുമ്പോൾ ഇവിടെ യുദ്ധം നിലനില്പിന് വേണ്ടിയുള്ള പോരാട്ടമാകുന്നു .ചിത്രത്തിലെ ഒരു രംഗത്തിൽ വെടിയേറ്റ് വീണ വിയറ്റ് കോംഗ് പോരാളിയുടെ മുഖഭാവം ആരാണ് ശരി ,ആരാണ് തെറ്റ് എന്ന ചോദ്യം തമ്മിൽ അവശേഷിപ്പിക്കുന്നു .ചിത്രത്തിന്റെ പോസ്റ്ററിലെ ഹെൽമറ്റിൽ അടുത്തടുത്ത് കാണുന്ന BORN TO KILL എന്ന വാക്കും സമാധാനമുദ്രയും നിരവധി ചോദ്യങ്ങൾ മനസ്സിൽ നിറയ്ക്കുന്നു.ഹാർട്ട്മാൻ ട്രെയിനിംഗിനിടയിൽ പറയുന്നത് പോലെ യുദ്ധത്തിനിടയിൽ  ഒരു മറൈനിന്റെ ഏറ്റവും വിശ്വസ്തനായ സുഹ്യത്തും ഭാര്യയും കാമുകിയും എല്ലാം ഒന്ന് മാത്രമാണ്. രാത്രിയും പകലും ഉറക്കത്തിലും ഉണർച്ചയിലും അയാളുടെ സന്തത സഹചാരിയായ തോക്ക് !

🔹AMAZING CINEMA RATING : 4.5/5 ( Brilliant)

🔹പിൻകുറിപ്പ് : വിമാന യാത്രകൾ ഭയപ്പെട്ടിരുന്ന സ്റ്റാൻലി കുബ്രിക്ക് ഈ ചിത്രം പൂർണമായും ഇംഗ്ലണ്ടിൽ ആണ് ഷൂട്ട് ചെയ്തത് .
©PRADEEP V K

4.5 Star (Brilliant) · German · Germany · Vampire

91. NOSFERATU THE VAMPIRE (GERMANY/VAMPIRE/1979)

🔹AMAZING CINEMA # 91
🔹 MOVIE TITLE : NOSFERATU THE VAMPYRE (1979)
🔹COUNTRY : GERMANY
🔹LANGUAGE : GERMAN / ENGLISH / ROMANIAN
🔹GENRE : VAMPIRE /  HORROR
🔹RUNNING TIME : 107 Min
🔹DIRECTOR : WERNER HERZOG
🔹ACTORS : KLAUS KINSKI, ISABELLE ADJANI

🔹SYNOPSIS🔹

▪ബ്രാം സ്റ്റോക്കർ 1897 ൽ എഴുതിയ ഡ്രാക്കുള എന്ന നോവലിനെയും1922 ൽ ഇറങ്ങിയ Nosferatu എന്ന ജർമൻ നിശബ്ദ ചിത്രത്തിനെയും ആധാരമാക്കി വെർണർ ഹെർസോഗ്‌ സംവിധാനം ചെയ്ത ചിത്രമാണ് Nosferatu The Vampyre . ഡ്രാക്കുള നോവലിനെ ആധാരമാക്കി 1921ൽ ജർമൻ സംവിധായകൻ F.W.Murnau ഒരു സിനിമ സംവിധാനം ചെയ്യാൻ തീരുമാനിച്ചെങ്കിലും  നോവലിന്റെ സിനിമാനുമതി ലഭിച്ചില്ല .അതുകൊണ്ട് കഥയിൽ സാരമായ മാറ്റങ്ങൾ വരുത്തുകയും കഥാപാത്രങ്ങളുടെ പേരുകൾ മാറ്റുകയും ചെയ്തതിന് ശേഷം Nosferatu എന്ന പേരിൽ 1922ചിത്രം റിലീസ് ചെയ്തു . Vampire എന്ന വാക്ക് Nosferatu എന്നും Count Dracula എന്ന പേര് Count Orlok എന്നും മാറ്റി .എങ്കിലും ചിത്രം കോടതി നടപടി നേരിടുകയും എല്ലാ പ്രിന്റുകളും പിടിച്ചെടുത്ത് നശിപ്പിക്കാൻ കോടതി ഉത്തരവിടുകയും ചെയ്തു .എങ്കിലും കുറച്ച് പ്രിൻറുകൾ അവശേഷിക്കുകയും പിന്നീട് ചിത്രം ഒരു മാസ്റ്റർ പീസ് ആയി വാഴ്ത്തപ്പെടുകയും ചെയ്തു . ആ ചിത്രത്തിന്റെ റീമേക് ആണ്  ഹെർസോഗിന്റെ ചിത്രം .എന്നാൽ അപ്പോഴേക്കും നോവലിന്റെ സിനിമാനുമതി ലഭിച്ചതിനാൽ കഥാപാത്രങ്ങളുടെ പേരുകൾ യഥാർത്ഥ നോവലിലേത് തന്നെയായിരുന്നു 

▪ജർമൻ റിയൽ എസ്റേററ്റ് ഏജന്റ് ആയ ജോനാഥൻ ഹാർക്കർ  ട്രാൻസിൽവാനിയയിലെ കൗണ്ട് ഡ്രാക്കുളയുടെ കോട്ടയിലേക്ക് പോകാൻ നിയോഗിക്കപ്പെടുന്നു . കൗണ്ട് ഡ്രാക്കുള ജർമനിയിൽ വാങ്ങാനുദ്ദേശിക്കുന്ന ബംഗ്ലാവിന്റെ രേഖകൾ ഒപ്പിടുവിക്കുന്നതിന് വേണ്ടിയായിരുന്നു അത് . ജോനാഥന്റെ ഭാര്യയായ ലൂസി അദ്ദേഹത്തെ തടയുന്നുവെങ്കിലും അദ്ദേഹം ട്രാൻസിൽവാനിയയിലേക്ക് യാത്രയാകുന്നു . എന്നാൽ യാത്രയിലുടനീളം ഉണ്ടായ  നിരവധി തടസ്സങ്ങളെ അതിജീവിച്ച് ഡ്രാക്കുളയുടെ കോട്ടയിലെത്തുന്ന ജോനാഥന് രക്തം മരവിപ്പിക്കുന്ന ഭീതിജനകമായ അനുഭവങ്ങളാണ് ഉണ്ടാകുന്നത് . ഡ്രാക്കുള യഥാർത്ഥത്തിൽ ആരാണെന്ന് മനസ്സിലാക്കുന്ന ജോനാഥൻ അവിടെ നിന്ന് രക്ഷപ്പെട്ട് തിരിച്ച് ജർമനിയിലെത്തുന്നുവെങ്കിലും അതിന് മുമ്പ് അവിടെയെത്തിയ ഡ്രാക്കുള അവിടെ മാരകമായ പ്ലേഗ് പരത്തുകയും ജനങ്ങൾ ഓരോരുത്തരായി കൊല്ലപ്പെടുകയും ചെയ്യുന്നു . യാഥാർത്ഥ്യങ്ങൾ മനസ്സിലാക്കിയ ലൂസി ഡ്രാക്കുളയിൽ നിന്നും ആ പ്രദേശത്തെ രക്ഷിക്കാൻ ശ്രമം തുടങ്ങുന്നു .

🔹VERDICT🔹

▪കഥാപാത്രങ്ങൾ യഥാർത്ഥ നോവലിലേത് തന്നെയാണെങ്കിലും വ്യത്യസ്തമായ കഥാഗതിയാണ് ഈ ചിത്രത്തിന് . Klaus Kinski അവതരിപ്പിച്ച ഡ്രാക്കുള ഇതുവരെ കണ്ടിട്ടുള്ള ഡ്രാക്കുള വേഷങ്ങളിൽ നിന്ന്‌ വളരെ വ്യത്യസ്തമാണ് .ഒരു തരത്തിലുള്ള സ്പെഷ്യൽ ഇഫക്ടുകളും ഇല്ലാത്ത വളരെ റിയലിസ്റ്റിക് ആയ ഒരു ഡ്രാക്കുള ചിത്രമാണിത് . വെർണർ ഹെർസോഗ് എന്ന മാസ്റ്റർ സംവിധായകന്റെ കയ്യൊപ്പ് പതിഞ്ഞ ഈ ചിത്രം അത് കൊണ്ട് തന്നെ വളരെ പുതുമയുള്ള ഒരു അനുഭവം തന്നെയാണ് സമ്മാനിക്കുന്നത് . രക്തരൂക്ഷിതമായ പുതിയ കാല വാംപയർ ചിത്രങ്ങൾ കണ്ടിട്ടുള്ളവരുടെ അറിവിലേക്കായി പറയാം .ഈ ചിത്രത്തിൽ ഒരേ ഒരു രംഗത്തിൽ മാത്രമാണ് ഡ്രാക്കുള രക്തം കുടിക്കുന്ന രംഗം ചിത്രീകരിച്ചിരിക്കുന്നത് .അതുകൊണ്ട് തന്നെ അത്തരമൊരു ചിത്രം പ്രതീക്ഷിച്ച് ഈ ചിത്രം കാണരുത് എന്ന് അപേക്ഷ .

🔹AMAZING CINEMA RATING : 4.5/5 ( Brilliant)

🔹പിൻകുറിപ്പ് : ഈ ചിത്രത്തിന്റെ തുടക്കത്തിൽ കാണിച്ചിരിക്കുന്നത് സംവിധായകൻ നേരിട്ട് ചിത്രീകരിച്ച യഥാർത്ഥ മമ്മികൾ തന്നെയാണ് 

©PRADEEP V K

4.5 Star (Brilliant) · English · USA · War

87. APOCALYPSE NOW (USA/WAR/1979)

🔹AMAZING CINEMA # 87
🔹MOVIE TITLE : APOCALYPSE NOW (1979)
🔹COUNTRY : USA
🔹LANGUAGE : ENGLISH
🔹GENRE : EPIC WAR FILM
🔹DIRECTOR : FRANCIS FORD COPPOLA 
🔹ACTORS : MARLON BRANDO, MARTIN SHEEN

🔹SYNOPSIS🔹

▪ഇരുപത് വർഷക്കാലം നീണ്ടു നിന്ന വിയറ്റ്നാം യുദ്ധമാണ് Apocalypse Now എന്ന ചിത്രത്തിന്റെ കഥാപശ്ചാത്തലം. 1969ൽ അമേരിക്കൻ ആർമി സ്പെഷ്യൽ ഫോർസിൽ കേണലായിരുന്ന Walter E.Kurtz (Marlon Brando) ആർമിയുടെ സമ്മതമില്ലാതെ സ്വന്തം ഇഷ്ടാനുസരണം കമ്പോഡിയയിലേക്ക് കടക്കുകയും അവിടെ ഗോത്രവർഗക്കാരുടെ നേതാവായി ഒരു പാരലൽ ഗവൺമെന്റ് സ്ഥാപിക്കുകയും ചെയ്യുന്നു . അമേരിക്കൻ താല്പര്യങ്ങൾക്ക് വിരുദ്ധമായി പ്രവർത്തിക്കുന്ന അദ്ദേഹത്തെ കമ്പോഡിയയിൽ അദ്ദേഹത്തിന്റെ താവളത്തിൽ നുഴഞ്ഞു കയറി കൊലപ്പെടുത്താൻ ആർമി ജനറൽ,   Cap. Benjamin Williard (Martin Sheen) നെ ചുമതലപ്പെടുത്തുന്നു . എന്നാൽ അമേരിക്കൻ സഹായത്തോടെ മുന്നേറുന്ന സൗത്ത് വിയറ്റ്നാമും സോവിയറ്റ് യൂണിയൻ സഹായിക്കുന്ന നോർത്ത് വിയറ്റ്നാമും കടന്ന് കമ്പോഡിയയിലെ Walter E. Kurtz ന്റെ താവളത്തിലെത്തുക എന്നത് അത്യന്തം ശ്രമകരമായ ഒരു ദൗത്യം തന്നെയായിരുന്നു . അതെല്ലാം തരണം ചെയ്ത് തന്നെ ഏല്പിച്ച ദൗത്യം പൂർത്തീകരിക്കാൻ Cap.Williard ന് കഴിയുമോ എന്ന കഥയാണ് ചിത്രം പറയുന്നത് .

▪വളരെ  റിയലിസ്റ്റിക് ആയി  യുദ്ധരംഗങ്ങൾ ചിത്രീകരിച്ചിരിക്കുന്ന ഈ ചിത്രം  ഒരു യുദ്ധ ചിത്രത്തേക്കാളുപരി ഒരു സൈക്കോളജിക്കൽ ഡ്രാമ ആയാണ് എനിക്ക് അനുഭവപ്പെട്ടത് .ചിത്രത്തിന്റെ തുടക്കത്തിൽ ഏകാകിയായി ജീവിക്കുന്ന Cap.Williard അനുഭവിക്കുന്ന മാനസിക സംഘർഷങ്ങൾ ആണ് ദൃശ്യവല്ക്കരിച്ചിരിക്കുന്നത് .പിന്നീട് Col.Walter E.Kurtz നെ കൊലപ്പെടുത്താനുള്ള ദൗത്യം ലഭിക്കുമ്പോൻ Cap.Williard , Col. Kurtz ന്റെ ജീവിതത്തെക്കുറിച്ച് കൂടുതൽ അറിയുകയും അദ്ദേഹത്തിന്റെ മാനസിക തലത്തിലേക്ക് കടക്കുവാൻ ശ്രമിക്കുകയും ചെയ്യുന്നു .യുദ്ധഭൂമിയിലൂടെ ഉള്ള അതികഠിനമായ യാത്രക്കിടയിലും Col.Waltz ന്റെ ജീവിത കഥ Cap.Williard വായിക്കുകയും പ്രേക്ഷകരുമായി സംവദിക്കുകയും ചെയ്യുന്നു .

▪അവസാനം യഥാർത്ഥ Col.Waltz നെ കാണുമ്പോഴേക്കും Cap.Williard നോടൊപ്പം പ്രേക്ഷകനും അദ്ദേഹത്തെക്കുറിച്ച് ഒരു വ്യക്തമായ ധാരണ ലഭിച്ചിരിക്കും . എന്നാൽ അവിടെയാണ് MARLON BRANDO എന്ന അതുല്യ നടന്റെ രംഗപ്രവേശം . The Godfather എന്ന ചിത്രത്തിൽ Godfather നെ അവതരിപ്പിച്ച MARLON BRANDO യെ ആ ചിത്രം കണ്ടവർ ഒരിക്കലും മറക്കാൻ വഴിയില്ല . തന്റെ മുഖത്തെ ഭാവപ്രകടനങ്ങളിലൂടെ മാത്രം ഒരു കഥാപാത്രത്തെ എങ്ങനെ അവതരിപ്പിക്കാം എന്ന് അദ്ദേഹം Col.Waltz എന്ന കഥാപാത്രത്തിലൂടെ കാണിച്ചു തരുന്നു . ചിത്രത്തിന്റെ അവസാന ഭാഗത്ത് മാത്രം പ്രത്യക്ഷപ്പെടുന്ന ഈ കഥാപാത്രത്തിന്റെ മുഖം മാത്രമാണ് കൂടുതലും ചിത്രീകരിച്ചിരിക്കുന്നത് .എന്നാൽ അത് വരെ കേട്ട് മാത്രം പരിചയിച്ച Col.Waltz എന്ന മനുഷ്യൻ നാം കേട്ടതിലും എത്രയോ ഉയരെയാണെന്ന് ആദ്യ ഷോട്ടുകളിൽ തന്നെ നമുക്ക് വ്യക്തമാവും . അപാരമായ ഡയലോഗ് പ്രസന്റേഷനിലൂടെയും ഭാവപ്രകടനങ്ങളിലൂടെയും Marlon Brando അനശ്വരമാക്കിയ Col.Walter E.Kurtz എന്ന കഥാപാത്രത്തെ ഈ ചിത്രം കണ്ട ആർക്കും മറക്കാനാവില്ല .

▪യുദ്ധ സിനിമകളിലെ ക്ലാസിക് എന്ന് വിശേഷിപ്പിക്കാവുന്ന ഈ ചിത്രം ഫ്രാൻസിസ് ഫോർഡ് കൊപ്പോള എന്ന സംവിധായകന്റെ കയ്യൊപ്പ് പതിഞ്ഞ ചിത്രമാണ്. സംവിധാനം നിർവഹിച്ച ചിത്രങ്ങളിൽ മിക്കതും ലോക സിനിമാ ചരിത്രത്തിലെ നാഴികക്കല്ലുകൾ ആയി മാറിയ ചുരുക്കം ചില സംവിധായകരിൽ ഒരാളാണ് അദ്ദേഹം . ഹാരിസൺ ഫോർഡ് , ലോറൻസ് ഫിഷ് ബോൺ തുടങ്ങി പിന്നീട് പ്രശസ്തരായ പല നടൻമാരുടേയും ചെറുതെങ്കിലും മികച്ച വേഷങ്ങൾ ഈ ചിത്രത്തിൽ കാണാം .ലോക സിനിമാ ക്ലാസിക്കുകൾ കാണാനാഗ്രഹിക്കുന്നവർ ഈ ചിത്രം ഒരിക്കലും ഒഴിവാക്കരുത് .

🔹AMAZING CINEMA RATING : 4.5/5 (Brilliant)
©PRADEEP V K